ថ្ងៃ អង្គារ ទី ១៩ ខែ តុលា ឆ្នាំ ២០២១

រក​ឃើញ​សាកសព​អ្នកដំណើរ​ក្នុង​យន្តហោះ​ Air​ Asia​ QZ8501​ ដែល​បាត់​ខ្លួន​ក្រោយ​ពេល​ធ្លាក់​ក្នុង​សមុទ្រ​

​ឈាន​មក​ដល់​វេលា​ល្ងាច​នា​ថ្ងៃ​ទី​៣០​ ខែធ្នូ​ ឆ្នាំ​២០១៤​នេះ​ ក្រៅពី​បំណែក​ទ្វារ​យន្តហោះ​ដឹក​អ្នកដំណើរ​ឥណ្ឌូ​នេ​ស៊ី​ Air​ Asia​ មាន​ជើងហោះហើរ​ QZ8501​ ដែល​បាត់​ខ្លួន​កាលពី​រសៀល​ថ្ងៃ​ទី​២៨​ ខែធ្នូ​ ឆ្នាំ​២០១៤​កន្លង​ទៅ​ ត្រូវ​បាន​រក​ឃើញ​នោះ​ ក្រុម​អ្នករុករក​បាន​ប្រទះ​ឃើញ​សាកសព​មនុស្ស​ជាង​៤០​នាក់​អណ្តែត​នៅ​លើ​ផ្ទៃ​ទឹកសមុទ្រ​ក្បែរ​ទីតាំង​បំណែក​បាក់បែក​របស់​យន្តហោះ​ ហើយ​ព័ត៌មាន​នេះ​បាន​ធ្វើ​ឲ្យ​ក្រុម​គ្រួសារ​សាច់ញាតិ​របស់​ជន​រង​គ្រោះជា​អ្នកដំណើរ​ក្នុង​យន្តហោះ​នាំ​គ្នា​យំទួញសោក​ក្តុកក្តួល​ពេញ​អាកាសយានដ្ឋាន​ Juanda​ ក្នុង​ទីក្រុង​ Surabaya​ ។​

​ក្រុម​អ្នក​ជួយ​សង្គ្រោះ​បាន​ប្រាប់​ទីភ្នាក់ងារសារព័ត៌មាន​ Jakarta​ Post​ ឲ្យ​ដឹង​ថា​ ពួក​គេ​បាន​មើលឃើញ​មនុស្ស​ជា​ច្រើន​អណ្តែត​លើ​ទឹកសមុទ្រ​ ហើយ​បាន​បោយ​ដៃ​សុំ​ការ​ជួយ​សង្គ្រោះ​ ប៉ុន្តែ​ជា​អកុសល​ ពេល​ក្រុម​ជួយ​សង្គ្រោះ​ទៅ​ដល់​ មនុស្ស​ទាំងនោះ​ក៏​បាន​ដាច់ខ្យល់​ស្លាប់​បាត់បង់​ជីវិត​អស់​ទៅ​ហើយ​ ខណៈ​សាកសព​មួយ​ចំនួន​មាន​សភាព​ហើម​ និង​មួយ​ចំនួន​ទៀត​មាន​សភាព​ធម្មតា​ គ្មាន​របួស​ស្នាម​អ្វី​ទេ​ ជា​ហេតុ​ធ្វើ​ឲ្យ​ក្រុម​ជួយ​សង្គ្រោះ​អះអាង​ថា​ ប្រសិនបើ​រក​ឃើញ​មុន​នេះ​តែ​ប៉ុន្មាន​ម៉ោង​ គឺ​នឹង​អាច​ជួយ​សង្គ្រោះ​មនុស្ស​ទាំងនោះ​ឲ្យ​រស់រាន​មានជីវិត​បាន​យ៉ាងច្រើន​ ។​ រីឯ​ក្រុម​អ្នក​មុជទឹក​ដែល​មាន​ចំនួន​ជាង​១០​នាក់​នោះ​ បាន​និង​កំពុង​ព្យាយាម​មុជ​ចូល​ទៅ​ក្នុង​បាតសមុទ្រ​ ដើម្បី​ស្វែងរក​យន្តហោះ​ដែល​ធ្លាក់​នៅ​ម្តុំ​ប្រទះ​ឃើញ​សាកសព​ ។​

​សូម​រំលឹក​ជូន​ថា​ យន្តហោះ​ដឹក​អ្នកដំណើរ​ប្រភេទ​ Airbus​ A320-200​ របស់​ក្រុមហ៊ុន​ Air​ Asia​ នៃ​ប្រទេស​ឥណ្ឌូ​នេ​ស៊ី​ មាន​ជើងហោះហើរ​ QZ8501​ ផ្ទុក​មនុស្ស​ក្នុង​យន្តហោះ​សរុប​ចំនួន​១៦២​នាក់​ បាន​បាត់​ខ្លួន​ចេញ​ផុត​ពី​ប្រព័ន្ធ​រ៉ា​ដា​ បន្ទាប់​ពី​បាន​ចេញដំណើរ​ពី​អាកាសយានដ្ឋាន​ Juanda​ ទីក្រុង​ Surabaya​ ប្រទេស​ឥណ្ឌូ​នេ​ស៊ី​ ឆ្ពោះទៅ​កាន់​ប្រទេស​សិង្ហ​បុរី​ នៅ​វេលា​រសៀល​ថ្ងៃ​ទី​២៨​ ខែធ្នូ​ ឆ្នាំ​២០១៤​ ត្រង់​ចំណុច​លើ​ផ្ទៃសមុទ្រ​ Java​ ៕​

  

Filed in: Feature, អន្តរជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.