ថ្ងៃ ពុធ ទី ២៩ ខែ មិថុនា ឆ្នាំ ២០២២

តើ​អាច​រកមុខ​អ្នក​ទទួលខុសត្រូវ​លើ​ការ​កាប់​បំផ្លាញ​ព្រៃឈើ​នៅ​តំបន់​ឧទ្យាន​ជាតិ​វី​រៈ​ជ័យ​ឃើញ​ដែរ​ឬទេ​?

​បន្ទាប់​ពី​អ្នកតំណាង​រាស្ត្រ​គណបក្ស​សង្គ្រោះ​ជាតិ​ជាង​២០​រូប​ពិនិត្យ​ឃើញ​ថា​ មាន​សកម្មភាព​កាប់​បំផ្លិចបំផ្លាញ​ព្រៃឈើ​យ៉ាង​អនាធិបតេយ្យ​នៅ​ឧទ្យាន​ជាតិ​វីរៈជន​ តំបន់​កន្ទុយ​នាគ​ ឋិត​ក្នុងស្រុក​តា​វែង​ ខេត្តរតនគិរី​ បង្ក​ដោយ​ក្រុមហ៊ុន​ឧកញ៉ា​ ទ្រី​ ភាព​ និង​ក្រុមហ៊ុន​ឧកញ៉ា​ អាន​ ម៉ា​ឌី​ និង​បាន​ចេញ​លិខិតផ្លូវការ​កាលពី​ថ្ងៃ​ទី​០៨​ ខែកក្កដា​ ឆ្នាំ​២០១៥​ ជម្រាប​ជូន​សម្តេច​អគ្គមហាសេនាបតី​តេ​ជោ​ ហ៊ុន​ សែន​ នាយក​រដ្ឋមន្ត្រី​នៃ​ព្រះរាជាណាចក្រ​កម្ពុជា​ តាម​រយៈ​សម្តេច​អគ្គ​មហា​ពញា​ចក្រី​ ហេង​ សំ​រិ​ន​ ប្រធានរដ្ឋសភា​នីតិកាល​ទី​៥​ ស្នើ​សុំ​ឲ្យ​មានការ​បញ្ឈប់​ជា​បន្ទាន់​ក្រុមហ៊ុន​ ទ្រី​ ភាព​ និង​ក្រុមហ៊ុន​អាន​ ម៉ា​ឌី​ ដែល​កំពុង​ធ្វើ​អាជីវកម្ម​កាប់​បំផ្លាញ​ព្រៃឈើ​នៅ​ក្នុងភូមិ​សាស្ត្រ​ឧទ្យាន​ជាតិ​វី​រៈ​ជ័យ​ តំបន់​កន្ទុយ​នាគ​ ឋិត​ក្នុងស្រុក​តា​វែង​ ខេត្តរតនគិរី​ រួច​មក​ គឺ​នៅ​ថ្ងៃ​ទី​០៨​ ខែកក្កដា​ ឆ្នាំ​២០១៥​ដដែល​នេះ​ដែរ​ ស្រាប់តែ​ក្រុមហ៊ុន​ ទ្រី​ ភាព​ អ៊ី​ម​ផត​ អ៊ិ​ច​ផត​ (Try​ Pheap​ Import​ Export​ Co.,​ Ltd.)​ ដែល​មាន​លោក​ឧកញ៉ា​ ទ្រី​ ភាព​ ជានា​យក​ក្រុមហ៊ុន​ បាន​ចេញ​សេចក្តី​ប្រកាស​ព័ត៌មាន​មួយ​ច្រានចោល​ទៅ​នឹង​ការ​ចោទប្រកាន់​របស់​អ្នកតំណាង​រាស្ត្រ​គណបក្ស​សង្គ្រោះ​ជាតិ​ ខណៈ​សម្តេច​អគ្គមហាសេនាបតី​តេ​ជោ​ ហ៊ុន​ សែន​ ហៅ​បុរស​ខ្លាំង​ នាយក​រដ្ឋមន្ត្រី​នៃ​ព្រះរាជាណាចក្រ​កម្ពុជា​មិន​ទាន់​បាន​ចាត់វិធានការ​ឆ្លើយ​តប​ទៅ​នឹង​សំណើ​របស់​ក្រុម​អ្នកតំណាង​រាស្ត្រ​នៅឡើយ​ ។​

