ថ្ងៃ ពុធ ទី ២៥ ខែ ឧសភា ឆ្នាំ ២០២២

ឧកញ៉ា​២​នាក់​ត្រូវ​ពលរដ្ឋ​ប្តឹង​ទៅ​ ACU​ ចោទប្រកាន់​រឿង​ពុក​រលួយ​ក្នុង​ការ​ធ្វើ​អាជីវកម្ម​គន្លង​ដាយ​ត្រី​

​ប្រភព​ព័ត៌មាន​ពី​មន្ត្រី​រដ្ឋបាល​ជលផល​ បាន​បង្ហើប​ប្រាប់​ឲ្យ​ដឹង​ថា​ មន្ត្រីសង្កាត់​រដ្ឋបាល​ជលផល​ស្រុក​ពញាឮ​ ខេត្តកណ្តាល​ ចំនួន​២​នាក់​ និង​ឧកញ៉ា​ចំនួន​២​នាក់​ទៀត​ ត្រូវ​បាន​ប្រជាពលរដ្ឋ​រស់នៅ​ក្នុងស្រុក​ពញាឮ​ ខេត្តកណ្តាល​ ប្តឹង​ទៅ​អង្គភាព​ប្រឆាំង​អំពើ​ពុក​រលួយ​ មាន​ឯកឧត្តម​បណ្ឌិត​ ទេស​រដ្ឋមន្ត្រី​ ឱម​ យ៉ិ​ន​ទៀង​ ជា​ប្រធាន​ ដោយ​ចោទប្រកាន់​ថា​ សមគំនិត​គ្នា​ប្រព្រឹត្ត​ពុក​រលួយ​ បង្កើត​ឲ្យ​មាន​គន្លង​ដាយ​ត្រី​ក្នុងភូមិ​សាស្ត្រ​ខេត្តកណ្តាល​ តាម​ដង​ទន្លេសាប​ ក្រោម​រូបភាព​វិនិយោគ​ និង​ការ​សិក្សា​ ធ្វើ​ឲ្យ​ទិន្នផល​ត្រី​នៅ​តាម​ឡូត៍​ដាយ​ស្របច្បាប់​ថយ​ចុះ​ និង​បាត់បង់​ថវិកាជាតិ​ ។​

​ឧកញ៉ា​ចំនួន​២​នាក់​ដែល​ត្រូវ​ប្រជាពលរដ្ឋ​ប្តឹង​ចោទប្រកាន់​ក្នុង​រឿង​ពុក​រលួយ​ ពាក់ព័ន្ធ​នឹង​ការ​ធ្វើ​អាជីវកម្ម​គន្លង​ដាយ​ត្រី​មាន​ភាព​មិន​ប្រក្រតី​ទៅ​អង្គភាព​ប្រឆាំង​អំពើ​ពុក​រលួយ​(ACU)​នោះ​ គឺ​លោក​ឧកញ៉ា​ ឡូ​វ​ ហ៊ឹង​ និង​លោក​ឧកញ៉ា​ ប៊ុត​ ចាន់ធូ​ ។​

​ប្រភព​ព័ត៌មាន​ដដែល​បាន​បង្ហើប​ឲ្យ​ដឹង​ដែរ​ថា​ លោក​ឧកញ៉ា​ ឡូ​វ​ ហ៊ឹង​ និង​លោក​ឧកញ៉ា​ ប៊ុត​ ចាន់ធូ​ ត្រូវ​បាន​ ACU​ កោះហៅ​ម្តងម្នាក់ៗ​ឲ្យ​ចូល​ទៅ​បំភ្លឺ​នៅ​ ACU​ រួច​ហើយ​ ពាក់ព័ន្ធ​នឹង​ពាក្យបណ្តឹង​របស់​ក្រុម​ប្រជាពលរដ្ឋ​ ប៉ុន្តែ​គេ​មិន​ទាន់​បានដឹង​អំពី​ចំណាត់ការ​យ៉ាងណា​ពី​ ACU​ យ៉ាងណា​នៅឡើយ​ទេ​ ។​

