ថ្ងៃ សៅរ៏ ទី ១៦ ខែ មករា ឆ្នាំ ២០២១

បុរស​ខ្លាំង​ជាប់​ឈ្មោះ​ជា​នាយក​រដ្ឋមន្ត្រី​ដែល​ធ្វើការ​តាម​របៀប​ “​ទប់ចិត្ត​មិន​បាន​”

​មាន​ព័ស្តុតាង​ជា​ច្រើន​ពាក់ព័ន្ធ​ទៅ​នឹង​របៀបរបប​ការងារ​របស់​សម្តេច​អគ្គមហាសេនាបតី​តេ​ជោ​ ហ៊ុន​ សែន​ ហៅ​បុរស​ខ្លាំង​ ក្នុង​ឋានៈ​ និង​មុខងារ​ជា​នាយក​រដ្ឋមន្ត្រី​នៃ​ព្រះរាជាណាចក្រ​កម្ពុជា​ ដែល​ធ្វើការ​តាម​រូបភាព​ "​ទប់ចិត្ត​ខ្លួនឯង​មិន​បាន​"​ ឬ​ប្រកប​ទៅ​ដោយ​សតិ​មិន​នឹងន​(​ប្រែប្រួល​ក្នុង​មួយ​ថ្ងៃ​រហូត​ដល់​ទៅ​៣-៤​ដង​ ក្នុង​ការ​ដោះស្រាយ​ករណី​តែ​មួយ​)​ ឬ​ពោរពេញ​ទៅ​ដោយ​ក្បាច់គុន​ "​ស៊ី​ញ៉េ​នឹង​ដៃ​ លុប​វិញ​នឹង​ជើង​"​ ធ្វើ​ឲ្យ​មន្ត្រីរាជការ​ក្រោម​ឱវាទ​ និង​អ្នកជំនួញ​មួយ​ចំនួន​លាន់មាត់​ និង​ដឹង​អំពី​ "​ចំណុចខ្សោយ​"​ របស់​នាយក​រដ្ឋមន្ត្រី​រូប​នេះ​ អាច​ឆ្លៀតឱកាស​ទទួល​បាន​បុណ្យស័ក្តិ​ និង​ប្រមូល​បាន​លាភសក្ការៈ​ជា​ហូរហែ​ ក្រោម​រូបមន្ត​ "​លៃលក​ឲ្យ​អារម្មណ៍​សម្តេច​តេ​ជោ​សប្បាយចិត្ត​ និង​ទទួល​បាន​ផលប្រយោជន៍​"​ ។​

​ព័ស្តុតាង​មួយ​ចំនួន​បាន​បង្ហាញ​អំពី​ចំណុច​គួរ​ឲ្យ​ចាប់អារម្មណ៍​ ពាក់ព័ន្ធ​ទៅ​នឹង​របៀបរបប​ការងារ​របស់​បុរស​ខ្លាំង​ ក្រោម​រូបភាព​ "​គ្រប់គ្រង​ចិត្ត​ខ្លួនឯង​មិន​បាន​"​ ឬ​ "​ទប់ចិត្ត​មិន​បាន​"​ ឬ​ "​សតិ​មិន​នឹងន​"​ ឬ​ "​ធ្វើ​ហើយ​បាន​គិត​"​ ដូច​ខាងក្រោម​ ៖

