ថ្ងៃ អង្គារ ទី ២០ ខែ តុលា ឆ្នាំ ២០២០

​សោកនាដកម្ម​មនុស្ស​ស្លាប់​គរ​ជើង​ជិត​៤០០​នាក់​ កាលពី​៦​ឆ្នាំ​មុន​នៅ​កោះ​ពេជ្រ​ ដែល​មិន​អាច​បំភ្លេច​បាន​ក្នុង​ថ្ងៃ​បុណ្យអុំទូក​

​នៅ​ថ្ងៃ​ទី​១៣​ ខែវិច្ឆិកា​ ឆ្នាំ​២០១៦​ស្អែក​នេះ​ ព្រះរាជ​ពិធីបុណ្យ​អុំទូក​នៅ​តាម​ដង​ទន្លេសាប​មុខ​ព្រះ​បរមរាជវាំង​នឹង​ចាប់ផ្តើម​ប្រព្រឹត្ត​ឡើង​ បន្ទាប់​ពី​ព្រះរាជ​ពិធីបុណ្យ​អុំទូក​ធ្លាប់​ត្រូវ​បាន​រាជរដ្ឋាភិបាល​សម្រេច​ផ្អាក​កាលពី​ឆ្នាំ​២០១៥​កន្លង​ទៅ​ ក្រោម​ហេតុផល​ "​ទឹកទន្លេ​មាន​កម្រិត​ទាប​"​ និង​ព្រះរាជាណាចក្រ​កម្ពុជា​កំពុង​ប្រឈម​នឹង​គ្រោះ​រាំង​ស្ងួត​ ។​ លើស​ពី​នេះ​ ព្រះរាជ​ពិធីបុណ្យ​អុំទូក​ក៏​ធ្លាប់​បាន​ផ្អាក​ដំណើរការ​អស់​រយៈពេល​ចំនួន​៣​ឆ្នាំ​ជាប់ៗ​គ្នា​ផង​ដែរ​ កាលពី​ឆ្នាំ​២០១១-២០១២​ និង​ឆ្នាំ​២០១៣​ ក្រោយ​ការ​កើត​មាន​ឧបទ្ទវហេតុ​មនុស្ស​ស្លាប់​ចំនួន​៣៥៣​នាក់​ និង​រង​របួស​ជាង​៤០០​នាក់​ នា​រាត្រី​ថ្ងៃ​ទី​២២​ ខែវិច្ឆិកា​ ឆ្នាំ​២០១០​ ក្នុង​ព្រះរាជ​ពិធីបុណ្យ​អុំទូក​ បណ្តែតប្រទីប​ សំពះ​ព្រះ​ខែ​ និង​អកអំបុក​ឆ្នាំ​២០១០​ នៅ​លើ​ស្ពាន​ពេជ្រ​ នៃ​មជ្ឈមណ្ឌល​កម្សាន្ត​កោះ​ពេជ្រ​ ដោយ​រាជរដ្ឋាភិបាល​អះអាង​ថា​ បណ្តាល​មក​ពី​ "​មនុស្ស​រត់​ជាន់​គ្នា​"​ ។​

​ហេតុការណ៍​មនុស្ស​ស្លាប់​ចំនួន​៣៥៣​នាក់​ និង​រង​របួស​ជាង​៤០០​នាក់​នៅ​កោះ​ពេជ្រ​ ក្នុង​ព្រះរាជ​ពិធីបុណ្យ​អុំទូក​ បណ្តែតប្រទីប​ សំពះ​ព្រះ​ខែ​ និង​អកអំបុក​ ឆ្នាំ​២០១០(​រាត្រី​ថ្ងៃ​ចុង​ក្រោយ​)​ គឺជា​សោកនាដកម្ម​ដ៏​ធំធេង​ណាស់​ដែល​មិន​អាច​បំភ្លេច​បាន​ក្នុង​ប្រវត្តិសាស្ត្រ​នៃ​ការ​ប្រារព្ធ​ពិធីបុណ្យ​នា​សម័យ​ព្រះរាជាណាចក្រ​កម្ពុ​ជាទី​២​ ក្រោម​ការ​ដឹកនាំ​របស់​សម្តេច​អគ្គមហាសេនាបតី​តេ​ជោ​ ហ៊ុន​ សែន​ ហៅ​បុរស​ខ្លាំង​ នាយក​រដ្ឋមន្ត្រី​នៃ​ព្រះរាជាណាចក្រ​កម្ពុជា​ ។​

