ថ្ងៃ ព្រហស្បតិ៍ ទី ២៦ ខែ ឧសភា ឆ្នាំ ២០២២

ដំណឹងបែកធ្លាយ​រឿងដ៏សាហាវ ! ​បុរស​ខ្លាំង​តាំងខ្លួន​ធ្វើ​ស្តេច​ ផ្តល់​ឋានន្តរស័ក្តិ​ថ្នាក់ឧត្តម​សេនីយ៍​ដល់​មន្ត្រី​នគរបាល​ជាតិ​

​អនុលោម​តាម​មាត្រា​១៤​ កថាខណ្ឌ​ទី​២​ នៃ​ច្បាប់​ស្តី​ពី​ការ​រៀបចំ​និង​ការ​ប្រព្រឹត្ត​ទៅ​នៃ​គណៈរដ្ឋមន្ត្រី​ ដែល​ប្រកាស​ឲ្យ​ប្រើ​ដោយ​ព្រះរាជក្រម​លេខ​០២/​ន​ស​/៩៤​ ចុះ​ថ្ងៃ​ទី​២០​ ខែកក្កដា​ ឆ្នាំ​១៩៩៤​ និង​ស្មារតី​ព្រះរាជក្រឹត្យ​លេខ​ន​ស​/​រក​ត​/០៥០១/១៧៨​ ចុះ​ថ្ងៃ​ទី​២២​ ខែឧសភា​ ឆ្នាំ​២០០១​ ស្តី​ពី​លក្ខន្តិកៈ​ដោយឡែក​នៃ​ក្របខ័ណ្ឌ​មន្ត្រី​នគរបាល​ជាតិ​កម្ពុជា​ គឺ​បាន​តម្រូវ​ឲ្យ​មន្ត្រីជាន់ខ្ពស់​នគរបាល​ជាតិ​ដែល​មាន​ឋានន្តរស័ក្តិ​ថ្នាក់ឧត្តម​សេនីយ៍​ឡើង​ទៅ​ ត្រូវ​តែងតាំង​ដោយ​ព្រះរាជក្រឹត្យ​ តាម​សំណើ​របស់​នាយក​រដ្ឋមន្ត្រី​ទូល​ថ្វាយ​ព្រះមហាក្សត្រ​ ។​ ប៉ុន្តែ​ ឥឡូវនេះ​មានរឿង​បែកធ្លាយ​សម្តេច​អគ្គមហាសេនាបតី​តេ​ជោ​បណ្ឌិត​សភាចា​រ្យ​ ហ៊ុន​ សែន​ នាយក​រដ្ឋមន្ត្រី​នៃ​ព្រះរាជាណាចក្រ​កម្ពុជា​ ហៅ​បុរស​ខ្លាំង​ បាន​តាំងខ្លួន​ធ្វើ​ស្តេច​ទទួលស្គាល់​ឋានន្តរស័ក្តិ​ថ្នាក់​ឧត្តមសេនីយ៍ឯក​(​ផ្កាយ​៣)​ ដល់​មន្ត្រី​នគរបាល​ជាតិ​កម្ពុជា​ម្នាក់​ ដោយ​អនុក្រឹត្យ​របស់​រាជរដ្ឋាភិបាល​ទៅ​វិញ​ ។​

​ព័ស្តុតាង​បាន​បង្ហាញ​ថា​ លោក​ឧកញ៉ា​ម្នាក់​ឈ្មោះ​ ឌឿ​ន​ សុវណ្ណ​ ​នាយ​នគរបាល​ជាតិ​ជាន់ខ្ពស់​ក្រសួងមហាផ្ទៃ​ អត្តលេខ​០២១៦៩​ ឋានន្តរស័ក្តិ​ថ្នាក់​ឧត្តមសេនីយ៍ឯក​(​ផ្កាយ​៣)​ និង​​ជាទី​ប្រឹក្សា​ក្រសួងមហាផ្ទៃ​ មាន​ឋានៈ​ស្មើ​រដ្ឋលេខាធិការ​ ពោល​គឺ​​មាន​ងារ​ និង​ឋានៈ​ជា​«ឯកឧត្តម​ ឧកញ៉ា​ ឧត្តមសេនីយ៍ឯក​» ។​ ប៉ុន្តែ​ក្រោយមក​ តាម​សេចក្តី​ក្រាប​បង្គំ​ទូល​ថ្វាយ​របស់​បុរស​ខ្លាំង​ជា​នាយក​រដ្ឋមន្ត្រី​ លោក​ឧកញ៉ា​ ឌឿ​ន​ សុវណ្ណ​ ត្រូវ​បាន​ព្រះករុណា​ព្រះមហាក្សត្រ​ជាទី​សក្ការៈ​ ត្រាស់​បង្គាប់​បញ្ចប់​មុខ​តំណែង​ពី​ទីប្រឹក្សា​ក្រសួងមហាផ្ទៃ​ ដកហូត​ឋានន្តរស័ក្តិ​ថ្នាក់​ឧត្តមសេនីយ៍ឯក​ និង​លុបឈ្មោះ​ចេញពី​ក្របខ័ណ្ឌ​មន្ត្រី​នគរបាល​ជាតិ​កម្ពុជា​នៃ​ក្រសួងមហាផ្ទៃ​ជា​ស្ថាពរ​ ដោយ​ព្រះរាជក្រឹត្យ​លេខ​ន​ស​/​រក​ត​/១០១២/៩៣៥​ ចុះ​ថ្ងៃ​ទី​១៣​ ខែតុលា​ ឆ្នាំ​២០១២​ ។​