១-​ក្នុង​សំណុំរឿង​ក្តី​របស់​ក្រុមហ៊ុន​ Meng​ Srieng​ Express​ Import​ Export​ &​ Transportation​ Pte.,​ Ltd.​ កាលពី​អំឡុង​ឆ្នាំ​២០០១​កន្លង​ទៅ​ លោក​ឧកញ៉ា​ លី​ សាយ​ឃាង​ ត្រូវ​បាន​ចៅក្រម​ស៊ើបអង្កេត​តុលាការក្រុង​ភ្នំពេញ​ចេញ​ដីកាចាប់ខ្លួន​ នា​ថ្ងៃ​ទី​២៤​ ខែសីហា​ ឆ្នាំ​២០០១​ ពី​បទ​ រំលោភ​លើ​សេចក្តី​ទុកចិត្ត​ និង​ក្លែង​លិខិតឯកជន​ ។​ ដោយ​សំណុំរឿង​ក្តី​នេះ​ទទួល​រង​នូវ​ការ​លូកដៃ​អន្តរាគមន៍​គ្រប់​ច្រកល្ហក​ខ្លាំង​ពេក​ ទើប​រាជរដ្ឋាភិបាល​បាន​សម្រេច​ជា​គោលការណ៍​ឲ្យ​តុលាការ​ដំណើរការ​តាម​ផ្លូវច្បាប់​បន្ត​ទៀត​ (​បន្ត​ការ​ស្វែងរក​ចាប់ខ្លួន​លោក​ឧកញ៉ា​ លី​ សាយ​ឃាង​ ជា​ជន​ត្រូវ​ចោទ​តាម​ដីកា​តុលាការ​)​ តាម​ស្មារតី​លិខិត​លេខ​២០៧៩​ស​ជ​ណ​ ចុះ​ថ្ងៃ​ទី​២៤​ ខែធ្នូ​ ឆ្នាំ​២០០១​ របស់​ទីស្តីការគណៈរដ្ឋមន្ត្រី​ (​យោង​ចំណារ​ចុះ​ថ្ងៃ​ទី​២២​ ខែធ្នូ​ ឆ្នាំ​២០០១​ របស់​សម្តេច​ ហ៊ុន​ សែន​ ជា​នាយក​រដ្ឋមន្ត្រី​)​ ។​

​ចំណុច​គួរ​ឲ្យ​ចាប់អារម្មណ៍​បំផុត​ក្នុង​សំណុំរឿង​ក្តី​នេះ​ គឺ​រាជរដ្ឋាភិបាល​បាន​សម្រេច​ជា​លាយលក្ខណ៍អក្សរ​ ដោយ​បញ្ជាក់​ថា​ "…​ដោយ​គ្មាន​បុគ្គល​ណាមួយ​រាប់​ទាំង​នាយក​រដ្ឋមន្ត្រី​ ជ្រៀតជ្រែក​ក្នុង​ដំណើរការ​នេះ​បាន​ឡើយ​ ។​ …"​ ។​ មាន​ន័យ​ថា​ ក្នុង​សំណុំរឿង​ក្តី​ដ៏​កក្រើក​នេះ​ ធ្លាប់​មាន​អ្នក​ជ្រៀតជ្រែក​អន្តរាគមន៍​ឆ្វេ​ច​ឆ្វាច​រួច​មក​ហើយ​ ទើប​នាយក​រដ្ឋមន្ត្រី​សម្រេច​ហាមប្រាម​ខ្លួនឯង​ថែម​ទៀត​ជា​លាយលក្ខណ៍អក្សរ​តែ​ម្តង​ កុំ​ឲ្យ​មានការ​លូកដៃ​ជ្រៀតជ្រែក​ ពីព្រោះ​បារម្ភ​ខ្លាច​ "​ទប់ចិត្ត​ខ្លួនឯង​មិន​បាន​"​ (Sic!)​ ។​

​ប៉ុន្តែ​ក្រោយមក​ រាជរដ្ឋាភិបាល​បុរស​ខ្លាំង​ដដែល​ បាន​សម្រេច​បញ្ឈប់​ការ​ស្វែងរក​ចាប់ខ្លួន​លោក​ឧកញ៉ា​ លី​ សាយ​ឃាង​ វិញ​ តាម​ស្មារតី​លិខិត​លេខ​៦២៦​ស​ជ​ណ​ ចុះ​ថ្ងៃ​ទី​២៣​ ខែមេសា​ ឆ្នាំ​២០០២​ របស់​ទីស្តីការគណៈរដ្ឋមន្ត្រី​ (Resic!)​ ។​

