ថ្ងៃ អង្គារ ទី ១៨ ខែ ធ្នូ ឆ្នាំ ២០១៨

សភា​បក្ស​កាន់​អំណាច​ធ្វើ​ច្បាប់​ផ្តល់​អំណាច​ផ្តាច់មុខ​ឲ្យ​បុរស​ខ្លាំង​ ក្នុង​រឿង​ស្នើ​លើកលែងទោស​ឲ្យ​ទណ្ឌិត​

​មាត្រា​២៧​នៃ​រដ្ឋធម្មនុញ្ញ​ដែល​ជា​ច្បាប់​កំពូល​នៃ​ព្រះរាជាណាចក្រ​កម្ពុជា​ បាន​ចែង​ថា​ «​ ព្រះមហាក្សត្រ​ទ្រង់មាន​ព្រះរាជ​សិទ្ធិ​បន្ធូរ​បន្ថយទោស​ និង​លើកលែងទោស​ ។​ »​ ។​ ប៉ុន្តែ​តាម​រូបភាព​ជាក់ស្តែង​ ទោះបី​រដ្ឋធម្មនុញ្ញ​នៃ​ព្រះរាជាណាចក្រ​កម្ពុជា​ត្រង់​មាត្រា​២៧​បញ្ញត្តិ​ដូច្នេះ​ក៏​ដោយ​ ក៏​មិន​ដែល​ឃើញ​ព្រះមហាក្សត្រ​នៃ​ព្រះរាជាណាចក្រ​កម្ពុជា​ទ្រង់​ប្រើ​រាជ​សិទ្ធិ​របស់​ព្រះ​អង្គ​ធ្វើការ​លើកលែងទោស​ឲ្យ​ទណ្ឌិត​ណា​ម្នាក់​ដែល​មិន​ឆ្លង​តាម​សេចក្តី​ក្រាប​បង្គំ​ទូល​ថ្វាយ​ (​សំណើ​)​ របស់​នាយក​រដ្ឋមន្ត្រី​នោះ​ឡើយ​ ។​ នេះ​គឺជា​រឿង​គួរ​ឲ្យ​ហួសចិត្ត​មួយ​ ។​

​ដោយឡែក​ ច្បាប់​ស្តី​ពី​ពន្ធនាគារ​ដែល​រដ្ឋសភា​នីតិកាល​ទី​៤​ភាគច្រើន​លើសលប់​មក​ពី​គណបក្ស​ប្រជាជន​កម្ពុជា​ ជា​គណបក្ស​នយោបាយ​កាន់កាប់​អំណាច​ផ្តាច់មុខ​នៅ​កម្ពុជា​ បាន​អនុម័ត​នា​ថ្ងៃ​ទី​០៧​ ខែវិច្ឆិកា​ ឆ្នាំ​២០១១​ និង​ត្រូវ​បាន​ប្រកាស​ឲ្យ​ប្រើ​ដោយ​ព្រះរាជក្រម​លេខ​ន​ស​/​រកម​/១២១១/០២១​ ចុះ​ថ្ងៃ​ទី​២១​ ខែធ្នូ​ ឆ្នាំ​២០១១​ នៅ​ត្រង់​មាត្រា​៧៧​ បាន​ចែង​ថា​ «​ ក្នុង​ករណី​ចាំបាច់​ ប្រមុខ​រាជរដ្ឋាភិបាល​មាន​បុព្វសិទ្ធិ​ធ្វើ​សំណើ​ថ្វាយ​ព្រះមហាក្សត្រ​សុំ​លើកលែងទោស​ឲ្យ​ទណ្ឌិត​នៅ​ពេល​ណា​ក៏​បាន​ ។​ »​ ។​

