ថ្ងៃ ព្រហស្បតិ៍ ទី ២៨ ខែ តុលា ឆ្នាំ ២០២១

ប្រធានរដ្ឋសភា​បក្ស​កាន់​អំណាច​ផ្តល់​ការ​អធ្យាស្រ័យ​ត្រឹម​ដាក់​ទណ្ឌកម្ម​វិន័យ​លើ​អ្នកតំណាង​រាស្ត្រ​ អ៊ុំ​ សំ​អាន​

​នៅ​ថ្ងៃ​ទី​២៥​ ខែកក្កដា​ ឆ្នាំ​២០១៥​នេះ​ បន្ទាប់​ពី​ទទួល​បាន​លិខិត​ចុះ​ថ្ងៃ​ទី​២៤​ ខែកក្កដា​ ឆ្នាំ​២០១៥​ម្សិលមិញ​ របស់​ឯកឧត្តម​ អ៊ុំ​ សំ​អាន​ អ្នកតំណាង​រាស្ត្រ​មណ្ឌល​ខេត្តសៀមរាប​ មក​ពី​គណបក្ស​សង្គ្រោះ​ជាតិ​ ដែល​ជា​គណបក្ស​នយោបាយ​ប្រឆាំង​ដ៏​ធំ​នៅ​កម្ពុជា​ សុំ​ការ​អធ្យាស្រ័យ​ និង​អត់ឱន​ ពី​សម្តេច​អគ្គ​មហា​ពញា​ចក្រី​ ហេង​ សំ​រិ​ន​ ប្រធានរដ្ឋសភា​នីតិកាល​ទី​៥​រួច​មក​ គឺ​សម្តេច​អគ្គ​មហា​ពញា​ចក្រី​ ប្រធានរដ្ឋសភា​ និង​ជា​អ្នកតំណាង​រាស្ត្រ​មណ្ឌល​ខេត្តកំពង់ចាម​ មក​ពី​គណបក្ស​ប្រជាជន​កម្ពុជា​ ដែល​ជា​គណបក្ស​កាន់កាប់​អំណាច​នៅ​កម្ពុជា​ បាន​ធ្វើ​ចំណារ​ជា​លាយលក្ខណ៍អក្សរ​ផ្តល់​នូវ​ការ​អធ្យាស្រ័យ​ចំពោះ​ឯកឧត្តម​ អ៊ុំ​ សំ​អាន​ ដោយ​បញ្ចប់​ត្រឹម​ការ​ដាក់​ទណ្ឌកម្ម​ខាង​វិន័យ​ ដូច​មាន​ចែង​ក្នុង​ស្មារតី​សេចក្តីសម្រេច​លេខ​២០១​រ​.​ស​ ចុះ​ថ្ងៃ​ទី​២៤​ ខែកក្កដា​ ឆ្នាំ​២០១៥​ របស់​រដ្ឋសភា​ ។​

​យោង​តាម​ចំណារ​ផ្តល់​ការ​អធ្យាស្រ័យ​របស់​សម្តេច​អគ្គ​មហា​ពញា​ចក្រី​ ហេង​ សំ​រិ​ន​ ប្រធានរដ្ឋសភា​មក​ពី​គណបក្ស​កាន់កាប់​អំណាច​ ទៅ​លើ​ឯកឧត្តម​ អ៊ុំ​ សំ​អាន​ អ្នកតំណាង​រាស្ត្រ​មណ្ឌល​ខេត្តសៀមរាប​ដូច្នេះ​ ធ្វើ​ឲ្យ​មជ្ឈដ្ឋាន​នានា​ផ្តោតអារម្មណ៍​ថា​ ប្រសិនបើ​ឯកឧត្តម​ អ៊ុំ​ សំ​អាន​ មិន​ធ្វើ​លិខិត​លាយលក្ខណ៍អក្សរ​ជា​ផ្លូវការ​សុំ​ការ​អធ្យាស្រ័យ​ពី​សម្តេច​អគ្គ​មហា​ពញា​ចក្រី​ ប្រធានរដ្ឋសភា​ទេ​នោះ​ ទំនងជា​សម្តេច​អគ្គ​មហា​ពញា​ចក្រី​ ប្រធានរដ្ឋសភា​នឹង​មាន​វិធានការ​លើស​ពី​នេះ​ទៀត​ក៏​ថា​បាន​ ឬ​ក៏​ឈាន​ប្តឹងផ្តល់​ទៅ​តុលាការ​ឲ្យ​មានការ​ដាក់ទោស​ទណ្ឌ​ ?​ (Sic!)​ ។​

