ថ្ងៃ ព្រហស្បតិ៍ ទី ២៧ ខែ កម្ភៈ ឆ្នាំ ២០២០

បុរស​ខ្លាំង​មើល​រំលង​ករណី​ទណ្ឌិត​ ឈូក​ បណ្ឌិត​ ដែល​មាន​សេរីភាព​នៅ​ក្រៅ​គុក​ និង​មិន​លុបឈ្មោះ​ពី​ក្របខ័ណ្ឌ​មន្ត្រី​

​សំណុំរឿង​ទណ្ឌិត​ ឈូក​ បណ្ឌិត​ អតីត​អភិបាលក្រុង​បា​វិត​នៃ​ខេត្តស្វាយរៀង​ ពាក់ព័ន្ធ​នឹង​ការ​បាញ់ប្រហារ​ទៅ​លើ​កម្មការិនី​ចំនួន​៣​នាក់​ បម្រើ​ការងារ​នៅ​រោងចក្រ​ផលិត​ស្បែកជើង​កៅ​វ៉េ​ (Kao​ Way)​ ឋិត​ក្នុង​តំបន់​សេដ្ឋកិច្ច​ពិសេស​បា​វិត​ បណ្តាល​ឲ្យ​រង​របួស​ធ្ងន់ធ្ងរ​សឹង​បាត់បង់​ជីវិត​ កាលពី​ថ្ងៃ​ទី​២០​ ខែកុម្ភៈ​ ឆ្នាំ​២០១២​កន្លង​ទៅ​នោះ​ ត្រូវ​បាន​មជ្ឈដ្ឋាន​នានា​ រួម​ទាំង​ប្រិ​យ​មិត្ត​អ្នកលេង​បណ្តាញ​ព័ត៌មាន​សង្គម​ Facebook​ ដ៏​ពេញ​និយម​ផង​ លើក​មក​និយាយ​ឡើង​វិញ​ បន្ទាប់​ពី​សម្តេច​អគ្គមហាសេនាបតី​តេ​ជោ​ ហ៊ុន​ សែន​ ហៅ​បុរស​ខ្លាំង​ នាយក​រដ្ឋមន្ត្រី​នៃ​ព្រះរាជាណាចក្រ​កម្ពុជា​ និង​សម្តេច​ក្រឡាហោម​ ស​ ខេ​ង​ ឧបនាយករដ្ឋមន្ត្រី​ រដ្ឋមន្ត្រី​ក្រសួងមហាផ្ទៃ​ បញ្ចេញ​ប្រតិកម្ម​ទៅ​នឹង​ករណី​លោក​ឧកញ៉ា​ សុខ​ ប៊ុ​ន​ ដែល​បាន​ប្រព្រឹត្ត​អំពើ​ហិង្សា​ទៅ​លើ​កញ្ញា​ ឯក​ សុជាតា​ ហៅ​ សា​សា​ អតីត​ពិធី​ការិនី​ស្ថានីយ៍ទូរទស្សន៍​ CTN​ ជា​បន្តបន្ទាប់​រួច​មក​ ។​

​ការ​ថ្លែង​ប៉ុន្មាន​ម៉ាត់​របស់​បុរស​ខ្លាំង​ កាលពី​ថ្ងៃ​ទី​១៦​ ខែកក្កដា​ ឆ្នាំ​២០១៥​កន្លង​ទៅ​ថ្មីៗ​ ធ្វើ​ឲ្យ​លោក​ឧកញ៉ា​ សុខ​ ប៊ុ​ន​ ដែល​កំពុង​ឋិត​នៅ​ឯ​បរទេស​ ក្នុង​បំណង​គេចវេះ​ពី​ការ​តាម​ចាប់ខ្លួន​ដោយ​សមត្ថកិច្ច​នោះ​ ត្រូវ​បាន​ភាគី​ពាក់ព័ន្ធ​ខ្នះខ្នែង​តាម​ស្វែងរក​ចាប់ខ្លួន​លោក​ឧកញ៉ា​ សុខ​ ប៊ុ​ន​ រហូត​ដល់​បរទេស​ តាម​រយៈ​ប៉ូលិស​អាំង​ទែ​ប៉ូ​ល​ ហើយ​ក៏​បាន​ជំរុញ​ឲ្យ​លោក​ឧកញ៉ា​ សុខ​ ប៊ុ​ន​ សម្រេចចិត្ត​វិល​ត្រឡប់​ចូល​មក​មាតុភូមិ​វិញ​យ៉ាង​តក់ក្រហល់​ នាថ្ងៃទី១៨ ខែកក្កដា ឆ្នាំ២០១៥នេះ គឺមុន​កាលកំណត់​ ដែល​ប្រកាស​ថា​ នឹង​វិល​ចូល​មក​នៅ​ថ្ងៃ​ទី​២០​ ខែកក្កដា​ ឆ្នាំ​២០១៥​ខាង​មុខ​ ។​