​ជាមួយនឹង​ការ​ច្រានចោល​ចំពោះ​ការ​ចោទប្រកាន់​របស់​ក្រុម​អ្នកតំណាង​រាស្ត្រ​គណបក្ស​សង្គ្រោះ​ជាតិ​ ដែល​បាន​ប្រទះ​ឃើញ​ក្រុមហ៊ុន​របស់​លោក​ឧកញ៉ា​ ទ្រី​ ភាព​ និង​ក្រុមហ៊ុន​របស់​លោក​ឧកញ៉ា​ អាន​ ម៉ា​ឌី​ កំពុង​ធ្វើ​អាជីវកម្ម​កាប់​បំផ្លាញ​ និង​ដឹក​ជញ្ជូន​ឈើ​យ៉ាង​អនាធិបតេយ្យ​នៅ​តំបន់​ឧទ្យាន​ជាតិ​វី​រៈ​ជ័យ​នោះ​ ក្រុមហ៊ុន​ Try​ Pheap​ Import​ Export​ បាន​លើក​ហេតុផល​ថា​ ទីតាំង​ដី​សម្បទាន​វិនិយោគ​អភិវឌ្ឍន៍​ដំណាំ​ក​សិ​-​ឧស្សាហកម្ម​កៅស៊ូ​ចំនួន​២​កន្លែង​ នៅ​តំបន់​ឧទ្យាន​ជាតិ​វី​រៈ​ជ័យ​ ដែល​ក្រុមហ៊ុន​ធ្លាប់​ទទួល​បាន​សិទ្ធិ​វិនិយោគ​ពី​រាជរដ្ឋាភិបាល​កន្លង​មក​ ក្រុមហ៊ុន​បាន​ប្រគល់​ដី​សម្បទាន​ជូន​ទៅ​រាជរដ្ឋាភិបាល​វិញ​ហើយ​ ដូច​មាន​បញ្ជាក់​នៅ​ក្នុង​ស្មារតី​លិខិត​លេខ​១៧៦៩​ស​ជ​ណ​ ចុះ​ថ្ងៃ​ទី​០៦​ ខែវិច្ឆិកា​ ឆ្នាំ​២០១៣​ របស់​ទីស្តីការគណៈរដ្ឋមន្ត្រី​ ពោល​គឺ​ក្រុមហ៊ុន​មិន​មាន​ធ្វើ​សកម្មភាព​អ្វី​នៅ​លើ​ទីតាំង​ដី​ និង​តំបន់​ឧទ្យាន​ជាតិ​វី​រៈ​ជ័យ​ឡើយ​ (Sic!)​ ។​

