ថ្ងៃ ព្រហស្បតិ៍ ទី ១៧ ខែ តុលា ឆ្នាំ ២០១៩

រយៈពេល​០៤​ខែ​ បុរស​ខ្លាំង​ប្រែ​អារម្មណ៍​១៨០​អង្សា​ បន្ទាប់​ពី​បាន​បាយ​សាមគ្គី​ និង​ Selfie​ ជាមួយ​ទណ្ឌិត​ម្នាក់​

​យោង​តាម​អំណាច​សាលដីកា​ព្រហ្មទណ្ឌ​ស្ថាពរ​លេខ​១៧​ក្រ​៥.​ប​ ចុះ​ថ្ងៃ​ទី​១២​ ខែមីនា​ ឆ្នាំ​២០១៣​ របស់​សាលាឧទ្ធរណ៍​ ដែល​បាន​នាំ​ឲ្យ​សាលក្រម​ព្រហ្មទណ្ឌ​លេខ​៣២(​ច​)​ ចុះ​ថ្ងៃ​ទី​២៥​ ខែ​ម​សា​ ឆ្នាំ​២០១១​ និង​សាលក្រម​ព្រហ្មទណ្ឌ​លេខ​៨៩(​ច​)​ ចុះ​ថ្ងៃ​ទី​១៣​ ខែតុលា​ ឆ្នាំ​២០១១​ របស់​សាលាដំបូង​រាជធានី​ភ្នំពេញ​ចូល​ជា​ស្ថាពរ​នោះ​ គឺ​លោក​ សម​ រ​ង្ស៊ី​ ប្រធាន​គណបក្ស​សង្គ្រោះ​ជាតិ​ បាន​ជាប់​ឈ្មោះ​ជា​ទណ្ឌិត​ ត្រូវ​តុលាការ​ផ្តន្ទាទោស​ដាក់​ពន្ធនាគារ​កំណត់​២​ឆ្នាំ​ និង​ពិន័យ​ជា​ប្រាក់​ចំនួន​៨​លាន​រៀល​ ពី​បទ​បរិហារកេរ្តិ៍​ជា​សាធារណៈ​ និង​ញុះញង់​ឲ្យ​មានការ​រើសអើង​ ប៉ុន្តែ​ទណ្ឌិត​ឈ្មោះ​ សម​ រ​ង្ស៊ី​ មិន​ទាន់​បាន​អនុវត្តន៍​ទោស​នៅឡើយ​ទេ​ ។​

Sam--

​ទោះបីជា​លោក​ សម​ រ​ង្ស៊ី​ នៅ​ជាប់​ឈ្មោះ​ជា​ទណ្ឌិត​(​ជន​មានទោស​ជា​ស្ថាពរ​)​ក៏​ដោយ​ ក៏​ទណ្ឌិត​រូប​នេះ​ត្រូវ​បាន​គណៈកម្មាធិការ​ជាតិ​រៀបចំ​ការ​បោះ​ឆ្នោត​ និង​ប្រធានរដ្ឋសភា​នីតិកាល​ទី​៥​ សម្រេច​និង​ប្រកាស​ទទួលស្គាល់​ជា​អ្នកតំណាង​រាស្ត្រ​មណ្ឌល​ខេត្តកំពង់ចាម​ តាំងពី​ខែកក្កដា​ ឆ្នាំ​២០១៤​ និង​មានឱកាស​បាន​ចូលរួម​ប្រជុំ​ និង​អនុម័ត​ច្បាប់​ផ្សេងៗ​នៅ​ក្នុង​រដ្ឋសភា​ ព្រមទាំង​បាន​ធ្វើការ​ប្រាស្រ័យ​ទាក់ទង​ជាមួយ​សម្តេច​អគ្គមហាសេនាបតី​តេ​ជោ​ ហ៊ុន​ សែន​ ប្រធាន​គណបក្ស​ប្រជាជន​កម្ពុជា​ និង​សម្តេច​ក្រឡាហោម​ ស​ ខេ​ង​ អនុប្រធាន​គណបក្ស​ប្រជាជន​កម្ពុជា​…​។​ល​។​ ទៀត​ផង​ ។​

