ថ្ងៃ ចន្ទ ទី ០៣ ខែ សីហា ឆ្នាំ ២០២០

រឿង​កាន់តែ​ធំ​ !​ បុរស​ខ្លាំង​រួម​ដៃ​ជាមួយ​យួន​ធ្វើ​ផែនទី​បូរណភាព​ទឹកដី​កែ​ខ្នាត​មាត្រដ្ឋាន​ រំលោភ​បំពាន​រដ្ឋធម្មនុញ្ញ​

​កាលពី​រសៀល​ថ្ងៃ​ទី​២៣​ ខែវិច្ឆិកា​ ឆ្នាំ​២០១៦​កន្លង​ទៅ​ថ្មីៗ​ សម្តេច​អគ្គមហាសេនាបតី​តេ​ជោ​ ហ៊ុន​ សែន​ ហៅ​បុរស​ខ្លាំង​ នាយក​រដ្ឋមន្ត្រី​នៃ​ព្រះរាជាណាចក្រ​កម្ពុជា​ បាន​ឯកភាព​គ្នា​ជាមួយ​លោក​ Nguyen​ Xuan​ Phuc​ នាយក​រដ្ឋមន្ត្រី​នៃ​សាធារណរដ្ឋ​សង្គមនិយម​វៀតណាម​ ដើម្បី​ស្នើ​ទៅ​កាន់​ប្រទេស​បារាំង​ សុំ​ឲ្យ​អ្នកឯកទេស​បារាំង​ជួយ​ធ្វើ​ផែនទី​ដោយ​ផ្ទេរ​ពី​ផែនទី​ខ្នាត​ ១/១០០​ ០០០​ ទៅ​ជា​ផែនទី​ខ្នាត​ ១/៥០​ ០០០​ វិញ​ ដែល​ជា​ការ​រំលោភ​បំពាន​លើ​រដ្ឋធម្មនុញ្ញ​ជា​ច្បាប់​កំពូល​នៃ​ព្រះរាជាណាចក្រ​កម្ពុជា​យ៉ាងធ្ងន់ធ្ងរ​បំផុត​ ។​

​រឿង​កែប្រែ​ខ្នាត​ផែនទី​ពី​ខ្នាត​ ១/១០០​ ០០០​ ទៅ​ជា​ផែនទី​ខ្នាត​ ១/៥០​ ០០០​ ដែល​ផ្ទុយ​ទៅ​នឹង​ស្មារតី​មាត្រា​២​នៃ​រដ្ឋធម្មនុញ្ញ​នៃ​ព្រះរាជាណាចក្រ​កម្ពុជា​នោះ​ គឺ​បុរស​ខ្លាំង​បាន​អនុវត្ត​ជាមួយ​ភាគី​ប្រទេស​វៀតណាម​រហូត​ដល់​ពឹងពាក់​ឲ្យ​ភាគី​វៀតណាម​បោះពុម្ព​ឡើង​វិញ​នូវ​ផែនទី​ UTM​ ខ្នាត​ ១/៥០​ ០០០​ ជំនួស​ផែនទី​ Bonne​ ខ្នាត​ ១/១០០​ ០០០​ ចំនួន​៤០​ផ្ទាំង​ អម​សន្ធិសញ្ញា​កំណត់ព្រំដែន​រដ្ឋ​ឆ្នាំ​១៩៨៥​ ដូច​មាន​បញ្ជាក់​នៅ​ក្នុង​ប្រការ​៣​នៃ​សន្ធិសញ្ញា​បំពេញបន្ថែម​រវាង​ព្រះរាជាណាចក្រ​កម្ពុជា​ និង​សាធារណរដ្ឋ​សង្គមនិយម​វៀតណាម​ ទៅ​លើ​សន្ធិសញ្ញា​កំណត់ព្រំដែន​រដ្ឋ​ឆ្នាំ​១៩៨៥​ ចុះ​ថ្ងៃ​ទី​១០​ ខែតុលា​ ឆ្នាំ​២០០៥​ (​បុរស​ខ្លាំង​ចុះហត្ថលេខា​ជាមួយ​លោក​ Phan​ Van​ Khai​ នាយក​រដ្ឋមន្ត្រី​នៃ​សាធារណរដ្ឋ​សង្គមនិយម​វៀតណាម​ នៅ​ទីក្រុង​ហាណូយ​ ប្រទេស​វៀតណាម​)​ ដែល​ក្លាយទៅជា​ច្បាប់​ប្រកាស​ឲ្យ​ប្រើ​ដោយ​ព្រះរាជក្រម​លេខ​ន​ស​/​រកម​/១១០៥/០៣៩​ ចុះ​ថ្ងៃ​ទី​៣០​ ខែវិច្ឆិកា​ ឆ្នាំ​២០០៥​ យ៉ាង​ចម្រូងចម្រាស​ ។​