​ដោយឡែក​ ករណី​លោក​ ឈូក​ បណ្ឌិត​ អតីត​អភិបាលក្រុង​បា​វិត​ ដែល​ជា​មន្ត្រីរាជការ​ ត្រូវ​បាន​ស្ថាប័ន​តុលាការ​កំពូល​វិនិច្ឆ័យ​សេចក្តី​នា​ថ្ងៃ​ទី​២៦​ ខែធ្នូ​ ឆ្នាំ​២០១៤​ សម្រេច​ផ្តន្ទាទោស​ដាក់​ពន្ធនាគារ​កំណត់​១៨​ខែ​ ពី​បទ​បង្ក​របួស​ស្នាម​ដោយ​អ​ចេតនា​ និង​បង្គាប់​ឲ្យ​បង់ប្រាក់​ចំនួន​៣៨​លាន​រៀល​ ឲ្យ​ទៅ​ជន​រង​គ្រោះជា​កម្មការិនី​ចំនួន​៣​នាក់​ជាដើម​បណ្តឹងរដ្ឋប្បវេណី​ ព្រមទាំង​បង្គាប់​ឲ្យ​សមត្ថកិច្ច​សាធារណៈ​តាម​ស្វែងរក​ចាប់ខ្លួន​តាំងពី​ពាក់កណ្តាល​ឆ្នាំ​២០១៣​រួច​ហើយ​នោះ​ បែរជា​ត្រូវ​បាន​បុរស​ខ្លាំង​មើល​រំលង​ មិន​បញ្ចេញ​ប្រតិកម្ម​មួយ​ម៉ាត់​សោះ​ ទុក​ឱកាស​ឲ្យ​ទណ្ឌិត​ ឈូក​ បណ្ឌិត​ ទទួល​បាន​សេរីភាព​ឋិត​នៅ​ក្រៅ​ពន្ធនាគារ​ដើម្បី​អនុវត្តន៍​ទោស​ អស់​រយៈពេល​ជា​ច្រើន​ឆ្នាំទៅ​វិញ​ និង​ជន​រង​គ្រោះ​ទាំង​៣​នាក់​ក៏​មិន​ទាន់​បាន​ទទួល​សំណង​រដ្ឋប្បវេណី​ពី​ជន​ប្រព្រឹត្ត​ល្មើស​ផង​ដែរ​ ។​

​មជ្ឈដ្ឋាន​អ្នក​ច្បាប់​ និង​អ្នក​តាមដាន​សំណុំរឿង​លោក​ ឈូក​ បណ្ឌិត​ បាន​លើក​ឡើង​ថា​ ទោះបី​លោក​ ឈូក​ បណ្ឌិត​ អតីត​អភិបាលក្រុង​បា​វិត​ ក្លាយទៅជា​ទណ្ឌិត​តាម​អំណាច​សាលដីកា​ព្រហ្មទណ្ឌ​របស់​តុលាការ​កំពូល​រួច​ហើយ​ក៏​ដោយ​ ក៏​ទណ្ឌិត​រូប​នេះ​ទទួល​បាន​នូវ​ភ័ព្វ​សំណង​ចំនួន​២​ទល់​សព្វថ្ងៃ​ គឺ​ ៖​ ១-​មិន​ត្រូវ​បាន​សមត្ថកិច្ច​ចាប់ខ្លួន​យក​មក​ឲ្យ​អនុវត្តន៍​ទោស​នៅ​ក្នុង​ពន្ធនាគារ​ និង​២-​មិន​ត្រូវ​បាន​រាជរដ្ឋាភិបាល​លុបឈ្មោះ​ចេញពី​ក្របខ័ណ្ឌ​មន្ត្រីរាជការ​ស៊ី​វិល​នៅឡើយ​ ។​

