ថ្ងៃ សុក្រ ទី ០៣ ខែ ធ្នូ ឆ្នាំ ២០២១

រឿង​ស្វែងរក​ចាប់ខ្លួន​ទណ្ឌិត​ ឈូក​ បណ្ឌិត​ “​ស្ងាត់ឈឹង​ដូច​ចោរលួច​សេះ​”​ សូម​សម្តេច​ក្រឡាហោម​ ស​ ខេ​ង​ ចាប់អារម្មណ៍​ផង​ !

​មជ្ឈដ្ឋាន​ប្រជាពលរដ្ឋ​ និង​អ្នក​តាមដាន​កិច្ច​កំណែទម្រង់​ប្រព័ន្ធ​យុត្តិធម៌​សង្គម​នៅ​កម្ពុជា​ បាន​សម្តែង​នូវ​ការ​គាំទ្រ​ចំពោះ​ប្រសាសន៍​របស់​សម្តេច​ក្រឡាហោម​ ស​ ខេ​ង​ ឧបនាយករដ្ឋមន្ត្រី​ រដ្ឋមន្ត្រី​ក្រសួងមហាផ្ទៃ​ ដែល​បាន​ប្រកាស​កាលពី​ថ្ងៃ​ទី​១៤​ ខែកក្កដា​ ឆ្នាំ​២០១៥​ម្សិលមិញ​ ឲ្យ​សមត្ថកិច្ច​សាធារណៈ​តាម​ស្វែងរក​ចាប់ខ្លួន​លោក​ឧកញ៉ា​ សុខ​ ប៊ុ​ន​ ដែល​ប្រព្រឹត្ត​ហិង្សា​ទៅ​លើ​កញ្ញា​ ឯក​ សុជាតា​ ហៅ​សា​សា​ អតីត​ពិធី​ការី​នី​ស្ថានីយ៍ទូរទស្សន៍​ CTN​ ឲ្យ​ខាង​តែ​បាន​ និង​ប្រកាស​មិន​ឲ្យ​មាន​អ្នក​ណាមួយ​ជួយ​លាក់​បំពួន​ និង​កាង​ការពារ​លោក​ឧកញ៉ា​ សុខ​ ប៊ុ​ន​ ហើយ​បើ​មាន​សូម​ឲ្យ​ដកខ្លួន​ថយ​ចេញ​ទៀត​ផង​ ។​

​ជាមួយនឹង​ការ​ប្រកាស​របស់​សម្តេច​ក្រឡាហោម​ ស​ ខេ​ង​ នេះ​ដែរ​ មជ្ឈដ្ឋាន​នានា​ក៏​បាន​សំណូមពរ​ចំពោះ​សម្តេច​ក្រឡាហោម​ ស​ ខេ​ង​ មេត្តា​ធ្វើការ​ចាប់អារម្មណ៍​ទៅ​នឹង​ដំណើរការ​ស្វែងរក​តាម​ចាប់ខ្លួន​ទណ្ឌិត​ ឈូក​ បណ្ឌិត​ អតីត​អភិបាលក្រុង​បា​វិត​ ខេត្តស្វាយរៀង​ តាម​ដីកា​បង្គាប់​ឲ្យ​ចាប់ខ្លួន​ និង​អំណាច​សាលដីកា​ព្រហ្មទណ្ឌ​របស់​ស្ថាប័ន​តុលាការ​ ក្នុង​សំណុំរឿង​បាញ់ប្រហារ​ទៅ​លើ​កម្មការិនី​ចំនួន​៣​នាក់​ បម្រើ​ការងារ​នៅ​រោងចក្រ​ផលិត​ស្បែកជើង​កៅ​វ៉េ​ ឋិត​នៅ​ក្នុង​តំបន់​សេដ្ឋកិច្ច​ពិសេស​បា​វិត​ បណ្តាល​ឲ្យ​រង​របួស​ធ្ងន់ធ្ងរ​សឹង​បាត់បង់​ជីវិត​ កាលពី​ថ្ងៃ​ទី​២០​ ខែកុម្ភៈ​ ឆ្នាំ​២០១២​នោះ​ផង​ ដើម្បី​ផ្តល់​យុត្តិធម៌​ដល់​ជន​រង​គ្រោះជា​កម្មការិនី​ទាំង​៣​នាក់​ ។​

