ថ្ងៃ អង្គារ ទី ០៤ ខែ តុលា ឆ្នាំ ២០២២

រួចផុត​ទោសទណ្ឌហើយ​ ​!​ ឈូក បណ្ឌិត​ គឺជាកំពូល​ទណ្ឌិត​​ មាន​ភ័ព្វសំណាង​ខ្ពស់​ ដែល​មិន​ត្រូវបាន​លុបឈ្មោះ​ ចេញ​ពីក្របខ័ណ្ឌ​មន្ត្រីរាជការ

អតីត​អភិបាល​ នៃគណៈអភិបាលក្រុងបាវិត​ ខេត្តស្វាយរៀង​ គឺលោក​ ឈូក បណ្ឌិត​ ដែល​ក្លាយជាទណ្ឌិត​ តាម​អំណាច​សាលដីកាព្រហ្មទណ្ឌ របស់តុលាការ​កំពូល ​ផ្តន្ទាទោស​ដាក់ពន្ធនាគារ​ កំណត់​ ១៨ខែ និងបង្គាប់​ឲ្យបង់ប្រាក់ ​ចំនួន ៣៨លានរៀល​ ដល់ដើមបណ្តឹង​រដ្ឋប្បវេណី ជាកម្មការិនី​ រងគ្រោះ ចំនួន៣នាក់ ពីបទបង្ករបួសស្នាមដោយអចេតនា និងធ្លាប់​ឋិតនៅក្រៅគុកអស់រយៈពេល​ ជាង២ឆ្នាំ​ តែបាន​ចូល​មកសារភាព​ឲ្យសមត្ថកិច្ច​ ចាប់ខ្លួន ​នាថ្ងៃទី០៨ ខែសីហា ឆ្នាំ២០១៥ បន្ទាប់ពីសម្តេចអគ្គមហាសេនាបតីតេជោ ហ៊ុន សែន​ ហៅបុរសខ្លាំង​ នាយករដ្ឋមន្ត្រី នៃព្រះរាជាណាចក្រកម្ពុជា ប្រកាស​ជាសាធារណៈ​​ ឲ្យ​សមត្ថកិច្ច​ស្វែងរក​ចាប់ខ្លួន​ទណ្ឌិត​ ឈូក បណ្ឌិត​ កាល​ពីថ្ងៃទី០៣ ខែសីហា ឆ្នាំ២០១៥ ដើម្បីបន្ធូរបន្ថយ​សម្ពាធ នៃការរិះគន់​ កន្លងទៅនោះ ឥឡូវ​ ទណ្ឌិត​ ឈូក​ បណ្ឌិត​ ដែល​ទំនង​ជា​ « ជាប់គុក​ ដូចមិន​ជាប់គុក »  ទទួល​បាន​សេរីភាព​ រួចផុតទោសទណ្ឌ​ហើយ គិតត្រឹម​ថ្ងៃទី០៨ ខែកុម្ភៈ​ ឆ្នាំ២០១៧ នេះ។

ទោះយ៉ាងណា ក៏ដោយ​ ចាប់តាំងពីលោក​ ឈូក បណ្ឌិត​ ឋានន្តស័ក្តិ វរមន្ត្រី​ថ្នាក់​លេខ​១០ អតីតអភិបាល​នៃគណៈអភិបាល​ក្រុងបាវិត​ ខេត្តស្វាយរៀង​ ក្លាយជាទណ្ឌិត ​មក​ គឺមិនឃើញ​មាន​ឯកសារ​ផ្លូវការ ណាមួយ​ពីរាជរដ្ឋាភិបាល​កម្ពុជា សម្រេច​លុបឈ្មោះ ចេញ​ពីក្របខ័ណ្ឌមន្ត្រីរាជការស៊ីវិល​ ស្របតាមបញ្ញត្តិ​ នៃច្បាប់​ ឡើយ​ ពោល បាន​ត្រឹម​ដកហូត​មុខតំណែង​ ប៉ុណ្ណោះ ។

គួររំលឹកជូនថា បន្ទាប់ពីរង​នូវសម្ពាធរិះគន់​ព្រោងព្រាត​ ក្រោម​សម្រែក​ទាមទារ​រក​យុត្តិធម៌ នោះ ទើបលោក​ ឈូក បណ្ឌិត​ អតីតអភិបាល ​នៃគណៈអភិបាល​ក្រុង​បាវិត​ ខេត្តស្វាយរៀង​ ត្រូវបាន​ស្ថាប័នតុលាការ​សាលាដំបូងខេត្តស្វាយរៀង​​ ចោទប្រកាន់ និង​ផ្តន្ទាទោស ដាក់ពន្ធនាគារ​ កំណត់ ១៨ខែ​ និងបង្គាប់ឲ្យបង់ប្រាក់ ​ចំនួន ​៣៨លានរៀល​ ដល់​កម្មការិនី​ រោង​ចក្រផលិតស្បែកជើង​ Kao Way ចំនួន ៣នាក់ ជាដើមបណ្តឹង​រដ្ឋប្បវេណី​  ដែលត្រូវ​លោក ឈូក បណ្ឌិត​ បាញ់ប្រហា​រ បណ្តាល​ឲ្យ​រងរបួស​ធ្ងន់​សឹងបាត់បង់ជីវិត​ កាល​ពីថ្ងៃទី២០ ខែកុម្ភៈ ឆ្នាំ២០១២ នៅតំបន់​សេដ្ឋកិច្ចពិសេស​ បាវិត​ ។ ក្រោយមក​ សាលាដំបូង​ខេត្តស្វាយ​រៀង​ បាន​ចេញ​ដីកា​បង្គាប់ឲ្យ​សមត្ថកិច្ច​នគរបាល​យុត្តិធម៌​ តាម​ស្វែងរក​ចាប់ខ្លួន​ជនជាប់ចោទ​ឈ្មោះ ឈូក បណ្ឌិត​ តាំងពីពាក់កណ្តាល​ឆ្នាំ២០១៣​ តែបាន​ត្រឹម​ « ចាប់ខ្សល់ » រហូតដល់​ពិរុទ្ធជន​ ឈូក បណ្ឌិត​ ក្លាយជាទណ្ឌិត​ តាមអំណាច​សាលដីកា​ព្រហ្មទណ្ឌ របស់តុលាការ​កំពូល​ នាចុងឆ្នាំ២០១៤ និងទណ្ឌិត​ ឈូក បណ្ឌិត​​ បាន​ចូល​មក​សារភាព​ នាខែសីហា ឆ្នាំ២០១៥ ទើបចាប់ខ្លួនបាន​យក​ទៅអនុវត្តន៍ទោស​ នៅពន្ធនាគារ ។

