ថ្ងៃ ព្រហស្បតិ៍ ទី ២១ ខែ មករា ឆ្នាំ ២០២១

កាត់ទោសដោយចុងកាណុង​! អ្នកបើកបរ​គោយន្តដឹកកូនឈើ​ម្នាក់​រងការបាញ់ប្រហារដល់ស្លាប់​ ព្រោះគ្មានលុយ​បង់ឲ្យក្រុមមន្ត្រីដាក់កុងត្រូលជជុះ​

កាលពីវេលាម៉ោង១៩ និង៣៥នាទីរាត្រីថ្ងៃទី០៩ ខែកុម្ភៈ ឆ្នាំ២០១៧ម្សិលមិញ ប្រជាពលរដ្ឋ​ប្រកបរបរ​ដឹក​កូនឈើ​ខ្លុង​-ត្បែង​តាមគោយន្ត​ម្នាក់​ទទួលរងការ​បាញ់ប្រហារ​រហូតដល់ស្លាប់បាត់បង់ជីវិត​នៅត្រង់ចំណុច​ផ្លូវឆ្លងកាត់​ទីតាំងក្រុមហ៊ុន​ដាំពោត-អំពៅ HLH ខាងលិចស្ពានដែក​ ឃុំត្រពាំងជោរ​ ស្រុកឱរ៉ាល់ ខេត្តកំពង់ស្ពឺ ដោយ​សង្ស័យថា មិន​មាន​លុយ​បង់ឲ្យ​ក្រុមន្ត្រី​ដាក់កុងត្រូលជជុះ​តាមផ្លូវ​ដើម្បី​ជំរិត​ទារលុយ​ពីប្រជាពលរដ្ឋ​។

ប្រភពពីកន្លែងកើត​ហេតុ​បាន​ឲ្យដឹងថា ជនរងគ្រោះ​ដែល​រងការបាញ់សម្លាប់​ទាំងអយុត្តិធម៌នោះមានឈ្មោះ រ៉ន រ៉េត ភេទប្រុស​ អាយុ២៧ឆ្នាំ មានទីលំនៅភូមិថ្មគប់​ ឃុំអមលាំង ស្រុកថ្ពង ខេត្តកំពង់ស្ពឺ ខណៈបុរសអ្នករួមដំណើរ​លើគោយន្តជាមួយគ្នា​ម្នាក់ទៀត​ឈ្មោះ ធី ចាន់ណា អាយុ៣២ឆ្នាំ មានទីលំនៅភូមិត្បែង​ប្រជាប់ ឃុំប្រាំបីមុំ ស្រុកថ្ពង ខេត្តកំពង់ស្ពឺ​ ជួបសំណាង​ល្អ​មិន​រងគ្រោះថ្នាក់ឡើយ​។

ព័ត៌មានបឋម​បាន​ឲ្យដឹងថា មុនពេលកើតហេតុ​ជនរងគ្រោះ​រួមជាមួយ​អ្នកប្រកបរបរ​ដឹក​កូនឈើ​ខ្លុង​-ត្បែង​លក់តាម​គោយន្ត​ចំនួន២-៣គោយន្តផ្សេងទៀត​ចេញ​ពី​ចំណុចអូរត្រាវ​ ឃុំត្រពាំងជោរ ស្រុកឱរ៉ាល់ ខេត្តកំពង់ស្ពឺ​​ និង​ពេល​មក​ដល់​ចំណុចកើតហេតុ​ក៏លេចចេញ​មាន​មន្ត្រី​មួយក្រុម​ក្នុងនោះ​ មាន​ទាំងមន្ត្រីយោធា មន្ត្រីអង្គការសង្គមស៊ីវិល រួមទាំងអ្នកកាសែតផង បើករថយន្ត​​ម៉ាក Camry មួយគ្រឿង​ពាក់ស្លាកលេខខេមរភូមិន្ទ​មក​ឃាត់គោយន្តជនរងគ្រោះ​ឲ្យឈប់​បំណងជំរិតទារប្រាក់​ពី​សកម្មភាព​ប្រជាពលរដ្ឋដឹកកូនឈើលក់​។ នៅពេលជន​រងគ្រោះ​បាន​ឈប់គោយន្ត​របស់ខ្លួន​ ហើយបាន​ប្រាប់ទៅ​មនុស្សម្នាក់​ក្នុងចំណោម​២-៣នាក់ទៀត​ ដែលដាក់កុងត្រូលជជុះនោះថា «មិន​មានលុយឲ្យទេថ្ងៃនេះ​» រួចក៏បើកគោយន្តបន្តដំណើរទៅមុខទៀត​ ស្រាប់តែក្រុមន្ត្រីដាក់កុងត្រូលជជុះនោះ​បើករថយន្តដេញបាញ់សំដៅ​មកលើជនរងគ្រោះ​ រួច​ក៏ចេញ​ដំណើរ​តាមរថយន្តទៅហួស​បាត់ស្រមោល​។

បុរសឈ្មោះ​ ធី ចាន់ណា ជាអ្នករួមដំណើរ​តាម​គោយន្ត​ជាមួយជនរងគ្រោះបាន​បញ្ជាក់ឲ្យដឹងថា ពីដំបូងខ្លួន​មិន​បាន​ដឹង​ថាជនរងគ្រោះ​ត្រូវគ្រាប់កាំភ្លើងទេ ប៉ុន្តែក្រោយមក​បន្តិច​ស្រាប់តែ​ឃើញជនរងគ្រោះ​ធ្លាក់ពីលើគោយន្ត​ ទើបដឹងថាជនរងគ្រោះ​ត្រូវគ្រាប់កាំភ្លើង​បណ្តាលឲ្យស្លាប់​ ក៏បង្កការភ្ញាក់ផ្អើល​តែម្តង​។

សេចក្តីរាយការណ៍​ពីស្នងការដ្ឋាន​នគរបាល​ខេត្តកំពង់ស្ពឺបានឲ្យដឹងថា ទាក់ទង​នឹង​ករណី​បាញ់សម្លាប់ជន​រងគ្រោះខាងលើនេះ សមត្ថកិច្ច​បាន​ឃាត់ខ្លួនជនពាក់ព័ន្ធ​ចំនួន​៤នាក់ហើយ​យក​មក​សាកសួរ​តាមនីតិវិធី​ គឺមាន​ប្រុស​៣នាក់ និងស្រីម្នាក់​ធ្វើការស្រាវជ្រាវបន្ថែមទៀត​៕

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.