ថ្ងៃ អាទិត្យ ទី ២៨ ខែ កម្ភៈ ឆ្នាំ ២០២១

ឪពុកម្តាយ​ឧកញ៉ា ថោង សារ៉ាត់ មិន​ខ្វល់​ក្នុង​ចិត្ត​បន្តិច​សោះ​ពេល​បញ្ជូន​ខ្លួន​ទៅកាន់​តុលាការ បែរជា​សើច​ឌឺ​ដាក់​មហាជន​ទៀត​

ឈ្មោះ ថោង ចំរើន ហៅ តាំង សុខ និង​មានឈ្មោះ​ដើម​ជា​ភាសា​វៀតណាម​ថា «​មិន​» អាយុ​៦៧​ឆ្នាំ ត្រូវជា​ឪពុក និង​ឈ្មោះ កែវ សារី មានឈ្មោះ​ដើម​ជា​ភាសា​វៀតណាម​ថា «​ហាយ​» អាយុ​៥៥​ឆ្នាំ ត្រូវជា​ម្តាយ​របស់​ឧ​ត្ត​ម​សេនីយ៍​ឧកញ៉ា ថោង សារ៉ាត់ និង​ស្ត្រី​ឈ្មោះ ទាវ ធីតា អាយុ​៣៣​ឆ្នាំ ជា​ប្រពន្ធ​ទី​២​របស់​ឧកញ៉ា ថោង សារ៉ាត់ និង​បុរស​ឈ្មោះ ថោង បូ​ណា មានឈ្មោះ​ដើម​ជា​ភាសា​វៀតណាម​ថា «​មិញ​» អាយុ​៣៣ ឆ្នាំ ជា​ប្អូនបង្កើត​ឧកញ៉ា ថោង សារ៉ាត់ ដែល​ជាប់​សង្ស័យ​ក្នុង​សំណុំរឿង​ឃាតកម្ម​លើ​លោក​ឧកញ៉ា អ៊ឹង ម៉េង​ជឺ ហើយ​ត្រូវបាន​សមត្ថកិច្ច​ចាប់​ឃាត់ខ្លួន​កាលពី​រាត្រី​ថ្ងៃទី​០៣ ខែធ្នូ ឆ្នាំ​២០១៤​នោះ ត្រូវបាន​បញ្ជូន​ខ្លួន​មកកាន់​តុលាការ​សាលាដំបូង​រាជធានី​ភ្នំពេញ ដើម្បី​សាកសួរ​នៅវេលា​ព្រឹក​នា​ថ្ងៃទី​០៦ ខែធ្នូ ឆ្នាំ​២០១៤​នេះ ហើយ​បើតាម​ប្រភពព័ត៌មាន​ពី​សាលាដំបូង​រាជធានី​ភ្នំពេញ បាន​ឲ្យ​ដឹង​ដែរ​ថា ក្រុម​ជនសង្ស័យ​ទាំង​៤​នាក់​នេះ នឹងត្រូវ​ចាត់​នីតិវិធី​សាកសួរ​បន្ត​នៅ​ថ្ងៃស្អែក​ទី​០៧ ខែធ្នូ ឆ្នាំ​២០១៤ ទៀត​។

​ចំណុច​គួរ​ឲ្យ​ចាប់អារម្មណ៍​ទាក់ទង​នឹង​វត្តមាន​របស់​ក្រុម​ជនសង្ស័យ​ជា​គ្រួសារ​របស់លោក​ឧកញ៉ា ថោង សារ៉ាត់  នៅក្នុង​បរិវេណ​តុលាការ​សាលាដំបូង​រាជធានី​ភ្នំពេញ​នោះ គឺ​ឪពុកម្តាយ​របស់​ឧកញ៉ា ថោង សារ៉ាត់ ហាក់​បាន​សម្តែង​នូវ​ការមិន​ខ្វល់​ក្នុង​ចិត្ត​បន្តិច​សោះឡើយ ហើយ​បែរជា​សើច​ឌឺ​ដាក់​សមត្ថកិច្ច អ្នកសារព័ត៌មាន និង​មហាជន​ទៅវិញ ធ្វើ​ឲ្យ​មជ្ឈដ្ឋាន​ទូទៅ​កត់សម្គាល់ថា ទំនងជា​ជនសង្ស័យ​នេះ​អាង​មាន​ខ្នង​ក្រាស់ និង​អាង​មាន​លុយកាក់​ច្រើន សង្ឃឹមថា នឹង​បាន​រួចខ្លួន​វិញ​មើលទៅ​។​

​លោក​ឧ​ត្ត​ម​សេនីយ៍​ទោ​យោធា ថោង សារ៉ាត់ មានឈ្មោះ​ដើម​ជា​ភាសា​វៀតណាម​ថា «​ប៊ិន ទឹង​» អាយុ​៣៨​ឆ្នាំ និង​មាន​ងារ​ជា​ឧកញ៉ា និង​ក្រុម​អង្គរក្ស ព្រមទាំង​ក្រុមគ្រួសារ​ត្រូវបាន​សមត្ថកិច្ច​ចោទប្រកាន់​ពីបទ​អំពើ​ឃាតកម្ម​គិតទុក​ជាមុន សមគំនិត​ក្នុង​អំពើ​ឃាតកម្ម​គិតទុក​ជាមុន រារាំង​កិច្ចប្រតិបត្តិការ​របស់​សមត្ថកិច្ច និង​រក្សាទុក​អាវុធ​ខុសច្បាប់ ខណៈ​លោក​ឧកញ៉ា ថោង សារ៉ាត់ កំពុង​រត់គេច​ទៅសំងំ​លាក់ខ្លួន​នៅ​ស្រុក​យួន​។​

​មជ្ឈដ្ឋាន​មួយចំនួន​បាន​លើកឡើងថា ទោះបី​អំពើ​របស់​ក្រុមគ្រួសារ​ឧកញ៉ា ថោង សារ៉ាត់ កន្លងមក​មាន​រូបភាព​មិនសូវ​ល្អ​ក៏ពិតមែន ក៏ប៉ុន្តែ​គេ​មិន​ជឿថា ក្រុម​ជនសង្ស័យ​ទាំងនោះ​មានការ​ពាក់ព័ន្ធ​នឹង​សំណុំរឿង​ឃាតកម្ម​លើ​លោក​ឧកញ៉ា អ៊ឹង ម៉េង​ជឺ ឡើយ គឺ​ទំនង​អាចមាន​អ្នកធំ​ប្រើល្បិច «​ព្រួញ​១​បាញ់​បាន​ឧកញ៉ា​២»៕​

 

Filed in: Feature, តុលាការ, ព័ត៌មានជាតិ Tags: 

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.