​ក្រុម​អ្នក​ឃ្លាំមើល​ឧក្រិដ្ឋកម្ម​ព្រៃឈើ​នៅ​កម្ពុជា​ បាន​លើក​ឡើង​ថា​ ជា​ការ​ពិត​ ព្រៃឈើ​នៅ​តំបន់​កន្ទុយ​នាគ​នៃ​ឧទ្យាន​ជាតិ​វី​រៈ​ជ័យ​ ខេត្តរតនគិរី​ គឺ​មានការ​កាប់​បំផ្លាញ​យ៉ាង​រង្គាល​ ដោយ​មានការ​ពាក់ព័ន្ធ​ទៅ​នឹង​ក្រុមហ៊ុន​វៀតណាម​ទៀត​ផង​ ចាប់តាំងពី​មុន​ឆ្នាំ​២០០០​មក​ម្ល៉េះ​ ។​ ដោយឡែក​ ក្រុមហ៊ុន​ Try​ Pheap​ Import​ Export​ និង​ក្រុមហ៊ុន​ MDS​ Thmoda​ SEZ​ ជា​បុត្រ​សម្ព័ន្ធ​របស់​ក្រុមហ៊ុន​ MDS​ Group​ គ្រប់គ្រង​ដោយ​លោក​ឧកញ៉ា​ ទ្រី​ ភាព​ ធ្លាប់​មាន​ទំនាក់ទំនង​យ៉ាង​ជិត​ស្និទ្ធ​ជាមួយ​ក្រុមហ៊ុន​វៀតណាម​ឈ្មោះ​ Hoang​ Anh​ Gia​ Lai​ Company​ (HAGL)​ ។​ ដូច្នេះ​ ក្រុមហ៊ុន​វៀតណាម​ឈ្មោះ​ HAGL​ និង​ក្រុមហ៊ុន​លោក​ឧកញ៉ា​ ទ្រី​ ភាព​ ត្រូវ​បាន​គេ​សង្ស័យ​យ៉ាង​ខ្លាំង​ថា​ មានការ​ពាក់ព័ន្ធ​ទៅ​នឹង​សកម្មភាព​កាប់​បំផ្លាញ​ព្រៃឈើ​នៅ​តំបន់​ឧទ្យាន​ជាតិ​វី​រៈ​ជ័យ​ ខេត្តរតនគិរី​ រួច​ហើយ​ប្រើ​ល្បិច​ប្រគល់​ដី​សម្បទាន​ដែល​ខ្លួន​ទទួល​បាន​ឲ្យ​ទៅ​រដ្ឋ​វិញ​ ។​

​មជ្ឈដ្ឋាន​អ្នក​ច្បាប់​ និង​អ្នក​អភិរក្ស​ធនធានធម្មជាតិ​ព្រៃឈើ​នៅ​កម្ពុជា​ បាន​លើក​ឡើង​ថា​ ក្រុម​អ្នកតំណាង​រាស្ត្រ​គណបក្ស​សង្គ្រោះ​ជាតិ​ទាំង​ជាង​២០​រូប​ ដែល​បាន​ធ្វើ​លិខិតផ្លូវការ​ស្នើ​សុំ​ឲ្យ​បុរស​ខ្លាំង​ជា​នាយក​រដ្ឋមន្ត្រី​បញ្ឈប់​សកម្មភាព​ការ​កាប់​បំផ្លាញ​ព្រៃឈើ​នៅ​តំបន់​ឧទ្យាន​ជាតិ​វី​រៈ​ជ័យ​ ខេត្តរតនគិរី​ របស់​ក្រុមហ៊ុន​លោក​ឧកញ៉ា​ ទ្រី​ ភាព​ និង​ក្រុមហ៊ុន​លោក​ឧកញ៉ា​ អាន​ ម៉ា​ឌី​ នោះ​ គួរតែ​បញ្ចេញ​នូវ​ព័ស្តុតាង​ជាក់លាក់​ឲ្យ​សាធារណជន​បានឃើញ​ ដើម្បី​វែកមុខ​អ្នក​ទទួលខុសត្រូវ​លើ​ការ​កាប់​បំផ្លាញ​ព្រៃឈើ​នៅ​តំបន់​ឧទ្យាន​ជាតិ​វី​រៈ​ជ័យ​ពិតប្រាកដ​ និង​កុំ​ឲ្យ​ក្រុមហ៊ុន​លោក​ឧកញ៉ា​ ទ្រី​ ភាព​ ជា​ឈ្មួញ​ឈើ​ដ៏​ល្បី​នៅ​កម្ពុជា​មានឱកាស​ដោះសា​តទៅ​ទៀត​បាន​ផង​ ៕​

Try-Pheap-2 Try-Pheap-t0-CNRP CNRP-to-Hun-Sen

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.