ថ្ងៃ ពុធ ទី ២៥ ខែ ឧសភា ឆ្នាំ ២០២២

អតីត​ទីប្រឹក្សា​ប្រធានរដ្ឋសភា​ពីរ​នាក់​ប្តី​-​ប្រពន្ធ​ ត្រូវ​ប្រជាពលរដ្ឋ​ប្តឹង​ទៅ​តុលាការ​ចោទប្រកាន់​ពី​បទ​ កាប់​រាន​ដី​ព្រៃ​ជាង​១.០០០​ហិ​កតា​

​សេចក្តីរាយការណ៍​ពី​ខេត្តកំពត​ បាន​ឲ្យ​ដឹង​ថា​ អតីត​ទីប្រឹក្សា​សម្តេច​អគ្គ​មហា​ពញា​ចក្រី​ ហេង​ សំ​រិ​ន​ ប្រធានរដ្ឋសភា​នៃ​ព្រះរាជាណាចក្រ​កម្ពុជា​ ពីរ​នាក់​ប្តី​-​ប្រពន្ធ​ និង​គូកន​ ត្រូវ​បាន​ក្រុម​ប្រជាពលរដ្ឋ​រស់នៅ​ស្រុក​ឈូក​ ខេត្តកំពត​ ប្តឹង​ទៅ​ស្ថាប័ន​អយ្យការ​អម​សាលាដំបូង​ខេត្តកំពត​ ដោយ​ចោទប្រកាន់​ពី​បទ​កាប់​រាន​ ឈូស​ឆាយដី​ព្រៃ​ នៅ​ត្រង់​ចំណុច​វាល​ឈើ​ត្រាវ​ ភូមិ​ព្រៃ​ពាយ​ ឃុំ​ត្រពាំង​ភ្លាំង​ ស្រុក​ឈូក​ ខេត្តកំពត​ ប្រមាណ​ជាង​១.០០០​ហិ​កតា​ យក​ទៅ​លក់​ឲ្យ​ក្រុមហ៊ុន​បរទេស​ កើប​លុយ​ដាក់​ហោប៉ៅ​ផ្ទាល់ខ្លួន​ ។​ លើស​ពី​នេះ​ អតីត​ទីប្រឹក្សា​ប្រធានរដ្ឋសភា​រូប​នោះ​ក៏​ត្រូវ​បាន​ប្រជាពលរដ្ឋ​ប្តឹង​ចោទប្រកាន់​ពី​បទ​ធ្វើ​ទារុណកម្ម​ និង​រំលោភ​បំពាន​យក​ដី​សម្បទាន​សង្គមកិច្ច​របស់​ប្រជាពលរដ្ឋ​ចំនួន​១០១​គ្រួសារ​ទៀត​ផង​ ។​

​ប្រភព​ព័ត៌មាន​ពី​តុលាការ​សាលាដំបូង​ខេត្តកំពត​ បាន​ឲ្យ​ដឹង​ថា​ តំណាង​អយ្យការ​អម​សាលាដំបូង​ខេត្តកំពត​កំពុង​តែ​ចាត់ការ​សំណុំរឿង​នេះ​តាម​នីតិវិធី​ហើយ​ ដោយ​បាន​ចេញ​ដីកា​កោះហៅ​ប្រជាពលរដ្ឋ​ជាដើម​បណ្តឹង​ និង​អ្នក​ពាក់ព័ន្ធ​ឯទៀតៗ​មក​សាកសួរ​ជា​បន្តបន្ទាប់​ ។​