លោក ឈូក បណ្ឌិត ឋានន្តរស័ក្ដិ វរមន្ត្រី​ថ្នាក់លេខ១០ ដែលល្បីថា ត្រូវជាក្មួយ​របស់​លោកជំទាវ​ នាយឧត្តមសេនីយ៍​ផ្កាយមាស៤​ ម៉ែន សំអន សមាជិកគណៈអចិន្ត្រៃយ៍​ នៃគណៈកម្មាធិការកណ្តាល​គណបក្សប្រជាជន​កម្ពុជា​ អ្នកតំណាង​រាស្ត្រ មណ្ឌលខេត្តស្វាយរៀង​ និងជា​ឧបនាយករដ្ឋមន្ត្រី រដ្ឋមន្ត្រីក្រសួង​ទំនាក់ទំនង​ជាមួយ​រដ្ឋសភា​ ព្រឹទ្ធសភា​ និងអធិការកិច្ច​ នោះ ធ្លាប់ត្រូវបាន​តែងតាំង​ ជាអភិបាល​ នៃគណៈអភិបាល​ក្រុងបាវិត ( តាំងពីនៅមាន​ឋានន្តរស័ក្តិ ថ្នាក់អនុមន្ត្រី ) ដោយអនុក្រឹត្យលេខ​ ៧២៧អនក្រ​.តត ចុះថ្ងៃទី២៥ ខែឧសភា ឆ្នាំ២០០៩ និង​ក្រោយមក​ ត្រូវបាន​រាជរដ្ឋាភិបាល​ សម្រេច​ដកហូត​មុខតំណែងនេះ ​ឲ្យ​មក​បម្រើការងារ​នៅសាលាខេត្តស្វាយរៀង វិញ ដោយ​អនុក្រឹត្យលេខ ២៥៩អនក្រ.តត ចុះថ្ងៃទី០៥ ខែមីនា ឆ្នាំ២០១២ បន្ទាប់ពីមាន​រឿងអាស្រូវ បាញ់ប្រហារទៅលើកម្មការិនី រោងចក្រ​ផលិតស្បែកជើង Kao Way ពេលកំពុងធ្វើកូដកម្ម​ ទាមទារ​លក្ខខណ្ឌ​ការងារ​ល្អប្រសើរ​ បណ្តាល​ឲ្យ​រងរបួស​ធ្ងន់​ ចំនួន៣នាក់​ សឹងបាត់បង់ជីវិត ​នាថ្ងៃទី២០ ខែកុម្ភៈ ឆ្នាំ២០១២។

មជ្ឈដ្ឋាន​អ្នកវិភាគកិច្ចការសង្គម​នៅកម្ពុជា បាន​លើកឡើងថា ការណ៍ដែល​ មិន​មាន​ឯកសារផ្លូវការណាមួយ ​របស់​រាជរដ្ឋាភិបាល​ សម្រេច​លុបឈ្មោះទណ្ឌិត ឈូក បណ្ឌិត​ ចេញពី​ក្របខ័ណ្ឌ​មន្ត្រីរាជការស៊ីវិល​ ស្របតាម​មាត្រា​៥៣ កថាខណ្ឌទី២ នៃច្បាប់​ស្តីពី​សហលក្ខន្តិកៈមន្ត្រីរាជការ​ស៊ីវិល នៃព្រះរាជាណាចក្រកម្ពុជា នោះ គឺធ្វើឲ្យ​គេសង្ស័យថា ជាការទុកឱកាស​ឲ្យ​លោក​ ឈូក បណ្ឌិត​ ងាយស្រួល​ក្នុងការ​ទទួល​បាន​ឋានន្តរស័ក្តិ​ វិញ​ នៅពេល​រួចផុតពីទោសទណ្ឌ។

អនុលោម​តាម​ច្បាប់ នៃព្រះរាជាណាចក្រកម្ពុជា គឺទោះបី​ ទណ្ឌិត​ ឈូក បណ្ឌិត​ បាន​អនុវត្តទោសរួចរាល់ហើយ​ក៏ដោយ​ ក៏ត្រូវតែមាន​កាតព្វកិច្ចសង​សំណង​ ដល់​ដើមបណ្តឹង​រដ្ឋប្បវេណី​ ដែរ​ ប៉ុន្តែ​មិន​ទាន់បាន​ដឹងថា តើកម្មការិនី រងគ្រោះ​ ទាំង៣នាក់ បាន​ទទួល​សំណង​ ពីទណ្ឌិត​ ឈូក បណ្ឌិត​ រួចហើយ​ ឬយ៉ាងណា នៅឡើយទេ​៕

Filed in: Feature, តុលាការ, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.