ថ្ងៃ សៅរ៏ ទី ០៨ ខែ សីហា ឆ្នាំ ២០២០

ហេតុ​អ្វី​បានជា​គណបក្សប្រឆាំង​មិន​ប្តឹង​ឲ្យ​មានការ​ពិនិត្យ​អំពី​ធម្មនុញ្ញភាព​សន្ធិសញ្ញា​កំណត់ព្រំដែន​កម្ពុជា​-​វៀតណាម​ ?

​ថ្នាក់ដឹកនាំ​គណបក្ស​សង្គ្រោះ​ជាតិ​ ដែល​ជា​គណបក្ស​នយោបាយ​ប្រឆាំង​ដ៏​ធំ​តែ​មួយ​គត់​ និង​មាន​អាសនៈ​នៅ​ក្នុង​រដ្ឋសភា​នៃ​ព្រះរាជាណាចក្រ​កម្ពុជា​ នីតិកាល​ទី​៥​ ធ្លាប់​បាន​ និង​បន្ត​ប្រកាន់​ជំហរ​របស់​ខ្លួន​អះអាង​ថា​ សន្ធិសញ្ញា​បំពេញបន្ថែម​រវាង​ព្រះរាជាណាចក្រ​កម្ពុជា​ និង​សាធារណរដ្ឋ​សង្គមនិយម​វៀតណាម​ ទៅ​លើ​សន្ធិសញ្ញា​កំណត់ព្រំដែន​រដ្ឋ​ឆ្នាំ​១៩៨៥​ ចុះហត្ថលេខា​ដោយ​សម្តេច​ ហ៊ុន​ សែន​ នាយក​រដ្ឋមន្ត្រី​នៃ​រាជរដ្ឋាភិបាល​កម្ពុជា​ និង​លោក​ ផា​ន​ វ៉ា​ន់ខា​យ​ នាយក​រដ្ឋមន្ត្រី​នៃ​សាធារណរដ្ឋ​សង្គមនិយម​វៀតណាម​ នា​ថ្ងៃ​ទី​១០​ ខែតុលា​ ឆ្នាំ​២០០៥​ នៅ​ទីក្រុង​ហាណូយ​ ប្រទេស​វៀតណាម​នោះ​ គឺ​ធ្វើ​ឲ្យ​កម្ពុជា​បាត់បង់​ទឹកដី​ ។​ លើស​ពី​នេះ​ មជ្ឈដ្ឋាន​ជា​ច្រើន​ទៀត​ក៏​បាន​អះអាង​ដែរ​ថា​ សន្ធិសញ្ញា​បំពេញបន្ថែម​រវាង​ព្រះរាជាណាចក្រ​កម្ពុជា​ និង​សាធារណរដ្ឋ​សង្គមនិយម​វៀតណាម​ ទៅ​លើ​សន្ធិសញ្ញា​កំណត់ព្រំដែន​ឆ្នាំ​១៩៨៥​ គឺ​មិន​ស្រប​ទៅ​នឹង​ឯករាជ្យ​ អធិបតេយ្យ​ បូរណភាព​ទឹកដី​ អព្យាក្រឹតភាព​ និង​ឯកភាព​ជាតិ​ របស់​ព្រះរាជាណាចក្រ​កម្ពុជា​ ដូច​មាន​ចែង​នៅ​ក្នុង​មាត្រា​២​ និង​មាត្រា​៥៥​ នៃ​រដ្ឋធម្មនុញ្ញ​នៃ​ព្រះរាជាណាចក្រ​កម្ពុជា​ (​ប្រើប្រាស់​ផែនទី​ខុស​ខ្នាត​)​ ។​ ប៉ុន្តែ​ទន្ទឹម​នឹង​នេះ​ មជ្ឈដ្ឋាន​ប្រជាពលរដ្ឋ​ដែល​បាន​តាមដាន​ដំណើរការ​បោះបង្គោល​ព្រំដែន​គោក​កម្ពុជា​-​វៀតណាម​ បាន​ចោទ​ជា​សំណួរ​ថា​ ហេតុ​អ្វី​បានជា​អ្នកតំណាង​រាស្ត្រ​មក​ពី​គណបក្ស​សង្គ្រោះ​ជាតិ​ មិន​ប្តឹង​ទៅ​ក្រុមប្រឹក្សាធម្មនុញ្ញ​ ឲ្យ​មានការ​ពិនិត្យ​អំពី​ធម្មនុញ្ញភាព​នៃ​សន្ធិសញ្ញា​កំណត់ព្រំដែន​កម្ពុជា​-​វៀតណាម​ តាម​នីតិវិធី​ ដើម្បី​ចង់បាន​ចម្លើយ​ពី​ស្ថាប័ន​ក្រុមប្រឹក្សាធម្មនុញ្ញ​ថា​ តើ​សន្ធិសញ្ញា​កំណត់ព្រំដែន​កម្ពុជា​-​វៀតណាម​ នោះ​ស្រប​ ឬ​មិន​ស្រប​នឹង​រដ្ឋធម្មនុញ្ញ​នៃ​ព្រះរាជាណាចក្រ​កម្ពុជា​ ?​ តើ​អាច​មាន​អាថ៌​កំបាំង​អ្វី​ដែរ​ឬទេ​ ?

