ថ្ងៃ អាទិត្យ ទី ០៣ ខែ កក្កដា ឆ្នាំ ២០២២

យុវតី​ជា​សិស្សសាលា​៣​នាក់​ទៅ​រៀន​គួ​ បែរជា​បាត់​ខ្លួន​អស់​០៣​ថ្ងៃ​មិន​ទាន់​រក​ឃើញ​

​យុវតី​ជា​សិស្សសាលា​ចំនួន​៣​នាក់​ មាន​ទីលំនៅ​ភូមិ​កោះ​កុក​"​ក​"​ ឃុំ​កោះ​ទន្ទឹម​ ស្រុក​កំពង់សៀម​ ខេត្តកំពង់ចាម​ បាន​បាត់​ខ្លួន​អស់​ចំនួន​០៣​ថ្ងៃ​មក​ហើយ​ នៅ​តែ​មិន​ទាន់​រក​ឃើញ​នៅឡើយ​ បន្ទាប់​ពី​ក្រុម​នាង​ចាក​ចេញពីផ្ទះ​ទៅ​រៀន​គួ​ភាសា​អង់គ្លេស​ កាលពី​រសៀល​ថ្ងៃ​ទី​១៧​ ខែតុលា​ ឆ្នាំ​២០១៦​កន្លង​ទៅ​ថ្មីៗ​ ខណៈ​សមត្ថ​កិច្ចសហការ​ជាមួយ​អាណាព្យាបាល​ក្រុម​គ្រួសារ​យុវតី​បាត់​ខ្លួន​ បាន​និង​កំពុង​ស្វែងរក​យ៉ាង​យកចិត្តទុកដាក់​ ។​

​សមត្ថកិច្ច​នគរបាល​ព្រហ្មទណ្ឌ​ខេត្តកំពង់ចាម​ បាន​ប្រាប់​បណ្តាញសារព័ត៌មាន​ឲ្យ​ដឹង​ថា​ ការិយាល័យ​ប្រឆាំង​ការ​ជួញដូរ​មនុស្ស​និង​ការពារ​អនីតិជន​ បាន​ទទួល​ពាក្យបណ្តឹង​ពី​អាណាព្យាបាល​យុវតី​ជា​សិស្សសាលា​ចំនួន​៣​នាក់​ ដែល​បាន​ប្តឹង​ពី​ការ​បាត់​ខ្លួន​កូនស្រី​ក្នុង​ពេល​ក្រុម​នាង​ជិះ​ទោចក្រយាន​(​កង់​)​ចេញពីផ្ទះ​ទៅ​រៀន​គួ​ ហើយ​មិនឃើញ​ត្រឡប់​មក​ផ្ទះ​វិញ​ ។​ យុវតី​ដែល​បាត់​ខ្លួន​ទាំង​៣​នាក់​នោះ​ រួម​មាន​ ៖​ ១-​ឈ្មោះ​ ខូ​យ​ គឹ​ម​ឡា​ង​ អាយុ​១៦​ឆ្នាំ​,​ ២-​ឈ្មោះ​ ផុ​ន​ ភក្ត្រា​ អាយុ​១៤​ឆ្នាំ​ និង​៣-​ឈ្មោះ​ សេន​ សូ​នី​តា​ អាយុ​១៣​ឆ្នាំ​ ។​

​ប្រភព​ព័ត៌មាន​ពី​សមត្ថកិច្ច​បាន​បង្ហើប​ប្រាប់​ឲ្យ​ដឹង​ដែរ​ថា​ យុវតី​ទាំង​៣​នាក់​ដែល​បាត់​ខ្លួន​នោះ​ គឹ​នៅ​ថ្ងៃ​កើតហេតុ​បាន​នាំ​គ្នា​ឡើង​ជិះ​ទោចក្រយានយន្ត​(​ម៉ូតូ​)​ជាមួយ​មិត្តភក្តិ​ប្រុស​ចំនួន​២​នាក់​ ក្នុង​នោះ​មាន​ម៉ូតូ​ម៉ាក​ Scoopy​ មួយ​គ្រឿង​ និង​ម៉ាក​ Honda​ Dream​ C125​ មួយ​គ្រឿង​ទៀត​ ចេញពី​កន្លែង​រៀន​គួ​ ដោយ​បន្សល់​ទុក​កង់​របស់​នាង​នៅ​ទីនោះ​ ។

​ពាក់ព័ន្ធ​នឹង​ការ​បាត់​ខ្លួន​យុវតី​ជា​សិស្សសាលា​ទាំង​៣​នាក់​នេះ​ ត្រូវ​បាន​សមត្ថកិច្ច​សន្និដ្ឋាន​ជាបឋម​ថា​ ក្រុម​នាង​អាច​ចាញ់​ឧបាយកល​មិត្ត​ប្រុស​ល្បួងលួងលោម​អូស​ទាញ​នាំ​នាង​ដើរ​លេង​ ដោយ​ទៅ​ទីកន្លែង​ឆ្ងាយ​មិន​ទាន់​ហ៊ាន​ត្រឡប់​វិល​មក​ផ្ទះ​វិញ​ ៕​

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.