ថ្ងៃ អាទិត្យ ទី ០៣ ខែ កក្កដា ឆ្នាំ ២០២២

ប្រធាន​មន្ទីរ​សង្គមកិច្ច​ខេត្តកំពង់ធំ​ដែល​មាន​ងារ​ជា​”​ឯកឧត្តម​”​ល្បីល្បាញ​ថា​ក្រៅពី​ប្រព្រឹត្ត​អំពើ​ពុក​រលួយ​ ថែម​ទាំង​ប្លន់​ដីធ្លី​រាស្ត្រ​ទៀត​

​មន្ត្រីរាជការ​បម្រើ​ការងារ​នៅ​ក្រោម​ឱវាទ​មន្ទីរ​សង្គមកិច្ច​ អតីត​យុទ្ធ​ជន​ និង​យុវ​នីតិសម្បទា​ខេត្តកំពង់ធំ​ បាន​នាំ​គ្នា​បរិហារ​រិះគន់​ឯកឧត្តម​ ជា​ ជាតិ​ ជា​ប្រ​ធា​មន្ទីរ​និង​ជាទី​ប្រឹក្សា​ឯកឧត្តម​បណ្ឌិត​ ងួ​ន​ ញ៉ិល​ អតីត​អនុប្រធាន​ទី​១​រដ្ឋសភា​ នីតិកាល​ទី​៥​ និង​ជា​អ្នកតំណាង​រាស្ត្រ​មណ្ឌល​ខេត្តកំពង់ធំ​ថា​ ឯកឧត្តម​ប្រធាន​មន្ទីរ​ និង​ជាទី​ប្រឹក្សា​ឯកឧត្តម​បណ្ឌិត​ ងួ​ន​ ញ៉ិល​ រួច​នេះ​ ក្រៅពី​ពូកែ​ជំនាញ​ខាង​ប្រព្រឹត្ត​អំពើ​ពុក​រលួយ​ កិបកេង​ថវិកាជាតិ​ និង​ថវិកា​របប​និវត្តន៍​ជន​ និង​អតីត​យុទ្ធ​ជន​នោះ​ គឺ​ថ្លើមធំ​ហ៊ាន​រំលោភ​បំពាន​ប្លន់​យក​ដីធ្លី​ប្រជារាស្ត្រ​ចំនួន​៣៤​គ្រួសារ​ ស្មើនឹង​៥៤​ហិ​កតា​ នៅ​ចំណុច​ដីស្រែ​វាល​ក្រោម​ តំបន់​បាត​ព្រ​លាក​ ឋិត​ក្នុងភូមិ​ពោធិ៍​តា​អ៊ុ​ន​ សង្កាត់​ស្រយូវ​ ក្រុង​ស្ទឹង​សែន​ (​អតីត​ស្រុក​ស្ទឹង​សែន​)​ ខេត្តកំពង់ធំ​ ធ្វើ​ឲ្យ​ប្រជារាស្ត្រ​ជា​ម្ចាស់​ដី​ខឹងសម្បា​ក្តៅក្រហាយ​ និង​ប្តឹង​ទៅ​ស្ទើរ​គ្រប់​ស្ថាប័ន​ តែ​មិន​ទាន់​មាន​ដំណោះស្រាយ​នៅឡើយ​ទល់​បច្ចុប្បន្ន​ ។​

​លោក​ ឃុ​ត​ នាង​ និង​លោក​ ភោ​ ភឿ​ក​ តំណាង​ប្រជារាស្ត្រ​ចំនួន​៣៤​គ្រួសារ​ បាន​ឲ្យ​ដឹង​ថា​ ដីធ្លី​ដែល​លោក​ ជា​ ជាតិ​ រំលោភ​បំពាន​យក​នោះ​គឺជា​ដីស្រែ​ដែល​ពួក​គាត់​បាន​កាន់កាប់​ និង​អាស្រ័យ​ផល​ តាំងពី​អំឡុង​ឆ្នាំ​១៩៨៧​ ដោយ​អ្នកខ្លះ​ទទួល​បាន​ចំណែក​ដីធ្លី​ពី​រដ្ឋ​ចំនួន​១​ហិ​កតា​ ឬ​២​ហិ​កតា​ ។​ ស្រាប់តែ​មក​ដល់​ដើមឆ្នាំ​២០០៦​ ដីធ្លី​របស់​ពួក​គាត់​ត្រូវ​បាន​លោក​ ជា​ ជាតិ​រំលោភ​បំពាន​យក​ធ្វើ​ជា​កម្មសិទ្ធិ​និង​បាន​យក​ដីធ្លី​នេះ​ធ្វើ​ជា​អាង​ទឹក​បម្រើ​ឲ្យ​ផលប្រយោជន៍​ផ្ទាល់ខ្លួន​ទៅ​វិញ​ ។​

