ថ្ងៃ ព្រហស្បតិ៍ ទី ២៨ ខែ តុលា ឆ្នាំ ២០២១

មេ​អង្គភាព​ប្រឆាំង​អំពើ​ពុក​រលួយ​នៅ​កម្ពុជា​ត្រូវ​បាន​បុរសខ្លាំងដាក់​ឲ្យ​ចូល​និវត្តន៍​ហើយ​

​ឯកឧត្តម​ ឱម​ យ៉ិ​ន​ទៀង​ អាយុ​៦០​ឆ្នាំ​០៤​ខែ​ ទេស​រដ្ឋមន្ត្រី​ ទទួល​បន្ទុក​ជា​ប្រធាន​អង្គភាព​ប្រឆាំង​អំពើ​ពុក​រលួយ​ និង​ជា​ឧត្តមមន្ត្រី​ថ្នាក់​លេខ​១​នៃ​ក្របខ័ណ្ឌ​មន្ត្រី​គ្រប់គ្រង​រដ្ឋបាល​នៅ​អង្គភាព​ប្រឆាំង​អំពើ​ពុក​រលួយ​ ដែល​ទទួល​បាន​ចំណេះដឹង​សញ្ញាបត្រ​កម្រិត​អនុ​បណ្ឌិត​ និង​បណ្ឌិត​ពី​សាកលវិទ្យាល័យ​ចំរើន​ពហុ​បច្ចេកវិទ្យា​នោះ​ ត្រូវ​បាន​ព្រះករុណា​ព្រះមហាក្សត្រ​នៃ​ព្រះរាជាណាចក្រ​កម្ពុជា​ ទ្រង់​ត្រាស់​បង្គាប់​ដាក់​ឲ្យ​ចូល​និវត្តន៍​ហើយ​ តាម​សេចក្តី​ក្រាប​បង្គំ​ទូល​ថ្វាយ​របស់​សម្តេច​អគ្គមហាសេនាបតី​តេ​ជោ​ ហ៊ុន​ សែន​ នាយក​រដ្ឋមន្ត្រី​នៃ​ព្រះរាជាណាចក្រ​កម្ពុជា​ ដោយ​ព្រះរាជក្រឹត្យ​លេខ​ន​ស​/​រក​ត​/១០១៤/១២៣៦​ ចុះ​ថ្ងៃ​ទី​១៣​ ខែតុលា​ ឆ្នាំ​២០១៤​ ។​

​ព្រះរាជក្រឹត្យ​លេខ​ន​ស​/​រក​ត​/១០១៤/១២៣៦​ ចុះ​ថ្ងៃ​ទី​១៣​ ខែតុលា​ ឆ្នាំ​២០១៤​ ត្រង់​មាត្រា​១​បាន​ចែង​ថា​ "​ដាក់​ឯកឧត្តម​ ឱម​ យ៉ិ​ន​ទៀង​ ឲ្យ​ចូល​និវត្តន៍​ក្នុង​ឋានន្តរស័ក្តិ​ឧត្តមមន្ត្រី​ថ្នាក់​លេខ​១​ នៃ​ក្របខ័ណ្ឌ​មន្ត្រី​គ្រប់គ្រង​រដ្ឋបាល​នៅ​អង្គភាព​ប្រឆាំង​អំពើ​ពុក​រលួយ​ ចាប់ពី​ថ្ងៃ​ទី​០១​ ខែសីហា​ ឆ្នាំ​២០១៤"​ ។​

