ថ្ងៃ អង្គារ ទី ០៩ ខែ មីនា ឆ្នាំ ២០២១

បែកធ្លាយ​រឿង​មាន​គេ​រំដោះ​រថយន្ត​ពាក់​ស្លាក​លេខ​រដ្ឋ​ដឹកឈើ​ខុសច្បាប់​ ប្រើប្រាស់​ដោយ​សាកលវិទ្យាល័យ​បាត់ដំបង​ពី​រដ្ឋបាល​ព្រៃឈើ​

​សេចក្តីរាយការណ៍​ពី​ខេត្តបាត់ដំបង​ បាន​ឲ្យ​ដឹង​ថា​ ករណី​រថយន្ត​មួយ​គ្រឿង​ម៉ាក​ Toyota​ Land​ Cruiser​ ពាក់​ស្លាក​លេខ​រដ្ឋ​ 16.2-0238​ ប្រើប្រាស់​ដោយ​សាកលវិទ្យាល័យ​បាត់ដំបង​ ដែល​អ្នកបើកបរ​ឈ្មោះ​ បូ​រ៉ា​ យក​ទៅ​ធ្វើ​ជា​មធ្យោបាយ​ដឹក​ជញ្ជូន​ឈើ​ប្រណីត​ខុសច្បាប់​ ហើយ​ត្រូវ​កម្លាំង​សមត្ថកិច្ច​ចម្រុះ​បង្ក្រាប​ចាប់​បាន​ កាលពី​រាត្រី​ថ្ងៃ​ទី​២១​ ខែកញ្ញា​ ឆ្នាំ​២០១៥​ និង​រក្សា​ទុក​នៅ​រដ្ឋបាល​ព្រៃឈើ​ខេត្តបាត់ដំបង​នោះ​ ត្រូវ​បាន​ក្រុម​មន្ត្រី​សាកលវិទ្យាល័យ​បាត់ដំបង​ មាន​លោកស្រី​ សៀង​ឯម​ ទទឹម​ ជា​សាកល​វិទ្យា​ធិ​ការិនី​ សមគំនិត​ជាមួយ​មន្ត្រី​រដ្ឋបាល​ព្រៃឈើ​ រំដោះ​យក​មក​ទុក​នៅ​សាកលវិទ្យាល័យ​ខេត្តបាត់ដំបង​វិញ​ហើយ​ ដោយ​រុំ​តង់​កៅស៊ូ​ពណ៌​ខៀវ​បិទ​ជិត​ ខ្លាចក្រែង​ក្រុម​សាស្ត្រាចារ្យ​ និង​បុគ្គលិក​សិក្សា​ ព្រមទាំង​និស្សិត​បានដឹង​ និង​បានឃើញ​រឿងអាស្រូវ​ដ៏​ល្បីល្បាញ​នេះ​ ។​

UBB-Forest1

​ក្រុម​សាស្ត្រាចារ្យ​ និង​បុគ្គលិក​សិក្សា​នៃ​សាកលវិទ្យាល័យ​បាត់ដំបង​មួយ​ចំនួន​ បាន​បង្ហើប​ប្រាប់​ឲ្យ​ដឹង​ថា​ រថយន្ត​ម៉ាក​ Land​ Cruiser​ ប្រើប្រាស់​ដោយ​សាកលវិទ្យាល័យ​បាត់ដំបង​ ក្រោម​ឱវាទ​គ្រប់គ្រង​របស់​ក្រសួង​អប់រំ​ យុវជន​ និង​កីឡា​ ដែល​ក្លាយជា​មធ្យោបាយ​ដឹក​ជញ្ជូន​ឈើ​ប្រណីត​ខុសច្បាប់​ ហើយ​ត្រូវ​សមត្ថកិច្ច​ចាប់​បាន​ ក្រោម​រូបភាព​បទល្មើស​ជាក់ស្តែង​នោះ​ គឺជា​អតីត​រថយន្ត​ប្រើប្រាស់​ដោយ​សម្តេច​ក្រឡាហោម​ ស​ ខេ​ង​ ឧបនាយករដ្ឋមន្ត្រី​ រដ្ឋមន្ត្រី​ក្រសួងមហាផ្ទៃ​ ដែល​បច្ចុប្បន្ន​រថយន្ត​មួយ​គ្រឿង​នេះ​ បាន​ចុះ​ក្នុង​បញ្ជី​ជា​សម្បត្តិ​រដ្ឋ​ ក្រោម​ការ​គ្រប់គ្រង​របស់​ក្រសួង​អប់រំ​ យុវជន​ និង​កីឡា​ ប្រគល់​ឲ្យ​មន្ត្រី​សាកលវិទ្យាល័យ​បាត់ដំបង​ប្រើប្រាស់​ ដោយ​ពាក់​ស្លាក​លេខ​រដ្ឋ​ 16.2-0238​ ស្រប​តាម​មាត្រា​៥​ និង​មាត្រា​៩​នៃ​អនុក្រឹត្យ​របស់​រាជរដ្ឋាភិបាល​លេខ​៧៧​អន​ក្រ​.​បក​ ចុះ​ថ្ងៃ​ទី​២៨​ ខែវិច្ឆិកា​ ឆ្នាំ​២០០៣​ ស្តី​ពី​ការ​ចេញ​ស្លាក​លេខ​សម្គាល់​យានជំនិះ​ ។​

