ថ្ងៃ ពុធ ទី ២១ ខែ តុលា ឆ្នាំ ២០២០

ឥណ្ឌា​ប្រកាស​ទិញ​យន្តហោះ​ចម្បាំង​ប្រមាណ​៣០០​គ្រឿង​ទៀត​ មាន​ទំហំ​ទឹកប្រាក់​យ៉ាងតិច​១៥​ពាន់​លាន​ដុល្លារ​ ត្រៀម​ទប់ទល់​ឥទ្ធិពល​មហាអំណាច​ចិន​

​សារព័ត៌មាន​ DNA​ របស់​ឥណ្ឌា​ បាន​ផ្សព្វផ្សាយ​នា​ថ្ងៃ​ទី​២៩​ ខែតុលា​ ឆ្នាំ​២០១៦​ម្សិលមិញ​ឲ្យ​ដឹង​ថា​ រដ្ឋាភិបាល​ឥណ្ឌា​ប្រកាស​បញ្ជា​ទិញ​យន្តហោះ​ចម្បាំង​ប្រមាណ​៣០០​គ្រឿង​បន្ថែម​ទៀត​ ប៉ុន្តែ​ការ​បញ្ជា​ទិញ​នេះ​គឺ​តម្រូវ​ឲ្យ​មាន​បណ្តា​ក្រុមហ៊ុន​ចូល​មក​ធ្វើការ​វិនិយោគ​ដោយ​ផ្ទាល់​ជាមួយ​ក្រុមហ៊ុន​ក្នុងស្រុក​របស់​ឥណ្ឌា​ ដើម្បី​ផលិត​យន្តហោះ​ចម្បាំង​ទាំងនោះ​ ។​

​គម្រោង​បញ្ជា​ទិញ​យន្តហោះ​ចម្បាំង​ចាប់ពី​ ២០០​គ្រឿង​ ទៅ​៣០០​គ្រឿង​របស់​ឥណ្ឌា​នេះ​ គឺ​មាន​ទំហំ​ទឹកប្រាក់​ចំណាយ​យ៉ាងតិច​ចំនួន​១៥​ពាន់​លាន​ដុល្លារ​អា​មេ​រិ​ក​ សម្រាប់​បំពេញ​ជំនួស​នូវ​យន្តហោះ​ចម្បាំង​ចាស់ៗ​នៅ​សេសសល់​ដែល​ឥណ្ឌា​ធ្លាប់​ទិញ​ពី​សម័យ​សហភាព​សូ​វៀត​មក​ ។​

​កាលពី​ពេល​កន្លង​ទៅ​ថ្មីៗ​ រដ្ឋាភិបាល​ឥណ្ឌា​ដែល​ជា​ប្រទេស​មាន​អាវុធ​នុយក្លេអ៊ែរ​មួយ​នេះ​ ធ្លាប់​បាន​បញ្ជា​ទិញ​យន្តហោះ​ចម្បាំង​ប្រភេទ​ Dassault​ Rafale​ ចំនួន​៣៦​គ្រឿង​ពី​ប្រទេស​បារាំង​ ដែល​មាន​តម្លៃ​ទឹកប្រាក់​សរុប​ជិត​៦​ពាន់​លាន​ដុល្លារ​អា​មេ​រិ​ក​ ។​

​ជំនួប​រវាង​លោក​ Narendra​ Modi​ នាយក​រដ្ឋមន្ត្រី​ឥណ្ឌា​ ជាមួយ​លោក​ Barack​ Obama​ ប្រធានាធិបតី​សហរដ្ឋអាមេរិក​ នៅ​រដ្ឋធានី​ Washington​ DC.​ កាលពី​ថ្ងៃ​ទី​០៧-០៨​ ខែមិថុនា​ ឆ្នាំ​២០១៦​កន្លង​ទៅ​ ឥណ្ឌា​ក៏​បាន​គ្រោង​បញ្ជា​ទិញ​យន្តហោះ​គ្មាន​មនុស្ស​បើក​ បំពាក់​កាំជ្រួច​មី​ស៊ី​ល​ប្រភេទ​ General​ Atomics​ MQ-9​ Reaper​ (​ពី​មុន​ហៅ​ថា​ Predator​ B)​ ពី​សហរដ្ឋអាមេរិក​ ចំនួន​២៥០​គ្រឿង​ មាន​តម្លៃ​ទឹកប្រាក់​សរុប​ប្រមាណ​ ៥​ពាន់​លាន​ដុល្លារ​អា​មេ​រិ​ក​ ។​

