ថ្ងៃ អង្គារ ទី ១៨ ខែ ធ្នូ ឆ្នាំ ២០១៨

តំណែង​​ប្រៀបដូច​ «ទឹកលើស្លឹកឈូក» ដែលមិនគួរ​ទទួលយក​តាំងពីចូលសភា​ដំបូង​

បន្ទាប់ពី​មហាបាតុកម្ម​អស់រយៈពេល​ជាច្រើនសប្តាហ៍​នៅតាម​ដង​ផ្លូវ​ក្នុងរាជធានីភ្នំពេញ​​ក្រោមសន្ធឹក​សំឡេង​កងរំពង​ «ហ៊ុន សែន អើយ ចុះចេញទៅ!» បាន​បញ្ចប់​ គណបក្សសង្គ្រោះជាតិ​ក៏បាន​វិល​ចូល​បំពេញ​បង្គ្រប់​កូរ៉ុមរដ្ឋសភា​ឲ្យ​មានសមាជិក​ជាតំណាង​រាស្ត្រ​ស្របតាម​មាត្រា​៧៦ថ្មី នៃច្បាប់​ធម្មនុញ្ញ​ស្តីពី​វិសោធនកម្ម​មាត្រា​៧៦​​ និង​មាត្រា​ទាំងឡាយ​ពីជំពូក​ទី១៥ថ្មី ដល់​ជំពូក​ទី១៦ថ្មី នៃរដ្ឋធម្មនុញ្ញ​នៃព្រះរាជាណាចក្រកម្ពុជា ដែល​ប្រកាស​ឲ្យ​ប្រើ​ដោយ​ព្រះរាជក្រមលេខ​នស/រកម/១០១៤/០២២ ចុះថ្ងៃទី២៣ ខែតុលា ឆ្នាំ២០១៤។

cnrp-cpp-22-07

ក្រោយការ​ធ្វើ​សច្ចាប្រណិធាន​ចូលកាន់​តំណែង​ជា​តំណាងរាស្ត្រ​ក្នុងរដ្ឋសភា​រួចមក​ មាន​អ្នកតំណាង​រាស្ត្រ​របស់​គណបក្ស​សង្គ្រោះជាតិ​មួយ​ចំនួន​ក្នុងចំណោម​អ្នកតំណាង​រាស្ត្រ​ចំនួន​៥៥នាក់​ ទទួល​បាន​មុខតំណែង​ក្នុងគណៈកម្មាធិការ​អចិន្ត្រៃយ៍​រដ្ឋសភា​ និង​គណៈកម្មការ​នានា​នៃរដ្ឋសភា​នីតិកាល​ទី៥​ ជាពិសេស​​ឯកឧត្តម​ កឹម សុខា អនុប្រធាន​គណបក្ស​សង្គ្រោះជាតិ​ និង​ជាអ្នកតំណាង​រាស្ត្រ​មណ្ឌលខេត្តកំពង់ចាម​ ជាអនុប្រធានទី១នៃរដ្ឋសភា​ និង​ឯកឧត្តម​ សម រង្ស៊ី ប្រធាន​គណបក្ស​សង្គ្រោះជាតិ​ ជាប្រធាន​ក្រុមមតិភាគតិច​នៅក្នុងរដ្ឋសភា​ (ក្រោយមក​ត្រូវបាន​ជំនួស​ដោយ​ឯកឧត្តម កឹម សុខា ប្រធាន​ស្តីទីគណបក្ស​សង្គ្រោះជាតិ បន្ទាប់ពីលោក​ សម រង្ស៊ី ជាប់ឈ្មោះជាទណ្ឌិត បាត់បង់​សិទ្ធិ​ បុព្វសិទ្ធិ​ និ​ងសមាជិកភាព​ជាសមាជិករដ្ឋសភា​)។

kem-sokha

ទោះបី​ ឯកឧត្តម កឹម សុខា ទទួល​បាន​តំណែង​ជាអនុប្រធានទី១​នៃរដ្ឋសភា​ក្តី​ (ក្រោមការជួយ​ផ្ចុងផ្តើមដោយ​គណបក្សប្រជាជន​កម្ពុជា ជាគណបក្សនយោបាយ​កាន់កាប់អំណាច​ដុះស្លែនៅកម្ពុជា និង​មាន​៦៨អាសនៈ​នៅក្នុងរដ្ឋសភា) ក៏តំណែង​ដ៏ឧត្តុង្គឧត្តមនេះ​ត្រូវបាន​បាត់​បង់​វិញ​ក្នុងរយៈពេល​ត្រឹមតែប្រមាណ​១ឆ្នាំក្រោយមក​ក្រោមរូបភាព​ក្រុមអ្នកគាំទ្រ​គណបក្សប្រជាជន​កម្ពុជា​ធ្វើបាតុកម្ម​ទម្លាក់​តែម្តង​។ បច្ចុប្បន្ននេះទៀតសោត​ តំណែង​ជាប្រធាន​ក្រុម​មតិភាគតិច​នៅក្នុងរដ្ឋសភា​របស់​ឯកឧត្តម កឹម សុខា នោះ​ក៏កំពុងប្រឈ    ម​នឹងភាព​រង្គោះរង្គើ​ឬបាត់​បង់​ដែរ​។