​ក្រុម​តំណាង​ប្រជារាស្ត្រ​បាន​លើក​ឡើង​ឲ្យ​ដឹង​ដែរ​ថា​ ក្រោយ​មាន​ករណី​រំលោភ​បំពាន​ដីធ្លី​ពី​សំណាក់​លោក​ ជា​ ជាតិ​ រួច​មក​ ពួក​គាត់​បាន​ប្តឹង​ទៅ​អាជ្ញាធរ​ឃុំ​ ស្រុក​ ខេត្ត​ និង​ឯកឧត្តម​ ងួ​ន​ ញ៉ិល​ អ្នកតំណាង​រាស្ត្រ​មណ្ឌល​ខេត្តកំពង់ធំ​ផង​ដែរ​ តែ​មិន​ទទួល​បាន​លទ្ធផល​ឡើយ​ ។​ លុះ​មក​ដល់​ឆ្នាំ​២០០៨​ ពួក​គាត់​បាន​យក​រឿងរ៉ាវ​នេះ​ប្តឹង​សុំ​អន្តរាគមន៍​ពី​សម្តេច​អគ្គ​មហា​ពញា​ចក្រី​ ហេង​ សំ​រិ​ន​ ប្រធានរដ្ឋសភា​នៃ​ព្រះរាជាណាចក្រ​កម្ពុជា​ ទើបត្រូវ​បាន​សម្តេច​អគ្គ​មហា​ពញា​ចក្រី​ ហេង​ សំ​រិ​ន​ ចេញ​លិខិតផ្លូវការ​បញ្ជូន​មក​ឯកឧត្តម​អភិបាល​ នៃ​គណៈ​អភិបាលខេត្ត​កំពង់ធំ​ ពិនិត្យ​និង​ដោះស្រាយ​ ប៉ុន្តែ​នៅ​តែ​ស្ងាត់ឈឹង​ដូច​ចោរលួច​សេះ​ដដែល​ ។​

​ដោយឡែក​ មន្ត្រីរាជការ​បម្រើ​ការងារ​នៅ​ខេត្តកំពង់ធំ​ បាន​ទម្លាយ​ឲ្យ​ដឹង​ថា​ ក្រៅពី​មាន​បញ្ហា​ដីធ្លី​ជាមួយ​ប្រជារាស្ត្រ​ ដោយសារ​អាង​ខ្លួន​ជា​មន្ត្រី​មាន​លុយ​ និង​មាន​បក្ខពួក​ខ្សែ​ធំ​ជាទី​ប្រឹក្សា​អនុប្រធាន​រដ្ឋសភា​ គឺ​លោក​ ជា​ ជាតិ​ ប្រធាន​មន្ទីរ​សង្គមកិច្ច​ អតីត​យុទ្ធ​ជន​ និង​យុវ​នីតិសម្បទា​ ខេត្តកំពង់ធំ​ បាន​ប្រព្រឹត្ត​អំពើ​ពុក​រលួយ​កិបកេង​ថវិកាជាតិ​ក្នុង​ជំពូក​៦០,​ ជំពូក​៦១,​ជំពូក​៦២,​ ជំពូក​៦៤​ និង​ជំពូក​៦៥​ ក្នុង​មួយ​ឆ្នាំៗ​បាន​ប្រាក់​រាប់រយ​លាន​រៀល​ ដាក់​បោ​ប៉ៅ​ចែក​គ្នា​ចាយ​ជាមួយ​បក្ខពួក​របស់​គាត់​ ព្រមទាំង​កិបកេង​ប្រាក់ខែ​និវត្តន៍​ជន​ និង​អតីត​យុទ្ធ​ជន​ ទោះបី​ប្រាក់​ទាំងនោះ​ត្រូវ​បាន​បើក​តាម​ប្រព័ន្ធ​ធនាគារ​ក៏​ដោយ​ ។​