​អនុលោម​តាម​មាត្រា​៧៧​នៃ​ច្បាប់​ស្តី​ពី​ពន្ធនាគារ​ គឺ​បាន​បង្ហាញ​ឲ្យ​ឃើញ​ថា​ ជន​ជាប់​ឃុំ​ដែល​មានឈ្មោះ​ជា​ទណ្ឌិត​រូប​ណា​ដែល​ត្រូវ​បាន​ប្រមុខ​រាជរដ្ឋាភិបាល​ (​សម្តេច​អគ្គមហាសេនាបតី​តេ​ជោ​ ហ៊ុន​ សែន​ ហៅ​បុរស​ខ្លាំង​)​ចាប់អារម្មណ៍​ និង​ចង់​ជួយ​ឲ្យ​មាន​សេរីភាព​រួច​ទោសទណ្ឌ​វិញ​ គឺ​បុរស​ខ្លាំង​អាច​ធ្វើ​សំណើ​ថ្វាយ​ព្រះមហាក្សត្រ​សុំ​លើកលែងទោស​បាន​ទាំងអស់​នៅ​ពេល​ណា​ក៏​បាន​ស្រេច​តាម​ចិត្ត​ ដោយ​ព្រះមហាក្សត្រ​គ្មាន​ព្រះរាជ​សិទ្ធិ​រារាំង​ ឬ​បង្ក​ឧបសគ្គ​ឡើយ​ ។​

​មជ្ឈដ្ឋាន​អ្នក​ច្បាប់​ឯករាជ្យ​នៅ​កម្ពុជា​ បាន​លើក​ឡើង​ថា​ ស្ថានភាព​ជាក់ស្តែង​នៅ​កម្ពុជា​ គឺ​បុរស​ខ្លាំង​មាន​អំណាច​ខ្លាំង​ទាំង​ព្រម​ ទាំង​ដាក់បន្ទុក​ ទាំង​ដោះ​បន្ទុក​ ពីព្រោះ​មាន​មនុស្ស​ជា​ច្រើន​នាក់​មក​ហើយ​ ជា​ពិសេស​អ្នក​ឈឺឆ្អាល​រឿង​ជាតិ​ និង​ទឹកដី​ អ្នក​ស្រឡាញ់​អំពើ​យុត្តិធម៌​ បែរជា​រង​គ្រោះ​ឈាន​ទៅ​ទទួលទោស​ទណ្ឌ​ទាំង​អយុត្តិធម៌​ ក្រោម​អំណាច​របស់​ស្ថាប័ន​តុលាការ​ដែល​មិន​ឯករាជ្យ​ និង​ខ្វះ​មនសិការ​វិជ្ជាជីវៈ​ពិតប្រាកដ​ បម្រើ​ឲ្យ​គណបក្ស​កាន់កាប់​អំណាច​ដឹកនាំ​ដោយ​បុរស​ខ្លាំង​ ហើយ​ក៏​មាន​អ្នកទោស​នយោបាយ​ច្រើន​នាក់​ដែរ​ដែល​ទទួល​បានការ​លើកលែងទោស​តាម​សំណើ​របស់​បុរស​ខ្លាំង​ បន្ទាប់​ពី​បុរស​ខ្លាំង​បាន​បង្ក្រាប​ឲ្យ​រាងចាល​បាក់បប​ខ្លបខ្លាច​ និង​បុរស​ខ្លាំង​បាន​ «​ ចំណេញ​ »​ រួច​មក​ ។​

​សរុបសេចក្តី​មក​ បុរស​ខ្លាំង​នៃ​កម្ពុជា​ គឺ​ខ្លាំង​ទាំង​ព្រម​ ទាំង​រក្សា​ការពារ​កាន់កាប់​អំណាច​ ទាំង​បង្កើត​រឿង​អយុត្តិធម៌​ ទាំង​បង្ក​ការ​ឈឺចាប់​ដល់​អ្នក​ដទៃ​ ទាំង​រំលោភ​បំពាន​ច្បាប់​ និង​ទាំង​លើកលែង​ទោសទណ្ឌ​ដល់​ទណ្ឌិត​ដែល​ខ្លួន​ចាប់អារម្មណ៍​ចង់​ជួយ​ផង​ (​តាម​រយៈ​សភា​ធ្វើ​ច្បាប់​ផ្តល់​អំណាច​ផ្តាច់មុខ​ឲ្យ​)​ ៕​

 

 

Filed in: Feature, ទស្សនៈនយោបាយ, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 012 858 205, 015 745 215 E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.