ថ្ងៃ អង្គារ ទី ០១ ខែ ធ្នូ ឆ្នាំ ២០២០

សំណល់​កន្ទុយបារី​ជ្រក​ក្រោម​ស្លាក​ជីធម្មជាតិ​រាប់​តោន​បាន​ចល័ត​ចេញពី​ខេត្តសៀមរាប​ទៅ​ខេត្តឧត្តរមានជ័យ​វិញ​

​រឿងអាស្រូវ​ពាក់ព័ន្ធ​នឹង​ការ​នាំ​ចូល​ជីធម្មជាតិ​ប្រមាណ​៣០​តោន​(​អាជ្ញាប័ណ្ណ​ផ្តល់​ឲ្យ​នាំ​ចូល​ចំនួន​៨០​តោន​)​ ដោយ​ក្រុមហ៊ុន​ឯកជន​មួយ​ឈ្មោះ​ ប៉ែន​ លឹ​ម​ ត្រេ​ឌី​ង​ គ្រុប​ ក្លាយជា​កាក​សំណល់​កន្ទុយបារី​ ប៉ះពាល់​ដល់​សុខភាព​មនុស្ស​ និង​ជាប់​ឈ្មោះ​ជា​ជី​ក្លែងក្លាយ​ យក​មក​ដាក់​ពង្រាយ​នៅ​ក្នុង​ទីតាំង​ខេត្ត​នៃ​ព្រះរាជាណាចក្រ​កម្ពុជា​ចំនួន​យ៉ាងតិច​ គឺ​ខេត្តសៀមរាប​,​ ខេត្តឧត្តរមានជ័យ​ និង​ខេត្ត​ត្បូងឃ្មុំ​ ដោយ​មានការ​អនុញ្ញាត​ពី​ក្រសួងកសិកម្ម​ រុក្ខា​ប្រមាញ់​ និង​នេសាទ​ មាន​ឯកឧត្តម​បណ្ឌិត​ អ៊ុ​ក​ រ៉ា​ប៊ុ​ន​ ជា​រដ្ឋមន្ត្រី​ កាលពី​ពាក់កណ្តាល​ឆ្នាំ​២០១៤​កន្លង​ទៅ​ ហើយ​ត្រូវ​បាន​បែកធ្លាយ​នា​ដើមឆ្នាំ​២០១៥​នេះ​មិន​ទាន់​ចប់​នៅឡើយ​ទេ​ ដ្បិត​មេខ្លោង​នាំ​ចូល​ជីធម្មជាតិ​ក្លែង​ក្លាយទៅជា​កាក​សំណល់​កន្ទុយបារី​រាប់​សិប​តោន​ គឺ​ឈ្មួញ​ឈ្មោះ​ ប៉ែន​ លឹ​ម​ នាយក​ក្រុមហ៊ុន​ប៉ែន​ លឹ​ម​ ត្រេ​ឌី​ង​ គ្រុប​ និង​មន្ត្រី​សមគំនិត​មិន​ទាន់​ទទួល​បានការ​ផ្តន្ទាទោស​តាម​ច្បាប់​ ខណៈ​កាក​សំណល់​កន្ទុយបារី​ទាំងនោះ​ក៏​មិន​ទាន់​យក​ចេញពី​ទឹកដី​កម្ពុជា​ដែរ​ តែ​បាន​ត្រឹម​ដឹក​ជញ្ជូន​ចល័ត​ពី​ខេត្តសៀមរាប​ប្រមាណ​១០​តោន​ ជម្លៀស​យក​ទៅ​ទុក​នៅ​ខេត្តឧត្តរមានជ័យ​ឲ្យ​គ្រប់​ចំនួន​ប្រមាណ​៣០​តោន​ប៉ុណ្ណោះ​ ។​

