ថ្ងៃ ពុធ ទី ២១ ខែ តុលា ឆ្នាំ ២០២០

Range Rover ខ្លាំង​​ ឈ្នះ Land Cruiser តែចាញ់រង្វង់មូលវត្តភ្នំ

រយៈពេល ០២ ថ្ងៃជាប់ៗគ្នានៅរាជធានីភ្នំពេញ​ រថយន្តទំនើបម៉ាក Range Rover ចំនួន២គ្រឿងបានសាកកម្លាំង២មុខសញ្ញាផ្សេងៗគ្នា ​គឺ ​ករណីទី១ Range Rover មួយគ្រឿងបុកពេញទំហឹង​ចំពាក់កណ្តាលតួរថយន្ត​ម៉ាក Land​ Cruiser មួយគ្រឿង​ធ្វើឲ្យ​ Land Cruiser ក្រឡាប់ផ្ងារជើង​នៅស្តុបវត្តមហាមន្ត្រី ផ្លូវលេខ១៦៣ កែងវិថីព្រះសីហនុ​ សង្កាត់វាលវង់ ខណ្ឌ៧មករា នាថ្ងៃទី២៣ ខែតុលា ឆ្នាំ២០១៦ និងករណីទី២ Range Rover ចងកំហឹង​បុកពេញទំហឹង​ទៅលើខឿន​រង្វង់មូលវត្តភ្នំ​ សង្កាត់វត្តភ្នំ ខណ្ឌដូនពេញ នាថ្ងៃទី២៤ ខែតុលា ឆ្នាំ២០១៦ រហូតដល់​ផ្លោងក្រឡាប់​ច្រើនត្រឡប់​ផ្ងារជើង​រងការខូចខាតយ៉ាងដំណំ។

កាលពីវេលាម៉ោង​០៣ និង១៥នាទីព្រឹក ឈានចូលថ្ងៃទី ២៣ ខែតុលា ឆ្នាំ២០១៦ នៅត្រង់ចំណុចស្តុបវត្តមហាមន្ត្រី​មានរថយន្តម៉ាក​ Range Rover ពណ៌ស ពាក់ស្លាកលេខ​ភ្នំពេញ​2AM-9992 ​មួយគ្រឿងបើកបរដោយស្រីស្រស់ម្នាក់តាម​បណ្តោយផ្លូវលេខ​១៦៣ ក្នុងទិសដៅ​ពីជើងមក​ត្បូង​ បាន​បុកពេញទំហឹង​ចំពាក់កណ្តាលតួរថយន្តម៉ាក Land Cruiser ពណ៌ខ្មៅ ពាក់ស្លាកលេខភ្នំពេញ​2W-8458​​​ មួយគ្រឿង​បើកបរដោយ​ស្ត្រីវ័យចំណាស់​ម្នាក់​តាមបណ្តោយវិថីព្រះសីហនុ​ ក្នុងទិសដៅ​ពីកើតមកលិច បណ្តាលឲ្យរថយន្ត Land Cruiser ក្រឡាប់ផ្ងារជើងឡើងលើ រួចហើយស្រីស្រស់​អ្នកបើកបររថយន្តបង្កគេចខ្លួនបាត់ស្រមោល​​បន្ទាប់ពីជួប​ហេតុការណ៍​ភ្លាមៗ បន្សល់ទុកតែរថយន្តបង្ករងខូចខាតផ្នែកខាងមុខយ៉ាងដំណំ ខណៈគ្មានអ្នករងរបួសធ្ងន់ធ្ងរក្នុង​ហេតុការណ៍​គ្រោះថ្នាក់​​ចរាចរណ៍នេះទេ។

ដោយឡែក​ កាលពីវេលាម៉ោង​០១ និង១០នាទី​ រំលងអធ្រាត្រ​ឈាន​ចូល​ថ្ងៃទី២៤ ខែតុលា​ ឆ្នាំ២០១៦នេះ​ មានរថយន្តម៉ាក​ Range Rover (Mini)​ ពណ៌ស ពាក់ស្លាកលេខ​ភ្នំពេញ2R-4777 មួយគ្រឿងបើកបរដោយបុរសម្នាក់​ទាំងអាការៈស្រវឹង​ក្នុងល្បឿនយ៉ាងលឿនតាម​បណ្តោយមហាវិថីព្រះនរោត្តម ក្នុងទិសដៅ​ពីត្បូងទៅជើង​ ស្រាប់តែជ្រុលចង្កូត​ទៅបុក​ខឿនរង្វង់មូលវត្តភ្នំពេញទំហឹង​ បណ្តាលឲ្យរថយន្តហោះផ្លោងក្រឡាប់ជាច្រើនត្រឡប់ខូចខាតយ៉ាងដំណំ ដោយអ្នកបើកបរ​ជួប​សំណាងល្អ​ត្រឹមរងរបួសស្រាល​ ព្រោះមានពោងសុវត្ថិភាពជួយការពារ​។

មជ្ឈដ្ឋាន​​ អ្នកធ្លាប់ប្រើប្រាស់​រថយន្តទំនើប​បាន​លាន់មាត់ថា​ ក្នុងហេតុការណ៍គ្រោះថ្នាក់ចរាចរណ៍​ទាំងពីរករណីខាងលើនេះ​ បើកុំតែរថយន្តបង្កជារថយន្តទំនើប​​ម៉ាក​ Range Rover មានទម្ងន់ធ្ងន់​ និងមាំទាំខាងសុវត្ថិភាព ម្ល៉េះសមអ្នកបើកបររថយន្តបង្កទទួលរងគ្រោះថ្នាក់​ធ្ងន់ធ្ងរ​ស្មានមិនដល់ជាមិនខាន។ ប៉ុន្តែ​ ទោះយ៉ាងណាក៏ដោយ​ គ្រប់អ្នកបើកបរយានយន្តត្រូវតែចូលរួមគោរពច្បាប់​ស្តីពីចរាចរណ៍ផ្លូវគោក ដើម្បីសុវត្ថិភាពទាំងអស់គ្នា៕

 

 

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 012 858 205, 015 745 215 E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.