ថ្ងៃ អាទិត្យ ទី ០៣ ខែ កក្កដា ឆ្នាំ ២០២២

រឿង​អ​សីលធម៌​របស់​គ្រូពេទ្យ​ស្រុក​ខ្មែរ​ដែល​កាត់​ជើងមនុស្ស​បោះចោល​ក្នុង​ធុងសំរាម​

​មាន​ហេតុការណ៍​ភ្ញាក់ផ្អើល​មួយ​បាន​កើតឡើង​កាលពី​វេលា​ម៉ោង​០៨​និង​៤៥​នាទី​ព្រឹក​ នា​ថ្ងៃ​ទី​០៨​ ខែតុលា​ ឆ្នាំ​២០១៤​ម្សិលមិញ​នេះ​ នៅ​មុខ​មន្ទីរពេទ្យ​ព្រះ​កុសុមៈ​ ហៅ​មន្ទីរពេទ្យ​លោកសង្ឃ​ ឋិត​ក្នុង​សង្កាត់​ទឹកល្អក់​២​ ខណ្ឌទួលគោក​ រាជធានី​ភ្នំពេញ​ ដោយសារ​ប្រជាពលរដ្ឋ​ និង​អ្នកជំងឺ​បាន​ប្រទះ​ឃើញ​ជើងមនុស្ស​មួយ​កំណាត់​ត្រូវ​បាន​គេ​កាត់​យក​មក​ចោល​ក្នុង​ធុងសំរាម​ នាំ​ឲ្យ​មានការ​សង្ស័យ​បឋម​ថា​ ជា​អំពើ​ឃាតកម្ម​ ។​

​ក្រោយ​ពី​មាន​ហេតុការណ៍​ភ្ញាក់ផ្អើល​ភ្លាមៗ​ កម្លាំង​សមត្ថកិច្ច​ក៏​បាន​ចុះ​ទៅ​ពិនិត្យ​មើល​ដល់​កន្លែង​កើតហេតុ​ ទើប​ដឹង​ថា​ ជា​ជើង​របស់​អ្នកជំងឺ​ម្នាក់​ដែល​ត្រូវ​បាន​ក្រុម​គ្រូពេទ្យ​កាត់​ចោល​ ដ្បិត​ជា​ជើងមាន​ដំបៅ​បណ្តាល​មក​ពី​ជំងឺ​ទឹកនោមផ្អែម​ព្យាបាល​មិនជា​ ។​

​ប្រភព​ព័ត៌មាន​ពី​ក្រុម​គ្រួសារ​សាច់ញាតិ​របស់​អ្នកជំងឺ​ បាន​ឲ្យ​ដឹង​ថា​ ស្ត្រី​ជា​អ្នកជំងឺ​ទឹកនោមផ្អែម​មាន​ដំបៅ​នៅ​ជើង​ខាងឆ្វេង​ ហើយ​ត្រូវ​បាន​ក្រុម​គ្រូពេទ្យ​កាត់​ចោល​នោះ​ មានឈ្មោះ​ ឡេ​ង​ ទូច​ អាយុ​៧២​ឆ្នាំ​ មានស្រុក​កំណើត​នៅ​ខេត្តកណ្តាល​ ។​ ក្រោយ​ពី​ការ​កាត់​ជើង​រួច​ហើយ​ កូន​របស់​អ្នកជំងឺ​បាន​យក​ជើង​ម្តាយ​របស់​ខ្លួន​ដែល​ក្រុម​គ្រូពេទ្យ​កាត់​ចោល​នោះ​ ទៅ​ដាក់​ក្នុង​ធុងសំរាម​គ្មាន​ការ​រុំ​បិទ​បាំង​ជិត​ឡើយ​ ជា​ហេតុ​ធ្វើ​ឲ្យ​អ្នក​ប្រទះ​ឃើញ​មានការ​ភ្ញាក់ផ្អើល​សង្ស័យ​ជា​ករណី​ឃាតកម្ម​ ឬ​អំពើ​ហិង្សា​ធ្ងន់ធ្ងរ​ណាមួយ​រហូត​ដល់​ថ្នាក់​កាត់​ជើងមនុស្ស​ ។​

​មជ្ឈដ្ឋាន​ប្រជាពលរដ្ឋ​បាន​សម្តែង​នូវ​ការ​រិះគន់​ទៅ​លើ​អំពើ​របស់​ក្រុម​គ្រូពេទ្យ​នៅ​មន្ទីរពេទ្យ​ព្រះ​កុសុមៈ​ ដែល​ធ្វេសប្រហែស​ ខ្ជីខ្ជា​ មិន​រុំ​វេច​ខ្ចប់​ជើងមនុស្ស​ដែល​កាត់​ចោល​ឲ្យ​បាន​ត្រឹមត្រូវ​ បែរជា​បណ្តែតបណ្តោយ​ឲ្យ​សាច់ញាតិ​អ្នកជំងឺ​យក​ទៅ​បោះចោល​ក្នុង​ធុងសំរាម​ទាំង​គ្មាន​ការ​រុំ​បិទ​ជិត​ បង្ក​ការ​ភ្ញាក់ផ្អើល​ទៅ​វិញ​ ដែល​អំពើ​បែប​នេះ​ត្រូវ​បាន​អ្នក​រិះគន់​ចាត់​ទុក​ថា​ ជា​អំពើ​អ​សីលធម៌​របស់​គ្រូពេទ្យ​មួយ​ចំនួន​នៅ​ស្រុក​ខ្មែរ​ ៕​

 

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.