​សេចក្តីរាយការណ៍​ពី​ក្រុម​ប្រជាពលរដ្ឋ​ជា​ម្ចាស់​បណ្តឹង​ បាន​រៀបរាប់​ឲ្យ​ដឹង​ថា​ ក្រោយ​ពេល​រដ្ឋបាល​ជលផល​បង្កើត​គន្លង​ដាយ​ថ្មីៗ​ជាង​១០​គន្លង​ ក្នុងភូមិ​សាស្ត្រ​ស្រុក​ពញាឮ​ ខេត្តកណ្តាល​ ក្រោម​រូបភាព​វិនិយោគ​ និង​សិក្សា​ស្រាវជ្រាវ​នោះ​ គឺ​ក្រុម​ឈ្មួញ​ឡូត៍​នេសាទ​ និង​មន្ត្រី​រដ្ឋបាល​ជលផល​មួយ​ចំនួន​ដែល​សមគំនិត​គ្នា​ បាន​ស្ទាក់​ចាប់​យក​ត្រី​អស់​មួយ​ភាគ​ធំ​ ធ្វើ​ឲ្យ​ទិន្នផល​ត្រី​នៅ​តាម​ឡូត៍​ដាយ​ស្របច្បាប់​ថយ​ចុះ​ ។​ ម្យ៉ាងទៀត​ ចំណូល​ដែល​បាន​មក​ពី​ការ​ធ្វើ​អាជីវកម្ម​គន្លង​ដាយ​តាម​រូបភាព​វិនិយោគ​ទៅ​ឲ្យ​លោក​ឧកញ៉ា​ ឡូ​វ​ ហ៊ឹង​ និង​លោក​ឧកញ៉ា​ ប៊ុត​ ចាន់ធូ​ ក្នុង​មួយ​ឆ្នាំៗ​មាន​តម្លៃ​រាប់​ពាន់​លាន​រៀល​នោះ​បាន​ចូល​ក្នុង​ខ្ទង់​ថវិកាជាតិ​កម្រិត​តិចតួច​ប៉ុណ្ណោះ​។​

​មន្ត្រី​រដ្ឋបាល​ជលផល​ដែល​ពាក់ព័ន្ធ​ ព្រមទាំង​លោក​ឧកញ៉ា​ ឡូ​វ​ ហ៊ឹង​ និង​លោក​ឧកញ៉ា​ ប៊ុត​ ចាន់ធូ​ មិន​ទាន់​អាច​ធ្វើការ​ទំនាក់ទំនង​សុំ​ការ​បំភ្លឺ​បញ្ជាក់​ ទាក់ទង​នឹង​បណ្តឹង​របស់​ក្រុម​ប្រជាពលរដ្ឋ​ទៅ​ ACU​ នោះ​នៅឡើយ​ទេ​ ដោយ​មិន​មាន​លេខ​ទូរស័ព្ទ​ទំនាក់ទំនង​ ។​

​លោក​ ឡូ​វ​ ហ៊ឹង​ ត្រូវ​បាន​តែងតាំង​ជា​ឧកញ៉ា​ដោយ​ព្រះរាជក្រឹត្យ​លេខ​ន​ស​/​រក​ត​/០៣៩៩/៣៣​ ចុះ​ថ្ងៃ​ទី​០៤​ ខែមីនា​ ឆ្នាំ​១៩៩៩​ ។​ រីឯ​លោក​ ប៊ុត​ ចាន់ធូ​ ត្រូវ​បាន​តែងតាំង​ជា​ឧកញ៉ា​ដោយ​ព្រះរាជក្រឹត្យ​លេខ​ន​ស​/​រក​ត​/១២០៤/០៦៨​ ចុះ​ថ្ងៃ​ទី​១៧​ខែធ្នូ​ឆ្នាំ​២០០៤​៕​

Lov-HingBut-Chantou

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.