​ប្រការ​៣​ ចំណុច​ទី​១​ និង​ចំណុច​ទី​២​ នៃ​សន្ធិសញ្ញា​បំពេញបន្ថែម​រវាង​ព្រះរាជាណាចក្រ​កម្ពុជា​ និង​សាធារណរដ្ឋ​សង្គមនិយម​វៀតណាម​ ទៅ​លើ​សន្ធិសញ្ញា​កំណត់ព្រំដែន​រដ្ឋ​ឆ្នាំ​១៩៨៥​ ដែល​បាន​ក្លាយជា​ច្បាប់​ និង​ត្រូវ​បាន​ប្រកាស​ឲ្យ​ប្រើ​ដោយ​ព្រះរាជក្រម​លេខ​ន​ស​/​រកម​/១១០៥/០៣៩​ ចុះ​ថ្ងៃ​ទី​៣០​ ខែវិច្ឆិកា​ ឆ្នាំ​២០០៥​ បាន​ចែង​ថា​ "​ដើម្បី​បង្ក​លក្ខណៈ​ងាយស្រួល​ដល់​ការងារ​បច្ចេកទេស​សម្រាប់​សម្រួល​ដល់​ដំណើរការ​ ការងារ​ខណ្ឌសីមា​ និង​បោះ​ង្គោ​ល​ព្រំដែន​គោក​ ភាគី​គូ​សន្យា​ទាំង​ពីរ​បាន​ឯកភាព​គ្នា​ ៖​ ១-​ក្រុម​ជំនាញ​បច្ចេកទេស​នៃ​ភាគី​នីមួយៗ​នឹង​ពិនិត្យ​ និង​ធ្វើការ​ផ្ទៀងផ្ទាត់​ជា​ឯកតោភាគី​នៃ​ការ​ចម្លង​ឡើង​វិញ​ នូវ​ខ្សែ​ព្រំដែន​ពី​ផែនទី​ Bonne​ ខ្នាត​ ១/១០០.០០០​ របស់​ក្រុម​ភូមិសាស្ត្រ​ឥណ្ឌូចិន​ អម​សន្ធិសញ្ញា​កំណត់ព្រំដែន​រដ្ឋ​ឆ្នាំ​១៩៨៥​ មក​លើ​ផែនទី​ UTM​ ខ្នាត​ ១/៥០.០០០​ អម​សន្ធិសញ្ញា​កំណត់ព្រំដែន​រដ្ឋ​ឆ្នាំ​១៩៨៥​ ។​ …,​ ២-​ភាគី​វៀតណាម​នឹង​ជួយ​ភាគី​កម្ពុជា​បោះពុម្ព​ឡើង​វិញ​នូវ​ផែនទី​ UTM​ ខ្នាត​ ១/៥០.០០០​ ចំនួន​៤០​ផ្ទាំង​ ដែល​មាន​ឋានលេខា​ដូច​គ្នា​នឹង​ផែនទី​ UTM​ ខ្នាត​ ១/៥០.០០០​ អម​សន្ធិសញ្ញា​កំណត់ព្រំដែន​ឆ្នាំ​១៩៨៥​ ជា​៥​ច្បាប់​ ។​"​ ។​ ពោល​គឺ​ សន្ធិសញ្ញា​កំណត់ព្រំដែន​កម្ពុជា​-​វៀតណាម​ បាន​ផ្តោត​លើ​ការ​ប្រើប្រាស់​ផែនទី​ UTM​ ខ្នាត​ ១/៥០.០០០​សឹង​ទាំងស្រុង​ ។​

