មុនចូលកាន់មុខតំណែងជានាយករដ្ឋមន្ត្រី គឺសម្តេចអគ្គមហាសេនាបតីតេជោ ហ៊ុន សែន ហៅបុរសខ្លាំង បានធ្វើសច្ចាប្រណិធាននៅចំពោះព្រះភ័ក្ត្រព្រះមហាក្សត្រ ព្រះភ័ក្ត្រនៃសម្តេចព្រះសង្ឃរាជ និងទេវតារក្សាស្វេតច្ឆត្រ ប្តេជ្ញាគោរពរដ្ឋធម្មនុញ្ញជាច្បាប់កំពូលនៃព្រះរាជាណាចក្រកម្ពុជា និងប្តេជ្ញាប្តូរផ្តាច់ហ៊ានបូជាជីវិតដើម្បីការពារជានិច្ចទាំងក្នុងបច្ចុប្បន្ន ទាំងក្នុងអនាគត នូវបូរណភាពទឹកដីដ៏ត្រឹមត្រូវតាមច្បាប់ នៅក្នុងព្រំដែនដីគោក និងព្រំដែនសមុទ្រដែលកម្ពុជាធ្លាប់មានក្នុងជំនាន់ឆ្នាំ១៩៦៣ដល់ឆ្នាំ១៩៦៩ ។
ទោះបីបានធ្វើសច្ចាប្រណិធានដូច្នេះ នៅមុនពេលចូលកាន់មុខតំណែងជានាយករដ្ឋមន្ត្រីក៏ដោយ ក៏រឿងពិតជាក់ស្តែងត្រូវបានមជ្ឈដ្ឋានអ្នកតាមដានព្រឹត្តិការណ៍នយោបាយនៅកម្ពុជា កត់សម្គាល់ឃើញថា បុរសខ្លាំងនៃកម្ពុជាបែរជាបានការពារ និងគោរពសន្ធិសញ្ញាកំណត់ព្រំដែនរដ្ឋរវាងប្រទេសកម្ពុជានិងប្រទេសវៀតណាមឆ្នាំ១៩៨៥យ៉ាងប្តូរផ្តាច់ មាំទាំ ជាងការគោរព និងការពាររដ្ឋធម្មនុញ្ញជាច្បាប់កំពូលនៃព្រះរាជាណាចក្រកម្ពុជា ជាពិសេសត្រង់មាត្រា២ស្តីពីបូរណភាពទឹកដីទៅវិញ ។
មាត្រា២នៃរដ្ឋធម្មនុញ្ញនៃព្រះរាជាណាចក្រកម្ពុជា បានចែងថា "បូរណភាពទឹកដីរបស់ព្រះរាជាណាចក្រកម្ពុជាមិនអាចរំលោភបានដាច់ខាតក្នុងព្រំដែនរបស់ខ្លួន ដែលមានកំណត់ក្នុងផែនទីខ្នាត១/១០០/០០០ ធ្វើនៅចន្លោះឆ្នាំ១៩៣៣-១៩៥៣ ហើយដែលត្រូវបានទទួលស្គាល់ជាអន្តរជាតិ នៅចន្លោះឆ្នាំ១៩៦៣-១៩៦៩ ។ " និងមាត្រា៥៥នៃរដ្ឋធម្មនុញ្ញដដែល បានចែងថា "សន្ធិសញ្ញា និងកិច្ចព្រមព្រៀងទាំងឡាយណាដែលមិនស្របនឹងឯករាជ្យ អធិបតេយ្យ បូរណភាពទឹកដី អព្យាក្រឹតភាព និងឯកភាពជាតិរបស់ព្រះរាជាណាចក្រកម្ពុជា ត្រូវលុបចោល ។ " ។
ដោយឡែក សន្ធិសញ្ញាកំណត់ព្រំដែនរដ្ឋរវាងសាធារណរដ្ឋប្រជាមានិតកម្ពុជា និងសាធារណរដ្ឋសង្គមវៀតណាម ចុះហត្ថលេខានាថ្ងៃទី២៧ ខែធ្នូ ឆ្នាំ១៩៨៥ ហៅកាត់ថា "សន្ធិសញ្ញាកំណត់ព្រំដែនរដ្ឋឆ្នាំ១៩៨៥" ត្រូវបានបុរសខ្លាំងក្នុងនាមជានាយករដ្ឋមន្ត្រីនៃព្រះរាជាណាចក្រកម្ពុជា បានលើកយកមកចុះហត្ថលេខាបំពេញបន្ថែមនៅទីក្រុងហាណូយប្រទេសវៀតណាម នាថ្ងៃទី១០ ខែតុលា ឆ្នាំ២០០៥ ជាមួយឯកឧត្តម ផាន វ៉ាន់ខាយ នាយករដ្ឋមន្ត្រីនៃសាធារណរដ្ឋសង្គមនិយមវៀតណាម ដោយដាក់ឈ្មោះថា "សន្ធិសញ្ញាបំពេញបន្ថែមរវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម ទៅលើសន្ធិសញ្ញាកំណត់ព្រំដែនរដ្ឋឆ្នាំ១៩៨៥" ។
