ថ្ងៃ ចន្ទ ទី ២៤ ខែ មករា ឆ្នាំ ២០២២

រាជរដ្ឋាភិបាល​បុរស​ខ្លាំង​បង្កើត​គណៈកម្មាធិការ​ពិនិត្យ​លើ​ការ​អភិវឌ្ឍន៍​រួម​គ្នា​លើ​ធនធាន​ប្រេងកាត​ក្នុង​តំបន់​ដែនសមុទ្រ​ត្រួត​គ្នា​កម្ពុជា​-​ថៃ​

​រាជរដ្ឋាភិបាល​កម្ពុជា​នីតិកាល​ទី​៥​នៃ​រដ្ឋសភា​ ដែល​មាន​សម្តេច​អគ្គមហាសេនាបតី​តេ​ជោ​ ហ៊ុន​ សែន​ ហៅ​បុរស​ខ្លាំង​ជា​នាយក​រដ្ឋមន្ត្រី​ បាន​បង្កើត​គណៈកម្មាធិការ​បច្ចេកទេស​ចម្រុះ​មួយ​ ទទួល​បន្ទុក​ការ​កំណត់ព្រំដែន​ និង​ការ​អភិវឌ្ឍន៍​រួម​គ្នា​លើ​ធនធាន​ប្រេងកាត​ នៅ​ក្នុង​តំបន់​ទាមទារ​ដែនសមុទ្រ​ត្រួត​គ្នា​កម្ពុជា​-​ថៃ​ តាម​សេចក្តីសម្រេច​លេខ​១៤៨​សសរ​ ចុះ​ថ្ងៃ​ទី​២៨​ ខែតុលា​ ឆ្នាំ​២០១៤​ ដែល​មាន​សមាសភាព​ចំនួន​២៣​នាក់​ ក្នុង​នោះ​ឯកឧត្តម​បណ្ឌិត​សភាចា​រ្យ​ សុខ​ អាន​ ឧបនាយករដ្ឋមន្ត្រី​ រដ្ឋមន្ត្រី​ទទួល​បន្ទុក​ទីស្តីការគណៈរដ្ឋមន្ត្រី​ និង​ជា​ដន្លងដងស្នែង​បុរស​ខ្លាំង​ជា​ប្រធាន​ និង​មាន​អនុប្រធាន​ចំនួន​៣​នាក់​ ក្នុង​នោះ​មាន​ឯកឧត្តម​ វ៉ា​ គឹ​ម​ហុង​ ទេស​រដ្ឋមន្ត្រី​ ទទួល​បន្ទុក​កិច្ចការ​ព្រំដែន​ផង​,​ ទីប្រឹក្សា​ជាន់ខ្ពស់​ចំនួន​៣​នាក់​,​ សមាជិក​ចំនួន​១៤​នាក់​ និង​លេខាធិការ​ចំនួន​២​នាក់​ ។​

​គណៈកម្មាធិការ​បច្ចេកទេស​ចម្រុះ​ទទួល​បន្ទុក​ការ​កំណត់ព្រំដែន​ និង​ការ​អភិវឌ្ឍន៍​រួម​គ្នា​លើ​ធនធាន​ប្រេងកាត​ នៅ​ក្នុង​តំបន់​ទាមទារ​ដែនសមុទ្រ​ត្រួត​គ្នា​កម្ពុជា​-​ថៃ​ មាន​ភារកិច្ច​ដូច​ខាងក្រោម​ ៖

១-​ចរចា​រៀបចំ​សន្ធិសញ្ញា​ ប្រព័ន្ធ​ច្បាប់​គ្រប់គ្រង​បទ​ប្បញ្ញត្តិ​ គោលការណ៍​ លិខិត​បទដ្ឋាន​ទាំងឡាយ​ពាក់ព័ន្ធ​នឹង​ការ​អភិវឌ្ឍន៍​រួម​គ្នា​នៃ​ធនធាន​ប្រេងកាត​ ដែល​មាន​ផលប្រយោជន៍​ទៅ​វិញ​ទៅ​មក​ និង​អាច​ទទួលយក​បាន​ដោយ​ភាគី​ទាំង​ពីរ​ ក្នុង​ការ​បែងចែក​ការ​ចំណាយ​ និង​ផល​ចំណេញ​នៃ​ការ​ធ្វើ​អាជីវកម្ម​ធនធាន​ប្រេងកាត​ដែល​ឋិត​នៅ​ក្នុង​តំបន់​នៃ​ការ​អភិវឌ្ឍន៍​រួម​គ្នា​ ដើម្បី​ដាក់​ជូន​រាជរដ្ឋាភិបាល​ពិនិត្យ​និង​សម្រេច​ ។​

២-​ចរចា​រៀបចំ​សន្ធិសញ្ញា​ កំណត់ព្រំដែន​សមុទ្រ​ ដែនដី​ខ្ព​ង​រាប​បាតសមុទ្រ​ និង​តំបន់សេដ្ឋកិច្ចផ្តាច់មុខ​ដែល​ឋិត​ចន្លោះ​បន្ទាត់​នៃ​ការ​ទាមទារ​អះអាង​ដែនសមុទ្រ​បច្ចុប្បន្ន​រៀងៗ​ខ្លួន​របស់​ប្រទេស​ទាំង​២​ នៅ​ក្នុង​តំបន់​ដែល​ត្រូវ​បែងចែក​ព្រំដែន​ អនុលោម​ទៅ​តាម​បណ្តា​គោលការណ៍​ទាំងឡាយ​ដែល​អាច​អនុវត្តន៍​បាន​នៃ​ច្បាប់​អន្តរជាតិ​ ដើម្បី​ដាក់​ជូន​រាជរដ្ឋាភិបាល​ពិនិត្យ​ និង​សម្រេច​ ។​

