ថ្ងៃ ពុធ ទី ២៥ ខែ ឧសភា ឆ្នាំ ២០២២

អំណាច​ទឹក​លុយ​និង​អំណាច​ស្និទ្ធ​នឹង​គ្រួសារ​បុរស​ខ្លាំង​ ធ្វើ​ឲ្យ​ឈើ​ល្មើស​គ្រប់​ប្រភេទ​ធ្លាក់​ចូល​ក្នុង​កណ្តាប់ដៃ​ក្រុមហ៊ុន​ឧកញ៉ា​ ទ្រី​ ភាព​ ទាំងអស់​

​មួយ​ថ្ងៃៗ​គ្មាន​លស់​ពេល​ឡើយ​ គឺ​តែង​មាន​ព័ត៌មាន​ប្រកាស​ថា​ អាជ្ញាធរ​បង្ក្រាប​ចាប់​បាន​ឈើ​ល្មើស​ជា​និច្ច​ នៅ​តាម​បណ្តា​ខេត្ត​នានា​ គ្រាន់តែ​តិច​ឬ​ច្រើន​ប៉ុណ្ណោះ​ ទោះបីជា​ឈើ​ចរាចរណ៍​ដោយ​អ្នកមាន​លុយ​ មាន​ងារ​ជា​ឧកញ៉ា​មួយ​ចំនួន​ក៏​ដោយ​ លើកលែងតែ​ឈើ​របស់​ក្រុមហ៊ុន​លោក​ឧកញ៉ា​ ទ្រី​ ភាព​ ជា​ឈ្មួញ​ឈើ​ល្បីឈ្មោះ​លេខ​១​នៅ​កម្ពុជា​ ខណៈ​ឈើ​ល្មើស​ដែល​អាជ្ញាធរ​ចាប់​បាន​នោះ​ ត្រូវ​ចាត់​នីតិវិធី​ដាក់​លក់​ដេញថ្លៃ​ ប្រមូល​លុយ​ចូល​ថវិកាជាតិ​ ព្រម​ជាមួយនឹង​រូបភាព​នៃ​ការ​លក់​ដេញថ្លៃ​ឈើ​ល្មើស​នា​ពេល​កន្លង​មក​ ត្រូវ​បាន​មជ្ឈដ្ឋាន​នានា​រិះគន់​ថា​ គ្មាន​តម្លាភាព​ បង្កប់​ដោយ​អំពើ​ពុក​រលួយ​ និង​បក្ខពួក​និយម​ ។​

​ក្រុម​មន្ត្រី​រដ្ឋបាល​ព្រៃឈើ​ និង​មន្ត្រី​បរិស្ថាន​មួយ​ចំនួន​បាន​និយាយ​ក្នុង​លក្ខខណ្ឌ​មិន​បញ្ចេញ​ឈ្មោះ​ ឲ្យ​ដឹង​ថា​ ទាំង​ឈើ​ប្រណីត​ ទាំង​ឈើ​ល្មើស​ប្រភេទ​ផ្សេងៗ​ទៀត​ដែល​ចាប់​បាន​ប្រមូល​មក​ដាក់​លក់​ដេញថ្លៃ​នោះ​ គឺ​នៅ​ទីបំផុត​បាន​ធ្លាក់​ទៅ​ក្នុង​កណ្តាប់ដៃ​ក្រុមហ៊ុន​លោក​ឧកញ៉ា​ ទ្រី​ ភាព​ ដដែល​ គ្រាន់តែ​ឆ្លងកាត់​តាម​ឈ្មួញ​ឈើ​តូចតាច​មួយ​ចំនួន​ចូលខ្លួន​មក​ដេញថ្លៃ​ ក្រោម​រូបភាព​ជា​"​ឡប់ឡែ​"​ប៉ុណ្ណោះ​ ។​

​ព័ស្តុតាង​ជាក់ស្តែង​ គឺ​កាលពី​ថ្ងៃ​ទី​២៥​ ខែឧសភា​ ឆ្នាំ​២០១៥​ម្សិលមិញ​នេះ​ មាន​រថយន្ត​ធំៗ​ជា​ច្រើន​គ្រឿង​របស់​ក្រុមហ៊ុន​លោក​ឧកញ៉ា​ ទ្រី​ ភាព​ បាន​ដើរ​ប្រមូល​ឈើ​គ្រប់​ប្រភេទ​ពី​តាម​បណ្តា​សង្កាត់​ និង​ផ្នែក​រដ្ឋបាល​ព្រៃឈើ​ក្នុង​ខេត្តសៀមរាប​ជា​បន្តបន្ទាប់​យ៉ាង​សកម្ម​ ដែល​ឈើ​ល្មើស​ទាំងនោះ​ត្រូវ​បាន​មន្ត្រី​រដ្ឋបាល​ព្រៃឈើ​ខេត្តសៀមរាប​ចាប់​បាន​រក្សា​ទុកជា​វត្ថុ​តាង​បទល្មើស​យ៉ាងតិច​តាំងពី​មួយ​ឆ្នាំ​មុន​ ហើយ​ការ​ប្រមូល​ឈើ​របស់​ក្រុមហ៊ុន​លោក​ឧកញ៉ា​ ទ្រី​ ភាព​ នេះ​មិនមែន​ជា​លើក​ទី​១​ទេ​ ។​

