ថ្ងៃ ពុធ ទី ២៩ ខែ មិថុនា ឆ្នាំ ២០២២

​តំណាងរាស្ត្រ​បក្ស​ប្រឆាំង​ស្នើ​ឲ្យ​បុរស​ខ្លាំង​បញ្ឈប់​អាជីវកម្ម​ និង​ការ​កាប់​បំផ្លាញ​ព្រៃឈើ​របស់​ឧកញ៉ា​ ទ្រី​ ភាព​ និង​ឧកញ៉ា​ អាន​ ម៉ា​ឌី​ នៅ​ឧទ្យាន​ជាតិ​វី​រៈ​ជ័យ​

​តាម​រយៈ​សម្តេច​អគ្គ​មហា​ពញា​ចក្រី​ កិត្តិ​ព្រឹទ្ធ​បណ្ឌិត​ ហេង​ សំ​រិ​ន​ ប្រធានរដ្ឋសភា​នីតិកាល​ទី​៥​ អ្នកតំណាង​រាស្ត្រ​មក​ពី​គណបក្ស​សង្គ្រោះ​ជាតិ​ចំនួន​ជាង​២០​រូប​ បាន​ធ្វើ​លិខិតផ្លូវការ​មួយ​ច្បាប់​គោរព​ជូន​សម្តេច​អគ្គមហាសេនាបតី​តេ​ជោ​ ហ៊ុន​ សែន​ ហៅ​បុរស​ខ្លាំង​ នាយក​រដ្ឋមន្ត្រី​នៃ​ព្រះរាជាណាចក្រ​កម្ពុជា​ ស្នើ​សុំ​ឲ្យ​បញ្ឈប់​ជា​បន្ទាន់​ក្រុមហ៊ុន​របស់​លោក​ឧកញ៉ា​ ទ្រី​ ភាព​ និង​ក្រុមហ៊ុន​លោក​ឧកញ៉ា​ អាន​ ម៉ា​ឌី​ ដែល​កំពុង​ធ្វើ​អាជីវកម្ម​កាប់​បំផ្លាញ​ព្រៃឈើ​នៅ​ក្នុងភូមិ​សាស្ត្រ​ឧទ្យាន​ជាតិ​វី​រៈ​ជ័យ​ តំបន់​កន្ទុយ​នាគ​ ឋិត​នៅ​ស្រុក​តា​វែង​ ខេត្តរតនគិរី​ ។​

​លិខិតផ្លូវការ​របស់​ក្រុម​អ្នកតំណាង​រាស្ត្រ​គណបក្ស​សង្គ្រោះ​ជាតិ​ ដែល​ជា​គណបក្ស​នយោបាយ​ប្រឆាំង​ដ៏​ធំ​នៅ​កម្ពុជា​នោះ​ បាន​លើក​ឡើង​ថា​ "​កាលពី​ថ្ងៃ​ទី​០៩​ ខែមិថុនា​ ឆ្នាំ​២០១៥​ យើងខ្ញុំ​ជា​អ្នកតំណាង​រាស្ត្រ​បាន​ចុះ​ទៅ​ពិនិត្យ​ដោយ​ផ្ទាល់​នៅ​ក្នុង​ឧទ្យាន​ជាតិ​វី​រៈ​ជ័យ​ ដែល​ជា​តំបន់​ព្រៃស្រោង​ឋិត​នៅ​ក្នុង​តំបន់​កន្ទុយ​នាគ​ ខេត្តរតនគិរី​ ហើយ​បាន​ប្រទះ​ឃើញ​ក្រុមហ៊ុន​របស់​ឧកញ៉ា​ ទ្រី​ ភាព​ និង​ក្រុមហ៊ុន​របស់​ឧកញ៉ា​ អាន​ ម៉ា​ឌី​ កំពុង​តែ​ធ្វើ​អាជីវកម្ម​កាប់​បំផ្លាញ​ និង​ដឹក​ជញ្ជូន​ឈើ​យ៉ាង​អនាធិបតេយ្យ​ ។​ បច្ចុប្បន្ន​នេះ​ ព្រៃឈើ​នៅ​ក្នុង​ឧទ្យាន​ជាតិ​វី​រៈ​ជ័យ​ តំបន់​កន្ទុយ​នាគ​ កំពុង​តែ​ប្រឈម​យ៉ាង​ខ្លាំង​ពី​ការ​បំផ្លាញ​ និង​ឈាន​ទៅ​រក​វិនាសកម្ម​ព្រៃឈើ​ ដោយសារ​តែ​ក្រុមហ៊ុន​ទាំង​ពីរ​ ។​ ប្រសិនបើ​គ្មាន​ការ​ទប់ស្កាត់​ទាន់​ពេលវេលា​នោះ​ទេ​ ព្រៃឈើ​នៅ​ក្នុង​តំបន់​នោះ​នឹង​ត្រូវ​បាន​បាត់បង់​ទាំងស្រុង​នៅ​ពេល​ដ៏​ខ្លី​ខាង​មុខ​ ។​ "​ ។​