៣-​ផ្អែក​លើ​តម្រូវការ​ចាំបាច់​ គណៈកម្មាធិការ​បច្ចេកទេស​ចម្រុះ​នេះ​ត្រូវ​ចុះ​អង្កេត​ផ្ទៀងផ្ទាត់​រួម​គ្នា​លើ​និយាម​កា​(​កូ​អ័​រ​ដោ​ណេ​)​នៃ​កោះ​ ថ្ម​ប៉ប្រះ​ទឹក​ ចំណុច​នីមួយៗ​ និង​អ្វីៗ​ទាំងអស់​ដែល​មាន​លក្ខណៈ​ពេ​ស​ និង​ចរិត​ប្រវត្តិសាស្ត្រ​ ពាក់ព័ន្ធ​ឋិត​នៅ​ក្នុង​ដែនដី​គោក​ និង​ដែនសមុទ្រ​កម្ពុជា​-​ថៃ​ ។​

៤-​តាមដាន​និង​ត្រួតពិនិត្យ​ការ​អនុវត្ត​សន្ធិសញ្ញា​ កិច្ចព្រមព្រៀង​ និង​លិខិត​បទដ្ឋាន​នានា​ ។​

​គណៈកម្មាធិការ​បច្ចេកទេស​ចម្រុះ​នេះ​មាន​ទីស្នាក់ការ​របស់​ខ្លួន​នៅ​ទីស្តីការគណៈរដ្ឋមន្ត្រី​ និង​មាន​សិទ្ធិ​ប្រើប្រាស់​ត្រា​របស់​ទីស្តីការគណៈរដ្ឋមន្ត្រី​ ព្រមទាំង​មាន​សិទ្ធិ​ប្រើប្រាស់​មូលនិធិ​ដែល​ជា​ចំណូល​ពី​វិស័យ​ប្រេងកាត​នៃ​ក្រសួង​រ៉ែ​ និង​ថាមពល​ ក្នុង​ការ​បំពេញការងារ​របស់​ខ្លួន​ តាម​ការ​សម្រេច​របស់​បុរស​ខ្លាំង​ជា​នាយក​រដ្ឋមន្ត្រី​ ។​

​គួរ​រំលឹក​ជូន​ដែរ​ថា​ ឯកឧត្តម​បណ្ឌិត​សភាចា​រ្យ​ សុខ​ អាន​ ធ្លាប់​បាន​មាន​ប្រសាសន៍​ឲ្យ​ដឹង​កាលពី​ថ្ងៃ​ទី​១២​ ខែតុលា​ ឆ្នាំ​២០១១​ថា​ នៅ​តំបន់​ត្រួត​គ្នា​ក្នុង​ដែនសមុទ្រ​រវាង​កម្ពុជា​និង​ថៃ​ ត្រូវ​បាន​អ្នកវិភាគ​វាយតម្លៃ​ថា​ មាន​ធនធាន​ប្រេង​ច្រើន​ជាងគេ​ ធៀប​នឹង​តំបន់​នានា​ក្នុង​ដែនសមុទ្រ​កម្ពុជា​ ខណៈ​ឯកឧត្តម​បណ្ឌិត​សភាចា​រ្យ​ សុខ​ អាន​ ក៏​ធ្លាប់​បាន​មាន​ប្រសាសន៍​កាលពី​ថ្ងៃ​ទី​២៧​ ខែធ្នូ​ ឆ្នាំ​២០១៣​កន្លង​ទៅ​ថា​ កម្ពុជា​អាច​នឹង​ទទួល​បាន​ចំណូល​ជាង​១០០​លាន​ដុល្លារ​អា​មេ​រិ​ក​ក្នុង​មួយ​ឆ្នាំ​ ប្រសិនបើ​ការ​បូម​ប្រេង​នៅ​ប្លុក​ A​ រុករក​ឃើញ​ដោយ​ក្រុមហ៊ុន​អាជីវកម្ម​ប្រេង​របស់​សហរដ្ឋអាមេរិក​ឈ្មោះ​ Chevron​ បាន​សម្រេច​ ។​

​ទោះ​យ៉ាងណា​ក្តី​ រហូត​មក​ទល់​នឹង​ពេល​នេះ​ មាន​រយៈពេល​ជិត​២​ឆ្នាំ​ហើយ​ កម្ពុជា​មិន​ទាន់​ទទួល​បាន​តំណក់​ប្រេង​ដំបូង​របស់​ខ្លួន​នៅឡើយ​ គិត​ចាប់ពី​វេលា​ម៉ោង​១២​យប់​ ថ្ងៃ​ទី​១២​ ខែធ្នូ​(១២)​ ឆ្នាំ​២០១២​ ដែល​បុរស​ខ្លាំង​ជា​នាយក​រដ្ឋមន្ត្រី​ធ្លាប់​បាន​មាន​ប្រសាសន៍​ជា​សាធារណៈ​កាលពី​អំឡុង​ខែកក្កដា​ ឆ្នាំ​២០១១​ថា​ កម្ពុជា​នឹង​ទទួល​បាន​តំណក់​ប្រេង​ដំបូង​នៅ​វេលា​ម៉ោង​១២​យប់​ នា​ថ្ងៃ​ទី​១២​ ខែ​១២(​ធ្នូ​)​ ឆ្នាំ​២០១២​នោះ​ ៕​

 

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.