ថ្ងៃ អង្គារ ទី ០៤ ខែ សីហា ឆ្នាំ ២០២០

រឿងអាស្រូវ​ពុក​រលួយ​របស់​ប្រធាន​មន្ទីរ​ទេសចរណ៍​ខេត្ត​ត្បូងឃ្មុំ​ ត្រូវ​បាន​មន្ដ្រី​ទម្លាយ​ឲ្យ​ដឹង​បន្ថែម​

​ប្រភព​ព័ត៌មាន​ពី​មន្ដ្រី​បម្រើ​ការងារ​នៅ​មន្ទីរ​ទេសចរណ៍​ខេត្ត​ត្បូងឃ្មុំ​បាន​បង្ហើប​ប្រាប់​ឲ្យ​ដឹង​ថា​ បន្ទាប់​ពី​មានការ​ផ្សព្វផ្សាយ​របស់​គេហទំព័រ​សារព័ត៌មាន​ ដើម​ត្នោត​ នា​ថ្ងៃ​ទី​២៧​ ខែវិច្ឆិកា​ ឆ្នាំ​២០១៦​កន្លង​ទៅ​ថ្មីៗ​ក្រោម​ចំណងជើង​ថា​ «​ប្រធាន​មន្ទីរ​ទេសចរណ៍​ខេត្ត​ត្បូងឃ្មុំ​ធុំក្លិន​មិន​ស្រួល​រឿង​ អសកម្ម​ បក្ខពួក​និយម​ និង​ពុក​រលួយ​»​ រួច​មក​ គឺ​លោក​ អឿ​ន​ រិ​ទ្ធ​ ជា​ប្រធាន​មន្ទីរ​ និង​បក្ខពួក​បាន​ក្ដៅស្លឹកត្រចៀក​ និង​ម្នីម្នា​សួរ​រកមុខ​មន្ដ្រី​ក្រោម​ឱវាទ​រូប​ណា​ដែល​លួច​បង្ហើប​រឿងអាស្រូវ​របស់​ខ្លួន​ដល់​អ្នកកាសែត​ ដើម្បី​ចាត់វិធានការ​ក្នុង​នាម​អំណាច​ជា​មេ​ ។​ ប៉ុន្តែ​ទន្ទឹម​នឹង​នេះ​ ក្រុម​មន្ដ្រី​ដែល​មាន​មនសិការ​ជាតិ​ ក៏​បាន​ទម្លាយ​រឿងអាស្រូវ​ពុក​រលួយ​របស់​លោក​ អឿ​ន​ រិ​ទ្ធ​ បន្ថែម​ទៀត​ដូច​ខាងក្រោម​ ៖

១-​បំប៉ោង​ដាក់​ឈ្មោះ​មន្ត្រី​ជាប់កិច្ចសន្យា​រហូត​ដល់​ចំនួន​១២​នាក់​ ដើម្បី​កេងប្រវ័ញ្ច​ថវិការដ្ឋ​ ដែល​តាម​ការ​ពិត​មន្ត្រី​មក​ធ្វើការ​ជាប់លាប់​តែ​ចំនួន​៣​នាក់​ប៉ុណ្ណោះ​ រីឯ​មន្ត្រី​៩​នាក់​ទៀត​ជា​មន្ត្រី​ខ្មោច​ (​មន្ត្រី​មាន​តែ​ឈ្មោះ​)​ បូក​រួម​ទាំង​កូនប្រុស​បង្កើត​របស់​លោក​ប្រធាន​មន្ទីរ​ម្នាក់​ផង​ ឈ្មោះ​ រិ​ទ្ធ​ ឧត្តម​ មានឈ្មោះ​ជា​មន្ត្រី​បម្រើ​ការងារ​នៅ​មន្ទីរ​ តែ​ការ​ពិត​កំពុង​ជាប់​សិក្សា​រៀនសូត្រ​នៅ​រាជធានី​ភ្នំពេញ​សោះ​ ។​

២-​កិបកេង​ប្រាក់​បេសកកម្ម​របស់​មន្ត្រី​ក្រោម​ឱវាទ​បាន​ចំនួន​ច្រើន​លាន​រៀល​ ដោយ​យក​លេស​ថា​ កាត់​លុយ​ឲ្យ​ទៅ​មន្ទីរ​សេដ្ឋកិច្ច​និង​ហិរញ្ញវត្ថុ​ខេត្ត​ ។​

