ថ្ងៃ ព្រហស្បតិ៍ ទី ២៨ ខែ តុលា ឆ្នាំ ២០២១

រយៈពេល​តែ​មួយ​ឆ្នាំ​រាជរដ្ឋាភិបាល​បុរស​ខ្លាំង​មាន​ទីប្រឹក្សា​ជិត​២០០​នាក់​ និង​ចាយ​លុយ​ជាតិ​អស់​ជាង​១​លាន​ដុល្លារ​

​ចាប់តាំងពី​រាជរដ្ឋាភិបាល​នីតិកាល​ទី​៥​នៃ​រដ្ឋសភា​គណបក្ស​ប្រជាជន​កម្ពុជា​ ដែល​មាន​សម្តេច​អគ្គមហាសេនាបតី​តេ​ជោ​ ហ៊ុន​ សែន​ ហៅ​បុរស​ខ្លាំង​ អនុប្រធាន​គណបក្ស​ប្រជាជន​កម្ពុជា​ដ៏​មាន​ឥទ្ធិពល​ អ្នកតំណាង​រាស្ត្រ​មណ្ឌល​ខេត្តកណ្តាល​ ជា​នាយក​រដ្ឋមន្ត្រី​ កកើត​មករ​ហូត​ទល់​នឹង​ពេល​នេះ​ គឺ​មាន​រយៈពេល​១​ឆ្នាំ​០២​ខែ​ហើយៗ​ត្រឹម​រយៈពេល​តែ​១​ឆ្នាំ​សោះ​ រាជរដ្ឋាភិបាល​បុរស​ខ្លាំង​មាន​ទីប្រឹក្សា​ចំនួន​១៩៤​នាក់​ ក្នុង​នោះ​០៣​នាក់​មាន​ឋានៈ​ស្មើ​ឧបនាយករដ្ឋមន្ត្រី​,​ ០៦​នាក់​មាន​ឋានៈ​ស្មើ​ទេស​រដ្ឋមន្ត្រី​,​ ៧៤​នាក់​មាន​ឋានៈ​ស្មើ​រដ្ឋមន្ត្រី​,​ ៣៣​នាក់​មាន​ឋានៈ​ស្មើ​រដ្ឋលេខាធិការ​ និង​៧៨​នាក់​មាន​ឋានៈ​ស្មើ​អនុរដ្ឋលេខាធិការ​ ដោយ​ចំនួន​ទីប្រឹក្សា​រាជរដ្ឋាភិបាល​ដ៏​ច្រើន​គ​គោក​នេះ​បាន​ចាយ​លុយ​ជាតិ​អស់​ចំនួន​ប្រមាណ​ជាង​១​លាន​ដុល្លារ​អា​មេ​រិ​ក​ (​រាជរដ្ឋាភិបាល​បុរស​ខ្លាំង​អាណត្តិ​ទី​៥​ ត្រូវ​បាន​តែងតាំង​ដោយ​ព្រះរាជក្រឹត្យ​លេខ​ន​ស​/​រក​ត​/០៩១៣/៩០៣​ ចុះ​ថ្ងៃ​ទី​២៤​ ខែកញ្ញា​ ឆ្នាំ​២០១៣)​ ។​

​សមាសភាព​មនុស្ស​ដែល​ទទួល​បានការ​តែងតាំង​ជាទី​ប្រឹក្សា​រាជរដ្ឋាភិបាល​បុរស​ខ្លាំង​ជា​ហូរហែ​ជិត​២០០​នាក់​ ក្នុង​រយៈពេល​ត្រឹមតែ​មួយ​ឆ្នាំ​នោះ​ គ្មាន​មុខ​ប្លែក​ពី​ណា​មក​ទេ​ គឺ​ភាគច្រើន​អតីត​ជា​មន្ត្រី​ធ្លាប់​ធ្វើ​រដ្ឋមន្ត្រី​-​រដ្ឋលេខាធិការ​ក្រសួង​-​អនុរដ្ឋលេខាធិការ​នៃ​បណ្តា​ក្រសួង​ ធ្លាប់​ធ្វើ​ជា​អភិបាលខេត្ត​ និង​អតីត​ជា​មន្ត្រី​គណបក្ស​នយោបាយ​ប្រឆាំង​ ដែល​ចុះចូល​មក​ក្នុង​គណបក្ស​ប្រជាជន​កម្ពុជា​ ។​

