ថ្ងៃ ពុធ ទី ២៥ ខែ ឧសភា ឆ្នាំ ២០២២

រថយន្ត​ដឹក​ប្រេងឥន្ធនៈ​សូ​គី​ម៉ិច​របស់​ឧកញ៉ា​ សុខ​ គង់​ លួច​ដឹកឈើ​គ្រញូង​ខុសច្បាប់​សា​ជា​ថ្មី​លើ​ទឹកដី​ខេត្តឧត្តរមានជ័យ​

​សេចក្តីរាយការណ៍​ពី​ខេត្តឧត្តរមានជ័យ​បាន​ឲ្យ​ដឹង​ថា​ នៅ​វេលា​ម៉ោង​០៧​ព្រឹក​ នា​ថ្ងៃ​ទី​២៣​ ខែតុលា​ ឆ្នាំ​២០១៤​នេះ​ ក្នុង​ចំណុច​ភូមិសាស្ត្រ​អូរ​កូនតឹង​ តាម​បណ្តោយ​ផ្លូវជាតិ​លេខ​៦៧​ ស្រុក​អន្លង់​វែង​ ជាប់​ព្រំប្រទល់​ខេត្តឧត្តរមានជ័យ​និង​ខេត្តសៀមរាប​ កម្លាំង​សមត្ថកិច្ច​ចម្រុះ​ដឹកនាំ​ដោយ​លោក​ កូយ​ កាន់​យ៉ា​ ព្រះរាជអាជ្ញា​នៃ​អយ្យការ​អម​សាលាដំបូង​ខេត្តឧត្តរមានជ័យ​ បាន​ស្ទាក់​ចាប់​រថយន្ត​ដឹក​ប្រេងឥន្ធនៈ​មួយ​គ្រឿង​របស់​ក្រុមហ៊ុន​សូ​គី​ម៉ិច​(SOKIMEX)​ មាន​លោក​ឧកញ៉ា​ សុខ​ គង់​ ជា​ថៅកែ​ធំ​ ដែល​លួច​បង្កប់​ដឹកឈើ​គ្រញូង​ខុសច្បាប់​ជា​ច្រើន​ម៉ែត្រគូប​ ខណៈ​រថយន្ត​ល្មើស​បាន​ព្យាយាម​ដឹកឈើ​គ្រញូង​ចេញពី​ទីរួមស្រុក​អន្លង់​វែង​ ខេត្តឧត្តរមានជ័យ​ ឆ្ពោះទៅ​កាន់​ខេត្តសៀមរាប​ ។​

​ក្រុម​សមត្ថកិច្ច​ចម្រុះ​បាន​បញ្ជាក់​ឲ្យ​ដឹង​ថា​ រថយន្ត​ដឹក​ប្រេងឥន្ធនៈ​របស់​ក្រុមហ៊ុន​សូ​គី​ម៉ិច​ដែល​លួច​បង្កប់​ឈើ​គ្រញូង​ខាងក្នុង​នោះ​ ពាក់​ស្លាក​លេខ​ភ្នំពេញ​ 3A-3461​ ។​

​សមត្ថកិច្ច​មិន​ទាន់​អាច​បញ្ជាក់​បាន​អំពី​បរិមាណ​ឈើ​គ្រញូង​ដែល​រថយន្ត​ដឹក​ប្រេងឥន្ធនៈ​ក្រុមហ៊ុន​សូ​គី​ម៉ិច​ចំណុះ​២៤.០០០​លី​ត្រ​ លួច​បង្កប់​ខុសច្បាប់​នោះ​នៅឡើយ​ទេ​ ដ្បិត​ពេល​កម្លាំង​សមត្ថកិច្ច​ចម្រុះ​ចុះ​ប្រតិបត្តិការ​បង្ក្រាប​ អ្នកបើកបរ​បាន​ចាក់សោ​រថយន្ត​រួច​គេចខ្លួន​បាត់​ស្រមោល​ ខណៈ​បច្ចុប្បន្ន​រថយន្ត​និង​វត្ថុ​តាង​ល្មើស​ត្រូវ​បាន​រក្សា​ទុក​នៅ​រដ្ឋបាល​ព្រៃឈើ​ខេត្តឧត្តរមានជ័យ​ រង់ចាំ​ដោះស្រាយ​តាម​នីតិវិធី​នៃ​ច្បាប់​ ។​