២-​ក្នុង​សំណុំរឿង​ទំនាស់​ដីធ្លី​រវាង​ប្រជាពលរដ្ឋ​ចំនួន​៤៩​គ្រួសារ​ និង​លោក​ឧកញ៉ា​ ជៀម​ ផែន​ ថៅកែ​ក្រុមហ៊ុនស្រា​បៀរ​លី​អូ​ ទំហំ​៣៥២​ហិ​កតា​ ឋិត​នៅ​ភូមិ​កែវ​ផុស​ ឃុំ​ទំនប់​រលក​ ស្រុក​ស្ទឹង​ហាវ​ ខេត្ត​ព្រះ​សីហ​នុ​ (​អតីត​ឃុំ​ជ្រោយ​ស្វាយ​ ស្រុកស្រែ​អំបិល​ ខេត្តកោះកុង​)​ ទោះបី​បាន​ដោះស្រាយ​បញ្ចប់​រួច​ហើយ​ក្តី​ ប៉ុន្តែ​ធ្លាប់​ត្រូវ​បាន​រាជរដ្ឋាភិបាល​សម្រេច​សាចុះសាឡើង​ចំនួន​៧-៨​លើក​ (​ម្តង​សម្រេច​ប្រគល់​ដី​ទំនាស់​ឲ្យ​ប្រជាពលរដ្ឋ​ ម្តង​សម្រេច​ចែក​ដី​ពាក់កណ្តាល​ឲ្យ​ភាគី​ទំនាស់​រៀងៗ​ខ្លួន​ ម្តង​សម្រេច​ប្រគល់​ដី​ទំនាស់​ឲ្យ​ឧកញ៉ា​ ជៀម​ ផែន​ និង​ក្រោយមក​ សម្រេច​ចុង​ក្រោយ​ប្រគល់​ដី​ទំនាស់​ឲ្យ​ប្រជាពលរដ្ឋ​វិញ​)​ ។​ ការ​សម្រេច​វិល​ចុះ​វិល​ឡើង​បែប​នេះ​ បាន​ធ្វើ​ឲ្យ​បាត់បង់​តម្លៃ​នៃ​របៀបរបប​ការងារ​របស់​នាយក​រដ្ឋមន្ត្រី​ និង​បាត់បង់​កិត្យានុភាព​របស់​រាជរដ្ឋាភិបាល​យ៉ាងធ្ងន់ធ្ងរ​ ។​

៣-​ក្នុង​សំណុំរឿង​ប៉ះទង្គិច​រវាង​លោក​ឧត្តមសេនីយ៍ឯក​ ម៉​ម​ ស្រ៊ី​ម​វ​ណ្ណា​ នាយ​នគរបាល​ជាតិ​ថ្នាក់ឧត្តម​សេនីយ៍​ក្រសួងមហាផ្ទៃ​ អត្តលេខ​០៦៩៥​ អគ្គនាយករង​នៃ​អគ្គនាយកដ្ឋាន​អន្តោប្រវេសន៍​ក្រសួងមហាផ្ទៃ​ និង​មន្ត្រី​ប៉ូលិស​ចរាចរណ៍​ពាក់​ស័ក្តិ​១​ម្នាក់​ឈ្មោះ​ សូត្រ​ កញ្ញា​ អត្តលេខ​៦៧៩៦៨​ គឺ​តាម​រយៈ​បណ្តាញ​ព័ត៌មាន​ទំនាក់ទំនង​សង្គម​ Facebook​ ចុះ​ថ្ងៃ​ទី​៣០​ ខែមិថុនា​ ឆ្នាំ​២០១៦​ បុរស​ខ្លាំង​បាន​ប្រកាស​ថា​ នឹង​ដក​មុខ​តំណែង​លោក​ឧត្តមសេនីយ៍ឯក​ ម៉​ម​ ស្រ៊ី​ម​វ​ណ្ណា​ និង​បណ្តេញ​ចេញពី​ក្របខ័ណ្ឌ​មន្ត្រី​នគរបាល​ជាតិ​ទាំងស្រុង​ ។​ នៅ​ថ្ងៃ​ដដែល​ អារម្មណ៍​របស់​បុរស​ខ្លាំង​មានការ​ប្រែប្រួល​មួយ​រំពេច​ ទើប​សម្រេច​ត្រឹម​ដកហូត​មុខ​តំណែង​លោក​ឧត្តមសេនីយ៍ឯក​ ម៉​ម​ ស្រ៊ី​ម​វ​ណ្ណា​ ពី​អគ្គនាយករង​នៃ​អគ្គនាយកដ្ឋាន​អន្តោប្រវេសន៍​ ឲ្យ​មក​បម្រើ​ការងារ​នៅ​ក្រសួងមហាផ្ទៃ​ ដោយ​អនុក្រឹត្យ​លេខ​៧២៤​ អន​ក្រ​.​ត​ត​ ចុះ​ថ្ងៃ​ទី​៣០​ ខែមិថុនា​ ឆ្នាំ​២០១៦​ ។​ ក្រោយមក​ នៅ​ថ្ងៃ​ដដែល​នេះ​ដែរ​ ដោយ​សំអាង​ថា​ លោក​ផ្កាយ​៣​ប៉ូលិស​ ម៉​ម​ ស្រ៊ី​ម​វ​ណ្ណា​ និង​លោក​ស័ក្តិ​១​ប៉ូលិស​ សូត្រ​ កញ្ញា​ បាន​ផ្សះផ្សា​គ្នា​ទទួលស្គាល់​ និង​កែប្រែ​នូវ​កំហុសឆ្គង​រៀងៗ​ខ្លួន​ បុរស​ខ្លាំង​ប្រែប្រួល​អារម្មណ៍​ម្តងទៀត​ ក៏​បាន​សម្រេច​និរាករណ៍​អនុក្រឹត្យ​ដែល​ដកហូត​តំណែង​លោក​ផ្កាយ​៣​ ម៉​ម​ ស្រ៊ី​ម​វ​ណ្ណា​ នោះ​វិញ​ ដោយ​អនុក្រឹត្យ​លេខ​៧៣៧​អន​ក្រ​.​ត​ត​ ចុះ​ថ្ងៃ​ទី​៣០​ ខែមិថុនា​ ឆ្នាំ​២០១៦​ ។​ មាន​ន័យ​ថា​ ក្នុង​មួយ​ថ្ងៃ​ សតិ​របស់​បុរស​ខ្លាំង​ប្រែប្រួល​រហូត​ដល់​ទៅ​ចំនួន​៣​ដង​ លើ​ករណី​តែ​មួយ​ ។​