៣-​លួច​បើកប្រាក់​បៀវត្សរ៍​របស់​លោក​ អ៊ា​ង​ វ​ណ្ណា​ អតីត​អនុប្រធាន​មន្ទីរ​ ចំនួន​១​លាន​រៀល​រៀង​រាល់​ខែ​ អស់​រយៈពេល​ប្រមាណ​២​ឆ្នាំ​ ពីព្រោះ​លោក​អតីត​អនុប្រធាន​មន្ទីរ​ អ៊ា​ង​ វ​ណ្ណា​ បាន​សុំ​លាឈប់​ពី​ក្របខ័ណ្ឌ​យូរ​មក​ហើយ​ ។​ ប៉ុន្តែ​ក្រោយមក​ លួច​ទាក់ទង​លោក​ អ៊ា​ង​ វ​ណ្ណា​ ឲ្យ​ជួយ​លាក់​ការណ៍​រឿង​បើកប្រាក់​បៀវត្សរ៍​អស់​ជិត​២​ឆ្នាំ​ ជា​ថ្នូរ​នឹង​ការ​បើក​លុយ​លាឈប់​ពី​ការងារ​សរុប​ចំនួន​១០​ខែ​ឲ្យ​វិញ​ ។​

៤-​ទោចក្រយានយន្ត​១​គ្រឿង​ថ្មីស្រឡាង​របស់​រដ្ឋ​ដែល​បាន​ផ្តល់​ឲ្យ​មន្ទីរ​ប្រើប្រាស់​ បែរជា​ធ្លាក់​ទៅ​ក្នុង​ដៃ​ប្រពន្ធ​-​កូន​របស់​លោក​ប្រធាន​មន្ទីរ​ប្រើប្រាស់​នៅ​ឯ​ខេត្តកំពង់ចាម​យ៉ាង​រំភើយ​ទៅ​វិញ​ មិន​ខ្ចី​គិតគូរ​ដល់​ការ​ខ្វះខាត​របស់​មន្ទីរ​ឡើយ​ ។​

៥-​រួមដៃគ្នា​ជាមួយ​លោក​ សោម​ ច័ន្ទ​រតនៈ​ ជា​មន្ត្រី​គណនេយ្យ​ និង​ជា​មន្ត្រី​ជំនិត​របស់​លោក​ប្រធាន​មន្ទីរ​ផង​ កំពុង​ត្រៀម​ចាត់ចែង​ដំឡើង​មុខ​តំណែង​មន្ត្រី​ក្រោម​ឱវាទ​តាម​រូបភាព​មិន​ប្រក្រតី​ ដែល​ផ្ទុយ​ទាំងស្រុង​ទៅ​នឹង​ប្រកាស​លេខ​២២០២​ របស់​ក្រសួង​មុខងារសាធារណៈ​ ។​

៦-​លួច​បន្លំ​កិបកេង​ថ្លៃ​ជួល​ផ្ទះ​ដោយ​ដាក់​តម្លៃ​ថា​ចំនួន​៦០០​ដុល្លារ​អា​មេ​រិ​ក​ក្នុង​១​ខែ​ តែ​តាម​ការ​ពិត​តម្លៃ​ទីផ្សារ​ជាក់ស្តែង​គឺ​ចំនួន​៣០០​ដុល្លារ​អា​មេ​រិ​ក​ក្នុង​១​ខែ​ ។​

៧-​លួច​ធ្វើ​លិខិត​មិន​ត្រឹមត្រូវ​ថា​ មាន​មន្ត្រី​ឈឺ​ ហើយ​ស្នើ​សុំ​លុយ​ពី​រតនាគារ​ខេត្ត​ និង​ស៊ីដាច់​ដោយ​មន្ត្រី​សាមីខ្លួន​មិន​បានដឹង​ថា​ ខ្លួន​ឈឹ​ផង​ទេ​ ។​

