ថ្ងៃ សុក្រ ទី ០៣ ខែ ធ្នូ ឆ្នាំ ២០២១

ព្រះសង្ឃ និងសិស្ស-និស្សិតជិត១០០អង្គ-នាក់ ដែលគង់និងស្នាក់នៅកុដិចំនួន៥ក្នុងវត្តឧណ្ណាលោមរបស់សម្តេចសង្ឃ ទេព វង្ស ប្រឈមនឹងការបណ្តេញចេញ

​ព្រះសង្ឃ​ និង​សិស្ស​-​និស្សិត​ចំនួន​ជិត​១០០​អង្គ​-​នាក់​ ដែល​គង់​ និង​ស្នាក់​នៅ​កុដិ​ចំនួន​៥​ គឺ​កុដិ​លេខ​១៨,​ លេខ​៣២,​ លេខ​៣៣,​ លេខ​៣៤​ និង​លេខ​៣៦​ ក្នុង​វត្ត​ឧណ្ណាលោម​ សង្កាត់​ជ័យ​ជំនះ​ ខណ្ឌដូនពេញ​ រាជធានី​ភ្នំពេញ​ ដែល​មាន​សម្តេចព្រះ​អគ្គ​មហា​សង្ឃ​រាជាធិបតី​ ទេព​ វង្ស​ សម្តេចព្រះ​មហាសង្ឃរាជ​នៃ​ព្រះរាជាណាចក្រ​កម្ពុជា​ ជា​សម្តេចព្រះ​ចៅអធិការ​វត្ត​ ត្រូវ​ប្រឈម​នឹង​ការ​បណ្តេញចេញ​ ដោយសារ​បណ្តា​កុដិ​ទាំង​៥​នោះ​ត្រូវ​រុះរើ​ ក្រោម​ហេតុផល​ថា​ យក​ទីតាំង​សម្រាប់​សាងសង់​សាលា​ធម្មសភា​ (​សាលាឆាន់​)​ តាម​សេចក្តីជូនដំណឹង​លេខ​២៩/១៦​ម​.​ស​.​រ​.​ស​ជ​ណ​ ចុះ​ថ្ងៃ​ទី​៣០​ ខែឧសភា​ ឆ្នាំ​២០១៦​ និង​សេចក្តីជូនដំណឹង​លេខ​០១៧៨/១៦​ វ​.​ឧ​.​ល​ ចុះ​ថ្ងៃ​ទី​១៤​ ខែកញ្ញា​ ឆ្នាំ​២០១៦​ ខណៈ​ព្រះសង្ឃ​ និង​សិស្ស​-​និស្សិត​ទាំងនោះ​មិន​យល់ព្រម​ឲ្យ​មានការ​រុះរើ​បណ្តា​កុដិ​ទាំង​៥​ឡើយ​ ហើយ​ចោទប្រកាន់​ថា​ អំពើ​របស់​គណៈសង្ឃ​វត្ត​ឧណ្ណាលោម​បែប​នេះ​ ជា​អំពើ​ផ្តាច់​ការ​ ប្រដូច​ទៅ​នឹង​របប​ប៉ុ​ល​ ពត​ ។​

​កាលពី​ថ្ងៃ​ទី​០២​ ខែមិថុនា​ ឆ្នាំ​២០១៦​កន្លង​ទៅ​ ព្រះសង្ឃ​ និង​សិស្ស​-​និស្សិត​ ដែល​គង់​ និង​ស្នាក់​នៅ​កុដិ​ទាំង​៥​ក្នុង​វត្ត​ឧណ្ណាលោម​ ចំនួន​៩៧​អង្គ​-​នាក់​ បាន​ធ្វើ​លិខិត​សុំ​អន្តរាគមន៍​មួយ​ច្បាប់​ ចម្រើនពរ​ និង​គោរព​ជូន​សម្តេច​អគ្គមហាសេនាបតី​តេ​ជោ​ ហ៊ុន​ សែន​ នាយក​រដ្ឋមន្ត្រី​នៃ​ព្រះរាជាណាចក្រ​កម្ពុជា​ ស្នើ​សុំ​ការ​ជួយ​អន្តរាគមន៍​មិន​ឲ្យ​មានការ​រុះរើ​កុដិ​ទាំង​៥​ ដោយ​សំអាង​លើ​ហេតុផល​ថា​ ដី​សាលាឆាន់​ចាស់​ និង​ដី​ទីប​ច្ឆា​ មាន​បណ្តោយ​ប្រវែង​៥១​ម៉ែត្រ​ និង​ទទឹង​៣១​ម៉ែត្រ​ គឺ​គ្រប់គ្រាន់​សម្រាប់​សាងសង់​សាលា​ធម្មសភា​ហើយ​ ប៉ុន្តែ​បែរជា​គណៈសង្ឃ​វត្ត​ឧណ្ណាលោម​មាន​ចេតនា​មិនល្អ​ ចង់​រុះរើ​កុដិ​ទាំង​៥​នោះ​ទៅ​វិញ​ នាំ​ឲ្យ​កើត​មាន​កំហុសឆ្គង​ធ្ងន់ធ្ងរ​ ។​