​តាម​ការ​បញ្ជាក់​របស់​លោក​ គឹ​ម​ ឆៃ​ហៀ​ង​ អភិបាលរង​នៃ​គណៈ​អភិបាលខេត្ត​សៀមរាប​ បាន​ឲ្យ​ដឹង​ថា​ ខាង​ភាគី​ក្រុមហ៊ុន​នាំ​ចូល​ជី​ក្លែងក្លាយ​នោះ​ បាន​ចាប់ផ្តើម​ដឹក​ជញ្ជូន​ជី​មាន​កន្ទុយបារី​នេះ​ប្រមាណ​១០​តោន​ចេញពី​សង្កាត់​ស្ល​ក្រាម​ ក្រុង​សៀមរាប​ ខេត្តសៀមរាប​ហើយ​ នា​ថ្ងៃ​ទី​២៧​ ខែមេសា​ ឆ្នាំ​២០១៥​ម្សិលមិញ​ តាម​ការ​បង្គាប់បញ្ជា​របស់​អាជ្ញាធរ​ ដោយ​យក​ទៅ​រក្សា​ទុក​នៅ​ខេត្តឧត្តរមានជ័យ​វិញ​ ។​

​សូម​រំលឹក​ជូន​ថា​ យោង​តាម​ពាក្យសុំ​ចុះ​ថ្ងៃ​ទី​១០​ ខែមិថុនា​ ឆ្នាំ​២០១៤​ របស់​លោក​ ប៉ែន​ លឹ​ម​ នាយក​ក្រុមហ៊ុន​ប៉ែន​ លឹ​ម​ ត្រេ​ឌី​ង​ គ្រុប​ នោះ​ ក្រសួងកសិកម្ម​ រុក្ខា​ប្រមាញ់​ និង​នេសាទ​ បាន​ចេញ​លិខិត​ចុះ​ថ្ងៃ​ទី​២៧​ ខែមិថុនា​ ឆ្នាំ​២០១៤​ អនុញ្ញាត​ឲ្យ​ក្រុមហ៊ុន​នេះ​នាំ​ចូល​ជីធម្មជាតិ​ចំនួន​៨០​តោន​ពី​ប្រទេស​អ៊ុយ​ក្រែ​ន​ តាម​មាត់ច្រក​កំពង់​ផែ​ខេត្ត​ព្រះ​សីហ​នុម​ក​កាន់​ព្រះរាជាណាចក្រ​កម្ពុជា​ មាន​សុពលភាព​រយៈពេល​១​ឆ្នាំ​រហូត​ដល់​ថ្ងៃ​ទី​២៦​ ខែមិថុនា​ ឆ្នាំ​២០១៥​ ។​

​នៅ​ពេល​ក្រុមហ៊ុន​ ប៉ែន​ លឹ​ម​ ត្រេ​ឌី​ង​ គ្រុប​ ទើប​នាំ​ចូល​ជីធម្មជាតិ​តាម​ការ​អនុញ្ញាត​ពី​ក្រសួងកសិកម្ម​ រុក្ខា​ប្រមាញ់​ និង​នេសាទ​ បាន​ប្រមាណ​៣០​តោន​នោះ​(១០​តោន​យក​ទៅ​ខេត្តសៀមរាប​ និង​២០​តោន​យក​ទៅ​ទុក​នៅ​ខេត្តឧត្តរមានជ័យ​)​ ក៏​បែកធ្លាយ​រឿងអាស្រូវ​ក្លាយជា​កាក​សំណល់​កន្ទុយបារី​ មាន​ក្លិន​មិនល្អ​ បង្ក​ការ​ប៉ះពាល់​ដល់​បរិស្ថាន​ និង​សុខភាព​មនុស្ស​ទៅ​វិញ​ ហើយ​ជាប់​ឈ្មោះ​ជា​"​ជី​ក្លែងក្លាយ​"​ទៀត​ផង​ ។​ ក្រោយ​ផ្ទុះ​រឿងអាស្រូវ​ភ្លាមៗ​ នៅ​ថ្ងៃ​ទី​១០​ ខែមីនា​ ឆ្នាំ​២០១៥​ ក្រសួងកសិកម្ម​ រុក្ខា​ប្រមាញ់​ និង​នេសាទ​ បាន​ចេញ​សេចក្តី​ប្រកាស​ព័ត៌មាន​មួយ​សម្រេច​លុប​ចោល​លិខិតអនុញ្ញាត​នាំ​ចូល​ នាំ​ចេញ​ជី​កសិកម្ម​របស់​ក្រុមហ៊ុន​ ប៉ែន​ លឹ​ម​ ត្រេ​ឌី​ង​ គ្រុប​ យ៉ាង​តក់ក្រហល់​ផង​ដែរ​ ស្រប​ពេល​នឹង​មាន​លេចឮ​ព័ត៌មាន​រួច​ ឈ្មួញ​ឈ្មោះ​ ប៉ែន​ លឹ​ម​ និង​មន្ត្រី​ពុក​រលួយ​ពាក់ព័ន្ធ​មួយ​ចំនួន​កំពុង​ខ្នះខ្នែង​ប្រឹងប្រែង​រត់ការ​ឲ្យ​បាន​រួចខ្លួន​ផុត​ពី​សំណាញ់​ច្បាប់​ ។​