​សូម​បញ្ជាក់​ជូន​ថា​ កាលពី​ឆ្នាំ​២០១៣​កន្លង​ទៅ​ មន្ទីរ​សង្គមកិច្ច​ អតីត​យុទ្ធ​ជន​ និង​យុវ​នីតិសម្បទា​ខេត្តកំពង់ធំ​ បាន​ចំណាយ​ថវិកាជាតិ​អស់​ចំនួន​ ១៣.៣១៦.៨១៦.១០១​រៀល​ (​ក្នុង​នោះ​ជំពូក​៦០​អស់​ចំនួន​៧៥.៧៨៦.៩១០​រៀល​,​ ជំពូក​៦១​អស់​ចំនួន​២៧៥.៣៤៨.០០០​រៀល​,​ ជំពូក​៦២​អស់​ចំនួន​៥១.៤៤១.៨០០​រៀល​,​ ជំពូក​៦៤​អស់​ចំនួន​១២.៦៣៧.៦៦៤.៤០០​រៀល​ និង​ជំពូក​៦៥​អស់​ចំនួន​២៧៦.៥៧៥.៨០០​រៀល​)​ ។​ ចំពោះ​គម្រោង​ចំណាយ​ថវិកា​ដែល​បាន​និង​កំពុង​បន្ត​អនុវត្តន៍​នៅ​ឆ្នាំ​២០១៤​នេះ​ មាន​ចំនួន​១៨.៤៤០.០០០.០០០​រៀល​(​ក្នុង​នោះ​ជំពូក​៦០​ចំនួន​៦០​លាន​រៀល​,​ ជំពូក​៦១​ចំនួន​៧៥​លាន​រៀល​,​ ជំពូក​៦២​ចំនួន​៦០​លាន​រៀល​,​ ជំពូក​៦៤​ចំនួន​១៧.៩២៥.០០០.០០០​រៀល​ និង​ជំពូក​៦៥​ ចំនួន​៣២០​លាន​រៀល​)​ ។​ ទោះបី​ថវិកា​ទាំងនេះ​មិន​ទាន់​បាន​បិទ​បញ្ចប់​ការ​ចំណាយ​ក៏​ដោយ​ ក៏​គេ​អាច​សង្កេត​ឃើញ​ថា​ នៅ​តែ​មាន​បង្កប់​ដោយ​អំពើ​ពុក​រលួយ​ដដែល​ គ្រាន់តែ​បាន​ប្តូរ​រូបភាព​បត់បែន​ទំនើប​កម្ម​ជាង​មុន​ ស្រប​ពេល​ដែល​ក្រុម​មន្ត្រី​អធិការកិច្ច​ ឬ​ មន្ត្រី​សវន​កម្ម​"​ជើង​ដប់​"​ចុះ​ត្រួតពិនិត្យ​តែ​បញ្ជីស្នាម​រៀបចំ​រួច​ជា​ស្រេច​ រួច​ដើរ​ផឹកស៊ី​ជាមួយ​គ្នា​ និង​យក​ស្រោមសំបុត្រ​ត្រឡប់​មក​វិញ​ធ្វើ​របាយការណ៍​ថា​ រក​មិនឃើញ​កំហុសឆ្គង​របស់​លោក​ប្រធាន​មន្ទីរ​ដ៏​មហិមា​ ជា​ ជាតិ​ ឡើយ​ ។​

​លោក​ ជា​ ជាតិ​ ក្នុង​ឋានៈ​ជា​ប្រធាន​មន្ទីរ​សង្គមកិច្ច​ អតីត​យុទ្ធ​ជន​ និង​យុវ​នីតិសម្បទា​ ខេត្តកំពង់ធំ​ ធ្លាប់​ត្រូវ​បាន​តែងតាំង​ជាទី​ប្រឹក្សា​ឯកឧត្តម​បណ្ឌិត​ ងួ​ន​ ញ៉ិល​ អតីត​អនុប្រធាន​ទី​១​រដ្ឋសភា​ នីតិកាល​ទី​៥​ មាន​ឋានៈ​ស្មើ​អនុរដ្ឋលេខាធិការ​បន្ថែម​លើ​មុខងារ​បច្ចុប្បន្ន​ ដោយ​ព្រះរាជក្រឹត្យ​លេខ​ន​ស​/​រក​ត​/១០១៣/១០៨៥​ ចុះ​ថ្ងៃ​ទី​២៦​ ខែតុលា​ ឆ្នាំ​២០១៣​ ទើប​ទទួល​បាន​ងារ​ជា​ "​ឯកឧត្តម​"​ ទល់​សព្វថ្ងៃ​ ៕​

 

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.