ថ្ងៃ ពុធ ទី ២១ ខែ តុលា ឆ្នាំ ២០២០

រថយន្ត​ពាក់​ស្លាក​លេខ​ខេមរភូមិន្ទ​នេះ​ មិន​បម្រើ​ការងារ​ការពារ​ជាតិ​ទេ​ តែ​បែរជា​បម្រើ​ឲ្យ​ឈ្មួញ​ដឹក​សត្វ​មាន់​ចូល​ខុសច្បាប់​ពី​ប្រទេស​ថៃ​យ៉ាង​ហ៊ឺហា​

​ជា​រឿង​គួរ​ឲ្យ​ហួសចិត្ត​ពន់ពេក​ណាស់​ ដោយ​រថយន្ត​ម៉ាក​ ISUZU​ ចង្កូត​ស្តាំ​ ពាក់​ស្លាក​លេខ​ខេមរភូមិន្ទ​ 01.2-6567​ មួយ​គ្រឿង​នេះ​មិន​បាន​ចូលរួម​បម្រើ​ការងារ​ការពារ​ជាតិ​ក្នុង​នាម​ជា​មធ្យោបាយ​សម្រាប់​ដឹក​ជញ្ជូន​សម្ភារៈ​ទ័ព​ ឬ​ដឹក​ជញ្ជូន​កងទ័ព​តាម​ស្មារតី​អនុក្រឹត្យ​របស់​រាជរដ្ឋាភិបាល​ស្តី​ពី​ការ​ចេញ​ស្លាក​លេខ​សម្គាល់​យានជំនិះ​អ្វី​នោះ​ទេ​ ប៉ុន្តែ​បែរជា​ត្រូវ​បាន​ក្រុម​ឈ្មួញ​យក​មក​ប្រើប្រាស់​សម្រាប់​ដឹក​ជញ្ជូន​សត្វ​មាន់​តាម​ច្រករបៀង​ខុសច្បាប់​ពី​ប្រទេស​ថៃ​ចូល​មក​ប្រទេស​កម្ពុជា​យ៉ាង​ហ៊ឺហា​ទៅ​វិញ​ ខណៈ​សមត្ថកិច្ច​ពាក់ព័ន្ធ​គ្រប់​ផ្នែក​ គ្រប់​ថ្នាក់​ ដែល​មាន​ចំនួន​ច្រើន​ដូច​ស្រមោច​មិន​ខ្វល់ខ្វាយ​ចាត់វិធានការ​ទាល់តែ​សោះ​ ។​

​ប្រភព​ព័ត៌មាន​ពី​ខេត្តបាត់ដំបង​ បាន​ឲ្យ​ដឹង​ថា​ ក្រុម​ឈ្មួញ​បាន​ប្រើប្រាស់​រថយន្ត​ម៉ាក​ ISUZU​ ពាក់​ស្លាក​លេខ​ខេមរភូមិន្ទ​ 01.2-6567​ នេះ​ធ្វើ​ជា​មធ្យោបាយ​សម្រាប់​ដឹក​ជញ្ជូន​សត្វ​មាន់​រស់​ខុសច្បាប់​តាម​ច្រករបៀង​មួយ​ឈ្មោះ​ "​បឹង​ឆ្នាំង​"​ ឋិត​ក្នុងស្រុក​កំ​រៀង​ ខេត្តបាត់ដំបង​ ពី​ប្រទេស​ថៃ​ ចូល​មក​ប្រទេស​កម្ពុជា​ ដោយ​ធ្វើ​ដំណើរ​តាម​ផ្លូវជាតិ​លេខ​៥​ យក​មក​ចែកចាយ​តាម​ទីតាំង​ផ្សារ​លក់ដូរ​ផ្សេងៗ​ក្នុង​មួយ​ថ្ងៃៗ​ចំនួន​ប្រមាណ​ជាង​ ២០០​ធុង​ ដាក់​សត្វ​មាន់​ ខណៈ​សមត្ថកិច្ច​ពាក់ព័ន្ធ​មិន​ហ៊ាន​ប៉ះពាល់​ ឬ​ត្រួតពិនិត្យ​អ្វី​ឡើយ​ ។​