Court-to-CNRP

​លើស​ពី​នេះ​ ទណ្ឌិត​ សម​ រ​ង្ស៊ី​ និង​ក្រុម​គ្រួសារ​(​ប្រពន្ធ​-​កូនបង្កើត​ និង​កូនប្រសា​)​ មានឱកាស​ជា​កិត្តិយស​បាន​ទទួលទាន​បាយ​សាមគ្គី​ និង​ថតរូប​ Selfie​ ជាមួយ​សម្តេច​អគ្គមហាសេនាបតី​តេ​ជោ​ ហ៊ុន​ សែន​ ហៅ​បុរស​ខ្លាំង​ ប្រធាន​គណបក្ស​ប្រជាជន​កម្ពុជា​ អ្នកតំណាង​រាស្ត្រ​មណ្ឌល​ខេត្តកណ្តាល​ និង​ជា​នាយក​រដ្ឋមន្ត្រី​នៃ​ព្រះរាជាណាចក្រ​កម្ពុជា​ និង​ក្រុម​គ្រួសារ​(​ប្រពន្ធ​-​កូនបង្កើត​ និង​កូនប្រសា​)​យ៉ាង​ហ៊ឺហា​ ក្នុង​បរិយាកាស​ស្និទ្ធស្នាល​បំផុត​ កាលពី​រាត្រី​ថ្ងៃ​ទី​១១​ ខែកក្កដា​ ឆ្នាំ​២០១៥​កន្លង​ទៅ​ នៅ​សណ្ឋាគារ​ សូ​ហ្វី​តែ​ល​ កាំ​បូ​ឌី​យ៉ា​ណា​ រៀបចំ​ដោយ​លោក​ឧកញ៉ា​ គិត​ ម៉េ​ង​ ប្រធាន​សភាពាណិជ្ជកម្ម​កម្ពុជា​ និង​ជា​ឈ្មួញ​ដ៏​ល្បីឈ្មោះ​នៅ​កម្ពុជា​ ។​

Hun-Sen-Sam-Rainsy-s

​ស្រាប់តែ​រយៈពេល​០៤​ខែ​ក្រោយមក​ គឺ​កាលពី​រាត្រី​ថ្ងៃ​ទី​១១​ ខែវិច្ឆិកា​ រហូត​ដល់​ថ្ងៃ​ទី​១២​ ខែវិច្ឆិកា​ ឆ្នាំ​២០១៥​ អារម្មណ៍​របស់​បុរស​ខ្លាំង​បែរជា​មានការ​ប្រែប្រួល​យ៉ាង​ខ្លាំង​ដល់​១៨០​អង្សា​ ដោយ​សម្តែង​នូវ​ការ​ខឹងសម្បា​លើ​លោក​ សម​ រ​ង្ស៊ី​ រហូត​ប្រើ​ពាក្យ​ហៅ​លោក​ សម​ រ​ង្ស៊ី​ ថា​ជា​ “​កូន​អា​ក្បត់ជាតិ​”​ តាម​ប្រវត្តិសាស្ត្រ​បន្សល់​ទុក​ពី​សម័យ​សម្តេចព្រះ​ នរោត្តម​ សីហ​នុ​ ដោយ​បំភ្លេច​រាល់​អនុស្សាវរីយ៍​បាយ​សាមគ្គី​ និង​ថត​ Selfie​ ទាំង​ក្រុម​គ្រួសារ​ជាមួយ​គ្នា​អស់រលីង​ទៅ​វិញ​ ។​

Hun-Sen-Sam-Rainsy-families

​ក្រោយ​ការ​ផ្ទុះ​កំហឹង​តែ​មួយ​ថ្ងៃ​របស់​បុរស​ខ្លាំង​ទៅ​លើ​លោក​ សម​ រ​ង្ស៊ី​ ជា​ហូរហែ​នោះ​ ឯកឧត្តម​ ហោ​ ណាំ​ហុង​ ជា​សមាជិក​គណៈ​អចិន្ត្រៃយ៍​នៃ​គណៈកម្មាធិការ​កណ្តាល​គណបក្ស​ប្រជាជន​កម្ពុជា​ ជា​អ្នកតំណាង​រាស្ត្រ​មណ្ឌល​ខេត្តកំពង់ចាម​ ជា​ឧបនាយករដ្ឋមន្ត្រី​ រដ្ឋមន្ត្រី​ក្រសួងការបរទេស​ និង​សហប្រតិបត្តិការ​អន្តរជាតិ​ និង​ជាដើម​បណ្តឹង​ដែល​ប្តឹង​លោក​ សម​ រ​ង្ស៊ី​ តាម​រយៈ​លោក​ ការ​ សា​វុ​ត្ថ​ ជា​មេធាវី​តំណាង​សិទ្ធិ​ បាន​ដាក់​ពាក្យសុំ​អនុវត្តន៍​សាលដីកា​ព្រហ្មទណ្ឌ​ស្ថាពរ​លេខ​១៧​ក​៥.​ប​ ចុះ​ថ្ងៃ​ទី​១២​ ខែមីនា​ ឆ្នាំ​២០១៣​ របស់​សាលាឧទ្ធរណ៍​ ទៅ​អយ្យការ​អម​សាលាដំបូង​រាជធានី​ភ្នំពេញ​ ។​ នៅ​ថ្ងៃ​ដដែល​ តំណាង​អយ្យការ​អម​សាលាដំបូង​រាជធានី​ភ្នំពេញ​ បាន​ចេញ​ដីកា​បង្គាប់​ឲ្យ​កងកម្លាំង​សាធារណៈ​ចាប់​ និង​នាំ​ខ្លួន​ទណ្ឌិត​ឈ្មោះ​ សម​ រ​ង្ស៊ី​ យក​ទៅ​អនុវត្តន៍​ទោស​នៅ​ពន្ធនាគារ​ ខណៈ​លោក​ សម​ រ​ង្ស៊ី​ កំពុង​បំពេញបេសកកម្ម​នៅ​ប្រទេស​ជប៉ុន​ ។​ នៅថ្ងៃទី១៦ ខែវិច្ឆិកា ឆ្នាំ២០១៥ រដ្ឋសភាបានសម្រេចដកហូត សិទ្ធិ បុព្វសិទ្ធិ និងសមាជិកភាពជាសមាជិករដ្ឋសភាមណ្ឌលខេត្តកំពង់ចាម ពីលោក សម រង្ស៊ី ទាំងស្រុង ។