​ដោយឡែក​ មាត្រា​២​ នៃ​រដ្ឋធម្មនុញ្ញ​នៃ​ព្រះរាជាណាចក្រ​កម្ពុជា​ បាន​ចែង​ថា​ "​បូរណភាព​ទឹកដី​របស់​ព្រះរាជាណាចក្រ​កម្ពុជា​ មិន​អាច​រំលោភ​បាន​ដាច់ខាត​ក្នុង​ព្រំដែន​របស់​ខ្លួន​ ដែល​មាន​កំណត់​ក្នុង​ផែនទី​ខ្នាត​ ១/១០០.០០០​ ធ្វើ​នៅ​ចន្លោះ​ឆ្នាំ​១៩៣៣-១៩៥៣​ ហើយ​ដែល​ត្រូវ​បាន​ទទួលស្គាល់​ជា​អន្តរជាតិ​ នៅ​ចន្លោះ​ឆ្នាំ​១៩៦៣-១៩៦៩​ ។​ "​ ។​

​អនុលោម​តាម​មាត្រា​២​នៃ​រដ្ឋធម្មនុញ្ញ​ ដែល​ជា​ច្បាប់​កំពូល​នៃ​ព្រះរាជាណាចក្រ​កម្ពុជា​ ដូច​មាន​ចែង​ខាងលើ​ គឺ​បាន​បង្ហាញ​ថា​ ការ​ប្រើប្រាស់​ផែនទី​ខ្នាត​១/៥០.០០០​ នៅ​ក្នុង​សន្ធិសញ្ញា​កំណត់ព្រំដែន​កម្ពុជា​-​វៀតណាម​ ទាំង​ឆ្នាំ​១៩៨៥​ក្តី​ ទាំង​ឆ្នាំ​២០០៥​ក្តី​ មិន​ស្រប​ទៅ​នឹង​មាត្រា​២​នៃ​រដ្ឋធម្មនុញ្ញ​ស្តី​ពី​បូរណភាព​ទឹកដី​ ដែល​កំណត់​ឲ្យ​ប្រើប្រាស់​ផែនទី​ខ្នាត​ ១/១០០.០០០​ នោះ​ទាំងស្រុង​ ។​

​មាត្រា​១៤១​ថ្មី​ កថាខណ្ឌ​ទី​១​ និង​មាត្រា​១៤២​ថ្មី​ នៃ​រដ្ឋធម្មនុញ្ញ​នៃ​ព្រះរាជាណាចក្រ​កម្ពុជា​ បាន​ចែង​ថា​ "​ក្រោយ​ពី​ច្បាប់​ណាមួយ​ត្រូវ​បាន​ប្រកាស​ឲ្យ​ប្រើ​ ព្រះមហាក្សត្រ​ ប្រធាន​ព្រឹទ្ធសភា​ ប្រធានរដ្ឋសភា​ នាយក​រដ្ឋមន្ត្រី​ សមាជិក​ព្រឹទ្ធសភា​ ចំនួន​មួយ​ភាគ​បួន​ តំណាងរាស្ត្រ​ចំនួន​មួយ​ភាគ​ដប់​ ឬ​តុលាការ​ អាច​សុំ​ឲ្យ​ក្រុមប្រឹក្សាធម្មនុញ្ញ​ពិនិត្យ​អំពី​ធម្មនុញ្ញភាព​នៃ​ច្បាប់​នោះ​ ។​ …​បទ​ប្បញ្ញត្តិ​ក្នុង​មាត្រា​ណា​ដែល​ក្រុមប្រឹក្សាធម្មនុញ្ញ​ប្រកាស​ថា​ មិន​ស្រប​នឹង​រដ្ឋធម្មនុញ្ញ​ មិន​អាច​យក​ទៅ​ប្រកាស​ឲ្យ​ប្រើ​ ឬ​យក​ទៅ​អនុវត្តន៍​បាន​ឡើយ​ ។​ សេចក្តីសម្រេច​របស់​ក្រុមប្រឹក្សាធម្មនុញ្ញ​ ជា​សេចក្តីសម្រេច​បិទផ្លូវ​តវ៉ា​ ។​ "​ ។​