៨-​លួច​ធ្វើ​លិខិត​បេសកកម្ម​ខ្យល់​ដោយ​ខ្លួន​មិន​បាន​ទៅ​ប្រជុំ​នៅ​រាជធានី​ភ្នំពេញ​ផង​ បែរជា​ដាក់​លិខិត​បេសកកម្ម​ថា​ បាន​ទៅ​ប្រជុំ​ដើម្បី​ទូទាត់​លុយ​គម្រោង​ថវិកា​ឆ្នាំ​២០១៦​ ។​

៩-​ជ្រើសរើស​មន្ត្រី​ជាប់កិច្ចសន្យា​ដែល​មាន​ចំនួន​ច្រើន​សំពីងសំពោង​នោះ​ មិន​បាន​ជូនដំណឹង​ផ្សព្វផ្សាយ​អ្វី​ជា​មុន​ទេ​ ដើម្បី​ឆ្លៀតឱកាស​ជ្រើសរើស​យក​តែ​បក្ខពួក​ សាច់ញាតិ​ខ្លួនឯង​ គឺ​មាន​អ្នកខ្លះ​មុខ​ដដែលៗ​អស់​រយៈពេល​២​ឆ្នាំ​ហើយៗ​បើ​មាន​អ្នក​ថ្មី​មក​ដាក់​ពាក្យ​បែរជា​មិន​ទទួល​ទៅ​វិញ​ ។​

១០-​គ្មាន​ឃើញ​មាន​កិច្ចប្រជុំ​ផ្សព្វផ្សាយ​អ្វី​ជា​ដុំ​កំភួន​ទេ​ តែ​បែរជា​ធ្វើ​បញ្ជី​របាយការណ៍​បំប៉ោង​ដាក់​ថា​ មាន​សកម្មភាព​ប្រជុំ​ផ្សព្វផ្សាយ​ញឹកញយ​ដង​ ដើម្បី​លួច​ស៊ីលុយ​គម្រោង​ថវិកា​ឆ្នាំ​២០១៦​បាន​ចំនួន​រាប់​លាន​រៀល​ ។​

១១-​រឿង​លទ្ធកម្ម​សាធារណៈ​ ទិញ​-​លក់​ផ្គត់ផ្គង់​សម្ភារៈ​បរិក្ខារ​នានា​ គឺ​ធ្វើ​តាម​របៀប​ «​ ចង​មុង​ »​ ដើម្បី​បើកដៃ​ឲ្យ​មិត្តភក្តិ​ សាច់ញាតិ​របស់​លោក​ សោម​ ច័ន្ទ​រតនៈ​ ជា​មន្ត្រី​គណនេយ្យ​ មានឱកាស​កិបកេង​ផល​ចំណេញ​ចែក​គ្នា​ចាយ​យ៉ាង​សប្បាយចិត្ត​ ។​

​សរុបសេចក្តី​មក​ ដើម្បី​លើកទឹកចិត្ត​ដល់​មន្ត្រីរាជការ​មាន​មនសិការ​ជាតិ​ មាន​កម្លាំងចិត្ត​ធ្វើការ​តទៅ​ទៀត​ ក្រុម​មន្ត្រី​ក្រោម​ឱវាទ​មន្ទីរ​ទេសចរណ៍​ខេត្ត​ត្បូងឃ្មុំ​ បាន​សំណូមពរ​ចំពោះ​ឯកឧត្តម​បណ្ឌិត​ ឱម​ យ៉ិ​ន​ទៀង​ ទេស​រដ្ឋមន្ត្រី​ ទទួល​បន្ទុក​ប្រធាន​អង្គភាព​ប្រឆាំង​អំពើ​ពុក​រលួយ​ (ACU)​ និង​ឯកឧត្តម​ ថោ​ង​ ខុន​ រដ្ឋមន្ត្រី​ក្រសួងទេសចរណ៍​ មេត្តា​មាន​វិធានការ​ស៊ើបអង្កេត​ឲ្យ​បាន​ល្អិតល្អន់​ទៅ​លើ​អំពើ​ពុក​រលួយ​របស់​លោក​ អឿ​ន​ រិ​ទ្ធ​ ប្រធាន​មន្ទីរ​ទេសចរណ៍​ខេត្ត​ត្បូងឃ្មុំ​នោះ​ផង​ ៕​

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 012 858 205, 015 745 215 E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.