​អនុលោម​តាម​​ព្រះរាជក្រឹត្យ​លេខ​ន​ស​/​រក​ត​/១០១៤/១២៣៦​ ចុះ​ថ្ងៃ​ទី​១៣​ ខែតុលា​ ឆ្នាំ​២០១៤​ ត្រង់​មាត្រា​១​ខាងលើ​ គឺ​ឯកឧត្តម​ ឱម​ យ៉ិ​ន​ទៀង​ ត្រូវ​បាន​ដាក់​ឲ្យ​ចូល​និវត្តន៍​ក្នុង​ក្របខ័ណ្ឌ​មុខងារសាធារណៈ​ហើយ​ ចាប់ពី​ថ្ងៃ​ទី​០១​ ខែសីហា​ ឆ្នាំ​២០១៤​ ប៉ុន្តែ​ឯកឧត្តម​រូប​នេះ​ត្រូវ​បាន​រក្សា​ទុក​មុខ​តំណែង​ក្នុង​ក្របខ័ណ្ឌ​នយោបាយ​ជា​ទេស​រដ្ឋមន្ត្រី​ ទទួល​បន្ទុក​ជា​ប្រធាន​អង្គភាព​ប្រឆាំង​អំពើ​ពុក​រលួយ​ដដែល​ ដូច​ករណី​លោក​ជំទាវ​ ម៉ែ​ន​ សំ​អន​ អាយុ​៦១​ឆ្នាំ​០២​ខែ​ ឧត្តមមន្ត្រី​ថ្នាក់​លេខ​១​នៃ​ក្របខ័ណ្ឌ​មន្ត្រី​គ្រប់គ្រង​រដ្ឋបាល​ក្រសួង​ទំនាក់ទំនង​ជាមួយ​រដ្ឋសភា​ ព្រឹទ្ធសភា​ និង​អធិការកិច្ច​ ត្រូវ​បាន​ដាក់​ឲ្យ​ចូល​និវត្តន៍​ក្នុង​ក្របខ័ណ្ឌ​មុខងារសាធារណៈ​ ដោយ​ព្រះរាជក្រឹត្យ​លេខ​ន​ស​/​រក​ត​/០៧១៤/៩៥០​ ចុះ​ថ្ងៃ​ទី​២១​ ខែកក្កដា​ ឆ្នាំ​២០១៤​ តែ​រក្សា​ទុក​មុខ​តំណែង​ក្នុង​ក្របខ័ណ្ឌ​នយោបាយ​ ជា​ឧបនាយករដ្ឋមន្ត្រី​ រដ្ឋមន្ត្រីក្រសួង​ទំនាក់ទំនង​ជាមួយ​រដ្ឋសភា​ ព្រឹទ្ធសភា​ និង​អធិការកិច្ច​ ដដែល​ (​សូម​ចូល​អាន​គេហទំព័រ​សារព័ត៌មាន​ដើម​ត្នោត​ចុះ​ផ្សាយ​ថ្ងៃ​ទី​១២​ ខែកញ្ញា​ ឆ្នាំ​២០១៤​បន្ថែម​)​ ។​

​ឯកឧត្តម​បណ្ឌិត​ ឱម​ យ៉ិ​ន​ទៀង​ ជា​សមាជិក​គណៈកម្មាធិការ​កណ្តាល​គណបក្ស​ប្រជាជន​កម្ពុជា​ បាន​ធ្វើ​សច្ចាប្រណិធាន​ចូល​ប្រកប​វិជ្ជាជីវៈ​មេធាវី​ ក្លាយជា​សមាជិក​គណៈមេធាវី​នៃ​ព្រះរាជាណាចក្រ​កម្ពុជា​ មាន​អត្តលេខ​៥២២​ នា​ថ្ងៃ​ទី​០៨​ ខែវិច្ឆិកា​ ឆ្នាំ​២០០៦​ និង​បច្ចុប្បន្ន​ជា​មេធាវី​សុំ​មិន​ប្រកប​វិជ្ជាជីវៈ​មេធាវី​ ។​ ឯកឧត្តម​ ឱម​ យ៉ិ​ន​ទៀង​ ទេស​រដ្ឋមន្ត្រី​ ទទួល​បន្ទុក​បេសកកម្ម​ពិសេស​ ត្រូវ​បាន​តែងតាំង​ជា​ប្រធាន​អង្គភាព​ប្រឆាំង​អំពើ​ពុក​រលួយ​ ដោយ​ព្រះរាជក្រឹត្យ​លេខ​ន​ស​/​រក​ត​/០៥១០/៣៦៧​ ចុះ​ថ្ងៃ​ទី​០៧​ ខែឧសភា​ ឆ្នាំ​២០១០​ និង​ត្រូវ​បាន​តែងតាំង​ជា​សមាជិក​ក្រុមប្រឹក្សា​ជាតិ​ប្រឆាំង​អំពើ​ពុក​រលួយ​ ដោយ​ព្រះរាជក្រឹត្យ​លេខ​ន​ស​/​រក​ត​/០៦១០/៤៩៩​ ចុះ​ថ្ងៃ​ទី​១២​ ខែមិថុនា​ ឆ្នាំ​២០១០​ ។​ លើស​ពី​នេះ​ ឯកឧត្តម​ ឱម​ យ៉ិ​ន​ទៀង​ ដែល​ជា​មនុស្ស​ស្និទ្ធ​សម្តេច​អគ្គមហាសេនាបតី​តេ​ជោ​ ហ៊ុន​ សែន​ ហៅ​បុរស​ខ្លាំង​ជា​នាយក​រដ្ឋមន្ត្រី​នៃ​ព្រះរាជាណាចក្រ​កម្ពុជា​ ត្រូវ​បាន​តែងតាំង​ជា​ប្រធាន​គណៈកម្មាធិការ​សិទ្ធិ​មនុស្ស​កម្ពុជា​ និង​ជា​សមាជិក​គណៈកម្មាធិការ​ជាតិ​ប្រឆាំង​ភេរវកម្ម​ ហៅ​កាត់​ថា​ "​គជ​ប​ភ​"​ និង​ជា​អនុប្រធាន​លេខាធិការដ្ឋាន​ គជ​ប​ភ​ ផង​ដែរ​ ៕​

 

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.