​យោង​តាម​ស្មារតី​អនុក្រឹត្យ​របស់​រាជរដ្ឋាភិបាល​លេខ​២៧៧​អន​ក្រ​.​បក​ ចុះ​ថ្ងៃ​ទី​១៣​ ខែតុលា​ ឆ្នាំ​២០១៤​ ស្តី​ពី​ការ​កែសម្រួល​មាត្រា​២​នៃ​អនុក្រឹត្យ​លេខ​៦២​អន​ក្រ​.​បក​ ចុះ​ថ្ងៃ​ទី​៣០​ ខែកញ្ញា​ ឆ្នាំ​២០០៤​ ស្តី​ពី​ប្រាក់​បំណាច់​របស់​សមាជិក​រាជរដ្ឋាភិបាល​ អនុរដ្ឋលេខាធិការ​ ទីប្រឹក្សា​ ព្រមទាំង​មន្ត្រីរាជការ​ស៊ី​វិល​ និង​កងកម្លាំងប្រដាប់អាវុធ​ចាប់ពី​ថ្នាក់​អនុ​លេខាធិការ​ឡើង​ទៅ​នោះ​ គឺ​ក្នុង​ចំណោម​ទីប្រឹក្សា​រាជរដ្ឋាភិបាល​ចំនួន​១៩៤​នាក់​ ត្រូវ​ចាយ​លុយ​ជាតិ​អស់​ចំនួន​ប្រមាណ​៣៤៥.៤៥០.០០០​រៀល​(​ប្រមាណ​ចំនួន​៨៦.៣០០​ដុល្លារ​អា​មេ​រិ​ក​)​ក្នុង​មួយ​ខែ​ ឬ​ចំនួន​ប្រមាណ​១.០៣៥.៦០០​ដុល្លារ​អា​មេ​រិ​ក​ក្នុង​១​ឆ្នាំ​ ។​

​ការ​ចំណាយ​ថវិកាជាតិ​ទៅ​លើ​ទីប្រឹក្សា​រាជរដ្ឋាភិបាល​ចំនួន​១៩៤​នាក់​នោះ​ គឺ​មាន​ចំនួន​ច្រើន​ជាង​ការ​ចំណាយ​លុយ​ជាតិ​នៅ​ស្ថាប័ន​តុលាការ​កំពូល​ ឬ​ជិត​ស្មើនឹង​ការ​ចាយ​លុយ​ជាតិ​នៅ​ស្ថាប័ន​តុលាការ​កំពូល​ និង​តុលាការ​សាលាឧទ្ធរណ៍​បូក​បញ្ចូល​គ្នា​ ឬ​ស្មើនឹង​ប្រមាណ​១​ភាគ​៧​នៃ​ថវិកា​ចំណាយ​ប្រចាំឆ្នាំ​២០១៤​ របស់​ស្ថាប័ន​ប្រឆាំង​អំពើ​ពុក​រលួយ​នៅ​កម្ពុជា​ (​សម្រាប់​ឆ្នាំ​២០១៤​ ស្ថាប័ន​ប្រឆាំង​អំពើ​ពុក​រលួយ​មាន​គម្រោង​ចំណាយ​ជាង​៧​លាន​ដុល្លារ​អា​មេ​រិ​ក​ និង​តុលាការ​កំពូល​មាន​គម្រោង​ចំណាយ​ប្រមាណ​៧៨៩.០០០​ដុល្លារ​អា​មេ​រិ​ក​ និង​សាលាឧទ្ធរណ៍​ មាន​គម្រោង​ចំណាយ​ប្រមាណ​៨៤៤.០០០​ដុល្លារ​​      ​អា​មេ​រិ​ក​)​ ។​

​មជ្ឈដ្ឋាន​អ្នកវិភាគ​ព្រឹត្តិការណ៍​នយោបាយ​បាន​លើក​ថា​ ដើម្បី​និរន្តរភាព​អំណាច​របស់​ខ្លួន​ និង​បក្ខពួក​ បុរស​ខ្លាំង​មិន​ញញើត​នឹង​ការ​ចាយវាយ​ថវិកាជាតិ​ខ្ជះខ្ជាយ​ទៅ​លើ​ទីប្រឹក្សា​ ដែល​មាន​ចំនួន​ដ៏​ច្រើន​សន្ធឹកសន្ធាប់​នោះ​ឡើយ​ (​មិន​ទាន់​គិត​ទៅ​ដល់ទី​ប្រឹក្សា​ក្រសួង​-​ស្ថាប័ន​ និង​ទីប្រឹក្សា​ថ្នាក់ដឹកនាំ​នៅ​ស្ថាប័ន​នីតិប្បញ្ញត្តិ​ និង​នីតិប្រតិបត្តិ​ផង​)​ ក្នុង​ហេតុផល​កៀរគរ​ ប្រមែប្រមូល​ក្រុម​មន្ត្រី​ទាំងនោះ​ឲ្យ​មក​ឋិត​នៅ​ក្នុង​កញ្ចប់​គណបក្ស​ប្រជាជន​កម្ពុជា​តែ​មួយ​ និង​ទទួល​បាន​លាភសក្ការៈ​រៀងៗ​ខ្លួន​ តាម​ឋានានុក្រម​ចាត់តាំង​ដោយ​បុរស​ខ្លាំង​ ៕​

 

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.