ថ្ងៃ សៅរ៏ ទី ១៩ ខែ មករា ឆ្នាំ ២០១៩

ទំហំ​នៃ​ការ​ខូចខាត​កិត្តិយស​របស់​រាជរដ្ឋាភិបាល​ និង​បុរស​ខ្លាំង​ ស្មើនឹង​១០០​រៀល​ ក្នុង​រឿង​មេ​បក្ស​ប្រឆាំង​ទម្លាក់​កំហុស​ថា​ សម្លាប់​លោក​ កែម​ ឡី​

​យោង​តាម​ពាក្យបណ្តឹង​ចុះ​ថ្ងៃ​ទី​០១​ ខែសីហា​ ឆ្នាំ​២០១៦​នេះ​ ធ្វើ​ឡើង​ដោយ​ឯកឧត្តម​ មេធាវី​ គី​ តិច​ សមាជិក​គណៈមេធាវី​នៃ​ព្រះរាជាណាចក្រ​កម្ពុជា​ អត្តលេខ​១៥៦​ ជា​មេធាវី​រាជរដ្ឋាភិបាល​ ជា​អនុប្រធាន​ក្រុមប្រឹក្សា​អ្នក​ច្បាប់​នៃ​ទីស្តីការគណៈរដ្ឋមន្ត្រី​(​មាន​ឋានៈ​ស្មើ​រដ្ឋមន្ត្រី​)​ និង​ជា​មេធាវី​តំណាង​ដោយ​អាណត្តិ​ឲ្យ​សម្តេច​អគ្គមហាសេនាបតី​តេ​ជោ​ ហ៊ុន​ សែន​ ហៅ​បុរស​ខ្លាំង​ នាយក​រដ្ឋមន្ត្រី​នៃ​ព្រះរាជាណាចក្រ​កម្ពុជា​ ដែល​បាន​ប្តឹង​លោក​ សម​ រ​ង្ស៊ី​ ប្រធាន​គណបក្ស​សង្គ្រោះ​ជាតិ​ និង​លោក​ជំទាវ​ ថា​ក់​ ឡា​នី​ សមាជិកា​ព្រឹទ្ធសភា​នៃ​ព្រះរាជាណាចក្រ​កម្ពុជា​ មក​ពី​គណបក្ស​សម​ រ​ង្ស៊ី​ ជូន​ទៅ​ស្ថាប័ន​អយ្យការ​អម​សាលាដំបូង​រាជធានី​ភ្នំពេញ​នោះ​ បាន​បង្ហាញ​ថា​ បុរស​ខ្លាំង​សុំ​ឲ្យ​តុលាការ​ផ្តន្ទាទោស​លោក​ សម​ រ​ង្ស៊ី​ និង​លោក​ជំទាវ​ ថា​ក់​ ឡា​នី​ តាម​ច្បាប់​ និង​ទាមទារ​សំណង​ជំងឺ​ចិត្ត​ចំនួន​១០០(​មួយ​រយ​)​រៀល​ក្នុង​ម្នាក់ៗ​ ពាក់ព័ន្ធ​នឹង​ការ​និយាយ​ទម្លាក់​កំហុស​លើ​រាជរដ្ឋាភិបាល​ និង​បុរស​ខ្លាំង​ថា​ សម្លាប់​លោក​បណ្ឌិត​ កែម​ ឡី​ ។​

​ពាក្យបណ្តឹង​របស់​ឯកឧត្តម​មេធាវី​ គី​ តិច​ បាន​យក​ការ​សរសេរ​របស់​លោក​ សម​ រ​ង្ស៊ី​ នា​ថ្ងៃ​ទី​១០​ ខែកក្កដា​ ឆ្នាំ​២០១៦​ នៅ​ក្នុង​ Page​ នៃ​បណ្តាញ​ព័ត៌មាន​ទំនាក់ទំនង​សង្គម​ Facebook​ ថា​ "…​ការ​បាញ់​សម្លាប់​លោក​ កែម​ ឡី​ ថ្ងៃនេះ​ ជា​អំពើ​ភេរវកម្ម​មួយទៀត​រៀបចំ​ដោយ​រដ្ឋអំណាច​"​ និង​កិច្ច​សម្ភាសន៍​នា​ថ្ងៃ​ទី​២៣​ ខែកក្កដា​ ឆ្នាំ​២០១៦​ ជាមួយ​វិទ្យុ​អាស៊ី​សេរី​ ដើម្បី​ដាក់បន្ទុក​ប្តឹង​លោក​ សម​ រ​ង្ស៊ី​ ប្រធាន​គណបក្ស​សង្គ្រោះ​ជាតិ​ ។​

