ថ្ងៃ ពុធ ទី ២៩ ខែ មិថុនា ឆ្នាំ ២០២២

គំនុំ​ជ្រៅ​ជាង​មហាសមុទ្រ​ ទើប​បុរស​ម្នាក់​ត្រូវ​បាន​ឃាតក​វាយ​ទម្លាក់​ពីលើ​ម៉ូតូ​ រួច​អា​រក​សម្លាប់​

​បុរស​ម្នាក់​ត្រូវ​បាន​ឃាតក​វាយ​ទម្លាក់​ពីលើ​ទោចក្រយានយន្ត​ដែល​កំពុង​ធ្វើ​ដំណើរ​ឲ្យ​ដួលធ្លាក់​ដី​ រួច​ហើយ​ចាប់​អា​រក​សម្លាប់​យ៉ាង​ព្រៃផ្សៃ​ បណ្តាល​ឲ្យ​ស្លាប់​បាត់បង់​ជីវិត​យ៉ាង​អាណោចអាធ័ម​ ក្បែរ​ទោចក្រយានយន្ត​របស់​ខ្លួន​ នៅ​វេលា​ម៉ោង​១០​និង​៣៥​នាទី​ព្រឹក​ នា​ថ្ងៃ​ទី​១១​ ខែកក្កដា ឆ្នាំ​២០១៥​នេះ​ ឋិត​ត្រង់​ចំណុច​អូរ​ថ្ម​ព្រុង​ ភូមិ​ត្រពាំង​លាប​ ឃុំ​ជម្ពូព្រឹក្ស​ ស្រុក​ឧដុង្គ​ ខេត្តកំពង់ស្ពឺ​ ។​

​ស្ត្រី​ឈ្មោះ​ មាស​ ច​ន្ថា​ អាយុ​៤៣​ឆ្នាំ​ ត្រូវជា​ភរិយា​របស់​បុរស​រង​គ្រោះ​ បាន​ប្រាប់​សមត្ថកិច្ច​ឲ្យ​ដឹង​ថា​ ជន​រង​គ្រោះជា​ប្តី​របស់​ខ្លួន​មានឈ្មោះ​ ប៉ាក​ សុភា​ អាយុ​៥៣​ឆ្នាំ​ មុខរបរ​ជា​អ្នក​ចាំចម្ការ​នៅ​ភូមិ​អូរ​នាង​ហ៊ីង​ ឃុំ​តាំង​ក្រូច​ ស្រុក​សំរោង​ទង​ ខេត្តកំពង់ស្ពឺ​ ។​ មុន​ពេល​កើតហេតុ​ គឺ​នៅ​វេលា​ម៉ោង​០៧​ព្រឹក​ នា​ថ្ងៃ​ទី​១១​ ខែកក្កដា​ ឆ្នាំ​២០១៥​ ប្តី​របស់​ខ្លួន​បាន​ជិះ​ម៉ូតូ​ចេញពីផ្ទះ​ក្នុង​គោលបំណង​ទៅ​ដូរ​ទឹក​សុទ្ធ​ និង​មិន​បានឃើញ​វិល​ត្រឡប់​មក​ផ្ទះ​វិញ​នៅឡើយ​ទេ​ ទើប​ដល់​វេលា​ម៉ោង​កើតហេតុ​ ស្រាប់តែ​មាន​គេ​មក​ប្រាប់​ខ្លួន​ថា​ ប្តី​របស់​ខ្លួន​បាន​ស្លាប់​នៅ​ចំណុច​កើតហេតុ​បាត់​ទៅ​ហើយ​ ។​

​សមត្ថកិច្ច​មូលដ្ឋាន​ និង​សមត្ថកិច្ច​ជំនាញ​បាន​ធ្វើការ​សន្និដ្ឋាន​ជាបឋម​ថា​ ការ​ស្លាប់​របស់​បុរស​រង​គ្រោះ​អាច​មានការ​ពាក់ព័ន្ធ​ទៅ​នឹង​ករណី​គំនុំ​ ទើប​ជន​ដៃដល់​ប្រើ​ដំបង​វាយ​ពីក្រោយ​ជន​រង​គ្រោះ​ទម្លាក់​ពីលើ​ម៉ូតូ​ឲ្យ​ដួល​ធ្លាក់​ រួច​ហើយ​ចាប់​អា​រក​សម្លាប់​ជា​ក្រោយ​ ពីព្រោះ​ជន​រង​គ្រោះ​បាន​ស្លាប់​នៅ​ក្បែរ​ម៉ូតូ​របស់​ខ្លួន​ម៉ាក​ Honda​ Dream​ 125​ ពណ៌​ខ្មៅ​ ពាក់​ស្លាក​លេខ​កំពង់ស្ពឺ​ 1F-2202​ មិន​មានការ​បាត់បង់​សម្ភារៈ​អ្វី​ទេ​ ។​

​ក្រោយ​ពី​បាន​ពិនិត្យ​ធ្វើ​កោសល្យវិច័យ​ចប់​សព្វគ្រប់​ សព​ជន​រង​គ្រោះ​ត្រូវ​បាន​សមត្ថកិច្ច​ប្រគល់​ឲ្យ​ក្រុម​គ្រួសារ​សាច់ញាតិ​យក​ទៅ​ចាត់ចែង​ធ្វើបុណ្យ​បាន​ប្រពៃណី​ និង​សមត្ថកិច្ច​កំពុង​បន្ត​សាកសួរ​លម្អិត​ទៅ​លើ​ស្ត្រី​ជា​ភរិយា​ជន​រង​គ្រោះ​ ដើម្បី​ឈាន​ទៅ​កំណត់​មុខសញ្ញា​ឃាតក​ក្នុង​អំពើ​ឃាតកម្ម​ដ៏​ព្រៃផ្សៃ​នេះ​ ៕​

 

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.