ថ្ងៃ ពុធ ទី ២៥ ខែ ឧសភា ឆ្នាំ ២០២២

ព័ស្តុតាងលើគោក ឬកណ្តាលវាល បង្ហាញឲ្យឃើញថា អំពើពុករលួយ និងបទល្មើសគេចពន្ធ ឋិត«ក្រោមក្លៀក»នាយករដ្ឋមន្ត្រី

​ដោយ​មិនបាច់​ប្រឹង​ដើរ​ស្វែងរក​នាំ​តែ​សឹក​ស្បែកជើង​ ឬ​បារម្ភ​ថា​ រឿងរ៉ាវ​មិន​ពិត​នាំ​ឲ្យ​អង្គភាព​ប្រឆាំង​អំពើ​ពុក​រលួយ​ (ACU)​ មិន​ជឿជាក់​នោះ​ គឺ​កាលពី​ថ្ងៃ​ទី​០៨​ ខែកញ្ញា​ ឆ្នាំ​២០១៦​កន្លង​ទៅ​ថ្មីៗ​នេះ​ សម្តេច​ក្រឡាហោម​ ស​ ខេ​ង​ ឧបនាយករដ្ឋមន្ត្រី​ រដ្ឋមន្ត្រី​ក្រសួងមហាផ្ទៃ​ បាន​រាយការណ៍​ជា​លាយលក្ខណ៍អក្សរ​គោរព​ជូន​សម្តេច​អគ្គមហាសេនាបតី​តេ​ជោ​ ហ៊ុន​ សែន​ នាយក​រដ្ឋមន្ត្រី​នៃ​ព្រះរាជាណាចក្រ​កម្ពុជា​រួច​ហើយ​ថា​ «…​កន្លង​មក​ មាន​រថយន្ត​ចំនួន​៤៧០​គ្រឿង​ដែល​មិន​បង់ពន្ធ​នាំ​ចូល​ ត្រូវ​បាន​ប្រើប្រាស់​ដោយ​មន្ត្រី​ក្រសួងមហាផ្ទៃ​ ហើយ​បំពាក់​ស្លាក​លេខ​នគរបាល​…"» ។​ លើស​ពី​នេះ​ របាយការណ៍​ និង​សំណើ​របស់​សម្តេច​ក្រឡាហោម​ ស​ ខេ​ង​ ដែល​ស្នើ​សុំ​លើកលែង​ពន្ធ​នាំ​ចូល​ចំពោះ​រថយន្ត​ល្មើស​(​អត់​បង់ពន្ធ​)​ ពាក់​ស្លាក​លេខ​នគរបាល​ទាំងនោះ​ ត្រូវ​បាន​សម្តេច​អគ្គមហាសេនាបតី​តេ​ជោ​ ហ៊ុន​ សែន​ ធ្វើ​ចំណារ​ចុះ​ថ្ងៃ​ទី​១៣​ ខែកញ្ញា​ ឆ្នាំ​២០១៦​ មាន​ខ្លឹមសារ​ថា​ «យល់ព្រម»ទៀត​ផង​ (Sic!)​ ។​

​ទាំង​របាយការណ៍​រៀបរាប់​ និង​សំណើ​របស់​សម្តេច​ក្រឡាហោម​ ស​ ខេ​ង​ ទាំង​ចំណារ​យល់ព្រម​របស់​សម្តេច​អគ្គមហាសេនាបតី​តេ​ជោ​ ហ៊ុន​ សែន​ ដូច​បាន​លើក​ឡើង​ខាងលើ​ បាន​ធ្វើ​ឲ្យ​មជ្ឈដ្ឋាន​នានា​ចាប់អារម្មណ៍​ ដូច​ខាងក្រោម​ ៖