kem-sokha-1

មជ្ឈដ្ឋាន​អ្នកគាំទ្រ​គណបក្ស​សង្គ្រោះជាតិ​ពេញទំហឹង​មួយចំនួន​ធ្លាប់បាន​បញ្ចេញ​ទស្សនៈ​រួចហើយថា​ ថ្វីដ្បិត​អ្នកតំណាង​រាស្ត្រ​មួយចំនួន​របស់​គណបក្ស​សង្គ្រោះជាតិ​ទទួ​ល​បាន​តំណែង​ដ៏ឧត្តុង្គឧត្តមនៅក្នុង​រដ្ឋ​សភា​អាច​ទទួល​បាន​របប​រថយន្ត​ទំនើប​ថ្មីសន្លាង​ក្តី និ​ងអាច​យិតយោង​ជួយ​ជ្រោមជ្រែង​ឲ្យ​មាន​ទីប្រឹក្សា​ និង​ជំនួយការមួយចំនួន​ទទួល​បាន​ឋានៈ​ និ​ងប្រាក់បៀវត្សរ៍​ក្តី… ក៏ប៉ុន្តែ​តំណែង​របស់​អ្នកតំណាង​រាស្ត្រ​មក​ពីគណបក្ស​សង្គ្រោះជាតិទាំងនោះ​ ដែល​ «ផ្តល់ដោយ​» គណបក្សប្រជាជន​កម្ពុជា ​គឺប្រៀបដូចជា​ «ទឹកលើស្លឹកឈូក» ទៅវិញទេ។

kem-sokha-case

ក្រុមអ្នកគាំទ្រ​គណបក្សសង្គ្រោះជាតិ​ដដែល​បាន​លើកឡើងទៀតថា ការចូលបំពេញការងារ​ជា​អ្នកតំណាង​រាស្ត្រ​ចំនួន​៥៥នាក់នៅក្នុងរដ្ឋសភា​របស់គណបក្សសង្គ្រោះជាតិ​ គឺជាប្រការ​ត្រឹមត្រូវ​ ប៉ុន្តែទន្ទឹមនឹងនេះប្រសិនសបើ​គណបក្សសង្គ្រោះជាតិ​គិតគូរ​តម្កល់ផលប្រយោជន៍ជាតិ​ និ​ងប្រជាពលរដ្ឋ​ជាធំ​ដើម្បីឈានឆ្ពោះ​ទៅ​ដណ្តើម​ភាពជោគជ័យ​សម្រាប់ការបោះឆ្នោត​លើកក្រោយនោះ គណបក្សសង្គ្រោះជាតិ​ដែល​បាន​សម្រេច​ចិត្ត​មិន​ចូលរួម​ធ្វើ​រដ្ឋាភិបាល​ចម្រុះជាមួយ​គណបក្ស​ប្រជាជន​កម្ពុជា គប្បី​ «កុំឆ្ងាញ់ និងកុំស្រើបស្រាល​ត្រេកត្រអាល​»​​ ជាមួយ​នឹង​តំណែង​នៅក្នុងរដ្ឋសភា​ ហើយយក​កម្មវិធីនយោបាយ​ចំនួន​៧ចំណុច​របស់ខ្លួន​ «ផ្គូផ្គង» ជាមួយ​កម្មវិធីនយោបាយ​ចំនួន១១ចំណុច​របស់គណបក្សប្រជាជន​កម្ពុជា ដើម្បី​ពិភាក្សា​ចរចាគ្នាវិញទើបប្រសើរជាង​ (ចំណុចដូចគ្នាយក​មកអនុវត្តរួមគ្នា និង​ចំណុចមិនទាន់​ស្របគ្នា​ត្រូវបន្តពិភាក្សា​ចរចាក្នុង​ន័យ​តម្កល់ផលប្រយោជន៍ប្រទេសជាតិ និងប្រជាពលរដ្ឋជាម្ចាស់ឆ្នោត​)។

ឥឡូវនេះ គណបក្សសង្គ្រោះជាតិ​បាន​ «ភ្លក្សរសជាតិ» របៀបរបប​ធ្វើការ​ជាមួយ​គណបក្សប្រជាជន​កម្ពុជាហើយ​ៗ​មុខតំណែង​របស់​អ្នកតំណាងរាស្ត្រ​គណបក្សសង្គ្រោះជាតិ​មួយ​ចំនួន​ដែល​ទទួល​បាន​នៅក្នុងរដ្ឋសភា​ក្រោម​ការ​ផ្ចុងផ្តើម​ដោយ​គណបក្សប្រជាជន​កម្ពុជា​នោះ​ គឺសុទ្ធតែរបៀប​ដូច «ទឹកលើស្លឹកឈូក» ប៉ុណ្ណោះ​៕

 

Filed in: Feature, ទស្សនៈនយោបាយ, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 012 858 205, 015 745 215 E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.