​ខ្លឹមសារ​បញ្ចប់​នៃ​លិខិត​របស់​ក្រុម​អ្នកតំណាង​រាស្ត្រ​គណបក្សប្រឆាំង​ គឺ​បាន​ស្នើ​ឲ្យ​បុរស​ខ្លាំង​មេត្តា​ពិនិត្យ​ និង​ជួយ​អន្តរាគមន៍​ដើម្បី​រក្សា​ព្រៃឈើ​នៅ​តំបន់​ឧទ្យាន​ជាតិ​វី​រៈ​ជ័យ​ឲ្យ​បាន​គង់វង្ស​ទុកជា​សម្បត្តិ​ធម្មជាតិ​របស់​ប្រជាជាតិ​កម្ពុជា​ ។​

​លិខិតផ្លូវការ​របស់​ក្រុម​អ្នកតំណាង​រាស្ត្រ​គណបក្សប្រឆាំង​ខាងលើ​ ត្រូវ​បាន​សម្តេច​អគ្គ​មហា​ពញា​ចក្រី​ កិត្តិ​ព្រឹទ្ធ​បណ្ឌិត​ ហេង​ សំ​រិ​ន​ បញ្ជូន​ទៅ​សម្តេច​អគ្គមហាសេនាបតី​តេ​ជោ​ ហ៊ុន​ សែន​ ជា​នាយក​រដ្ឋមន្ត្រី​នៅ​ថ្ងៃ​ទី​០៨​ ខែកក្កដា​ ឆ្នាំ​២០១៥​នេះ​ ។​

​សូម​បញ្ជាក់​ជូន​ថា​ ក្រុមហ៊ុន​ Try​ Pheap​ Import​ Export​ និង​ក្រុមហ៊ុន​ MDS​ Import​ Export​ ជា​បុត្រ​សម្ព័ន្ធ​របស់​ក្រុមហ៊ុន​ MDS​ Group​ គ្រប់គ្រង​ដោយ​លោក​ឧកញ៉ា​ ទ្រី​ ភាព​ មាន​ទំនាក់ទំនង​យ៉ាង​ជិត​ស្និទ្ធ​ជាមួយ​ក្រុមហ៊ុន​វៀតណាម​ឈ្មោះ​ Hoang​ Anh​ Gia​ Lai​ Company​ (HAGL)​ ក្នុង​ការ​កាប់​ និង​នាំ​ចេញ​ឈើ​ប្រណីត​ពី​ដី​សម្បទាន​នៅ​ខេត្តរតនគិរី​ ខណៈ​ក្រុមហ៊ុន​របស់​លោក​ឧកញ៉ា​ អាន​ ម៉ា​ឌី​ ក៏​មាន​សកម្មភាព​កាប់​ និង​ដឹក​ជញ្ជូន​ឈើ​នៅ​តំបន់​នោះ​យ៉ាង​សកម្ម​ដែរ​ ។​