​គួរ​រំលឹក​ជូន​ថា​ កាលពី​ថ្ងៃ​ទី​២៤​ ខែកក្កដា​ ឆ្នាំ​២០១៥​ម្សិលមិញ​នេះ​ យោង​តាម​ញត្តិ​របស់​អ្នកតំណាង​រាស្ត្រ​មក​ពី​គណបក្ស​ប្រជាជន​កម្ពុជា​ ជា​ពិសេស​ឯកឧត្តម​ ឈាង​ វុន​ អ្នកតំណាង​រាស្ត្រ​ល្បីឈ្មោះ​នៅ​មណ្ឌល​ខេត្តបាត់ដំបង​ មក​ពី​គណបក្ស​ប្រជាជន​កម្ពុជា​ នា​ថ្ងៃ​ទី​២១​ ខែកក្កដា​ ឆ្នាំ​២០១៥​ និង​ស្មារតី​អង្គប្រជុំ​ថ្ងៃ​ទី​២៤​ ខែកក្កដា​ ឆ្នាំ​២០១៥​ របស់​គណៈកម្មាធិការ​អចិន្ត្រៃយ៍​រដ្ឋសភា​ ឯកឧត្តម​ អ៊ុំ​ សំ​អាន​ អ្នកតំណាង​រាស្ត្រ​មណ្ឌល​ខេត្តសៀមរាប​ មក​ពី​គណបក្ស​សង្គ្រោះ​ជាតិ​ ដែល​ចូល​ចិត្ត​ឈឺឆ្អាល​ទៅ​នឹង​កិច្ចការ​ប្រទេស​ជាតិ​ (​ពិសេស​បញ្ហា​ព្រំដែន​រវាង​ប្រទេស​កម្ពុជា​និង​វៀតណាម​)​ ត្រូវ​បាន​រដ្ឋសភា​នីតិកាល​ទី​៥​សម្រេច​ដាក់​ទណ្ឌកម្ម​វិន័យ​កាត់​ប្រាក់​បំណាច់​ប្រចាំខែ​៥០%​ ក្នុង​រយៈពេល​០២​ខែ​ និង​ហាម​មិន​ឲ្យ​ចូល​ធ្វើការ​ក្នុង​រដ្ឋសភា​ក្នុង​វេលា​១៥​ពេល​ប្រជុំ​ជា​បន្តបន្ទាប់​ ដោយ​សេចក្តីសម្រេច​លេខ​២០១​ រ​.​ស​ ចុះ​ថ្ងៃ​ទី​២៤​ ខែកក្កដា​ ឆ្នាំ​២០១៥​ ចុះហត្ថលេខា​ដោយ​សម្តេច​អគ្គ​មហា​ពញា​ចក្រី​ ហេង​ សំ​រិ​ន​ ជា​ប្រធានរដ្ឋសភា​ ។​

​មជ្ឈដ្ឋាន​អ្នកវិភាគ​នយោបាយ​ឯករាជ្យ​នៅ​កម្ពុជា​ បាន​សម្តែង​នូវ​ការ​សោកស្តាយ​ចំពោះ​ចំណាត់ការ​របស់​សម្តេច​អគ្គ​មហា​ពញា​ចក្រី​ ហេង​ សំ​រិ​ន​ ប្រធានរដ្ឋសភា​នីតិកាល​ទី​៥​ ទៅ​លើ​ឯកឧត្តម​ អ៊ុំ​ សំ​អាន​ អ្នកតំណាង​រាស្ត្រ​មណ្ឌល​ខេត្តសៀមរាប​ ដែល​គ្រាន់តែ​មានការ​លើក​ឡើង​ទាក់ទង​ទៅ​នឹង​សម្តេច​អគ្គ​មហា​ពញា​ចក្រី​ ប្រធានរដ្ឋសភា​មិន​ចុះហត្ថលេខា​បញ្ជូន​លិខិត​របស់​ក្រុម​អ្នកតំណាង​រាស្ត្រ​ មក​ពី​គណបក្ស​សង្គ្រោះ​ជាតិ​ ជូន​ទៅ​សម្តេច​អគ្គមហាសេនាបតី​តេ​ជោ​ ហ៊ុន​ សែន​ នាយក​រដ្ឋមន្ត្រី​នៃ​ព្រះរាជាណាចក្រ​កម្ពុជា​ ពាក់ព័ន្ធ​នឹង​បញ្ហា​ព្រំដែន​កម្ពុជា​-​វៀតណាម​ ក្នុង​ន័យ​បំពេញការងារ​សំដៅ​បម្រើ​ឲ្យ​កិច្ចការ​ប្រទេស​ជាតិ​ពិតប្រាកដ​ ហើយ​ការ​ដាក់​ទណ្ឌកម្ម​វិន័យ​ទៅ​លើ​ឯកឧត្តម​ អ៊ុំ​ សំ​អាន​ នោះ​ទៀត​សោត​ ហាក់​មិន​បាន​ឆ្លងកាត់​ការ​សម្របសម្រួល​ពី​ប្រធាន​ក្រុម​តំណាង​សំឡេង​ភាគច្រើន​ និង​ប្រធាន​ក្រុម​តំណាង​សំឡេង​ភាគតិច​នៅ​ក្នុង​រដ្ឋសភា​ជា​មុន​ ដើម្បី​រក​ដំណោះស្រាយ​ក្នុង​ន័យ​សម្របសម្រួល​បង្ហាញ​អំពី​ភាព​ចាស់ទុំ​ខាង​នយោបាយ​ និង​កិត្យានុភាព​របស់​រដ្ឋសភា​ឡើយ​ ៕​

Um-Sam-An-Heng-Samrin Um-Sam-An-Letter1Um-Sam-An-Letter

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.