​ទោះ​យ៉ាងនេះ​ក្តី​ សោកនាដកម្ម​ដ៏​រន្ធត់​កន្លង​ទៅ​នោះ​ មិន​មានការ​ទទួលខុសត្រូវ​ផ្នែក​កំហុសឆ្គង​ ឬ​ការ​ធ្វេសប្រហែស​ក្នុង​ការ​បំពេញភារកិច្ច​របស់​ខ្លួន​ពី​សំណាក់​គណៈកម្មាធិការ​ជាតិ​រៀបចំ​បុណ្យ​ជាតិ​-​អន្តរជាតិ​ និង​ថ្នាក់ដឹកនាំ​ប្រទេស​ឡើយ​ គឺ​បាន​ត្រឹម​ផ្តល់​លុយកាក់​ទុកជា​ការ​លួង​ចិត្ត​ដល់​ក្រុម​គ្រួសារ​សាច់ញាតិ​នៃ​សព​ និង​ជន​រង​គ្រោះ​ដែល​រង​របួស​ជា​ការ​ស្រេច​ ។​

​ក្រោយមក​ រាជរដ្ឋាភិបាល​បាន​កសាង​ស្តូប​រំលឹក​វិញ្ញាណក្ខន្ធ​ប្រជាជន​ដែល​បាន​បាត់បង់​ជីវិត​ក្នុង​ឧបទ្ទវហេតុ​នៃ​ស្ពាន​កោះ​ពេជ្រ​ នា​រាត្រី​ថ្ងៃ​ទី​២២​ ខែវិច្ឆិកា​ ឆ្នាំ​២០១០​នោះ​ ដើម្បី​ទុកជា​ការ​រំលឹក​ និង​ចង​ចាំ​ជា​និច្ច​នូវ​សោកនាដកម្ម​យ៉ាងធ្ងន់ធ្ងរ​ចំពោះ​ជាតិ​ និង​ប្រជាជន​កម្ពុជា​ តាម​សេចក្តីសម្រេច​លេខ​៦៨​សសរ​ ចុះ​ថ្ងៃ​ទី​២៤​ ខែវិច្ឆិកា​ ឆ្នាំ​២០១០​ ។​

​ពាក់ព័ន្ធ​ទៅ​នឹង​សោកនាដកម្ម​មនុស្ស​ស្លាប់​ចំនួន​៣៥៣​នាក់​ និង​រង​របួស​ជាង​៤០០​នាក់​ ក្នុង​ព្រះរាជ​ពិធីបុណ្យ​អុំទូក​ឆ្នាំ​២០១០​នោះ​ ធ្លាប់​ត្រូវ​បាន​យុវជន​គណបក្ស​សង្គ្រោះ​ជាតិ​ម្នាក់​ឈ្មោះ​ សួង​ សុ​ភ័​ណ្ឌ​ ដាក់​ពាក្យ​ប្តឹង​សម្តេច​អគ្គមហាសេនាបតី​តេ​ជោ​ ហ៊ុន​ សែន​ នាយក​រដ្ឋមន្ត្រី​នៃ​ព្រះរាជាណាចក្រ​កម្ពុជា​ កាលពី​ថ្ងៃ​ទី​៣០​ ខែវិច្ឆិកា​ ឆ្នាំ​២០១២​ ទៅ​ស្ថាប័ន​អយ្យការ​អម​សាលាដំបូង​រាជធានី​ភ្នំពេញ​ ចោទប្រកាន់​ពី​បទ​ ឃាតកម្ម​គិត​ទុកជា​មុន​ ប៉ុន្តែ​បណ្តឹង​នេះ​ក៏​ត្រូវ​បាន​លោក​ មាស​ ច័ន្ទ​ពិសិដ្ឋ​ អតីត​ព្រះរាជអាជ្ញា​រង​ និង​ជា​តំណាង​អយ្យការ​អម​សាលាដំបូង​រាជធានី​ភ្នំពេញ​ សម្រេច​តម្កល់​រឿង​ទុក​ឥត​ចាត់ការ​ តាម​ដីកា​សម្រេច​លេខ​១១៣៨​ អយ​ឆ​ ចុះ​ថ្ងៃ​ទី​១៨​ ខែធ្នូ​ ឆ្នាំ​២០១២​ ។​

​សូម​គោរព​ជូនពរ​ដល់​ប្រជាពលរដ្ឋ​ដែល​បាន​ចូលរួម​ផ្ទាល់​ (​ជា​ពិសេស​កីឡាករ​ កីឡាការិនី​ចំណុះ​ទូក​)​ និង​បាន​អញ្ជើញ​មក​កម្សាន្ត​ក្នុង​ព្រះរាជ​ពិធីបុណ្យ​អុំទូក​ បណ្តែតប្រទីប​ សំពះ​ព្រះ​ខែ​ និង​អកអំបុក​ រយៈពេល​០៣​ថ្ងៃ​ គឺ​ចាប់ពី​ថ្ងៃ​ទី​១៣-១៤-១៥​ ខែវិច្ឆិកា​ ឆ្នាំ​២០១៦​នេះ​តទៅ​ បាន​ជួប​ប្រទះ​តែ​នឹង​សំណាងល្អ​ និង​ភាព​សប្បាយ​រីករាយ​គ្រប់ៗ​រូប​ ៕​

 

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 012 858 205, 015 745 215 E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.