ថ្ងៃ អង្គារ ទី ០៩ ខែ មីនា ឆ្នាំ ២០២១

រដ្ឋមន្ត្រីក្រសួង​ការងារ​ទទួលស្គាល់​ឋានន្តរស័ក្តិ​ឧត្តមសេនីយ៍​ ជួន​ សុវណ្ណ​ ជា​ឧត្តមសេនីយ៍ឯក​(​ផ្កាយ​៣)​វិញ​ហើយ​

​យោង​តាម​សេចក្តីសម្រេច​លេខ​៤៤​សសរ​ ចុះ​ថ្ងៃ​ទី​១០​ ខែមិថុនា​ ឆ្នាំ​២០១៥​ ស្តី​ពី​ការ​បង្កើត​គណៈកម្មការ​អន្តរក្រសួង​ស៊ើបអង្កេត​ពិសេស​ លើ​ករណី​បណ្តឹង​លេខ​២៣១៨​ ស្តី​ពី​ករណី​ឃាតកម្ម​លើ​មេដឹកនាំ​សហជីព​ ជា​ វិជ្ជា​ លោក​ ហ៊ី​ វុ​ទ្ធី​ និង​លោក​ រស់​ សុ​វ​ណ្ណា​រ៉េ​ត​ និង​តាម​សំណើ​របស់​ឯកឧត្តម​ អ៊ិ​ត​ សំ​ហេង​ រដ្ឋមន្ត្រីក្រសួង​ការងារ​ និង​បណ្តុះបណ្តាល​វិជ្ជាជីវៈ​ រាជរដ្ឋាភិបាល​ធ្លាប់​បាន​តែងតាំង​សមាសភាព​គណៈកម្មការ​អន្តរក្រសួង​នេះ​ មាន​ចំនួន​១៣​រូប​ ដោយ​សេចក្តីសម្រេច​លេខ​៦០​សសរ​ ចុះ​ថ្ងៃ​ទី​០៤​ ខែសីហា​ ឆ្នាំ​២០១៥​ និង​ឯកឧត្តម​ រដ្ឋមន្ត្រីក្រសួង​ការងារ​ និង​បណ្តុះបណ្តាល​វិជ្ជាជីវៈ​ បាន​ហៅ​ឋានន្តរស័ក្តិ​លោក​ឧត្តមសេនីយ៍ឯក​ ជួន​ សុវណ្ណ​ ថា​ជា​ នាយ​ឧត្តមសេនីយ៍​(​ផ្កាយ​៤)​ ព្រមទាំង​ហៅ​មុខ​តំណែង​លោក​ឧត្តមសេនីយ៍ឯក​ ជួន​ សុវណ្ណ​ ថា​ជា​ អគ្គស្នងការ​រាជធានី​ភ្នំពេញ​ ខណៈ​សម្តេច​អគ្គមហាសេនាបតី​តេ​ជោ​ ហ៊ុន​ សែន​ នាយក​រដ្ឋមន្ត្រី​នៃ​ព្រះរាជាណាចក្រ​កម្ពុជា​ ក៏​ចេះ​តែ​ចុះហត្ថលេខា​លើ​សេចក្តីសម្រេច​ទាំង​ខុសឆ្គង​ដែរ​ទៅ​ (Sic!)​ ។​