​ដោយឡែក​ ពាក្យបណ្តឹង​របស់​ឯកឧត្តម​មេធាវី​ គី​ តិច​ ដដែល​ បាន​យក​ការ​ថ្លែង​ជា​ Video​ Clip​ របស់​លោក​ជំទាវ​ ថា​ក់​ ឡា​នី​ នា​ថ្ងៃ​ទី​២៩​ ខែកក្កដា​ ឆ្នាំ​២០១៦​ ក្នុង​វេទិកាសាធារណៈ​មួយ​នៅ​ខេត្តរតនគិរី​ថា​ "…​ហើយ​ឥឡូវ​ហ្នឹង​ ហ៊ុន​ សែន​ មិនដឹង​គិត​យ៉ាងម៉េច​ទៀត​ទេ​ នៅ​មិន​នៅ​ ចុះឡើងៗ​ ទៅ​បាញ់​លោក​ កឹ​ម​ ឡី​ (​សំដៅ​លោក​ កែម​ ឡី​)​ អ្នកវិភាគ​នយោបាយ​ ឃើញ​ទេ​…"​ ដើម្បី​ដាក់បន្ទុក​ប្តឹង​លោក​ជំទាវ​ ថា​ក់​ ឡា​នី​ សមាជិកា​ព្រឹទ្ធសភា​នៃ​ព្រះរាជាណាចក្រ​កម្ពុជា​នីតិកាល​ទី​៣​ មក​ពី​គណបក្ស​ សម​ រ​ង្ស៊ី​ ។​

​មជ្ឈដ្ឋាន​អ្នក​ច្បាប់​ឯករាជ្យ​នៅ​កម្ពុជា​ បាន​លើក​ឡើង​ថា​ ការ​ទាមទារ​សំណង​ជំងឺ​ចិត្ត​របស់​បុរស​ខ្លាំង​បញ្ជាក់​អំពី​ទំហំ​ជួសជុល​ការ​ខូចខាត​កិត្តិយស​ និង​កិត្យានុភាព​ដែល​បណ្តាល​មក​ពី​អំពើ​ល្មើស​របស់​លោក​ សម​ រ​ង្ស៊ី​ និង​លោក​ជំទាវ​ ថា​ក់​ ឡា​នី​ ក្នុង​ម្នាក់ៗ​ចំនួន​១០០(​មួយ​រយ​)​រៀល​នោះ​ គឺ​បាន​បង្ហាញ​ថា​ ព្យសនកម្ម​ដែល​បុរស​ខ្លាំង​ និង​រាជរដ្ឋាភិបាល​បាន​ទទួល​ មិន​មាន​ទំហំ​ធំធេង​អ្វី​ឡើយ​ ប៉ុន្តែ​ប្រការ​សំខាន់​ដែល​បុរស​ខ្លាំង​ចង់បាន​បំផុត​នោះ​ គឺ​ចង់​ឲ្យ​ស្ថាប័ន​តុលាការ​ធ្វើ​បណ្តឹងអាជ្ញា​ ក្នុង​គោលបំណង​ពិនិត្យ​អត្ថិភាព​នៃ​បទល្មើស​ បង្ហាញ​ឲ្យ​ឃើញ​ពិរុទ្ធភាព​នៃ​ជនល្មើស​ និង​ផ្តន្ទាទោស​ទៅ​លើ​លោក​ សម​ រ​ង្ស៊ី​ និង​លោក​ជំទាវ​ ថា​ក់​ ឡា​នី​ តែ​ម្តង​ ។​

​ដូច្នេះ​ មជ្ឈដ្ឋាន​នានា​រង់ចាំ​តាមដាន​មើល​នូវ​ចំណាត់ការ​របស់​ស្ថាប័ន​តុលាការ​ ដែល​ល្បី​ថា​ "​មិន​ឯករាជ្យ​"​ នោះ​ តើ​នឹង​ចោទប្រកាន់​បើក​ការ​ស៊ើបសួរ​និង​ផ្តន្ទាទោស​ទៅ​លើ​លោក​ សម​ រ​ង្ស៊ី​ និង​លោក​ជំទាវ​ ថា​ក់​ ឡា​នី​ យ៉ាងណា​ដែរ​ ក្នុង​ករណី​ព្យសនកម្ម​មាន​កម្រិត​តូចតាច​បែប​នេះ​ ?​ ៕​

Filed in: Feature, តុលាការ, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 012 858 205, 015 745 215 E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.