១-​រថយន្ត​ទាំង​៤៧០​គ្រឿង​នោះ​ ឬ​ច្រើន​ជាង​នេះ​ មិន​អាច​ហោះ​ ឬ​ធ្លាក់​ពីលើ​មេឃ​មក​បាន​ទេ​ គឺ​ត្រូវ​តែ​បញ្ជូន​មក​ ឬ​នាំ​ចូល​តាម​ច្រក​នានា​ដែល​មាន​សមត្ថកិច្ច​ពាក់ព័ន្ធ​ត្រួតពិនិត្យ​ជា​មុន​ ជា​ពិសេស​សមត្ថកិច្ច​គយ​ និង​រដ្ឋាករ​ប្រចាំ​ច្រក​ទ្វារ​ ។​ ដូច្នេះ​ រថយន្ត​ចំនួន​៤៧០​គ្រឿង​ដែល​មិន​បង់ពន្ធ​នាំ​ចូល​ ឬ​ជា​រថយន្ត​គេចពន្ធ​ ជា​រថយន្ត​ល្មើសច្បាប់​ នាំ​ឲ្យ​ខាតបង់​ថវិកាជាតិ​តាម​រយៈ​ចំណូល​ពន្ធគយ​រាប់​លាន​ដុល្លារ​អា​មេ​រិ​ក​ អាច​ធ្លាក់​មក​ដល់​ដៃ​មន្ត្រី​ក្រសួងមហាផ្ទៃ​គ្រប់​លំដាប់ថ្នាក់​ប្រើប្រាស់​ជា​មធ្យោបាយ​កន្លង​មក​ បាន​បង្ហាញ​នូវ​អំពើ​ពុក​រលួយ​ ឬ​អសមត្ថភាព​របស់​ក្រុម​មន្ត្រី​គយ​ និង​រដ្ឋាករ​ និង​មន្ត្រី​ពាក់ព័ន្ធ​ប្រចាំ​ច្រក​ទ្វារ​យ៉ាង​ពិតប្រាកដ​ ដោយ​ឥត​ប្រកែក​បាន​ ។​

២-​រថយន្ត​ល្មើសច្បាប់​ (​គ្មាន​ពន្ធ​នាំ​ចូល​)​ ទាំង​៤៧០​គ្រឿង​ បែរជា​កន្លង​មក​ត្រូវ​បាន​ប្រើប្រាស់​ដោយ​មន្ត្រី​ក្រសួងមហាផ្ទៃ​ ជា​មន្ត្រី​នគរបាល​យុត្តិធម៌​ មាន​តួនាទី​បង្ការ​ ទប់ស្កាត់​ និង​បង្ក្រាប​បទល្មើស​ទៅ​វិញ​ ។​ ដូច្នេះ​ មន្ត្រី​ក្រសួងមហាផ្ទៃ​ដែល​ប្រើប្រាស់​រថយន្ត​ល្មើសច្បាប់​ទាំងនោះ​ ក៏​បាន​ចូលរួម​សមគំនិត​ប្រព្រឹត្ត​បទល្មើស​ជាមួយ​មន្ត្រី​គយ​ និង​រដ្ឋាករ​ ព្រមទាំង​មន្ត្រី​ពាក់ព័ន្ធ​ឯទៀត​ប្រចាំ​ច្រក​ទ្វារ​ព្រំដែន​យ៉ាង​សកម្ម​ផង​ដែរ​ ។​

៣-​មាត្រា​៥​ ចំណុច​ទី​៤,​ មាត្រា​៦​ ចំណុច​ទី​៤​ និង​មាត្រា​១២​ នៃ​អនុក្រឹត្យ​របស់​រាជរដ្ឋាភិបាល​កម្ពុជា​ លេខ​៧៧​អន​ក្រ​.​បក​ ចុះ​ថ្ងៃ​ទី​២៨​ ខែវិច្ឆិកា​ ឆ្នាំ​២០០៣​ ស្តី​ពី​ការ​ចេញ​ស្លាក​លេខ​សម្គាល់​យានជំនិះ​ បាន​ចែង​ថា​ «…​ក្រុម​ទី​៤​ ៖​ ម្ចាស់​គ្រប់គ្រង​យានយន្ត​ជា​របស់​ក្រសួងមហាផ្ទៃ​ ប្រើប្រាស់​សម្រាប់​ការងារ​សន្តិសុខ​ ឬ​សណ្តាប់ធ្នាប់​សង្គម​ ។​ ប្រភេទ​ទី​៤​ ៖​ នគរបាល​ 01.2-0001​ ផ្ទៃ​ពណ៌​ស​ អក្សរ​ និង​លេខ​ពណ៌​ក្រហម​ ។​ យានយន្ត​ក្នុង​ក្រុម​ទី​៤​ ដែល​មាន​ចែង​ក្នុង​មាត្រា​៥​ខាងលើ​ គឺជា​យានយន្ត​ដែល​ប្រើប្រាស់​ជា​មធ្យោបាយ​សម្រាប់​ការងារ​ការពារ​សន្តិសុខ​ជាតិ​ និង​សណ្តាប់ធ្នាប់​សង្គម​ ។​ យានយន្ត​ប្រភេទ​នេះ​ ត្រូវ​លាប​ពណ៌​ពិសេស​ដែល​កំណត់​ដោយ​ប្រកាស​របស់​រដ្ឋមន្ត្រី​ក្រសួងមហាផ្ទៃ​ នៅ​ជញ្ជាំង​ទ្វារ​សងខាង​ ត្រូវ​មាន​រចនា​រូប​សញ្ញា​របស់​នគរបាល​ជាតិ​ និង​សរសេរ​អក្សរ​នគរបាល​ជាតិ​ ជា​អក្សរ​ឡា​តាំង​ POLICE​ ដាក់​នៅ​ក្រោម​អក្សរ​ខ្មែរ​ ឬ​នៅ​លើ​តួ​យានយន្ត​ ។​ ទំហំ​អក្សរ​ លេខ​ និង​ស្លាក​ ត្រូវ​កំណត់​ដោយ​ប្រកាស​របស់​រដ្ឋមន្ត្រី​ក្រសួងមហាផ្ទៃ​ ។​ »​ ។​ ប៉ុន្តែ​ជាក់ស្តែង​ នា​ពេល​កន្លង​មក​ រថយន្ត​ប្រភេទ​ទំនើបៗ​ជា​ច្រើន​ដែល​ពាក់​ស្លាក​លេខ​នគរបាល​ មិន​បាន​អនុវត្ត​តាម​មាត្រា​១២​នៃ​អនុក្រឹត្យ​របស់​រាជរដ្ឋាភិបាល​ ស្តី​ពី​ការ​ចេញ​ស្លាក​លេខ​សម្គាល់​យានជំនិះ​ឡើយ​ ។​ មាន​ន័យ​ថា​ រថយន្ត​ស៊េរី​ទំនើបៗ​ដែល​ពាក់​ស្លាក​លេខ​នគរបាល​ អត់​បង់ពន្ធ​នាំ​ចូល​ទាំងនោះ​ ត្រូវ​បាន​ប្រើប្រាស់​ជា​ផលប្រយោជន៍​ឯកជន​យ៉ាង​ហ៊ឺហា​ គ្រាន់តែ​ជ្រក​ក្រោម​រូបភាព​ពាក់​ស្លាក​លេខ​ «​នគរបាល​» ប៉ុណ្ណោះ​ ហើយ​មាន​ពេល​ខ្លះ​បាន​ប្រព្រឹត្ត​បទល្មើស​ផ្សេងៗ​ទៀត​ផង​ ។​