​បន្ទាប់​ពី​គេហទំព័រ​សារព័ត៌មាន​ ដើម​ត្នោត​ បាន​ផ្សព្វផ្សាយ​នា​ថ្ងៃ​ទី​២២​ ខែសីហា​ ឆ្នាំ​២០១៥​កន្លង​ទៅ​ ក្រោម​ចំណងជើង​ថា​ "​រដ្ឋមន្ត្រីក្រសួង​ការងារ​ដំឡើង​ឋានន្តរស័ក្តិ​ថ្នាក់​នាយ​ឧត្តមសេនីយ៍​(​ផ្កាយ​៤)​ជូន​លោក​ឧត្តមសេនីយ៍ឯក​ ជួន​ សុវណ្ណ​"​រួច​មក​ រាជរដ្ឋាភិបាល​ក៏​បាន​ចេញ​សេចក្តីសម្រេច​មួយ​ថ្មី​ទៀត​លេខ​៧៣​សសរ​ ចុះ​ថ្ងៃ​ទី​១៥​ ខែកញ្ញា​ ឆ្នាំ​២០១៥​ តាម​សំណើ​របស់​រដ្ឋមន្ត្រីក្រសួង​ការងារ​និង​បណ្តុះបណ្តាល​វិជ្ជាជីវៈ​ដដែល​ ដោយ​បន្ថែម​សមាសភាព​សមាជិក​គណៈកម្មការ​ចំនួន​១​រូប​ទៀត​ គឺ​ឯកឧត្តម​ ឈិ​ត​ បូ​រ៉ា​វុ​ធ​ មេធាវី​រាជរដ្ឋាភិបាល​ និង​ជា​សមាជិក​ក្រុមប្រឹក្សា​អ្នក​ច្បាប់​នៃ​ទីស្តីការគណៈរដ្ឋមន្ត្រី​ និង​ងាក​មក​ទទួលស្គាល់​ឋានន្តរស័ក្តិ​លោក​ឧត្តមសេនីយ៍​ ជួន​ សុវណ្ណ​ ជា​ឧត្តមសេនីយ៍ឯក​(​ផ្កាយ​៣)​ និង​មុខ​តំណែង​ជា​អគ្គស្នងការ​រង​នគរបាល​ជាតិ​ និង​ជា​ស្នងការ​នគរបាល​រាជធានី​ភ្នំពេញ​ វិញ​ហើយៗ​សេចក្តីសម្រេច​លេខ​៦០​សសរ​ ចុះ​ថ្ងៃ​ទី​០៤​ ខែសីហា​ ឆ្នាំ​២០១៥​ របស់​រាជរដ្ឋាភិបាល​ ដែល​មានការ​ខុសឆ្គង​ទាក់ទង​នឹង​ការ​ហៅ​ឋានន្តរស័ក្តិ​ និង​មុខ​តំណែង​របស់​លោក​ឧត្តមសេនីយ៍ឯក​ ជួន​ សុវណ្ណ​ នោះ​ ត្រូវ​ទុកជា​និរាករណ៍​(សេចក្តីសម្រេចសរសេរខុសឆ្គងថា និរាយករណ៍) ។​

​មជ្ឈដ្ឋាន​អ្នក​តាមដាន​ព្រឹត្តិការណ៍​នយោបាយ​ និង​សង្គម​នៅ​កម្ពុជា​ បាន​លើក​ឡើង​ថា​ គណៈកម្មការ​អន្តរក្រសួង​នេះ​ ហាក់ដូចជា​មិន​ទាន់​បាន​ដំណើរការ​ស្រាវជ្រាវ​ប្រមូល​ព័ត៌មាន​ និង​ព័ស្តុតាង​ពាក់ព័ន្ធ​នឹង​ករណី​ឃាតកម្ម​ទៅ​លើ​លោក​ ជា​ វិជ្ជា​ ជា​អតីត​ប្រធាន​សហជីព​សេរី​កម្មករ​នៃ​ព្រះរាជាណាចក្រ​កម្ពុជា​ ដ៏​ល្បីឈ្មោះ​នោះ​នៅឡើយ​ទេ​ អស់​រយៈពេល​ជិត​០៤​ខែ​ហើយ​ គឺ​បាន​ត្រឹមតែ​ចេញ​សេចក្តីសម្រេច​ចុះឡើង​ និង​កែសម្រួល​សមាសភាព​គណៈកម្មការ​ប៉ុណ្ណោះ​ ៕​

Ith-Samheg-Letter1 Ith-Samheg-Letter Chea-Vechea-Ftu Chea-Vechea-Ftu1

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.