ថ្ងៃ ពុធ ទី ២៥ ខែ ឧសភា ឆ្នាំ ២០២២

ជនជាតិ​យួន​លួច​ជីក​ស្រះ​ទឹក​៥​កន្លែង​ និង​រណ្តៅ​ធំៗ​លើ​ចំណុច​ត្រួតស៊ីគ្នា​ពី​ព្រំដែន​យួន​ចូល​មក​ព្រំដែន​កម្ពុជា​ជាង​៣​០០ម៉ែត្រ

​សេចក្តីរាយការណ៍​ពី​ខេត្តរតនគិរី​ បាន​ឲ្យ​ដឹង​ថា​ ជនជាតិ​យួន​បាន​លួច​ចូល​មក​ជីក​ស្រះ​ទឹក​ចំនួន​៥​កន្លែង​ និង​រណ្តៅ​ធំៗ​ជា​ច្រើន​ហិ​កតា​ ដោយ​ប្រើ​គ្រឿងចក្រ​ រំលោភ​បំពាន​លើ​តំបន់​ត្រួតស៊ីគ្នា​ ឋិត​នៅ​ចំណុច​ភូមិ​ឡុំ​ ឃុំ​ប៉ក់​យ៉ៃ​ ស្រុក​អូ​រយ៉ា​ដាវ​ ខេត្តរតនគិរី​ ប្រទេស​កម្ពុជា​ ដែល​ជាប់​នឹង​ព្រំប្រទល់​ភូមិ​សេ​សៅ​ ឃុំ​យ៉ា​ណា​ង​ ស្រុក​ឌឹ​ក​គើ​ ខេត្ត​យ៉ា​ឡាយ​ ប្រទេស​វៀតណាម​ មាន​ចម្ងាយ​ពី​ខ្សែ​ទឹកដី​ប្រទេស​វៀតណាម​មក​លើ​ចំណុច​ត្រួតស៊ីគ្នា​(​តំបន់​ស​)​ ព្រំដែន​ប្រទេស​កម្ពុជា​ ពី​១៩៩,២០​ម៉ែត្រ​ដល់​ទៅ​៣៧៩,៥០​ម៉ែត្រ​ ។​

​មន្ត្រី​ប៉ុស្តិ៍​នគរបាល​ការពារ​ព្រំដែន​នៅ​តំបន់​នោះ​ បាន​បញ្ជាក់​ឲ្យ​ដឹង​ថា​ ស្រះ​ទឹក​ទាំង​៥​កន្លែង​ដែល​ជនជាតិ​យួន​ប្រើ​គ្រឿងចក្រ​ជីក​រំលោភ​លើ​តំបន់​ត្រួតស៊ីគ្នា​រវាង​ព្រំដែន​កម្ពុជា​ និង​ព្រំដែន​វៀតណាម​ ចេញពី​ខ្សែ​ព្រំដែន​វៀតណាម​មក​ដល់​តំបន់​ស​ព្រំដែន​កម្ពុជា​ រហូត​ដល់​ទៅ​ជាង​៣០០​ម៉ែត្រ​នោះ​ នៅ​ត្រង់​ចំណុច​និយាម​កា​ទី​១​លេខ​ 0775794.1515564,​ និយាម​កា​ទី​២​លេខ​ 0775792.1515588,​ និយាម​កា​ទី​៣​លេខ​ 0775516.1516086,​ និយាម​កា​ទី​៤​លេខ​ 0775424.1516124​ និង​និយាម​កា​ទី​៥​លេខ​ 0775528.1516308​ នៃ​ GPS​ WGS84​ ។​

​ប្រភព​ព័ត៌មាន​ពី​ខេត្តរតនគិរី​បាន​ឲ្យ​ដឹង​ដែរ​ថា​ កាលពី​រសៀល​ថ្ងៃ​ទី​២៥​ ខែឧសភា​ ឆ្នាំ​២០១៥​ម្សិលមិញ​នេះ​ កងកម្លាំង​ចម្រុះ​ស្រុក​អូ​រយ៉ា​ដាវ​ សហការ​ជាមួយ​កងកម្លាំង​សមត្ថកិច្ច​វរ​ការពារ​ព្រំដែន​គោក​ រួម​មាន​ នគរបាល​វរ​ការពារ​ព្រំដែន​លេខ​៦២៣​ និង​យោធា​វរ​ការពារ​ព្រំដែន​គោក​លេខ​១០២​ ព្រមទាំង​កម្លាំង​ទីបញ្ជាការ​ស្រាល​ បាន​ចុះ​ទៅ​ពិនិត្យ​ចំណុច​កើតហេតុ​ដែល​ជនជាតិ​យួន​បាន​ជីក​ស្រះ​ទឹក​ចំនួន​៥​កន្លែង​ និង​រណ្តៅ​ធំៗ​ជា​ច្រើន​ហិ​កតា​ ដោយ​ប្រើ​គ្រឿងចក្រ​រំលោភ​ចូល​មក​តំបន់​ត្រួតស៊ីគ្នា​ព្រំដែន​កម្ពុជា​-​វៀតណាម​នោះ​រួច​ហើយៗ​បាន​ធ្វើ​របាយការណ៍​ទៅ​ថ្នាក់លើ​រង់ចាំ​ការ​សម្រេច​ជា​ក្រោយ​ ។​

​អាជ្ញាធរ​មូលដ្ឋាន​នៅ​តំបន់​ចំណុច​កើតហេតុ​បាន​និយាយ​ឲ្យ​ដឹង​ថា​ ភូមិសាស្ត្រ​ចន្លោះ​បង្គោល​ព្រំដែន​លេខ​៣០​និង​លេខ​៤០​ មាន​ចម្ងាយ​៥៥​គីឡូម៉ែត្រ​ មាន​ប៉ុស្តិ៍​សង្កេតការណ៍​ចំនួន​១១​ មិន​ទាន់​មាន​បង្គោល​ព្រំដែន​ពិតប្រាកដ​នៅឡើយ​ ហើយ​កម្លាំង​ល្បាត​ការពារ​ក៏​មាន​ចំនួន​តិច​ ជា​ហេតុ​ធ្វើ​ឲ្យ​មានការ​លំបាក​ក្នុង​ការ​ល្បាត​តាម​ព្រំដែន​ និង​ក៏​ជា​ឱកាស​ងាយស្រួល​ឲ្យ​ជនជាតិ​វៀតណាម​ចូល​មក​ធ្វើ​សកម្មភាព​រំលោភ​បំពាន​បូរណភាព​ទឹកដី​ផង​ដែរ​ ៕​

03 04

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.