ថ្ងៃ អាទិត្យ ទី ០៣ ខែ កក្កដា ឆ្នាំ ២០២២

រថយន្ត​ពាក់​ស្លាក​លេខ​ខេមរភូមិន្ទ​បង្ក​គ្រោះថ្នាក់​ចរាចរណ៍​ទៀត​ហើយ​ ខណៈ​បុរស​ខ្លាំង​និង​ផ្កាយ​៤​ ទៀ​ បាញ់​ ស្ងាត់​មាត់​ដូច​គេ​ចុក​

​មាន​ហេតុការណ៍​គ្រោះថ្នាក់​ចរាចរណ៍​បង្ក​ដោយ​រថយន្ត​ពាក់​ស្លាក​លេខ​ខេមរភូមិន្ទ​ បុក​ទៅ​លើ​ទោចក្រយានយន្ត​ទៀត​ហើយ​ កាលពី​វេលា​ម៉ោង​១២​និង​៣៥​នាទី​ថ្ងៃត្រង់​ នា​ថ្ងៃ​ទី​០៥​ ខែតុលា​ ឆ្នាំ​២០១៤​កន្លង​ទៅ​ថ្មីៗ​នេះ​ នៅ​តាម​បណ្តោយ​ផ្លូវជាតិ​លេខ​៧៨​ ឋិត​ក្នុងភូមិ​៣​ ឃុំ​ត្រពាំង​ច្រេស​ ស្រុក​កូន​មុំ​ ខេត្តរតនគិរី​ បណ្តាល​ឲ្យ​អ្នក​ជិះ​ទោចក្រយានយន្ត​រង​របួស​ធ្ងន់ធ្ងរ​ត្រង់​ក្បាល​ ត្រូវ​បញ្ជូន​ទៅ​មន្ទីរពេទ្យ​បង្អែក​ខេត្តរតនគិរី​ ដើម្បី​សង្គ្រោះ​ជា​បន្ទាន់​ ខណៈ​អ្នកបើកបរ​រថយន្ត​បង្ក​បាន​ព្យាយាម​បើក​រត់គេច​មិន​ទទួលខុសត្រូវ​ បាន​ចម្ងាយ​ជាង​២០​គីឡូម៉ែត្រ​ ទើប​សមត្ថកិច្ច​ស្ទាក់​ឃាត់​ចាប់​បាន​នៅ​ត្រង់​ចំណុច​ផ្លូវបំបែក​ជា​បី​អូរ​ចង​ ។​

​ប្រភព​ព័ត៌មាន​ពី​សាក្សី​ជា​ប្រជាពលរដ្ឋ​ដែល​បានឃើញ​ហេតុការណ៍​ ឲ្យ​ដឹង​ថា​ ករណី​គ្រោះថ្នាក់​ចរាចរណ៍​ខាងលើ​នេះ​បង្ក​ឡើង​ដោយ​រថយន្ត​ម៉ាក​ ISUZU​ ពណ៌​ទឹកប្រាក់​ ពាក់​ស្លាក​លេខ​ខេមរភូមិន្ទ​10.2-9101​ មួយ​គ្រឿង​ បើកបរ​ពី​លិចទៅ​កើត​ក្នុង​ល្បឿន​យ៉ាង​លឿន​ និង​មក​ដល់​ចំណុច​កើតហេតុ​ ក៏​បាន​ពើប​នឹង​ទោចក្រយានយន្ត​មួយ​គ្រឿង​ម៉ាក​ Smash​ Rivo​ ពណ៌​ក្រហម​ គ្មាន​ពាក់​ស្លាក​លេខ​ ជិះ​ម្នាក់ឯង​ចេញពី​តូប​លក់​សម្ភារៈ​គ្រឿងបន្លាស់​រថយន្ត​ ក្នុង​ទិស​ដៅ​ស្របគ្នា​បុក​ពីក្រោយ​យ៉ាង​ពេញទំហឹង​ បណ្តាល​ឲ្យ​អ្នក​ជិះ​ទោចក្រយានយន្ត​រង​របួស​ធ្ងន់ធ្ងរ​ ដួល​បោក​ក្បាល​ដោយ​ផ្លោង​ប៉ើង​ប្រមាណ​ជាង​២០​ម៉ែត្រ​ ខណៈ​អ្នកបើកបរ​រថយន្ត​បាន​បង្កើន​ល្បឿន​ព្យាយាម​បើក​រត់គេច​ខ្លួន​មិន​ទទួលខុសត្រូវ​ ។​