៤-​ឥឡូវនេះ​ សូ​ម្បី​សម្តេច​ក្រឡាហោម​ ស​ ខេ​ង​ ឧបនាយករដ្ឋមន្ត្រី​ រដ្ឋមន្ត្រី​ក្រសួងមហាផ្ទៃ​ក៏​បាន​ «​ប្រថាប់ត្រា​»​ ឲ្យ​រថយន្ត​ល្មើសច្បាប់​ទាំងនោះ​បាន​ក្លាយជា​រថយន្ត​ស្របច្បាប់​ និង​ត្រូវ​បាន​យល់ព្រម​ដោយ​សម្តេច​អគ្គមហាសេនាបតី​តេ​ជោ​ ហ៊ុន​ សែន​ នាយក​រដ្ឋមន្ត្រី​នៃ​ព្រះរាជាណាចក្រ​កម្ពុជា​ថែម​ទៀត​ ធ្វើ​ឲ្យ​បទបញ្ជា​របស់​រាជរដ្ឋាភិបាល​ស្តី​ពី​ការ​បង្ក្រាប​អំពើ​រត់គេច​ពន្ធ​ និង​អនុក្រឹត្យ​របស់​រាជរដ្ឋាភិបាល​ ស្តី​ពី​ការ​ចេញ​ស្លាក​លេខ​សម្គាល់​យានជំនិះ​ ក្លាយជា​គ្មាន​ន័យ​ខ្លឹមសារ​ ឬ​ក្លាយជា​ «ក្រដាសអនាម័យ​»​ ។​

​សរុបសេចក្តី​មក​ នេះ​គឺជា​ព័ស្តុតាង​លើគោក​ ឬ​កណ្តាលវាល​ បង្ហាញ​ឲ្យ​ឃើញ​ថា​ អំពើ​ពុក​រលួយ​ និង​បទល្មើស​គេចពន្ធ​ ឋិត​នៅ​ «ក្រោម​ក្លៀក​»​ នាយក​រដ្ឋមន្ត្រី​តែ​ម្តង​ ដែល​គ្មាន​លទ្ធភាព​នឹង​បង្ក្រាប​ ឬ​លុប​បំបាត់​បាន​ឡើយ​ ហើយ​ឯកឧត្តម​បណ្ឌិត​ ឱម​ យ៉ិ​ន​ទៀង​ ទេស​រដ្ឋមន្ត្រី​ទទួល​បន្ទុក​ប្រធាន​អង្គភាព​ប្រឆាំង​អំពើ​ពុក​រលួយ​ ក៏​មិន​អាច​ «ក្អក​» បាន​ដល់ទី​បញ្ចប់​ ៕​

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.