ថ្ងៃ អាទិត្យ ទី ២៤ ខែ មីនា ឆ្នាំ ២០១៩

ផ្កាយ​២​ប៉ូលិស​ម្នាក់​ រង​ការ​ចោទប្រកាន់​ពី​បទ​ក្លែងបន្លំ​ឯកសារ​បណ្តាំមរតក​សព​ឪពុក​ជា​មន្ត្រី​ធំ​នៅ​ស្ថាប័ន​តុលាការ​

​ប្រភព​ព័ត៌មាន​ពី​សាលាដំបូង​រាជធានី​ភ្នំពេញ​បាន​ឲ្យ​ដឹង​ថា​ លោក​ឧត្តមសេនីយ៍ទោ​(​ផ្កាយ​២)​ នាយ​នគរបាល​ជាតិ​ថ្នាក់ឧត្តម​សេនីយ៍​ក្រសួងមហាផ្ទៃ​ម្នាក់​ ត្រូវ​បាន​តំណាង​អយ្យការ​អម​សាលាដំបូង​សម្រេច​ចោទប្រកាន់​បើក​ការ​ស៊ើបសួរ​ប្តឹង​ទៅ​ចៅក្រម​ស៊ើបសួរ​ ពី​បទ​ក្លែងបន្លំ​ឯកសារ​ ពាក់ព័ន្ធ​នឹង​ការ​ទទួល​កេរ​មរតក​ពី​ឪពុក​-​ម្តាយ​របស់​ខ្លួន​ អតីត​ជា​មន្ត្រីជាន់ខ្ពស់​ក្នុង​ជួរ​រាជរដ្ឋាភិបាល​កម្ពុជា​ ក្នុង​គោលបំណង​ច្បាម​យក​ជា​ផលប្រយោជន៍​សួនតួ​ផ្ទាល់ខ្លួន​ ។​

Ith-Narith-1

​នាយ​នគរបាល​ជាតិ​ថ្នាក់ឧត្តម​សេនីយ៍​ក្រសួងមហាផ្ទៃ​ ដែល​ទទួល​រង​ការ​ចោទប្រកាន់​បើក​ការ​ស៊ើបសួរ​ពី​តំណាង​អយ្យការ​អម​សាលាដំបូង​រាជធានី​ភ្នំពេញ​ ពី​បទ​ផ្តល់​លិខិតបញ្ជាក់​មិន​ពិត​,​ ប្រើប្រាស់​លិខិតបញ្ជាក់​មិន​ពិត​ និង​ផ្តល់​សេចក្តី​ប្រកាស​ដោយ​ភូត​កុហក​ ប្រព្រឹត្ត​នៅ​រាជធានី​ភ្នំពេញ​ កាលពី​អំឡុង​ឆ្នាំ​២០១៥​នោះ​ គឺ​លោក​ឧត្តមសេនីយ៍ទោ​ អ៊ិ​ត​ ណា​រិ​ទ្ធ​ អត្តលេខ​០៦១៣៥ អាយុ៥១ឆ្នាំ​ ត្រូវជា​កូនប្រុស​របស់​សព​ឯកឧត្តម​ អ៊ិ​ត​ ណូ​ឌី​ អតីត​អនុរដ្ឋលេខាធិការ​ក្រសួងកសិកម្ម​ រុក្ខា​ប្រមាញ់​ និង​នេសាទ​ ក្នុង​អាណត្តិ​រាជរដ្ឋាភិបាល​នីតិកាល​ទី​៤​នៃ​រដ្ឋសភា​ ។​

​យោង​តាម​ដីកា​សន្និដ្ឋាន​បញ្ជូន​រឿង​ឲ្យ​ស៊ើបសួរ​របស់​តំណាង​អយ្យការ​អម​សាលាដំបូង​រាជធានី​ភ្នំពេញ​ បាន​បញ្ជាក់​ថា​ ឯកឧត្តម​ អ៊ិ​ត​ ណូ​ឌី​ មានកូន​ចំនួន​២​នាក់​ គឺ​ឈ្មោះ​ អ៊ិ​ត​ ណា​រិ​ទ្ធ​ និង​ឈ្មោះ​ អ៊ិ​ត​ ជេន​ជូ​រី​ ។​ ក្រោយមក​ ឯកឧត្តម​ អ៊ិ​ត​ ណូ​ឌី​ បាន​រៀប​ការ​ភរិយា​ថ្មី​ និង​មានកូន​ស្រី​ម្នាក់​ឈ្មោះ​ ស៊ិ​ន​ សុ​ផា​វី​ ។​ បន្ទាប់​ពី​ទទួលមរណភាព​ សព​ឯកឧត្តម​ អ៊ិ​ត​ ណូ​ឌី​ បាន​បន្សល់​ទុក​នូវ​បណ្តាំមរតក​មួយ​សម្រាប់​ឲ្យ​កូនប្រុស​-​ស្រី​ទាំង​៣​នាក់​ជា​តំណាង​ ។​ ប៉ុន្តែ​ឈ្មោះ​ អ៊ិ​ត​ ណា​រិ​ទ្ធ​ មាន​ចេតនា​ចង់បាន​ប្រាក់​ជា​មរតក​នៅ​ធនាគារ​តែ​ម្នាក់ឯង​ ក៏​ប្រើ​ល្បិច​សមគំនិត​ជាមួយ​អាជ្ញាធរ​សង្កាត់​បឹង​ទំពុន​ ក្លែងបន្លំ​ឯកសារ​សាធារណៈ​បញ្ជាក់​ទទួលស្គាល់​ខុស​ពី​ការ​ពិត​ថា​ ខ្លួន​ជា​កូន​តែ​ម្នាក់​គត់​ដែល​ត្រូវ​ទទួល​មរតក​ពី​ឪពុក​ ។​

​លោក​ឧត្តមសេនីយ៍​ អ៊ិ​ត​ ណា​រិ​ទ្ធ​ នាយ​នគរបាល​ជាតិ​ថ្នាក់ឧត្តម​សេនីយ៍​ក្រសួងមហាផ្ទៃ​ អត្តលេខ​០៦១៣៥​ ទទួល​បានការ​ដំឡើង​ឋានន្តរស័ក្តិ​ថ្នាក់​ឧត្តមសេនីយ៍ទោ​(​ផ្កាយ​២)​ ដោយ​ព្រះរាជក្រឹត្យ​លេខ​ន​ស​/​រក​ត​/០៨១៥/៨១៩​ ចុះ​ថ្ងៃ​ទី​០១​ ខែសីហា​ ឆ្នាំ​២០១៥​ ។​

​ឥឡូវនេះ​ លោក​ឧត្តមសេនីយ៍ទោ​ប៉ូលិស​ អ៊ិ​ត​ ណា​រិ​ទ្ធ​ បាន​ជាប់​ឈ្មោះ​ជា​ជន​ត្រូវ​ចោទ​នៅ​ស្ថាប័ន​តុលាការ​ ហើយ​បើ​តុលាការ​រក​ឃើញ​ថា​ មានទោស​ទណ្ឌ​មែន​នោះ​ គឺ​លោក​ឧត្តមសេនីយ៍​រូប​នេះ​អាច​ប្រឈម​នឹង​ការ​ជាប់​ពន្ធនាគារ​ និង​ការ​ដកហូត​ឋានន្តរស័ក្តិ​ ឬ​អាច​លុបឈ្មោះ​ចេញពី​ក្របខ័ណ្ឌ​មន្ត្រី​នគរបាល​ជាតិ​ទៀត​ផង​ ៕​

Filed in: Feature, តុលាការ, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 012 858 205, 015 745 215 E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.