Sam-Rainsy-Sen-Family

​ចាប់តាំងពី​ថ្ងៃ​​តំណាង​អយ្យការ​អម​សាលាដំបូង​រាជធានី​ភ្នំពេញ​ ចេញ​ដីកា​បង្គាប់​ឲ្យ​ចាប់ខ្លួន​លោក​ សម​ រ​ង្ស៊ី​ តាម​ពាក្យ​ស្នើ​សុំ​អនុវត្តន៍​សាលដីកា​ព្រហ្មទណ្ឌ​របស់​សាលាឧទ្ធរណ៍​ ពី​សំណាក់​ឯកឧត្តម​ ហោ​ ណាំ​ហុង​ តាម​រយៈ​លោក​មេធាវី​ ការ​ សា​វុ​ត្ថ​ មក​ ទើប​មជ្ឈដ្ឋាន​ទូទៅ​ដឹង​ថា​ លោក​ សម​ រ​ង្ស៊ី​ គឺជា​ទណ្ឌិត​ម្នាក់​ដែល​មិន​ទាន់​បាន​អនុវត្តន៍​ទោស​ ប៉ុន្តែ​បែរជា​កន្លង​មក​ បាន​ក្លាយជា​អ្នកតំណាង​រាស្ត្រ​ចូលរួម​ប្រជុំ​ និង​អនុម័ត​ច្បាប់​ផ្សេងៗ​នៅ​ក្នុង​រដ្ឋសភា​ បាន​ទទួលទាន​បាយ​សាមគ្គី​ និង​ថត​ Selfie​ ពោរពេញ​ដោយ​កិត្តិយស​ និង​ស្និទ្ធស្នាល​ជាមួយ​បុរស​ខ្លាំង​ជា​នាយក​រដ្ឋមន្ត្រី​នៃ​ព្រះរាជាណាចក្រ​កម្ពុជា​ និង​បាន​ធ្វើ​ការងារ​យ៉ាងច្រើន​ជាមួយ​សម្តេច​ក្រឡាហោម​ ស​ ខេ​ង​ ឧបនាយករដ្ឋមន្ត្រី​ រដ្ឋមន្ត្រី​ក្រសួងមហាផ្ទៃ​ (Sic!)​ ។​

Sam-Raingsy---Hun-Sen4

​សូម​ប្រិ​យ​មិត្ត​អ្នក​អាន​មេត្តា​ជួយ​ពិចារណា​ និង​ផ្តល់​ពិន្ទុ​ផង​ទៅ​មើល​ថា​ តើ​កិត្តិយស​របស់​បុរស​ខ្លាំង​ និង​ក្រុម​គ្រួសារ​ ក្លាយជា​យ៉ាងណា​ដែរ​ នៅ​ពេល​បាន​ទទួលទាន​បាយ​សាមគ្គី​ និង​ថត​ Selfie​ ជាមួយ​លោក​ សម​ រ​ង្ស៊ី​ មានឈ្មោះ​ជា​ទណ្ឌិត​ ?​ តើ​កិត្យានុភាព​របស់​ស្ថាប័ន​រដ្ឋសភា​ទៅ​ជា​យ៉ាងណា​ដែរ​ នៅ​ពេល​ដែល​សម្តេច​អគ្គ​មហា​ពញា​ចក្រី​ ហេង​ សំ​រិ​ន​ ជា​ប្រធានរដ្ឋសភា​ ទទួលស្គាល់​ទណ្ឌិត​ឈ្មោះ​ សម​ រ​ង្ស៊ី​ ជា​អ្នកតំណាង​រាស្ត្រ​ បាន​ចូលរួម​ប្រជុំ​ និង​អនុម័ត​ច្បាប់​ផ្សេងៗ​នៅ​ក្នុង​រដ្ឋសភា​ អស់​រយៈពេល​ជាង​១​ឆ្នាំ​ ?​ តើ​មុខមាត់​របស់​សម្តេច​ក្រឡាហោម​ ស​ ខេ​ង​ ទៅ​ជា​យ៉ាងណា​ដែរ​ នៅ​ពេល​បាន​បំពេញការងារ​យ៉ាងច្រើន​រួច​ទៅ​ហើយ​ជាមួយ​ទណ្ឌិត​ឈ្មោះ​ សម​ រ​ង្ស៊ី​ ទោះ​បានដឹង​មុន​ ឬ​មិន​បានដឹង​ជា​មុន​ក្តី​ ?​ ៕​

Sam-Rainsy-987Sam-Rainsy-Sar-KhengSam-Rainsy-28-07-Letter

Filed in: Feature, តុលាការ, ទស្សនៈនយោបាយ, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 012 858 205, 015 745 215 E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.