​សមត្ថកិច្ច​នគរបាល​បាន​ឲ្យ​ដឹង​ថា​ អ្នកបើកបរ​រថយន្ត​បង្ក​ដែល​សមត្ថកិច្ច​ប៉ុស្តិ៍​នគរបាល​រដ្ឋបាល​អូរ​ចង​ធ្វើការ​ស្ទាក់​ឃាត់​បាន​នោះ​ មានឈ្មោះ​ អ៊ែ​ល​ លី​ ភេទ​ប្រុស​ អាយុ​៤៩​ឆ្នាំ​ ជនជាតិ​ខ្មែរ​-​អ៊ិ​ស្លា​ម​ មុខរបរ​ជា​អង្គរក្ស​ មាន​ទីលំនៅ​ខេត្តកំពង់ចាម​ ។​ រីឯ​ជន​រង​គ្រោះ​ដែល​ជិះ​ទោចក្រយានយន្ត​ទទួល​រង​របួស​ធ្ងន់ធ្ងរ​នោះ​មានឈ្មោះ​ ភា​ រក្ស​ ភេទ​ប្រុស​ អាយុ​២៥​ឆ្នាំ​ មាន​ទីលំនៅ​ភូមិ​-​ឃុំ​កើតហេតុ​ ។​

​បច្ចុប្បន្ន​ក្រៅពី​ជន​រង​គ្រោះ​ដែល​ត្រូវ​បាន​បញ្ជូន​យក​ទៅ​សង្គ្រោះ​នៅ​មន្ទីរពេទ្យ​បង្អែក​ខេត្តរតនគិរី​នោះ​ គឺ​ទោចក្រយានយន្ត​ រថយន្ត​ និង​អ្នកបើកបរ​រថយន្ត​ប​ង្កើ​ត្រូវ​បាន​បញ្ជូន​យក​មក​រក្សា​ទុក​នៅ​អធិការដ្ឋាន​នគរបាល​ស្រុក​កូន​មុំ​ រង់ចាំ​ដោះស្រាយ​តាម​ក្រោយ​ និង​កសាង​សំណុំរឿង​តាម​នីតិវិធី​នៃ​ច្បាប់​ ។​

