ថ្ងៃ ពុធ ទី ២៥ ខែ ឧសភា ឆ្នាំ ២០២២

ហួសចិត្ត​នឹង​ចំនួន​ទីប្រឹក្សា​របស់​អនុប្រធាន​ទី​២​រដ្ឋសភា​ច្រើន​ជាង​អនុប្រធាន​ទី​១​រដ្ឋសភា​ជិត​៥​ដង​

​ប្រជាពលរដ្ឋ​ដែល​ជា​ម្ចាស់​ឆ្នោត​បាន​សម្តែង​នូវ​ការ​ហួសចិត្ត​ឥត​ឧបមា​ នៅ​ពេល​ដែល​បានឃើញ​ចំនួន​ទីប្រឹក្សា​របស់​ឯកឧត្តម​ ងួ​ន​ ញ៉ិល​ អនុប្រធាន​ទី​២​រដ្ឋសភា​ នីតិកាល​ទី​៥​ និង​ជា​អ្នកតំណាង​រាស្ត្រ​មណ្ឌល​ខេត្តកំពង់ធំ​ មក​ពី​គណបក្ស​ប្រជាជន​កម្ពុជា​ ច្រើន​ជាង​ចំនួន​ទីប្រឹក្សា​របស់​ឯកឧត្តម​ កឹ​ម​ សុខា​ អនុប្រធាន​ទី​១​រដ្ឋសភា​ នីតិកាល​ទី​៥​ និង​ជា​អ្នកតំណាង​រាស្ត្រ​មណ្ឌល​ខេត្តកំពង់ចាម​ មក​ពី​គណបក្ស​សង្គ្រោះ​ជាតិ​ រហូត​ដល់​ទៅ​ជិត​៥​ដង​ ។​

​យោង​តាម​ស្មារតី​នៃ​ព្រះរាជក្រឹត្យ​លេខ​ន​ស​/​រក​ត​/០៩១៤/១១៥៧​ ចុះ​ថ្ងៃ​ទី​១៥​ ខែកញ្ញា​ ឆ្នាំ​២០១៤​ បាន​បង្ហាញ​ឲ្យ​ឃើញ​ថា​ ឯកឧត្តម​ ងួ​ន​ ញ៉ិល​ អនុប្រធាន​ទី​២​រដ្ឋសភា​ នីតិកាល​ទី​៥​ មាន​ទីប្រឹក្សា​ចំនួន​៦៣​នាក់​ ដែល​ក្នុង​នោះ​១៧​នាក់​មាន​ឋានៈ​ស្មើ​រដ្ឋមន្ត្រី​,​ ២៣​នាក់​មាន​ឋានៈ​ស្មើ​រដ្ឋលេខាធិការ​,​ ២២​នាក់​មាន​ឋានៈ​ស្មើ​អនុរដ្ឋលេខាធិការ​ និង​០១​នាក់​មាន​ឋានៈ​ស្មើ​អគ្គនាយក​ (​ក្នុង​ចំណោម​ទីប្រឹក្សា​របស់​ឯកឧត្តម​ ងួ​ន​ ញ៉ិល​ គឺ​មានកូន​បង្កើត​របស់​ឯកឧត្តម​ ងួ​ន​ ញ៉ិល​ ចំនួន​២​នាក់​ផង​ ដែល​មាន​ឋានៈ​ស្មើ​រដ្ឋលេខាធិការ​)​ ។​

​ដោយឡែក​ យោង​តាម​ស្មារតី​នៃ​ព្រះរាជក្រឹត្យ​លេខ​ន​ស​/​រក​ត​/០៩១៤/១១១៧​ ចុះ​ថ្ងៃ​ទី​០៨​ ខែកញ្ញា​ ឆ្នាំ​២០១៤​ បាន​បង្ហាញ​ឲ្យ​ឃើញ​ថា​ ឯកឧត្តម​ កឹ​ម​ សុខា​ អនុប្រធាន​ទី​១​រដ្ឋសភា​ នីតិកាល​ទី​៥​ មាន​ទីប្រឹក្សា​ផ្ទាល់​ចំនួន​១៤​នាក់​ ក្នុង​នោះ​០២​នាក់​មាន​ឋានៈ​ស្មើ​រដ្ឋមន្ត្រី​,​ ១២​នាក់​មាន​ឋានៈ​ស្មើ​រដ្ឋលេខាធិការ​ និង​មាន​ជំនួយការ​ផ្ទាល់​ចំនួន​០៧​នាក់​ ដែល​មាន​ឋានៈ​ស្មើ​អគ្គនាយក​ ។​

​បើ​និយាយ​អំពី​សម្តេច​អគ្គ​មហា​ពញា​ចក្រី​ ហេង​ សំ​រិ​ន​ ប្រធានរដ្ឋសភា​នីតិកាល​ទី​៥​ និង​ជា​អ្នកតំណាង​រាស្ត្រ​មណ្ឌល​ខេត្តកំពង់ចាម​ មក​ពី​គណបក្ស​ប្រជាជន​កម្ពុជា​វិញ​ គិត​ត្រឹម​ដើមខែ​សីហា​ ឆ្នាំ​២០១៤​ មាន​ទីប្រឹក្សា​ចំនួន​១២៩​នាក់​ ក្នុង​នោះ​០៤​នាក់​មាន​ឋានៈ​ស្មើ​ទេស​រដ្ឋមន្ត្រី​,​ ២២​នាក់​មាន​ឋានៈ​ស្មើ​រដ្ឋមន្ត្រី​,​ ៨៣​នាក់​មាន​ឋានៈ​ស្មើ​រដ្ឋលេខាធិការ​,​ ២០​នាក់​មាន​ឋានៈ​ស្មើ​អនុរដ្ឋលេខាធិការ​ និង​មាន​ជំនួយការ​ចំនួន​១១​នាក់​ មាន​ឋានៈ​ស្មើ​អគ្គនាយក​ ដែល​សុទ្ធតែ​ទទួល​បាន​ងារ​ជា​ឯកឧត្តម​ ឬ​លោក​ជំទាវ​ ទាំងអស់​ ។​

​ក្រៅពី​នេះ​ រដ្ឋសភា​នីតិកាល​ទី​៥​មាន​ទីប្រឹក្សា​ជាន់ខ្ពស់​គិត​ត្រឹម​ខែសីហា​ ឆ្នាំ​២០១៤​កន្លង​ទៅ​ ចំនួន​៣០​នាក់​ ដែល​មាន​ឋានៈ​ស្មើ​រដ្ឋមន្ត្រី​ ៕​

Kem-Sokh-Nhuon-Nhil

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.