ប្រការ៣ ចំណុចទី១ និងចំណុចទី២ នៃសន្ធិសញ្ញាបំពេញបន្ថែមរវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម ទៅលើសន្ធិសញ្ញាកំណត់ព្រំដែនរដ្ឋឆ្នាំ១៩៨៥ បានចែងថា "ដើម្បីបង្កលក្ខណៈងាយស្រួលដល់ការងារបច្ចេកទេសសម្រាប់សម្រួលដល់ដំណើរការការងារខណ្ឌសីមា និងបោះបង្គោលព្រំដែនគោក ភាគីគូសន្យាទាំងពីរបានឯកភាពគ្នា ៖ ១-ក្រុមជំនាញបច្ចេកទេសនៃភាគីនីមួយៗនឹងពិនិត្យ និងធ្វើការផ្ទៀងផ្ទាត់ជាឯកតោភាគីនៃការចម្លងឡើងវិញនូវខ្សែព្រំដែនពីផែនទី Bonne ខ្នាត ១/១០០.០០០ របស់ក្រុមភូមិសាស្ត្រឥណ្ឌូចិន អមសន្ធិសញ្ញាកំណត់ព្រំដែនឆ្នាំ១៩៨៥ មកលើផែនទី UTM ខ្នាត ១/៥០.០០០ អមសន្ធិសញ្ញាកំណត់ព្រំដែនឆ្នាំ១៩៨៥ ។… ២-ភាគីវៀតណាមនឹងជួយភាគីកម្ពុជាបោះពុម្ពឡើងវិញនូវផែនទី UTM ខ្នាត១/៥០.០០០ ចំនួន៤០ផ្ទាំងដែលមានឋានលេខាដូចគ្នានឹងផែនទី UTM ខ្នាត១/៥០.០០០ អមសន្ធិសញ្ញាកំណត់ព្រំដែនឆ្នាំ១៩៨៥ ជា៥ច្បាប់ ។ " ។
ក្រោយមក ទោះបីមានមជ្ឈដ្ឋានមួយចំនួន ជាពិសេសក្រុមប្រឹក្សាឃ្លាំមើលកម្ពុជា (Cambodia Watchdog Council-CWC) មានលោក រ៉ុង ឈុន, លោក ជា មុនី, លោក ម៉ែន ណាត និងលោក អៀ ចាន់ណា ជាតំណាង បានចេញសេចក្តីថ្លែងការណ៍ចុះថ្ងៃទី១១ ខែតុលា ឆ្នាំ២០០៥ ប្រតិកម្មទៅនឹងការចុះហត្ថលេខារបស់បុរសខ្លាំង លើសន្ធិសញ្ញាបំពេញបន្ថែមរវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម ទៅលើសន្ធិសញ្ញាកំណត់ព្រំដែនរដ្ឋឆ្នាំ១៩៨៥ថា មិនស្របនឹងរដ្ឋធម្មនុញ្ញនៃព្រះរាជាណាចក្រកម្ពុជាក៏ដោយ បែរជាបុរសខ្លាំងធ្វើការចោទប្រកាន់ និងចាប់ឃុំខ្លួនសមាសភាពរបស់ CWC ទៅវិញ ហើយជំរុញឲ្យព្រះករុណាព្រះមហាក្សត្រជាទីសក្ការៈឡាយព្រះហស្តលេខាលើព្រះរាជក្រមលេខនស/រកម/១១០៥/០៣៩ ចុះថ្ងៃទី៣០ ខែវិច្ឆិកា ឆ្នាំ២០០៥ ប្រកាសឲ្យប្រើច្បាប់ស្តីពីការអនុម័តយល់ព្រមលើសន្ធិសញ្ញាបំពេញបន្ថែមរវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម ទៅលើសន្ធិសញ្ញាកំណត់ព្រំដែនរដ្ឋឆ្នាំ១៩៨៥បានសម្រេច ។
មជ្ឈដ្ឋានអ្នកច្បាប់ឯករាជ្យ និងអ្នកតាមដានព្រឹត្តិការណ៍នយោបាយនៅកម្ពុជា បានលើកឡើងថា ការប្រើប្រាស់ផែនទីដើម្បីកំណត់ព្រំដែនរដ្ឋឆ្នាំ១៩៨៥រវាងប្រទេសកម្ពុជា និងប្រទេសវៀតណាមដែលត្រូវបានបំពេញបន្ថែមនៅឆ្នាំ២០០៥ខ្នាត១/៥០.០០០ ហើយត្រូវភាគីវៀតណាមជួយបោះពុម្ពឲ្យភាគីកម្ពុជាចំនួន៤០ផ្ទាំង គឺមានភាពផ្ទុយគ្នាទាំងស្រុងទៅនឹងផែនទីខ្នាត១/១០០.០០០ ដែលកំណត់នៅក្នុងមាត្រា២នៃរដ្ឋធម្មនុញ្ញជាច្បាប់កំពូលនៃព្រះរាជាណាចក្រកម្ពុជា ។
សរុបសេចក្តីមក បុរសខ្លាំងនៃកម្ពុជាក្នុងនាមជានាយករដ្ឋមន្ត្រីនៃព្រះរាជាណាចក្រកម្ពុជា បានបង្ហាញនូវជំហរការពារសន្ធិសញ្ញាកំណត់ព្រំដែនរដ្ឋរវាងកម្ពុជានិងវៀតណាមឆ្នាំ១៩៨៥ យ៉ាងប្តូរផ្តាច់ជាងការគោរព និងការពាររដ្ឋធម្មនុញ្ញនៃព្រះរាជាណាចក្រកម្ពុជាត្រង់មាត្រា២ ស្តីពីបូរណភាពទឹកដី ដូចបានធ្វើសច្ចាប្រណិធានមុនចូលកាន់មុខតំណែងចែងក្នុងមាត្រា១១៩ថ្មី ឧបសម្ព័ន្ធទី៦នៃរដ្ឋធម្មនុញ្ញ ៕