​ដីកា​បង្គាប់​ឲ្យ​ចាប់ខ្លួន​ជនជាប់ចោទ​ឈ្មោះ​ ឈូក​ បណ្ឌិត​ ត្រូវ​បាន​ចៅក្រម​ជំនុំជម្រះ​សាលាដំបូង​ខេត្តស្វាយរៀង​ចេញ​ចាប់តាំងពី​ពាក់កណ្តាល​ឆ្នាំ​២០១៣​មក​ម្ល៉េះ​ និង​មក​ដល់​ចុងឆ្នាំ​២០១៤​កន្លង​ទៅ​ ស្ថាប័ន​តុលាការ​កំពូល​ក៏​បាន​វិនិច្ឆ័យ​សេចក្តីសម្រេច​ផ្តន្ទាទោស​ជនជាប់ចោទ​ឈ្មោះ​ ឈូក​ បណ្ឌិត​ ឲ្យ​ក្លាយជា​ទណ្ឌិត​ (​ដាក់​ពន្ធនាគារ​កំណត់​១៨​ខែ​ និង​បង្គាប់​ឲ្យ​បង់ប្រាក់​ចំនួន​៣៨​លាន​រៀល​ ជូន​ដើមបណ្តឹង​រដ្ឋប្បវេណី​ជា​កម្មការិនី​ទាំង​៣​នាក់​ ពី​បទ​បង្ក​របួស​ស្នាម​ដោយ​អ​ចេតនា​)​រួច​ហើយ​ដែរ​ ប៉ុន្តែ​រហូត​ទល់​បច្ចុប្បន្ន​មាន​រយៈពេល​ជាង​២​ឆ្នាំ​ហើយ​ សមត្ថកិច្ច​មិន​ទាន់​ស្វែងរក​តាម​ចាប់ខ្លួន​ឈ្មោះ​ ឈូក​ បណ្ឌិត​ បាន​នៅឡើយ​ (​បើ​គិត​ចាប់ពី​ថ្ងៃ​ប្រព្រឹត្ត​ល្មើស​ គឺ​ទណ្ឌិត​ ឈូក​ បណ្ឌិត​ ទទួល​បាន​សេរីភាព​ឋិត​នៅ​ក្រៅ​មន្ទីរឃុំឃាំង​អស់​រយៈពេល​ជាង​៣​ឆ្នាំ​)​ ខណៈ​អនុលោម​តាម​បញ្ញត្តិ​មាត្រា​១៤៤​ កថាខណ្ឌ​ទី​២​ នៃ​ក្រមព្រហ្មទណ្ឌ​ដែល​បាន​ចែង​ថា​ "​ទោស​ដែល​ប្រកាស​ពី​បទមជ្ឈិម​ មាន​អាជ្ញា​យុ​កាល​៥​ឆ្នាំ​"​ គឺ​អាជ្ញា​យុ​កាល​នៃ​ទោស​របស់​ទណ្ឌិត​ ឈូក​ បណ្ឌិត​ ជិត​ផុត​ទៅ​ទៀត​ ។​

​នេះ​គឺជា​រឿង​មហា​អយុត្តិធម៌​មួយ​ និង​ឆ្លុះ​បញ្ចាំង​អំពី​វប្បធម៌​និ​រ​ទណ្ឌ​ភាព​នៅ​កម្ពុជា​ ដ្បិត​ការ​ស្វែងរក​ចាប់ខ្លួន​ទណ្ឌិត​ឈ្មោះ​ ឈូក​ បណ្ឌិត​ "​ស្ងាត់ឈឹង​ដូច​ចោរលួច​សេះ​"​ និង​សំណង​រដ្ឋប្បវេណី​ចំនួន​ត្រឹមតែ​៣៨​លាន​រៀល​សម្រាប់​ជន​រង​គ្រោះជា​កម្មការិនី​ចំនួន​៣​នាក់​នោះ​ មិន​ទាន់​ទទួល​បាន​ពី​ជន​ប្រព្រឹត្ត​ល្មើស​នៅឡើយ​ទេ​ ៕​

Chhouk-Bandith55

Filed in: Feature, តុលាការ, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.