​ដូច្នេះ​ បើ​យល់​ឃើញ​ថា​ ច្បាប់​ស្តី​ពី​ការ​អនុម័ត​យល់ព្រម​លើ​សន្ធិសញ្ញា​បំពេញបន្ថែម​រវាង​ព្រះរាជាណាចក្រ​កម្ពុជា​ និង​សាធារណរដ្ឋ​សង្គមនិយម​វៀតណាម​ ទៅ​លើ​សន្ធិសញ្ញា​កំណត់ព្រំដែន​រដ្ឋ​ឆ្នាំ​១៩៨៥​នោះ​ មិន​ស្រប​ទៅ​នឹង​រដ្ឋធម្មនុញ្ញ​ជា​ច្បាប់​កំពូល​នៃ​ព្រះរាជាណាចក្រ​កម្ពុជា​ ត្រង់​ការ​ប្រើប្រាស់​ "​ផែនទី​ខុស​ខ្នាត​"​ អាច​សង្ស័យ​នាំ​ឲ្យ​មានការ​បាត់បង់​ទឹកដី​កម្ពុជា​ ហេតុ​អ្វី​បានជា​អ្នកតំណាង​រាស្ត្រ​មក​ពី​គណបក្ស​សង្គ្រោះ​ជាតិ​ មិន​ព្រម​ប្តឹង​ទៅ​ស្ថាប័ន​ក្រុមប្រឹក្សាធម្មនុញ្ញ​ ឲ្យ​មានការ​ពិនិត្យ​អំពី​ធម្មនុញ្ញភាព​សន្ធិសញ្ញា​កំណត់ព្រំដែន​កម្ពុជា​-​វៀតណាម​ ដើម្បី​ឈាន​ទៅ​លុប​ចោល​ ឬ​មោឃភាព​សន្ធិសញ្ញា​កំណត់ព្រំដែន​កម្ពុជា​-​វៀតណាម​ ឆ្នាំ​២០០៥​ក្តី​ ឬ​ឆ្នាំ​១៩៨៥​ក្តី​ ?​ ហេតុ​អ្វី​អ្នកនយោបាយ​ចាប់អារម្មណ៍​នឹង​ការ​និយាយ​ ឬ​ជជែក​គ្នា​អំពី​ផែនទី​ក្លែងក្លាយ​ ហើយ​បែកគំនិត​ឈាន​ប្រុង​ទៅ​ធ្វើ​វិសោធនកម្ម​មាត្រា​២​នៃ​រដ្ឋធម្មនុញ្ញ​ ?​ ឬ​ក៏​ថ្នាក់ដឹកនាំ​គណបក្ស​សង្គ្រោះ​ជាតិ​ ឈ្វេងយល់​ឃើញ​ថា​ ស្ថាប័ន​ក្រុមប្រឹក្សាធម្មនុញ្ញ​ជា​ស្ថាប័ន​មិន​ឯករាជ្យ​ និង​លម្អៀង​ទៅ​ខាង​គណបក្ស​ប្រជាជន​កម្ពុជា​ ដែល​ជា​គណបក្ស​នយោបាយ​កាន់កាប់​អំណាច​ ទើប​មិន​ព្រម​ប្តឹង​ ឬ​មិន​ទាន់​ដល់​ពេល​ត្រូវ​ប្តឹង​ ?​ ឬ​ក៏​អាច​មាន​អាថ៌​កំបាំង​នយោបាយ​អ្វី​ផ្សេង​ទៀត​ ?

​សង្ឃឹមថា​ នា​ពេល​បច្ចុប្បន្ន​ក្តី​ ឬ​នៅ​ពេល​អនាគត​ខាង​មុខ​ឆាប់ៗ​ក្តី​ កម្ពុជា​នឹង​មាន​អ្នកនយោបាយ​គិតគូរ​អំពី​ផលប្រយោជន៍​ជាតិ​ និង​ប្រជាពលរដ្ឋ​ពិត​ប្រាកដជា​ចម្បង​ ចូលរួម​ដឹកនាំ​ប្រទេស​ជាតិ​ទាំងមូល​ឲ្យ​ស័ក្តិសម​មានឈ្មោះ​ថា​ "​ជា​អ្នកនយោបាយ​ជាតិ​"​ មិនមែន​ "​ជា​អ្នកនយោបាយ​ដូរ​បាយ​ ដូរ​បុណ្យស័ក្តិ​ និង​ដូរ​អំណាច​"​ ទៅ​ចុះ​ !​ ៕​

Cambodia-Vietnam-2005-1 Koh-Tral1

Filed in: Feature, ទស្សនៈនយោបាយ, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 012 858 205, 015 745 215 E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.