ថ្ងៃ ពុធ ទី ២៥ ខែ ឧសភា ឆ្នាំ ២០២២

ស្តេច​លុយ​ឯកឧត្តម​ឧកញ៉ា​ ងិ​ន​ ឃ​ន​ ត្រូវ​ដល់​អាយុ​ចូល​និវត្តន៍​តាំងពី​ឆ្នាំ​២០១៣​ តែ​បុរស​ខ្លាំង​ទើប​នឹកឃើញ​ដាក់​ឲ្យ​ចូល​និវត្តន៍​នៅ​ឆ្នាំ​២០១៤

​ឯកឧត្តម​ ឧកញ៉ា​ ងិ​ន​ ឃ​ន​ អាយុ​៦៣​ឆ្នាំ​ សមាជិក​គណៈកម្មាធិការ​កណ្តាល​គណបក្ស​ប្រជាជន​កម្ពុជា​ ជា​ឧត្តមមន្ត្រី​ថ្នាក់​លេខ​១​នៃ​ក្របខ័ណ្ឌ​មន្ត្រី​គ្រប់គ្រង​រដ្ឋបាល​ក្រសួង​សេដ្ឋកិច្ច​និង​ហិរញ្ញវត្ថុ​ ដោយ​បាន​កាន់​តំណែង​ជា​ប្រធាន​រតនាគារ​ជាតិ​ ហៅ​កាត់​ថា​ ប៉ុស្តិ៍​ខ្លាញ់​អង្គុយ​លើ​លុយ​រយៈពេល​ប្រមាណ​២០​ឆ្នាំ​នោះ​ ត្រូវ​ដល់​អាយុ​ចូល​និវត្តន៍​តាំងពី​ថ្ងៃ​ទី​០១​ ខែតុលា​ ឆ្នាំ​២០១៣​មក​ម្ល៉េះ​ ប៉ុន្តែ​សម្តេច​អគ្គមហាសេនាបតី​តេ​ជោ​ ហ៊ុន​ សែន​ ហៅ​បុរស​ខ្លាំង​ជា​នាយក​រដ្ឋមន្ត្រី​នៃ​ព្រះរាជាណាចក្រ​កម្ពុជា​ ទើប​ភ្ញាក់រលឹក​នឹកឃើញ​ធ្វើ​សេចក្តី​ក្រាប​បង្គំ​ទូល​ថ្វាយ​ព្រះករុណា​ព្រះមហាក្សត្រ​ចេញ​ព្រះរាជក្រឹត្យ​លេខ​ន​ស​/​រក​ត​/០៨១៤/១០៦២​ ដាក់​ឲ្យ​ចូល​និវត្តន៍​ជា​ផ្លូវការ​ក្នុង​ក្របខ័ណ្ឌ​មុខងារសាធារណៈ​ នៅ​ថ្ងៃ​ទី​១៩​ ខែសីហា​ ឆ្នាំ​២០១៤​កន្លង​ទៅ​ថ្មីៗ​នេះ​ប៉ុណ្ណោះ​ ជា​ហេតុ​ធ្វើ​ឲ្យ​មជ្ឈដ្ឋាន​អ្នក​តាមដាន​ឃ្លាំមើល​ដំណើរការ​កំណែទម្រង់រដ្ឋបាល​នៅ​កម្ពុជា​មានការ​ភ្ញាក់ផ្អើល​ និង​ហួសចិត្ត​យ៉ាង​ខ្លាំង​ ។​

