ថ្ងៃ សុក្រ ទី ២២ ខែ មករា ឆ្នាំ ២០២១

សំណុំរឿង​ចាប់ខ្លួន​ឈ្មួញ​ឈើ​ដុះ​ស្លែ​ជនជាតិ​យួន​ប្រចាំ​ខេត្តស្ទឹងត្រែង​ម្នាក់​ ត្រូវ​បាន​ផ្ទេរ​សមត្ថកិច្ច​មក​ឲ្យ​តុលាការ​ភ្នំពេញ​ចាត់ការ​វិញ​

​ប្រភព​ព័ត៌មាន​ច្បាស់​ការណ៍​ពី​មន្ត្រី​ក្រសួងយុត្តិធម៌​ បាន​បង្ហើប​ប្រាប់​ឲ្យ​ដឹង​ថា​ សំណុំរឿង​ឈ្មួញ​ឈើ​ដុះ​ស្លែ​ជា​ស្ត្រី​ជនជាតិ​យួន​ប្រចាំ​ខេត្តស្ទឹងត្រែង​ម្នាក់​ឈ្មោះ​ "​ព្រឿ​ង​"​ និង​មានឈ្មោះ​ខ្មែរ​ថា​ "​ហេង​ សំនៀង​"​ ដែល​ត្រូវ​សមត្ថកិច្ច​កងរាជអាវុធហត្ថ​លើ​ផ្ទៃ​ប្រទេស​ចាប់​ឃាត់ខ្លួន​កាលពី​វេលា​ព្រឹក​ព្រលឹម​ថ្ងៃ​ទី​១៣​ ខែតុលា​ ឆ្នាំ​២០១៦​ម្សិលមិញ​ ពាក់ព័ន្ធ​ទៅ​នឹង​ការ​ឡោម​ព័ទ្ធ​សមត្ថកិច្ច​រំដោះ​យក​ឈើ​ជា​វត្ថុ​តាង​នោះ​ ត្រូវ​បាន​រដ្ឋមន្ត្រី​ក្រសួងយុត្តិធម៌​សម្រេច​អនុញ្ញាត​ឲ្យ​មានការ​ផ្ទេរ​សមត្ថកិច្ច​មក​សាលាដំបូង​រាជធានី​ភ្នំពេញ​ចាត់ការ​ជំនួស​សាលាដំបូង​ខេត្តស្ទឹងត្រែង​វិញ​ហើយៗ​ទាំង​សំណុំរឿង​ ទាំង​ខ្លួន​ "​យាយ​ព្រឿ​ង​"​ បាន​បញ្ជូន​មក​ដល់​រាជធានី​ភ្នំពេញ​នៅ​ថ្ងៃ​ទី​១៤​ ខែតុលា​ ឆ្នាំ​២០១៦​នេះ​តែ​ម្តង​ ។​

​មន្ត្រី​ក្រសួងយុត្តិធម៌​ម្នាក់​បាន​បង្ហើប​ប្រាប់​ឲ្យ​លក្ខខណ្ឌ​មិន​បញ្ចេញ​ឈ្មោះ​ឲ្យ​ដឹង​ថា​ ការណ៍​ដែល​ក្រសួងយុត្តិធម៌​សម្រេច​ឲ្យ​មានការ​ផ្ទេរ​សមត្ថ​កិច្ចចាត់ការ​សំណុំរឿង​ "​យាយ​ព្រឿ​ង​"​ ជា​ឈ្មួញ​ឈើ​ដ៏​ល្បី​នេះ​ពី​សាលាដំបូង​ខេត្តស្ទឹងត្រែង​ មក​សាលាដំបូង​រាជធានី​ភ្នំពេញ​វិញ​ គឺ​ដោយសារ​ឈ្មួញ​ឈើ​ឈ្មោះ​ "​យាយ​ព្រឿ​ង​"​ បាន​ចំណាយ​លុយកាក់​ និង​មាន​ឥទ្ធិពល​ទៅ​លើ​មន្ត្រី​ពាក់ព័ន្ធ​គ្រប់​ថ្នាក់​ និង​គ្រប់​ផ្នែក​នៅ​ខេត្តស្ទឹងត្រែង​សឹង​ជាង​៩០​ភាគរយ​ទៅ​ហើយ​ ជា​ហេតុ​ធ្វើ​ឲ្យ​តុលាការ​ខេត្តស្ទឹងត្រែង​អាច​ពិបាក​ចាត់ការ​ក្នុង​សំណុំរឿង​តាម​នីតិវិធី​នៃ​ច្បាប់​ ពីព្រោះ​សូ​ម្បី​ការ​ចាប់​ឃាត់ខ្លួន​ "​យាយ​ព្រឿ​ង​"​ បាន​យក​មក​ចាត់ការ​បច្ចុប្បន្ន​ ក៏​ដោយសារ​កម្លាំង​ស្រាវជ្រាវ​ព័ត៌មាន​ និង​បង្ក្រាប​បទល្មើស​ព្រៃឈើ​របស់​កងរាជអាវុធហត្ថ​លើ​ផ្ទៃ​ប្រទេស​ដែរ​ តែបើ​ប្រើប្រាស់​កម្លាំង​សមត្ថកិច្ច​មូលដ្ឋាន​នៅ​ខេត្តស្ទឹងត្រែង​ ប្រាកដជា​មិន​អាច​ចាត់ការ​ "​យាយ​ព្រឿ​ង​"​ បាន​ឡើយ​ ។​