​ពាក្យបណ្តឹង​របស់​ក្រុម​ប្រជាពលរដ្ឋ​បាន​បញ្ជាក់​ថា​ លោក​ អាំ​ ផ​ល្លី​ន​ និង​លោកស្រី​ ហ៊ា​ង​ គុ​ន្ធី​ ជា​មេខ្លោង​ បាន​ជួល​អ្នក​ភូមិ​ព្រៃ​ពាយ​ក្នុង​តម្លៃ​ម្នាក់​២​ម៉ឺន​រៀល​ក្នុង​១​ថ្ងៃ​ ឲ្យ​កាប់​រាន​ ឈូស​ឆាយដី​ព្រៃ​នៅ​ត្រង់​ចំណុច​វាល​ឈើ​ត្រាវ​ ភូមិ​ព្រៃ​ពាយ​ ឃុំ​ត្រពាំង​ភ្លាំង​ ស្រុក​ឈូក​ ខេត្តកំពត​ និង​បាន​ប្រើប្រាស់​គ្រឿងចក្រ​ទៀត​ផង​ ចាប់តាំងពី​ថ្ងៃ​ទី​២៤​ ខែវិច្ឆិកា​ ឆ្នាំ​២០១៤​កន្លង​មក​ទល់​សព្វថ្ងៃ​ អស់​ដី​ព្រៃ​ប្រមាណ​ជាង​១.០០០​ហិ​កតា​ លើ​ទំហំ​ដី​ព្រៃ​ក្នុង​ចំណុច​វាល​ឈើ​ត្រាវ​នេះ​ប្រមាណ​២.០០០​ហិ​កតា​ មិន​បាន​រំខាន​ដល់​សមត្ថកិច្ច​បន្តិច​ណា​ឡើយ​ ។​

​លោក​ អាំ​ ផ​ល្លី​ន​ ធ្លាប់​ទទួល​បានការ​តែងតាំង​ជាទី​ប្រឹក្សា​សម្តេច​អគ្គ​មហា​ពញា​ចក្រី​ ហេង​ សំ​រិ​ន​ ប្រធានរដ្ឋសភា​នីតិកាល​ទី​៤​ មាន​ឋានៈ​ស្មើ​អនុរដ្ឋលេខាធិការ​ ដោយ​ព្រះរាជក្រឹត្យ​លេខ​ន​ស​/​រក​ត​/១០០៨/១១៤០​ ចុះ​ថ្ងៃ​ទី​២៤​ ខែតុលា​ ឆ្នាំ​២០០៨​ និង​លោកស្រី​ ហ៊ា​ង​ គុ​ន្ធី​(​ជា​ភរិយា​របស់​លោក​ អាំ​ ផ​ល្លី​ន​)​ ធ្លាប់​ទទួល​បានការ​តែងតាំង​ជាទី​ប្រឹក្សា​សម្តេច​អគ្គ​មហា​ពញា​ចក្រី​ ហេង​ សំ​រិ​ន​ ប្រធានរដ្ឋសភា​នីតិកាល​ទី​៥​ មាន​ឋានៈ​ស្មើ​អនុរដ្ឋលេខាធិការ​ ដោយ​ព្រះរាជក្រឹត្យ​លេខ​ន​ស​/​រក​ត​/១០១៣/១០៣៩​ ចុះ​ថ្ងៃ​ទី​២៤​ ខែតុលា​ ឆ្នាំ​២០១៣​ តែ​ត្រូវ​បាន​ដកហូត​តំណែង​នេះ​វិញ​ ដោយ​ព្រះរាជក្រឹត្យ​លេខ​ន​ស​/​រក​ត​/០៨១៤/១០៣៧​ ចុះ​ថ្ងៃ​ទី​១២​ ខែសីហា​ ឆ្នាំ​២០១៤​ ។​

​ពាក់ព័ន្ធ​នឹង​ការ​ចោទប្រកាន់​របស់​ក្រុម​ប្រជាពលរដ្ឋ​ខាងលើ​ សារព័ត៌មាន​ដើម​ត្នោត​មិន​ទាន់​អាច​សុំ​ការ​បំភ្លឺ​បញ្ជាក់​ពី​លោក​ អាំ​ ផ​ល្លី​ន​ និង​លោកស្រី​ ហ៊ា​ង​ គុ​ន្ធី​ បាន​នៅឡើយ​ គិត​ត្រឹម​ថ្ងៃ​ទី​០៥​ ខែឧសភា​ ឆ្នាំ​២០១៥​នេះ​ ពីព្រោះ​ទូរស័ព្ទ​មិន​អាច​ទំនាក់ទំនង​បាន​ ៕​

Ek-Chhenghuot.-9 Land-Kampot

Filed in: Feature, តុលាការ, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.