​លោក​ ងិ​ន​ ឃ​ន​ ទទួល​បានការ​តែងតាំង​ឲ្យ​ធ្វើ​ជា​ប្រធាន​រតនាគារ​ជាតិ​នៃ​ក្រសួង​សេដ្ឋកិច្ច​និង​ហិរញ្ញវត្ថុ​ ចាប់តាំងពី​ជំនាន់​ឯកឧត្តម​ សម​ រ​ង្ស៊ី​ អតីត​ធ្វើ​ជា​ទេស​រដ្ឋមន្ត្រី​ រដ្ឋមន្ត្រីក្រសួង​សេដ្ឋកិច្ច​និង​ហិរញ្ញវត្ថុ​ និង​រតនាគារ​ជាតិ​មិន​ទាន់​បាន​បង្កើត​ជា​អគ្គនាយកដ្ឋាន​មក​ម្ល៉េះ​ ។​ បន្ទាប់​ពី​កាន់​មុខ​តំណែង​ជា​ប៉ុស្តិ៍​ខ្លាញ់​អង្គុយ​លើ​លុយ​បាន​រយៈពេល​ប្រមាណ​ត្រឹម​៣-៤​ឆ្នាំ​ លោក​ ងិ​ន​ ឃ​ន​ ត្រូវ​បាន​តែងតាំង​ជា​ឧកញ៉ា​ ដោយ​ព្រះរាជក្រឹត្យ​លេខ​ន​ស​/​រក​ត​/០៦៩៨/៤០​ ចុះ​ថ្ងៃ​ទី​២២​ ខែមិថុនា​ ឆ្នាំ​១៩៩៨​ ។​ តម​ក​ទៀត​ លោក​ឧកញ៉ា​ ងិ​ន​ ឃ​ន​ ត្រូវ​បាន​តែងតាំង​ជា​ប្រតិភូ​រាជរដ្ឋាភិបាល​ទទួល​បន្ទុក​ជា​ប្រធាន​រតនាគារ​ជាតិ​នៃ​ក្រសួង​សេដ្ឋកិច្ច​និង​ហិរញ្ញវត្ថុ​ មាន​ឋានៈ​ស្មើ​រដ្ឋលេខាធិការ​ ដោយ​ព្រះរាជក្រឹត្យ​លេខ​ន​ស​/​រក​ត​/១០០៣/២៩៥​ ចុះ​ថ្ងៃ​ទី​០២​ ខែតុលា​ ឆ្នាំ​២០០៣​ ។​

​ដោយសារ​បាន​ក្លាយ​ខ្លួន​ជា​ស្តេច​លុយ​ ឯកឧត្តម​ ឧកញ៉ា​ ងិ​ន​ ឃ​ន​ ធ្លាប់​ទទួល​បានការ​តែងតាំង​ជាទី​ប្រឹក្សា​ផ្ទាល់​សម្តេច​អគ្គមហាសេនាបតី​តេ​ជោ​ ហ៊ុន​ សែន​ ជា​នាយក​រដ្ឋមន្ត្រី​ផង​ និង​ជាទី​ប្រឹក្សា​ឯកឧត្តម​ ស​ ខេ​ង​ ឧបនាយករដ្ឋមន្ត្រី​ រដ្ឋមន្ត្រី​ក្រសួងមហាផ្ទៃ​ផង​ ។​

​បច្ចុប្បន្ន​ ឯកឧត្តម​ ឧកញ៉ា​ ងិ​ន​ ឃ​ន​ លែង​បាន​កាន់​តំណែង​ជា​ប្រតិភូ​រាជរដ្ឋាភិបាល​ ទទួល​បន្ទុក​ជា​អគ្គនាយក​នៃ​អគ្គនាយកដ្ឋាន​រតនាគារ​ជាតិ​នៃ​ក្រសួង​សេដ្ឋកិច្ច​និង​ហិរញ្ញវត្ថុ​ទៀត​ហើយ​ បន្ទាប់​ពី​បាន​កាន់​មុខ​តំណែង​ខ្លាញ់​នេះ​អស់​រយៈពេល​ប្រមាណ​២០​ឆ្នាំ​រួច​មក​ និង​បាន​មក​បំពេញការងារ​ជា​អ្នកតំណាង​រាស្ត្រ​មណ្ឌល​ខេត្តបាត់ដំបង​ មក​ពី​គណបក្ស​ប្រជាជន​កម្ពុជា​វិញ​ម្តង​ ខណៈ​ឯកឧត្តម​ ឧកញ៉ា​រូប​នេះ​ដល់​អាយុ​ត្រូវ​ចូល​និវត្តន៍​ផង​ និង​ទទួល​បាន​ឱកាស​កើប​លុយ​ក្លាយជា​សេដ្ឋី​រួច​ហើយ​ផង​ ៕​

Ngin-KhornNgin-Khorn-1

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.