UBB

​មជ្ឈដ្ឋាន​អ្នក​ច្បាប់​ឯករាជ្យ​នៅ​កម្ពុជា​ បាន​លើក​ឡើង​ថា​ រថយន្ត​ពាក់​ស្លាក​លេខ​រដ្ឋ​ 16.2-0238​ ប្រើប្រាស់​ដោយ​សាកលវិទ្យាល័យ​បាត់ដំបង​ ដែល​ត្រូវ​បាន​បុគ្គល​មន្ត្រី​ខិលខូច​យក​ទៅ​ធ្វើ​ជា​មធ្យោបាយ​ដឹក​ជញ្ជូន​ឈើ​ប្រណីត​ខុសច្បាប់​ និង​ត្រូវ​សមត្ថកិច្ច​ចាប់​បាន​នោះ​ គឺជា​ការ​បំបាក់​មុខមាត់​សម្តេច​អគ្គមហាសេនាបតី​តេ​ជោ​ ហ៊ុន​ សែន​ នាយក​រដ្ឋមន្ត្រី​នៃ​ព្រះរាជាណាចក្រ​កម្ពុជា​ និង​សម្តេច​ក្រឡាហោម​ ស​ ខេ​ង​ ឧបនាយករដ្ឋមន្ត្រី​ រដ្ឋមន្ត្រី​ក្រសួងមហាផ្ទៃ​ អតីត​ជា​អ្នក​ប្រើប្រាស់​រថយន្ត​ ព្រមទាំង​ឯកឧត្តម​ បណ្ឌិត​ ហង់​ជួន​ ណា​រ៉ុ​ន​ រដ្ឋមន្ត្រីក្រសួង​អប់រំ​ យុវជន​ និង​កីឡា​ យ៉ាងធ្ងន់ធ្ងរ​ ។​ លើស​ពី​នេះ​ ការ​បង់លុយ​ជា​ថ្នូរ​រំដោះ​យក​វត្ថុ​តាង​ក្នុង​បទល្មើស​ព្រៃឈើ​ ដើម្បី​បិទ​បាំង​អំពើ​ខិលខូច​របស់​បុគ្គល​មន្ត្រី​មួយ​ចំនួន​នោះ​ គឺជា​ការ​រំលោភ​បំពាន​លើ​នីតិវិធី​នៃ​ច្បាប់​ថែម​ទៀត​ ។​

UBB1

​សាស្ត្រាចារ្យ​ និង​បុគ្គលិក​សិក្សា​ ក៏​ដូច​ជា​និស្សិត​នៃ​សាកលវិទ្យាល័យ​បាត់ដំបង​ ដែល​ដឹង​រឿងអាស្រូវ​កើត​មាន​ក្នុង​សាកលវិទ្យាល័យ​បាត់ដំបង​ខាងលើ​ បាន​សំណូមពរ​ចំពោះ​ឯកឧត្តម​បណ្ឌិត​ ឱម​ យ៉ិ​ន​ទៀង​ ទេស​រដ្ឋមន្ត្រី​ ទទួល​បន្ទុក​ប្រធាន​អង្គភាព​ប្រឆាំង​អំពើ​ពុក​រលួយ​(ACU)​ និង​ឯកឧត្តម​បណ្ឌិត​ ហង់​ជួន​ ណា​រ៉ុ​ន​ រដ្ឋមន្ត្រីក្រសួង​អប់រំ​ យុវជន​ និង​កីឡា​ មេត្តា​បើក​ការ​ស៊ើបអង្កេត​ និង​ចាត់វិធានការ​ទៅ​លើ​ថ្នាក់ដឹកនាំ​ និង​មន្ត្រី​ពាក់ព័ន្ធ​ ជា​ពិសេស​លោក​ អោ​ វុ​ត្ថា​ ប្រធាន​ការិយាល័យ​រដ្ឋបាល​ និង​ហិរញ្ញវត្ថុ​ នៃ​សាកលវិទ្យាល័យ​បាត់ដំបង​ ព្រមទាំង​មន្ត្រី​រដ្ឋបាល​ព្រៃឈើ​ ទាក់ទង​នឹង​ករណី​យក​រថយន្ត​ពាក់​ស្លាក​លេខ​រដ្ឋ​ជា​កម្មសិទ្ធិ​របស់​រដ្ឋ​ ទៅ​ប្រើប្រាស់​ជា​មធ្យោបាយ​ដឹក​ជញ្ជូន​ឈើ​ល្មើសច្បាប់​ទាំង​កំរោល​នោះ​ផង​ ៕​

 

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.