ថ្ងៃ អង្គារ ទី ០៩ ខែ មីនា ឆ្នាំ ២០២១

មិន​ទាន់​ឃើញ​សាកសព​ សាច់ញាតិ​មិន​ព្រម​ទទួល​សំណង​ ករណី​យន្តហោះ​ម៉ា​ឡេ​ស៊ីជើង​ហោះហើរ​ MH370​ បាត់​ខ្លួន

​សារព័ត៌មាន​ម៉ា​ឡេ​ស៊ី​បាន​ផ្សាយ​កាលពី​ថ្ងៃ​ទី​១១​ ខែធ្នូ​ ឆ្នាំ​២០១៤​ ឲ្យ​ដឹង​ថា​ ក្រុម​គ្រួសារ​សាច់ញាតិ​ជន​រង​គ្រោះ​ធ្វើ​ដំណើរ​តាម​យន្តហោះ​ដឹក​អ្នកដំណើរ​ប្រភេទ​ Boeing777-200​ របស់​ក្រុមហ៊ុន​អាកាសចរណ៍​ម៉ា​ឡេ​ស៊ី​អ៊ែ​រឡាញ​ មាន​ជើងហោះហើរ​ MH370​ ដែល​បាន​បាត់​ខ្លួន​កាលពី​ថ្ងៃ​ទី​០៨​ ខែមីនា​ ឆ្នាំ​២០១៤​កន្លង​ទៅ​នោះ​ មិន​ព្រម​ទទួលយក​សំណង​ជំហាន​ដំបូង​ចំនួន​៥​ម៉ឺន​ដុល្លារ​អា​មេ​រិ​ក​ឡើយ​ ខណៈ​ក្រុម​គ្រួសារ​សាច់ញាតិ​អ្នក​បាត់​ខ្លួន​ទាំងនោះ​សង្ឃឹមថា​ យន្តហោះ​ ព្រមទាំង​អ្នកដំណើរ​ទាំងអស់​នឹង​វិល​ត្រឡប់​មក​វិញ​នៅ​ពេល​ខាង​មុខ​ ។​

​លោក​ Liow​ Tiong​ Lai​ រដ្ឋមន្ត្រីក្រសួង​ដឹក​ជញ្ជូន​ម៉ា​ឡេ​ស៊ី​ បាន​ប្រកាស​ឲ្យ​ដឹង​ថា​ ការណ៍​ដែល​ក្រុម​គ្រួសារ​សាច់ញាតិ​ជន​រង​គ្រោះ​មិន​ព្រម​ទទួលយក​សំណង​នោះ​ ដោយសារ​ពួក​គាត់​មាន​ក្តី​សង្ឃឹមថា​ សាច់ញាតិ​របស់​ពួក​គាត់​ដែល​ធ្វើ​ដំណើរ​នៅ​លើ​យន្តហោះ​បាត់​ខ្លួន​នៅ​មាន​សុវត្ថិភាព​ និង​អាច​វិល​ត្រឡប់​មក​ជួបជុំ​ក្រុម​គ្រួសារ​វិញ​ ។​ ផ្ទុយ​វិញ​ ការ​ទទួល​សំណង​អាច​ប្រព្រឹត្ត​ទៅ​បាន​ លុះត្រាតែ​រក​ឃើញ​សាកសព​អ្នក​បាត់​ខ្លួន​ជា​មុន​សិន​ ។​

​សូម​បញ្ជាក់​ជូន​ថា​ យន្តហោះ​ដឹក​អ្នកដំណើរ​មាន​ជើងហោះហើរ​ MH370​ ដែល​ផ្ទុក​អ្នកដំណើរ​ និង​បុគ្គលិក​យន្តហោះ​ ព្រមទាំង​អាកាសយានិក​សរុប​ចំនួន​២៣៩​នាក់​ បាន​បាត់​ខ្លួន​កាលពី​ថ្ងៃ​ទី​០៨​ ខែមីនា​ ឆ្នាំ​២០១៤​ ក្រោយ​ពេល​ហោះហើរ​ចេញពី​អាកាសយានដ្ឋាន​អន្តរជាតិ​ ទីក្រុង​គូ​ឡា​ឡាំ​ពួរ​ ប្រទេស​ម៉ា​ឡេ​ស៊ី​ ក្នុង​ទិស​ដៅ​ឆ្ពោះទៅ​ទីក្រុង​ប៉េ​កាំ​ង​ ប្រទេស​ចិន​ រហូត​មក​ទល់​សព្វ​ថ្ងៃនេះ​ សកម្មភាព​រុករក​មិន​ទាន់​មាន​តម្រុយ​នៅឡើយ​ គឺ​បាន​ត្រឹមតែ​បន្ត​ស្វែងរក​តទៅ​ទៀត​ប៉ុណ្ណោះ​ ខណៈ​អាជ្ញាធរ​ប្រទេស​ម៉ា​ឡេ​ស៊ី​ធ្លាប់​បាន​ប្រកាស​រួច​ហើយ​ថា​ យន្តហោះ​ដែល​បាត់​ខ្លួន​នោះ​បាន​ធ្លាក់​ទៅ​ក្នុង​សមុទ្រ​ សម្លាប់​អ្នកដំណើរ​ទាំងអស់​គ្មាន​សេសសល់​ម្នាក់​ឡើយ​ ៕​

 

Filed in: Feature, អន្តរជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.