​អនុលោម​តាម​មាត្រា​៥,​ មាត្រា​៦​ និង​មាត្រា​១១​ នៃ​អនុក្រឹត្យ​របស់​រាជរដ្ឋាភិបាល​លេខ​៧៧​អន​ក្រ​.​បក​ ចុះ​ថ្ងៃ​ទី​២៨​ ខែវិច្ឆិកា​ ឆ្នាំ​២០០៣​ ស្តី​ពី​ការ​ចេញ​ស្លាក​លេខ​សម្គាល់​យានជំនិះ​ និង​ប្រកាស​របស់​ក្រសួងការពារជាតិ​លេខ​០៦៤/២០០៩​ប្រ​.​ក​ ចុះ​ថ្ងៃ​ទី​២២​ ខែឧសភា​ ឆ្នាំ​២០០៩​ ស្តី​ពី​ការ​ចេញ​ប័ណ្ណ​ ស្លាក​លេខ​ចរាចរណ៍​ និង​ប័ណ្ណ​សំគាល់​ស្ថាប័ន​ កងឯកភាព​ក្នុង​កង​យោធពលខេមរភូមិន្ទ​ គឺ​រថយន្ត​ដែល​ពាក់​ស្លាក​លេខ​ខេមរភូមិន្ទ​10.2-9101​ ជា​រថយន្ត​របស់​ក្រសួងការពារជាតិ​ ប្រើប្រាស់​ដោយ​ក្រុម​បេសកកម្ម​យោធា​បរទេស​សម្រាប់​នៅ​សមរភូមិ​ និង​ការងារ​ការពារ​ជាតិ​ ជា​មធ្យោបាយ​សម្រាប់​ដឹក​ជញ្ជូន​សម្ភារៈ​ទ័ព​ ឬ​ដឹក​ជញ្ជូន​កងទ័ព​ ដោយ​ត្រូវ​លាប​ពណ៌​ត្រេ​អ៊ី​ទៀត​ផង​ ។​ ប៉ុន្តែ​ចំពោះ​រថយន្ត​ដែល​បង្ក​គ្រោះថ្នាក់​ចរាចរណ៍​ខាងលើ​នេះ​ មិន​ត្រូវ​បាន​លាប​ពណ៌​ត្រេ​អ៊ី​ និង​ក៏​មិនឃើញ​មាន​ដឹក​ដំណើរ​របស់​យោធា​បរទេស​អ្វី​ឡើយ​ ។​

​តាម​ការ​កត់សម្គាល់​ជាក់ស្តែង​បាន​បង្ហាញ​ឲ្យ​ឃើញ​ថា​ មាន​រថយន្ត​ទំនើបៗ​ជា​ច្រើន​គ្រឿង​ រួម​មាន​ម៉ាក​ Landcruiser,​ Lexus​ និង​ Range​ Rover​ …​ត្រូវ​បាន​គេ​យក​មក​ធ្វើ​ចរាចរណ៍​តាម​ផ្លូវ​សាធារណៈ​យ៉ាង​ព្រោងព្រាត​ ដោយ​ពាក់​ស្លាក​លេខ​ខេមរភូមិន្ទ​ មិនបាច់​លាប​ពណ៌​ត្រេ​អ៊ី​ និង​យក​ទៅ​ប្រើប្រាស់​សម្រាប់​ការងារ​ការពារ​ជាតិ​អ្វី​នោះ​ទេ​ ដ្បិត​រថយន្ត​ទាំងនោះ​ជា​រថយន្ត​កម្មសិទ្ធិឯកជន​ យក​មក​ពាក់​ស្លាក​លេខ​ខេមរភូមិន្ទ​ បំពាន​លើ​អនុក្រឹត្យ​របស់​រាជរដ្ឋាភិបាល​ និង​ប្រកាស​របស់​ក្រសួងការពារជាតិ​ ប៉ុន្តែ​បែរជា​សម្តេច​អគ្គមហាសេនាបតី​តេ​ជោ​ នាយ​ឧត្តមសេនីយ៍​ផុត​លេខ​ផ្កាយ​មាស​៥​ ហ៊ុន​ សែន​ ជា​នាយក​រដ្ឋមន្ត្រី​នៃ​ព្រះរាជាណាចក្រ​កម្ពុជា​ និង​ឯកឧត្តម​ នាយ​ឧត្តមសេនីយ៍​ផ្កាយ​មាស​៤​ ទៀ​ បាញ់​ ឧបនាយករដ្ឋមន្ត្រី​ រដ្ឋមន្ត្រី​ក្រសួងការពារជាតិ​ នាំ​គ្នា​ស្ងាត់​មាត់​ដូច​គេ​ចុក​ មិន​មាន​វិធានការ​ទាល់តែ​សោះ​ ទុក​ឲ្យ​ប៉ះពាល់​ដល់​កិត្យានុភាព​នៃ​កង​យោធពលខេមរភូមិន្ទ​ទាំងមូល​ទៅ​វិញ​ ៕​

 

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.