​ក្រោយ​ពី​បាន​ធ្វើ​សកម្មភាព​កាប់​ឈើ​យ៉ាង​រង្គាល​រួច​មក​ ទើប​នៅ​ដើមឆ្នាំ​២០១៥​នេះ​ រាជរដ្ឋាភិបាល​បុរស​ខ្លាំង​បាន​សម្រេច​ដកហូត​ដី​សម្បទាន​សេដ្ឋកិច្ច​ជិត​២​ម៉ឺន​ហិ​កតា​នៅ​តំបន់​ឧទ្យាន​ជាតិ​វី​រៈ​ជ័យ​ ខេត្តរតនគិរី​ ពី​ក្រុមហ៊ុន​លោក​ឧកញ៉ា​ ទ្រី​ ភាព​ មក​វិញ​ ក្នុង​នោះ​ផ្ទៃដី​ទំហំ​៩.៧០០​ហិ​កតា​ដកហូត​ពី​ក្រុមហ៊ុន​ Try​ Pheap​ Import​ Export​ និង​ផ្ទៃដី​ទំហំ​៩.១០០​ហិ​កតា​ទៀត​ដកហូត​ពី​ក្រុមហ៊ុន​ MDS​ Thmoda​ SEZ​ ជា​បុត្រ​សម្ព័ន្ធ​របស់​ក្រុមហ៊ុន​ MDS​ Group​ ។​

​យោង​តាម​របាយការណ៍​ស៊ើបអង្កេត​មួយ​បាន​ក្រុម​កិច្ចការ​ពិសេស​សិទ្ធិ​មនុស្ស​នៅ​កម្ពុជា​ បាន​ឲ្យ​ដឹង​ថា​ លោក​ឧកញ៉ា​ ទ្រី​ ភាព​ ទទួល​បាន​ដី​សម្បទាន​សេដ្ឋកិច្ច​ពី​រាជរដ្ឋាភិបាល​ចំនួន​៧​ម៉ឺន​ហិ​កតា​  ហើយ​បាន​ធ្វើ​សកម្មភាព​កាប់​ឈើ​គ្រប់​ប្រភេទ​លើ​ទីតាំង​ដី​សម្បទាន​នោះ​ដើម្បី​នាំ​ចេញ​ ខណៈ​លោក​ឧកញ៉ា​ឈ្មួញ​ឈើ​ដ៏​ល្បី​រូប​នេះ​មាន​ក្រុមហ៊ុន​យ៉ាងតិច​ចំនួន​១៥​ក្រុមហ៊ុន​បាន​កាន់កាប់​តំបន់​សេដ្ឋកិច្ច​ពិសេស​(SEZ)​ចំនួន​ពីរ​នៅ​ជាប់​ព្រំដែន​ថៃ​ និង​វៀតណាម​ ។​

​លោក​ អាន​ ម៉ា​ឌី​ នាយកក្រុមហ៊ុន អាន ម៉ាឌី គ្រុប​ ជា​ឈ្មួញ​ដ៏​មាន​ឥទ្ធិពល​ម្នាក់​ ត្រូវ​បាន​តែងតាំង​ជា​ឧកញ៉ា​ដោយ​ព្រះរាជក្រឹត្យ​លេខ​ន​ស​/​រក​ត​/០៥០៣/១៧២​ ចុះ​ថ្ងៃ​ទី​១៣​ ខែឧសភា​ ឆ្នាំ​២០០៣​ ។​

​រីឯ​លោក​ ទ្រី​ ភាព​ ជា​ឈ្មួញ​ឈើ​ដ៏​ល្បីឈ្មោះ​នៅ​កម្ពុជា​ និង​ជា​ឈ្មួញ​ស្និទ្ធ​នឹង​ក្រុម​គ្រួសារ​របស់​បុរស​ខ្លាំង​ជា​នាយក​រដ្ឋមន្ត្រី​ ទទួល​បានការ​តែងតាំង​ជា​ឧកញ៉ា​ដោយ​ព្រះរាជក្រឹត្យ​លេខ​ន​ស​/​រក​ត​/០៨០៤/២១៤​ ចុះ​ថ្ងៃ​ទី​១៤​ ខែសីហា​ ឆ្នាំ​២០០៤​ ៕​

Try-Pheap-20CNRP-to-Hun-Sen

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.