​មជ្ឈដ្ឋាន​អ្នក​ច្បាប់​ឯករាជ្យ​ និង​អ្នក​ឃ្លាំមើល​បទល្មើស​ឧក្រិដ្ឋកម្ម​ព្រៃឈើ​នៅ​កម្ពុជា​ បាន​លើក​ឡើង​ថា​ កំហុសឆ្គង​នៃ​ការ​ប្រព្រឹត្ត​របស់​ "​យាយ​ព្រឿ​ង​"​ យ៉ាង​ហោច​ណាស់​អាច​ប្រឈម​នឹង​ការ​ចោទប្រកាន់​ចំនួន​២​បទល្មើស​ គឺ​ ៖​ ១-​ប្រមូល​ផល​ អនុ​ផល​ព្រៃឈើ​ខុសច្បាប់​ និង​២-​បទ​លុប​បំបាត់​វត្ថុ​តាង​…​។​ល​។​

​គួរ​រំលឹក​ជូន​ថា​ កាលពី​ថ្ងៃ​ទី​១២​ ខែតុលា​ ឆ្នាំ​២០១៦​ កម្លាំង​ក្រុមការងារ​ស្រាវជ្រាវ​ព័ត៌មាន​ និង​បង្ក្រាប​បទល្មើស​ព្រៃឈើ​របស់​កងរាជអាវុធហត្ថ​លើ​ផ្ទៃ​ប្រទេស​ សហការ​ជាមួយ​ស្ថាប័ន​តុលាការ​ខេត្តស្ទឹងត្រែង​ បាន​ចុះ​ស្រាវជ្រាវ​រក​ឃើញ​គំនរ​ឈើ​ប្រណីត​ចំនួន​០៦​រថយន្ត​សាំ​យ៉ុ​ង​ និង​០៦​រថយន្ត​បែន​ ដែល​គេ​លួចលាក់​ទុក​នៅ​ក្នុង​ចម្ការ​មួយ​កន្លែង​ ឋិត​នៅ​ភូមិ​ស្រែ​ក្រសាំង​ ឃុំ​ស្រែ​ក្រសាំង​ ស្រុក​សៀម​បូក​ ខេត្តស្ទឹងត្រែង​ ហើយ​ឈើ​ដ៏​ច្រើន​នោះ​ត្រូវ​បាន​សមត្ថកិច្ច​ប្រមូល​ដឹក​យក​មក​រក្សា​ទុកជា​វត្ថុ​តាង​បទល្មើស​នៅ​សង្កាត់​រដ្ឋបាល​ព្រៃឈើ​អូរ​ពងមាន់​ ខេត្តស្ទឹងត្រែង​ ។​ ស្រាប់តែ​នៅ​វេលា​ព្រឹក​ព្រលឹម​ថ្ងៃ​ទី​១៣​ ខែតុលា​ ឆ្នាំ​២០១៦​ម្សិលមិញ​ បែរជា​លេច​ចេញ​វត្តមាន​ឈ្មួញ​ឈើ​ឈ្មោះ​ "​យាយ​ព្រឿ​ង​"​ រួម​ជាមួយ​កម្លាំង​កម្មករ​៧​នាក់​ និង​រថយន្ត​២​គ្រឿង​ ធ្វើ​សកម្មភាព​រំដោះ​យក​ឈើ​ជា​វត្ថុ​តាង​ និង​ឡោម​ព័ទ្ធ​កងកម្លាំង​យាមកាម​ឈើ​ទៀត​ផង​ ទើបត្រូវ​កម្លាំង​សមត្ថកិច្ច​ចាប់​ឃាត់ខ្លួន​ឈ្មួញ​ឈើ​ដុះ​ស្លែ​ និង​ថ្លើមធំ​នេះ​ក្នុង​បទ​ល្មី​ស​ជាក់ស្តែង​តែ​ម្តង​ ៕​

 

 

 

 

 

Filed in: Feature, តុលាការ, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.