៤-​ក្នុង​ជម្លោះដែនសមុទ្រ​ចិន​ខាងត្បូង​ រវាង​ប្រទេស​ចិន​ជាមួយ​បណ្តា​ប្រទេស​សមាជិកសមាគម​អាស៊ាន​ ដែល​តុលាការ​ម​ជ្ឈ​ត្ត​កម្ម​អចិន្ត្រៃយ៍​(Permanent​ Court​ of​ Arbitration)​ ទីក្រុង​ឡា​អេ​ សម្រេច​កាលពី​ថ្ងៃ​ទី​១២​ ខែកក្កដា​ ឆ្នាំ​២០១៦​ ឲ្យ​ប្រទេស​ហ្វី​លី​ពី​ន​ឈ្នះក្តី​លើ​ប្រទេស​ចិន​នោះ​ គឺ​កាលពី​ចុងខែ​កក្កដា​ ឆ្នាំ​២០១៦​កន្លង​ទៅ​ រាជរដ្ឋាភិបាល​បុរស​ខ្លាំង​ប្រកាស​មិន​គាំទ្រ​លើ​សេចក្តីសម្រេច​ណាមួយ​របស់​តុលាការ​ទីក្រុង​ឡា​អេ​ ជាមួយ​បណ្តា​ប្រទេស​សមាជិកសមាគម​អាស៊ាន​ឯទៀត​ លើ​ករណី​ជម្លោះដែនសមុទ្រ​ចិន​ខាងត្បូង​ទេ​ ។​ ប៉ុន្តែ​នៅ​ថ្ងៃ​ទី​០៦​ ខែសីហា​ ឆ្នាំ​២០១៦​ ក្នុង​ឱកាស​ទទួល​ពានរង្វាន់​ "​សមិទ្ធផល​អាស៊ាន​អមតៈ​"​លើក​ទី​១៣​ នៅ​ទីក្រុង​វៀងចន្ទន៍​ ប្រទេស​ឡាវ​ ស្រាប់តែ​បុរស​ខ្លាំង​ថ្លែងការណ៍​ថា​ សូម​ឲ្យ​អាស៊ាន​រួម​កម្លាំង​គ្នា​ជា​ធ្លុង​មួយ​ និង​បទ​ពិសោធន៍​នៃ​ការ​ចាកចេញ​របស់​អង់គ្លេស​ពី​សហភាព​អឺរ៉ុប​ មិន​គួរ​កើតឡើង​ក្នុង​ចំណោម​សមាជិក​អាស៊ាន​ទៅ​វិញ​ ។​

​ទាំងនេះ​ គឺជា​ព័ស្តុតាង​មួយ​ចំនួន​ដែល​បង្ហាញ​អំពី​របៀបរបប​ការងារ​របស់​បុរស​ខ្លាំង​ជា​នាយក​រដ្ឋមន្ត្រី​នៃ​ព្រះរាជាណាចក្រ​កម្ពុជា​ ក្រោម​រូបភាព​ "​ទប់ចិត្ត​មិន​បាន​"​ ឬ​ "​សតិ​មិន​នឹងន​"​ ឬ​ "​ធ្វើ​ហើយ​បាន​គិត​"​ ៕​

 

Filed in: Feature, ទស្សនៈនយោបាយ, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.