ថ្ងៃ សៅរ៏ ទី ២៣ ខែ មករា ឆ្នាំ ២០២១

កប់យោបល់​! ជនជាប់ចោទជាឃាតក​សម្លាប់បណ្ឌិត​ កែម ឡី គឺជាទារក​ទើបមានអាយុ០២ខែ

តាមការគ្រោងទុក ​នៅវេលាម៉ោង ០៨ ព្រឹក នាថ្ងៃទី០១ ខែមីនា ឆ្នាំ២០១៧ខាងមុខ នៅបន្ទប់សវនាការលេខ១ ក្រុមប្រឹក្សាជំនុំជម្រះសាលាដំបូងរាជធានីភ្នំពេញ​ ដែលមាន​លោកចៅក្រម លាង សំណាត់​ ជាប្រធាន​ក្រុមប្រឹក្សា​នឹងបើកសវនាការ​ជំនុំជម្រះ​ទៅលើ​បុរស​ជនជាប់ចោទ​ឈ្មោះ អឿត អាង ហៅ ជួប សម្លាប់ ដែលសមត្ថកិច្ចប៉ូលិសចាប់បាន​ក្រោមការចោទប្រកាន់​ពីបទ​ឃាតកម្មគិតទុកជាមុន​លើលោក​បណ្ឌិត កែម ឡី និងកាន់កាប់អាវុធ​ដោយ​គ្មានការអនុញ្ញាត មាន​លោក​ស្រី​ ប៊ូ រចនា ភរិយាលោកបណ្ឌិត កែម ឡី ជាដើមបណ្តឹងរដ្ឋប្បវេណីនៅក្នុ​ងសំណុំរឿង​ព្រហ្មទណ្ឌលេខ​៣២៨១ ចុះថ្ងៃទី១១ ខែកក្កដា ឆ្នាំ២០១៦។

chuop-samlab

ក្រៅពីបាន​បង្ហាញ​នូវអារម្មណ៍មិន​សូវជឿជាក់ថា បុរសឈ្មោះ អឿត អាង ហៅ ជួប សម្លាប់ ដែល​ធ្លាប់បួសជាសង្ឃ​ គឺជាឃាតកពិតប្រាកដ​ដែល​សម្លាប់​លោក​បណ្ឌិត​ កែម​​​ ឡី នោះ​ មជ្ឈដ្ឋាន​អ្នកតាមដាន​សំណុំរឿងឃាតកម្ម​ដ៏កក្រើកនេះ​ ក៏បាន​សម្តែង​នូវការហួសចិត្តពន់ពេក​ចំពោះស្ថាប័នតុលាការ​ដែលគ្រោង​បើសវនាការ​ជំនុំជម្រះ​ទៅលើជនជាប់ចោទ​ជាទារក​ទើបមានអាយុ​ប្រមាណ០២ខែ​ប៉ុណ្ណោះទៅវិញ​ (ថ្ងៃខែឆ្នាំកំណើត​របស់ជនជាប់ចោទឈ្មោះ អឿត អាង ហៅ ជួប សម្លាប់ តុលាការដាក់ថា កើតថ្ងៃទី១០ ខែធ្នូ ឆ្នាំ២០១៦)។

eut-ang-1

មជ្ឈដ្ឋាន​ប្រជាពលរដ្ឋ​បាន​សម្តែង​នូវការ​ស្រងាកចិត្ត​ចំពោះមន្ត្រី​តុលាការ​មួយចំនួន​ដែលបំពេញ​ការងារ​ដោយ​ភាពខ្ជីខ្ជា​ និង​ធ្វេសប្រហែស​ ដែល​ធ្វើឲ្យ​ប្រជាពលរដ្ឋ​មិន​មាន​ជំនឿ​លើការ​ទទួល​បាន​នូវពន្លឺយុត្តិធម៌ពី​ការកាត់ក្តីរបស់​មន្ត្រីតុលាការ​ឡើយ​។

eut-ang-2

គួររំលឹកជូនថា​ លោកបណ្ឌិត កែម ឡី អាយុ៤៦ឆ្នាំ ប្រធាន​អង្គការ​អភិវឌ្ឍសង្គម និងជាអ្នកសិក្សាស្រាវជ្រាវកិច្ចការសង្គម​នៅកម្ពុជាដ៏ល្បីឈ្មោះ​ត្រូវបាន​ខ្មាន់កាំភ្លើងបាញ់សម្លាប់​នៅវេលាម៉ោងប្រមាណ​០៩ព្រឹក​ នាថ្ងៃអាទិត្យ​​ទី១០ ខែកក្កដា ឆ្នាំ២០១៦ នៅហាងលក់ទំនិញស្ថានីយ៍ប្រេងឥន្ធនៈ Caltex ស្តុបបូគោ កាច់ជ្រុងមហាវិថីព្រះមុនីវង្ស​ និងមហាវិថីម៉ៅសេទុង​ ក្នុងភូមិសាស្ត្រ​សង្កាត់ទន្លេបាសាក់ ខណ្ឌចំការមន​ រាជធានីភ្នំពេញ។ ក្រោយកើតមាន​អំពើឃាតកម្មភ្លាមៗ​ បុរសម្នាក់ឈ្មោះ ជួប សម្លាប់ ត្រូវសមត្ថកិច្ចប៉ូលិស​ចាប់ខ្លួនបាន​ ហើយ​សារភាពថា ខ្លួនជាអ្នកបាញ់សម្លាប់​លោក កែម ឡី៕

kem-ley-3

Filed in: Feature, តុលាការ, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.