​ក្រុម​អ្នក​ច្បាប់​ឯករាជ្យ​នៅ​កម្ពុជា​ បាន​ធ្វើការ​ពន្យល់​ថា​ អនុលោម​តាម​បញ្ញត្តិ​មាត្រា​៥៣​ កថាខណ្ឌ​ទី​២​ នៃ​ច្បាប់​ស្តី​ពី​សហលក្ខន្តិកៈ​មន្ត្រីរាជការ​ស៊ី​វិល​នៃ​ព្រះរាជាណាចក្រ​កម្ពុជា​ ដែល​បាន​ចែង​ថា​ "​ការ​ផ្តន្ទាទោស​ជា​បទឧក្រិដ្ឋ​ ឬ​ជា​បទមជ្ឈិម​ដោយ​ឥត​ព្យួរទោស​ បណ្តាល​ឲ្យ​មានការ​ហូតងារ​អ្នករាជការ​នោះ​ គិត​ពី​ថ្ងៃ​សាលក្រម​ចូល​ជា​ស្ថាពរ​ ។​ "​ ដូច្នេះ​ លោក​ ឈូក​ បណ្ឌិត​ ដែល​ក្លាយជា​ទណ្ឌិត​ទៅ​ហើយ​នោះ​ ត្រូវ​តែ​លុបឈ្មោះ​ចេញពី​ក្របខ័ណ្ឌ​មន្ត្រីរាជការ​ស៊ី​វិល​ ។​

​ក្រុម​អ្នក​រិះគន់​មួយ​ចំនួន​បាន​និយាយ​លើក​ឡើង​ពាក់ព័ន្ធ​ទៅ​នឹង​ករណី​ទណ្ឌិត​ ឈូក​ បណ្ឌិត​ ថា​ "​ឈូក​ បណ្ឌិត​ មានបុណ្យ​ស័ក្តិតូច​មែន​ ប៉ុន្តែ​មាន​ខ្នង​ការពារ​ធំ​ ឬ​ក្រាស់​អាច​យ៉ាង​ហោច​ណាស់​ក៏​ថ្នាក់​ឧបនាយករដ្ឋមន្ត្រី​ដ៏​មាន​ឥទ្ធិពល​ដែរ​ "​ ។​

​លោក​ ឈូក​ បណ្ឌិត​ ឋានន្តរស័ក្តិ​វរមន្ត្រី​ថ្នាក់​លេខ​១០​ ធ្លាប់​ត្រូវ​បាន​តែងតាំង​ជា​អភិបាល​នៃ​គណៈ​អភិបាលក្រុង​បា​វិត​នៃ​ខេត្តស្វាយរៀង​ ដោយ​អនុក្រឹត្យ​របស់​រាជរដ្ឋាភិបាល​លេខ​៧២៧​អន​ក្រ​.​ត​ត​ ចុះ​ថ្ងៃ​ទី​២៥​ ខែឧសភា​ ឆ្នាំ​២០០៩​ និង​ក្រោយមក​ ត្រូវ​បាន​ដកហូត​មុខ​តំណែង​នេះ​ឲ្យ​មក​បម្រើ​ការងារ​នៅ​សាលា​ខេត្តស្វាយរៀង​វិញ​ ដោយ​អនុក្រឹត្យ​របស់​រាជរដ្ឋាភិបាល​លេខ​២៥៩​អន​ក្រ​.​ត​ត​ ចុះ​ថ្ងៃ​ទី​០៥​ ខែមីនា​ ឆ្នាំ​២០១២​ បន្ទាប់​ពី​មានរឿង​អាស្រូវ​បាញ់ប្រហារ​ទៅ​លើ​កម្មការិនី​រោងចក្រ​ស្បែកជើង​កៅ​វ៉េ​ ពេល​កំពុង​ធ្វើ​កូដកម្ម​-​បាតុកម្ម​ទាមទារ​លក្ខខណ្ឌ​ការងារ​ នា​ថ្ងៃ​ទី​២០​ ខែកុម្ភៈ​ ឆ្នាំ​២០១២​ បណ្តាល​ឲ្យ​កម្មការិនី​ចំនួន​៣​នាក់​រង​របួស​ធ្ងន់ធ្ងរ​សឹង​បាត់បង់​ជីវិត​ ៕​

Chhouk-Bandith55

Filed in: Feature, តុលាការ, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 012 858 205, 015 745 215 E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.