​ដោយឡែក​ ឥណ្ឌា​ក៏​ជា​ប្រទេស​ទី​១​ដែល​បាន​បញ្ជា​ទិញ​យន្តហោះ​ចម្បាំង​អាច​ចុះ​ចត​នៅ​លើ​ទឹកបាន​ ធុន​ Seaplane​ US-2​ ពី​ប្រទេស​ជប៉ុន​ចំនួន​១៥​គ្រឿង​ មាន​តម្លៃ​ទឹកប្រាក់​សរុប​ជិត​២​ពាន់​លាន​ដុល្លារ​អា​មេ​រិ​ក​ផង​ដែរ​ ។​

​អ្នកវិភាគ​ព្រឹត្តិការណ៍​នយោបាយ​អន្តរជាតិ​ បាន​លើក​ឡើង​ថា​ គម្រោង​បញ្ជា​ទិញ​យន្តហោះ​ចម្បាំង​ និង​សព្វាវុធ​ដ៏​ច្រើន​របស់​ឥណ្ឌា​ពី​បណ្តា​ប្រទេស​មួយ​ចំនួន​នោះ​ គឺ​ប្រាកដ​ណាស់​ ឥណ្ឌា​សម្រាប់​យក​មក​ប្រើប្រាស់​លើ​ការ​ការពារ​ដែន​អធិបតេយ្យភាព​របស់​ខ្លួន​ ដែល​មាន​វិសាលភាព​ដ៏​ធំ​ និង​កំពុង​មាន​ជម្លោះ​ជាមួយ​បណ្តា​ប្រទេស​ជិតខាង​ជា​ប្រទេស​មាន​អាវុធ​នុយក្លេអ៊ែរ​ដូច​ឥណ្ឌា​ដែរ​ ជា​អាទិ៍​ ប្រទេស​ចិន​ និង​ប្រទេស​ប៉ា​គី​ស្ថាន​ ។​

​មិន​ត្រឹម​ការ​ប្រើប្រាស់​នូវ​យន្តហោះ​ចម្បាំង​នោះ​ទេ​ កាលពី​ខែសីហា​ ឆ្នាំ​២០១៦​កន្លង​ទៅ​ថ្មីៗ​ ឥណ្ឌា​ក៏​បាន​ដាក់​ពង្រាយ​នូវ​មី​ស៊ី​ល​វាយលុក​ដ៏​ទំនើប​ធុន​ BRAHMOS​ នៅ​តាម​បណ្តោយ​ព្រំដែន​គោក​ជាប់​នឹង​ប្រទេស​ចិន​ដែល​កំពុង​មាន​វិវាទ​ថែម​ទៀត​ផង​ ជា​ហេតុ​ធ្វើ​ឲ្យ​មហាអំណាច​ចិន​សម្តែង​នូវ​ការ​ខឹងសម្បា​យ៉ាង​ខ្លាំង​ ។​

​ក្រុម​មន្ត្រី​រដ្ឋាភិបាល​ឥណ្ឌា​បាន​និយាយ​ឲ្យ​ដឹង​កាលពី​ថ្ងៃ​សុក្រ​ ទី​២៨​ ខែតុលា​ ឆ្នាំ​២០១៦​កន្លង​ទៅ​ថ្មីៗ​ឲ្យ​ដឹង​ថា​ លោកនាយក​រដ្ឋមន្ត្រី​ឥណ្ឌា​ Narendra​ Modi​ នឹង​ធ្វើ​ទស្សនកិច្ច​នៅ​ប្រទេស​ជប៉ុន​នា​ខែវិច្ឆិកា​ ឆ្នាំ​២០១៦​ខាង​មុខ​ ដែល​រំពឹង​ថា​ នឹង​ចុះហត្ថលេខា​រួម​គ្នា​ជាមួយ​លោកនាយក​រដ្ឋមន្ត្រី​ជប៉ុន​ Shinzo​ Abe​ លើ​កិច្ចព្រមព្រៀង​វិស័យ​បច្ចេកទេស​នុយក្លេអ៊ែរ​ស៊ី​វិល​ផង​ និង​បង្កើន​ចំណងទាក់ទង​វិស័យ​យោធា​ផង​ ដើម្បី​ទប់ទល់​ទៅ​នឹង​ឥទ្ធិពល​របស់​អំណាច​ចិន​នៅ​អាស៊ី​ ៕​

Filed in: Feature, អន្តរជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 012 858 205, 015 745 215 E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.