​មាត្រា​៥,​ មាត្រា​៦​ និង​មាត្រា​១១​ នៃ​អនុក្រឹត្យ​របស់​រាជរដ្ឋាភិបាល​កម្ពុជា​ លេខ​៧៧​ អន​ក្រ​.​បក​ ចុះ​ថ្ងៃ​ទី​២៨​ ខែវិច្ឆិកា​ ឆ្នាំ​២០០៣​ ស្តី​ពី​ការ​ចេញ​ស្លាក​លេខ​សម្គាល់​យានជំនិះ​ បាន​ចែង​បញ្ជាក់​ថា​ យានយន្ត​ដែល​ពាក់​ស្លាក​លេខ​ខេមរភូមិន្ទ​ គឺជា​យានយន្ត​គ្រប់គ្រង​ដោយ​ក្រសួងការពារជាតិ​ ប្រើប្រាស់​សម្រាប់​នៅ​សមរភូមិ​ និង​ការងារ​ការពារ​ជាតិ​ សម្រាប់​ដឹក​ជញ្ជូន​សម្ភារៈ​ទ័ព​ ឬ​ដឹក​ជញ្ជូន​កងទ័ព​ ។​

​ដូច្នេះ​ រថយន្ត​ពាក់​ស្លាក​លេខ​ខេមរភូមិន្ទ​ ហើយ​ត្រូវ​បាន​ក្រុម​ឈ្មួញ​យក​មក​ប្រើប្រាស់​សម្រាប់​ដឹក​ជញ្ជូន​សត្វ​មាន់​ចូល​ខុសច្បាប់​ពី​ប្រទេស​ថៃ​មក​ប្រទេស​កម្ពុជា​យ៉ាង​ហ៊ឺហា​នោះ​ បាន​បង្ក​ឲ្យ​មាន​បច្ច័យ​អាក្រក់​ ដូច​ខាងក្រោម​ ៖

១-​រំលោភ​បំពាន​លើ​ស្មារតី​អនុក្រឹត្យ​របស់​រាជរដ្ឋាភិបាល​កម្ពុជា​ លេខ​៧៧​អន​ក្រ​.​បក​ ចុះ​ថ្ងៃ​ទី​២៨​ ខែវិច្ឆិកា​ ឆ្នាំ​២០០៣​ ស្តី​ពី​ការ​ចេញ​ស្លាក​លេខ​សម្គាល់​យានជំនិះ​ ។​

២-​បំបាក់​មុខមាត់​រាជរដ្ឋាភិបាល​កម្ពុជា​ និង​បង្អាប់បង្អោន​កិត្យានុភាព​កង​យោធពលខេមរភូមិន្ទ​យ៉ាងធ្ងន់ធ្ងរ​ ។​

៣-​ចូលរួម​សមគំនិត​ធ្វើ​ឲ្យ​ខាតបង់​ប្រាក់​ចំណូល​រដ្ឋ​តាម​រយៈ​ការ​ដឹក​ជញ្ជូន​ចរាចរណ៍​សត្វ​មាន់​ខុសច្បាប់​ដោយ​គេចពន្ធ​ ។​

៤-​បង្ក​ឲ្យ​មាន​ផល​ប៉ះពាល់​ដល់​ការ​ប្រកប​មុខរបរ​ជំនួញ​ ពោល​គឺជា​រូបភាព​នៃ​ការ​ប្រកួតប្រជែង​មិន​ស្មោះត្រង់​ ដោយ​ម្ខាង​រកស៊ី​បង់ពន្ធ​ជូន​រដ្ឋ​ត្រឹមត្រូវ​ និង​ម្ខាង​ទៀត​រកស៊ី​គេចពន្ធ​ ។​

​សូម​ឯកឧត្តម​ នាយ​ឧត្តមសេនីយ៍​ផ្កាយ​មាស​៤​ ទៀ​ បាញ់​ ឧបនាយករដ្ឋមន្ត្រី​ រដ្ឋមន្ត្រី​ក្រសួងការពារជាតិ​ មេត្តា​ត្រួតពិនិត្យ​មើល​ និង​មាន​វិធានការ​ជាក់លាក់​ទៅ​លើ​ករណី​អសកម្ម​ទាំងនេះ​ផង​ ៕​

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 012 858 205, 015 745 215 E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.