​ចំណុច​ដែល​ធ្វើ​ឲ្យ​សមត្ថកិច្ច​ចម្រុះ​ និង​មជ្ឈដ្ឋាន​នានា​ចាប់អារម្មណ៍​ខ្លាំង​បំផុត​នោះ​ គឺ​រថយន្ត​ដឹក​ប្រេងឥន្ធនៈ​របស់​ក្រុមហ៊ុន​សូ​គី​ម៉ិច​ មាន​លោក​ឧកញ៉ា​ សុខ​ គង់​ ជា​ថៅកែ​ធំ​ ដែល​លួច​បង្កប់​ឈើ​គ្រញូង​ខុសច្បាប់​ ហើយ​ត្រូវ​សមត្ថកិច្ច​បង្ក្រាប​បាន​នា​ថ្ងៃ​ទី​២៣​ ខែតុលា​ ឆ្នាំ​២០១៤​នេះ​ មាន​ពាក់​ស្លាក​លេខ​ភ្នំពេញ​ 3A-3461​ ដូច​គ្នា​ទៅ​នឹង​រថយន្ត​ដឹក​ប្រេងឥន្ធនៈ​ក្រុមហ៊ុន​សូ​គី​ម៉ិច​ដែល​សមត្ថកិច្ច​បង្ក្រាប​បាន​ករណី​លួច​បង្កប់​ឈើ​គ្រញូង​ខុសច្បាប់​ប្រមាណ​២០​តោន​ កាលពី​ថ្ងៃ​ទី​២០​ ខែសីហា​ ឆ្នាំ​២០១៤​ បេះបិទ​តែ​ម្តង​ ធ្វើ​ឲ្យ​គេ​អាច​សន្និដ្ឋាន​បាន​ថា​ រថយន្ត​ល្មើស​បាន​លួច​ដឹកឈើ​គ្រញូង​ខុសច្បាប់​អស់​រយៈពេល​យូរ​ឆ្នាំ​មក​ហើយ​ ដោយ​មិន​ខ្ចី​រាងចាល​ និង​មិន​ញញើត​កោតក្រែង​ច្បាប់​ ឬ​បទបញ្ជា​របស់​សម្តេច​អគ្គមហាសេនាបតី​តេ​ជោ​ ហ៊ុន​ សែន​ ហៅ​បុរស​ខ្លាំង​ជា​នាយក​រដ្ឋមន្ត្រី​ឡើយ​ ។​

​ក្រុម​អ្នក​រិះគន់​មាត់ដាច​បាន​លើក​ឡើង​ថា​ ក្រុមហ៊ុន​របស់​លោក​ឧកញ៉ា​ សុខ​ គង់​ អតីត​ប្រធាន​សភាពាណិជ្ជកម្ម​កម្ពុជា​(​លោក​ សុខ​ គង់​ ជា​ឈ្មួញ​ដ៏​មាន​ឥទ្ធិពល​នៅ​កម្ពុជា​ ត្រូវ​បាន​តែងតាំង​ជា​ឧកញ៉ា​ ដោយ​ព្រះរាជក្រឹត្យ​លេខ​ន​ស​/​រក​ត​/០៤៩៥/៣៧​ ចុះ​ថ្ងៃ​ទី​១៧​ ខែមេសា​ ឆ្នាំ​១៩៩៥)​ មានមុខ​របរជំនួញ​ច្រើន​គ​គោក​ ដូច​ជា​ កើប​ប្រមូល​លុយ​ពី​ប្រាសាទអង្គរវត្ត​ សណ្ឋាគារ​ទំនើប​នៅ​ខេត្ត​ព្រះ​សីហ​នុ​ រមណីយដ្ឋាន​ឋានសួគ៌​ភ្នំ​បូកគោ​ ខេត្តកំពត​ និង​ប្រេងឥន្ធនៈ​…​។​ល​។​ ឥឡូវ​ក្រុមហ៊ុន​របស់​លោក​ឧកញ៉ា​ សុខ​ គង់​ បាន​បន្ថែម​មុខរបរ​ជំនួញ​ថ្មី​មួយទៀត​ គឺ​លួច​ដឹកឈើ​គ្រញូង​ខុសច្បាប់​តាម​រថយន្ត​ដឹក​ប្រេងឥន្ធនៈ​ក្រុមហ៊ុន​សូ​គី​ម៉ិច​ ៕​

Sokimex-Wood​-Feet Sokimex-Wood2

Filed in: Uncategorized

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.