​ស្រាប់តែ​ក្រោយមក​ទៀត​  ស្ងាត់ៗបុរស​ខ្លាំង​ក្នុង​នាម​ជា​ប្រមុខ​រាជរដ្ឋាភិបាល​ តាម​សំណើ​របស់​រដ្ឋមន្ត្រី​ក្រសួងមហាផ្ទៃ​ បែរជា​បាន​ចេញ​អនុក្រឹត្យ​មួយ​លេខ​៥១៦​អន​ក្រ​.​ត​ត​ ចុះ​ថ្ងៃ​ទី​១៨​ ខែឧសភា​ ឆ្នាំ​២០១៥​ ​តែងតាំង​មុខ​តំណែង​លោក​ឧត្តមសេនីយ៍ឯក​ ឌឿ​ន​ សុវណ្ណ​ អត្តលេខ​២១៦៩​ ជា​អគ្គលេខាធិការ​រង​នៃ​អគ្គលេខាធិការដ្ឋាន​ក្រសួងមហាផ្ទៃ​ តាម​របៀប​ទទួលស្គាល់​លោក​ ឌឿ​ន​ សុវណ្ណ​ មាន​ឋានន្តរស័ក្តិ​ថ្នាក់ឧត្តម​សេនីយ៍​ឯកនៃ​ក្របខ័ណ្ឌ​មន្ត្រី​នគរបាល​ជាតិ​កម្ពុជា​រួច​ជា​ស្រេច​យ៉ាង​ហ៊ឺហា​ទៅ​វិញ​ ខណៈ​ចាប់តាំងពី​ថ្ងៃ​ទី​១៣​ ខែតុលា​ ឆ្នាំ​២០១២​ ដែល​ជា​ថ្ងៃ​ព្រះករុណា​ព្រះមហាក្សត្រ​ទ្រង់​ឡាយព្រះហស្តលេខា​លើ​ព្រះរាជក្រឹត្យ​ត្រាស់​បង្គាប់​បញ្ចប់​មុខ​តំណែង​លោក​ ឌឿ​ន​ សុវណ្ណ​ ពី​ទីប្រឹក្សា​ក្រសួងមហាផ្ទៃ​ និង​ដកហូត​ឋានន្តរស័ក្តិ​ថ្នាក់​ឧត្តមសេនីយ៍ឯក​ ព្រមទាំង​លុបឈ្មោះ​ចេញពី​ក្របខ័ណ្ឌ​មន្ត្រី​នគរបាល​ជាតិ​កម្ពុជា​ជា​ស្ថាពរ​ហើយ​ រហូត​មក​ដល់​ថ្ងៃ​ទី​១៨​ ខែឧសភា​ ឆ្នាំ​២០១៥​ មិន​មាន​ព្រះរាជក្រឹត្យ​ណាមួយ​ទទួលស្គាល់​ ឬ​តែងតាំង​ឋានន្តរស័ក្តិ​ថ្នាក់​ឧត្តមសេនីយ៍ឯក​ជូន​លោក​ ឌឿ​ន​ សុវណ្ណ​ អតីត​ក្របខ័ណ្ឌ​មន្ត្រី​នគរបាល​ជាតិ​កម្ពុជា​នៃ​ក្រសួងមហាផ្ទៃ​សា​ជា​ថ្មី​នោះ​ឡើយ​ ។​

​សរុបសេចក្តី​មក​ បុរស​ខ្លាំង​បាន​និង​កំពុង​តាំងខ្លួន​ធ្វើ​ជា​ស្តេច​ ផ្តល់​ឋានន្តរស័ក្តិ​ថ្នាក់​ឧត្តមសេនីយ៍ឯក​ក្នុង​ក្របខ័ណ្ឌ​មន្ត្រី​នគរបាល​ជាតិ​កម្ពុជា​នៃ​ក្រសួងមហាផ្ទៃ​ ដល់​លោក​ឧកញ៉ា​ ឌឿ​ន​ សុវណ្ណ​ ទាំង​រំលោភ​បំពាន​ច្បាប់​យ៉ាងធ្ងន់ធ្ងរ​បំផុត​ ទុកជា​ប្រវត្តិសាស្ត្រ​ក្នុង​សម័យ​ព្រះរាជាណាចក្រ​កម្ពុ​ជាទី​២​ ៕​

 

 

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.