​មិន​ទាន់​បានដឹង​អំពី​លទ្ធផល​នៃ​កិច្ច​អន្តរាគមន៍​ពី​សម្តេច​អគ្គមហាសេនាបតី​តេ​ជោ​ ហ៊ុន​ សែន​ នាយក​រដ្ឋមន្ត្រី​នៃ​ព្រះរាជាណាចក្រ​កម្ពុជា​ បែប​ណា​នៅឡើយ​ទេ​ ប៉ុន្តែ​កាលពី​ថ្ងៃ​ទី​០៣​ ខែតុលា​ ឆ្នាំ​២០១៦​កន្លង​ទៅ​ថ្មីៗ​នេះ​ ព្រះ​វិន័យធរ​ សំ​ ចាន់​ ជួសមុខ​ឲ្យ​សម្តេចព្រះ​មហាសង្ឃរាជ​ ទេព​ វង្ស​ ជា​សម្តេចព្រះ​ចៅអធិការ​វត្ត​ឧណ្ណាលោម​ បាន​ចម្រើនពរ​ស្នើ​សុំ​កងកម្លាំង​៣​ប្រភេទ​ (​នគរបាល​ ចំនួន​១០​នាក់​,​ អាវុធហត្ថ​ ចំនួន​១០​នាក់​ និង​ប្រជា​ការពារ​ ចំនួន​១០​នាក់​)​ និង​មធ្យោបាយ​ដឹក​ជញ្ជូន​ចំនួន​២​គ្រឿង ពីលោកអភិបាលនៃគណៈអភិបាលខណ្ឌដូនពេញ​ ដើម្បី​សហការ​ចុះ​រុះរើ​កុដិ​ទាំង​៥​ ចាប់ពី​ថ្ងៃ​ទី​០៤​ ខែតុលា​ ដល់​ថ្ងៃ​ទី​០៦​ ខែតុលា​ ឆ្នាំ​២០១៦​ ។​

​មជ្ឈដ្ឋាន​ពុទ្ធបរិស័ទ​ដែល​ប្រតិបត្តិ​តាម​ព្រះពុទ្ធ​សាសនា​ បាន​បញ្ចេញ​ទស្សនៈ​ថា​ គណៈសង្ឃ​វត្ត​ឧណ្ណាលោម​ទាំងមូល​ ជា​ពិសេស​ សម្តេចព្រះ​អគ្គ​មហា​សង្ឃ​រាជាធិបតី​ ទេព​ វង្ស​ សម្តេចព្រះ​មហាសង្ឃរាជ​នៃ​ព្រះរាជាណាចក្រ​កម្ពុជា​ និង​ជា​សម្តេចព្រះ​ចៅអធិការ​វត្ត​ឧណ្ណាលោម​ មេត្តា​មាន​ព្រះ​តម្រិះ​សា​ជា​ថ្មី​ឡើង​វិញ​អំពី​ករណី​រុះរើ​បណ្តា​កុដិ​ទាំង​៥​នោះ​ ដើម្បី​រក្សា​ភាព​ស្ងប់ស្ងាត់​ និង​សាមគ្គីភាព​ក្នុង​វិស័យ​ព្រះពុទ្ធ​សាសនា​ដែល​ជា​សាសនា​របស់​រដ្ឋ​ ៕​

 

 

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.