​ដូច្នេះ​ ទាំង​ឈើ​ដែល​គេ​កាប់​នៅ​ក្នុង​ព្រៃ​ ទាំង​ឈើ​ល្មើស​គ្រប់​ប្រភេទ​ដែល​អាជ្ញាធរ​បង្ក្រាប​ចាប់​បាន​ គឺ​នៅ​ទីបំផុត​បាន​ធ្លាក់​ទៅ​ក្នុង​កណ្តាប់ដៃ​របស់​ក្រុមហ៊ុន​លោក​ឧកញ៉ា​ ទ្រី​ ភាព​ មូល​ទាំងស្រុង​តែ​មួយ​ដដែល​ ។​

​មជ្ឈដ្ឋាន​អ្នក​តាមដាន​ឧក្រិដ្ឋកម្ម​បទល្មើស​ព្រៃឈើ​នៅ​កម្ពុជា​ បាន​លើក​ឡើង​ថា​ កត្តា​ដែល​សម្រួល​ និង​ជំរុញ​ឲ្យ​អាជីវកម្ម​ធនធាន​ព្រៃឈើ​កម្ពុជា​បច្ចុប្បន្ន​ធ្លាក់​ទៅ​ក្នុង​កណ្តាប់ដៃ​ក្រុមហ៊ុន​របស់​លោក​ឧកញ៉ា​ ទ្រី​ ភាព​ ប្រមូល​បាន​លុយរាប់​លាន​ដុល្លារ​អា​មេ​រិ​ក​ក្នុង​១​ឆ្នាំៗ​នោះ​ គឺ​ដោយសារ​អំណាច​ទឹកប្រាក់​របស់​លោក​ឧកញ៉ា​ ទ្រី​ ភាព​ ផង​ និង​អំណាច​ទទួល​បាន​ពី​ការ​ទំនាក់ទំនង​ជិត​ស្និទ្ធ​របស់​លោក​ឧកញ៉ា​ ទ្រី​ ភាព​ និង​ក្រុម​គ្រួសារ​សម្តេច​អគ្គមហាសេនាបតី​តេ​ជោ​ ហ៊ុន​ សែន​ ហៅ​បុរស​ខ្លាំង​ ជា​នាយក​រដ្ឋមន្ត្រី​នៃ​ព្រះរាជាណាចក្រ​កម្ពុជា​ផង​ ។​

​យោង​តាម​របាយការណ៍​ស៊ើបអង្កេត​របស់​ក្រុម​កិច្ចការ​ពិសេស​សិទ្ធិ​មនុស្ស​នៅ​កម្ពុជា​ ចេញផ្សាយ​កាលពី​ថ្ងៃ​ទី​២០​ ខែវិច្ឆិកា​ ឆ្នាំ​២០១៣​ បាន​ឲ្យ​ដឹង​ថា​ ឈ្មួញ​ឈើ​ល្បីឈ្មោះ​ឧកញ៉ា​ ទ្រី​ ភាព​ បាន​បង់ប្រាក់​ឲ្យ​ក្រុម​គ្រួសារ​បុរស​ខ្លាំង​ចំនួន​១២​លាន​ដុល្លារ​អា​មេ​រិ​ក​ក្នុង​១​ឆ្នាំ​(១​លាន​ដុល្លារ​អា​មេ​រិ​ក​ក្នុង​១​ខែ​)​ ដើម្បី​ជា​ថ្នូរ​ទទួល​បាន​សិទ្ធិ​អំណាច​កាប់​ និង​ធ្វើ​អាជីវកម្ម​ឈើ​នៅ​កម្ពុជា​ នាំ​ចេញ​ទៅ​កាន់​ប្រទេស​វៀតណាម​ និង​ប្រទេស​ចិន​ ខណៈ​របាយការណ៍​របស់​អង្គការ​អភិរក្ស​អន្តរជាតិ​បាន​សន្និដ្ឋាន​ថា​ ក្រុមហ៊ុន​លោក​ឧកញ៉ា​ ទ្រី​ ភាព​ ទទួល​បាន​ប្រាក់​ចំណេញ​ជិត​២៣០​លាន​ដុល្លារ​ក្នុង​រយៈពេល​៣​ឆ្នាំ​ ពី​ជំនួញ​ធនធាន​ព្រៃឈើ​កម្ពុជា​ ។​