​អនុលោម​តាម​មាត្រា​១០៩​ ចំណុច​ទី​៤​នៃ​ច្បាប់​ស្តី​ពី​ការ​គ្រប់គ្រង​ថ្នាំ​កសិកម្ម​ និង​ជី​កសិកម្ម​ ដែល​ប្រកាស​ឲ្យ​ប្រើ​ដោយ​ព្រះរាជក្រម​លេខ​ន​ស​/​រកម​/០១១២/០០៥​ ចុះ​ថ្ងៃ​ទី​១៤​ ខែមករា​ ឆ្នាំ​២០១២​ បាន​ចែង​ថា​ "​ត្រូវ​ផ្តន្ទាទោស​ដាក់​ពន្ធនាគារ​ពី​០១​ខែ​ទៅ​១​ឆ្នាំ​ និង​ត្រូវ​ពិន័យ​ជា​ប្រាក់​ចំនួន​៥​លាន​រៀល​ទៅ​១០​លាន​រៀល​ ចំពោះ​បុគ្គល​ណា​ដែល​ប្រព្រឹត្ត​ក្លែងបន្លំ​សមាសធាតុ​ ឬ​មាន​សមាសធាតុ​ផ្សេង​ពី​ការ​អះអាង​នៅ​ពេល​ស្នើ​សុំ​ការ​ចុះបញ្ជី​ ឬ​ផលិតផល​ជី​កសិកម្ម​ក្រៅ​បមាណីយ​ ។​ "​ ។​

​ដូច្នេះ​ ជុំវិញ​រឿងអាស្រូវ​ការ​នាំ​ចូល​ជីធម្មជាតិ​របស់​ក្រុមហ៊ុន​ ប៉ែន​ លឹ​ម​ ត្រេ​ឌី​ង​ គ្រុប​ ដែល​មាន​លោក​ ប៉ែន​ លឹ​ម​ ជានា​យក​ក្រុមហ៊ុន​ ក្លាយជា​កាក​សំណល់​កន្ទុយបារី​ ឬ​ជា​ជី​ក្លែងក្លាយ​ បង្ខូច​កិត្យានុភាព​ប្រទេស​កម្ពុជា​ឲ្យ​ជាប់​ឈ្មោះ​ជា​"​ធុងសំរាម​"​នោះ​ សម្តេច​អគ្គមហាសេនាបតី​តេ​ជោ​ ហ៊ុន​ សែន​ ហៅ​បុរស​ខ្លាំង​ជា​ប្រមុខ​រាជរដ្ឋាភិបាល​ មិន​ត្រូវ​បណ្តែតបណ្តោយ​ឲ្យ​ឈ្មួញ​ឈ្មោះ​ ប៉ែន​ លឹ​ម​ និង​ក្រុម​មន្ត្រី​សមគំនិត​ពុក​រលួយ​ពាក់ព័ន្ធ​បាន​រួចខ្លួន​គេច​ផុត​ពី​ការ​ផ្តន្ទាទោស​តាម​ច្បាប់​ជា​ដាច់ខាត​ ៕​

Tobaco-31  Tobaco-22Tobaco-40

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.