​មាត្រា​២​នៃ​រដ្ឋធម្មនុញ្ញ​ដែល​ជា​ច្បាប់​កំពូល​នៃ​ព្រះរាជាណាចក្រ​កម្ពុជា​ បាន​ចែង​ថា​ "​បូរណភាព​ទឹកដី​របស់​ព្រះរាជាណាចក្រ​កម្ពុជា​ មិន​អាច​រំលោភ​បាន​ដាច់ខាត​ក្នុង​ព្រំដែន​របស់​ខ្លួន​ដែល​មាន​កំណត់​ក្នុង​ផែនទី​ខ្នាត​ ១/១០០​ ០០០​ ធ្វើ​នៅ​ចន្លោះ​ឆ្នាំ​១៩៣៣-១៩៥៣​ ហើយ​ដែល​ត្រូវ​បាន​ទទួលស្គាល់​ជា​អន្តរជាតិ​ នៅ​ចន្លោះ​ឆ្នាំ​១៩៦៣-១៩៦៩​ ។​ "​ និង​មាត្រា​៥៥​ ព្រមទាំង​មាត្រា​១៥០​ថ្មី​នៃ​រដ្ឋធម្មនុញ្ញ​ដដែល​ បាន​ចែង​ដែរ​ថា​ "​សន្ធិសញ្ញា​ និង​កិច្ចព្រមព្រៀង​ទាំងឡាយ​ណា​ដែល​មិន​ស្រប​នឹង​ឯករាជ្យ​ អធិបតេយ្យ​ បូរណភាព​ទឹកដី​ អព្យាក្រឹតភាព​ និង​ឯកភាព​ជាតិ​របស់​ព្រះរាជាណាចក្រ​កម្ពុជា​ ត្រូវ​លុប​ចោល​ ។​ រដ្ឋធម្មនុញ្ញ​នេះ​ជា​ច្បាប់​កំពូល​នៃ​ព្រះរាជាណាចក្រ​កម្ពុជា​ ។​ ច្បាប់​ និង​សេចក្តីសម្រេច​ទាំងឡាយ​នៃ​ស្ថាប័ន​នានា​របស់​រដ្ឋ​ ត្រូវ​ស្រប​នឹង​រដ្ឋធម្មនុញ្ញ​ជា​ដាច់ខាត​ ។​ "​ ។​

​មជ្ឈដ្ឋាន​អ្នក​ច្បាប់​ឯករាជ្យ​នៅ​កម្ពុជា​ បាន​លើក​ឡើង​ថា​ ការ​ប្រើប្រាស់​ផែនទី​ខ្នាត​ ១/៥០​ ០០០​ នៅ​ក្នុង​សន្ធិសញ្ញា​បំពេញបន្ថែម​រវាង​ព្រះរាជាណាចក្រ​កម្ពុជា​ និង​សាធារណរដ្ឋ​សង្គមនិយម​វៀតណាម​ ទៅ​លើ​សន្ធិសញ្ញា​កំណត់ព្រំដែន​រដ្ឋ​ឆ្នាំ​១៩៨៥​ គឺ​បាន​រំលោភ​បំពាន​យ៉ាងធ្ងន់ធ្ងរ​ទៅ​លើ​មាត្រា​២​នៃ​រដ្ឋធម្មនុញ្ញ​ ដែល​តម្រូវ​ឲ្យ​បូរណភាព​ទឹកដី​របស់​ព្រះរាជាណាចក្រ​កម្ពុជា​ត្រូវ​កំណត់​ក្នុង​ផែនទី​ខ្នាត​ ១/១០០​ ០០០​ ។​ ដូច្នេះ​ អនុលោម​ទៅ​លើ​មាត្រា​៥៥​ និង​មាត្រា​១៥០​ថ្មី​ នៃ​រដ្ឋធម្មនុញ្ញ​នៃ​ព្រះរាជាណាចក្រ​កម្ពុជា​ គឺ​សន្ធិសញ្ញា​បំពេញបន្ថែម​រវាង​ព្រះរាជាណាចក្រ​កម្ពុជា​ និង​សាធារណរដ្ឋ​សង្គមនិយម​វៀតណាម​ ទៅ​លើ​សន្ធិសញ្ញា​កំណត់ព្រំដែន​រដ្ឋ​ឆ្នាំ​១៩៨៥​ ត្រូវ​ចាត់ទុកជា​មោឃៈ​ ឬ​លុប​ចោល​ជា​ស្ថាពរ​ ។​

​ឥឡូវនេះ​ គ្រប់​ស្ថាប័ន​ជាតិ​ ជា​ពិសេស​ស្ថាប័ន​រដ្ឋសភា​ដែល​មាន​អ្នកតំណាង​រាស្ត្រ​ចំនួន​១២៣​រូប​ ដែល​តំណាង​ឲ្យ​ប្រជាជាតិ​ខ្មែរ​ទាំងមូល​ មិន​ត្រឹមតែ​មិន​ចាត់​នីតិវិធី​ឈាន​ទៅ​និរាករណ៍​សន្ធិសញ្ញា​បំពេញបន្ថែម​រវាង​ព្រះរាជាណាចក្រ​កម្ពុជា​ និង​សាធារណរដ្ឋ​សង្គមនិយម​វៀតណាម​ ទៅ​លើ​សន្ធិសញ្ញា​កំណត់ព្រំដែន​រដ្ឋ​ឆ្នាំ​១៩៨៥​ ដែល​ផ្ទុយ​នឹង​រដ្ឋធម្មនុញ្ញ​ប៉ុណ្ណោះ​ទេ​ បែរជា​បុរស​ខ្លាំង​អាង​អំណាច​ដ៏​មហិមា​រួម​ដៃ​ជាមួយ​ភាគី​ប្រទេស​វៀតណាម​ ស្នើ​សុំ​ឲ្យ​បារាំង​ជួយ​ធ្វើ​ផែនទី​កែ​ពី​ខ្នាត​ ១/១០០​ ០០០​ ទៅ​ជា​ខ្នាត​ ១/៥០​ ០០០​ ផ្ទើ​ន​នឹង​រដ្ឋធម្មនុញ្ញ​ជា​ច្បាប់​កំពូល​នៃ​ព្រះរាជាណាចក្រ​កម្ពុជា​ថែម​ទៀត​ ៕​

 

 

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 012 858 205, 015 745 215 E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.