​ចំណូល​ថវិកាជាតិ​កាលពី​ឆ្នាំ​២០១៣​ បាន​មក​ពី​អាករ​លើ​ការ​នាំ​ចេញ​ឈើ​ និង​សម្បទាន​ព្រៃឈើ​ មាន​ចំនួន​ប្រមាណ​ជិត​១០​លាន​ដុល្លារ​អា​មេ​រិ​ក​(​ក្នុង​នោះ​ចំណូល​ពី​អាករ​លើ​ការ​នាំ​ចេញ​ឈើ​ចំនួន​១៦.៧៦០​លាន​រៀល​ ឬ​ប្រមាណ​ជាង​៤​លាន​ដុល្លារ​អា​មេ​រិ​ក​ និង​ចំណូល​ពី​សម្បទាន​ព្រៃឈើ​ចំនួន​២០.៤០០​លាន​រៀល​ ឬ​ប្រមាណ​ជាង​៥​លាន​ដុល្លារ​អា​មេ​រិ​ក​)​ និង​ចំណូល​ថវិកាជាតិ​បាន​មក​ពី​អាករ​លើ​ការ​នាំ​ចេញ​ឈើ​ និង​សម្បទាន​ព្រៃឈើ​នៅ​ឆ្នាំ​២០១៤​កន្លង​ទៅ​ មាន​ចំនួន​ជាង​១៤​លាន​ដុល្លារ​អា​មេ​រិ​ក​ប៉ុណ្ណោះ​ (​ក្នុង​នោះ​ចំណូល​ពី​អាករ​លើ​ការ​នាំ​ចេញ​ឈើ​ចំនួន​២០.៤៩០​លាន​រៀល​ ឬ​ប្រមាណ​ជាង​៥​លាន​ដុល្លារ​អា​មេ​រិ​ក​ និង​ចំណូល​ពី​សម្បទាន​ព្រៃឈើ​ចំនួន​៣៩.០០០​លាន​រៀល​ ឬ​ប្រមាណ​ជាង​៩​លាន​ដុល្លារ​អា​មេ​រិ​ក​)​ ។​ មាន​ន័យ​ថា​ ចំណូល​ថវិកាជាតិ​បាន​មក​ពី​ធនធាន​ព្រៃឈើ​កម្ពុជា​ក្នុង​១​ឆ្នាំៗ​ សឹង​មិន​ស្មើនឹង​ចំណូល​របស់​ក្រុម​គ្រួសារ​បុរស​ខ្លាំង​ជា​នាយក​រដ្ឋមន្ត្រី​ ទទួល​បាន​ពី​លោក​ឧកញ៉ា​ ទ្រី​ ភាព​ បង់​ឲ្យ​ផង​ និង​មិន​ស្មើនឹង​ទំហំ​នៃ​ការ​ខូចខាត​ផ្លូវថ្នល់​ដោយសារ​ការ​ដឹក​ជញ្ជូន​ឈើ​របស់​ក្រុមហ៊ុន​លោក​ឧកញ៉ា​ ទ្រី​ ភាព​ ផង​ ។​

​លោក​ឧកញ៉ា​ ទ្រី​ ភាព​ នាយក​ក្រុមហ៊ុន​ Try​ Pheap​ Import​ Export​ និង​ក្រុមហ៊ុន​ MDS​ Import​ Export​ ជា​បុត្រ​សម្ព័ន្ធ​របស់​ក្រុមហ៊ុន​ MDS​ Group​ ទទួល​បានការ​តែងតាំង​ជា​ឧកញ៉ា​ ដោយ​ព្រះរាជក្រឹត្យ​លេខ​ន​ស​/​រក​ត​/០៨០៤/២១៤​ ចុះ​ថ្ងៃ​ទី​១៤​ ខែសីហា​ ឆ្នាំ​២០០៤​ តាម​សេចក្តី​ក្រាប​បង្គំ​ទូល​ថ្វាយ​ និង​ចុះហត្ថលេខា​ដោយ​សម្តេច​អគ្គ​មហា​ធម្ម​ពោធិ​សាល​ ជា​ ស៊ី​ម​ ប្រមុខរដ្ឋ​ស្តីទី​ ក្នុង​ព្រះ​បរម​នាម​ និង​តាម​ព្រះរាជ​ត្រាស់​បង្គាប់​របស់​ព្រះករុណា​ព្រះមហាក្សត្រ​ជាទី​សក្ការៈ​ ៕​

Try-Pheap-Wood Try-Pheap-41

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.