ថ្ងៃ អាទិត្យ ទី ០៣ ខែ កក្កដា ឆ្នាំ ២០២២

ប៉ូលិស​សេដ្ឋកិច្ច​ក្រសួងមហាផ្ទៃ​ចំនួន​៤​នាក់​ត្រូវ​បាន​ចាប់​ឃាត់ខ្លួន​ពី​បទ​កំហែង​យក​ និង​បង្ខាំង​មនុស្ស​ជំរិត​ទារប្រាក់​

​ប្រភព​ព័ត៌មាន​ពី​ខេត្តសៀមរាប​ បាន​ឲ្យ​ដឹង​ថា​ នគរបាល​សេដ្ឋកិច្ច​ក្រសួងមហាផ្ទៃ​ចំនួន​៤​នាក់​ ត្រូវ​បាន​សមត្ថកិច្ច​កងរាជអាវុធហត្ថ​ ដឹកនាំ​ដោយ​តំណាង​អយ្យការ​អម​សាលាដំបូង​ខេត្តសៀមរាប​ ចាប់​ឃាត់ខ្លួន​ កាលពី​វេលា​ម៉ោង​១៦​រសៀល​ នា​ថ្ងៃ​ទី​០១​ ខែតុលា​ ឆ្នាំ​២០១៤​ ម្សិលមិញ​នៅ​ចំណុច​ភូមិ​មាត់​ខ្លា​ ឃុំ​អន្លង់​សំណ​ ស្រុក​ជីក្រែង​ ជា​ព្រំប្រទល់​ខេត្តសៀមរាប​-​កំពង់ធំ​ និង​ត្រូវ​បាន​បញ្ជូន​ខ្លួន​ទៅ​កាន់​អង្គភាព​ប្រឆាំង​អំពើ​ពុក​រលួយ​ ដើម្បី​ចាត់ការ​បន្ត​នៅ​រសៀល​ថ្ងៃ​ទី​០២​ ខែតុលា​ ឆ្នាំ​២០១៤​នេះ​ ពាក់​ទង​នឹង​ការ​ប្រព្រឹត្ត​ល្មើសច្បាប់​ ខុស​តួនាទី​ភារកិច្ច​ កំហែង​យក​ និង​បង្ខាំង​មនុស្ស​ជំរិត​ទារប្រាក់​ ។​

ព័ត៌មាន​ពី​សមត្ថកិច្ច​បាន​ឲ្យ​ដឹង​ថា​ នគរបាល​សេដ្ឋកិច្ច​ក្រសួងមហាផ្ទៃ​ ទាំង​៤​នាក់​ដែល​ត្រូវ​បាន​ចាប់ខ្លួន​នោះ​ រួម​មាន​ ៖​ ១-​លោក​វរសេនីយ៍ទោ​ ឈៀង​ លាង​ពៅ​ អាយុ​៤៧​ឆ្នាំ​  មាន​ទីលំនៅ​សង្កាត់​បឹង​កេងកង​២​ ខណ្ឌចំការមន​ រាជធានី​ភ្នំពេញ​,​ ២-​លោក​វរ​ស​នី​យ៍​ទោ​ ម៉ា​ តៃ​យ៉ា​ អាយុ​៥៤​ឆ្នាំ​ មាន​ទីលំនៅ​សង្កាត់​ភ្នំពេញ​ថ្មី​ ខណ្ឌ​សែន​សុខ​ រាជធានី​ភ្នំពេញ​,​ ៣-​លោក​អនុសេនីយ៍ទោ​ ជា​ ខេ​ង​ អាយុ​៥៦​ឆ្នាំ​ មាន​ទី​លម​ណ​សង្កាត់​កា​កាប​ ខណ្ឌ​ពោធិ៍​សែន​ជ័យ​ រាជធានី​ភ្នំពេញ​ និង​៤-​លោក​ព្រិ​ន្ទ​បាល​ឯក​ យឹ​ម​ ថា​ណា​ អាយុ​៣៣​ឆ្នាំ​ មាន​ទីលំនៅ​សង្កាត់​បឹង​ទំពុន​ ខណ្ឌមានជ័យ​ រាជធានី​ភ្នំពេញ​ ខណៈ​ដែល​មន្ត្រី​នគរបាល​សេដ្ឋកិច្ច​ទាំង​៤​នាក់​នេះ​មាន​បេសកកម្ម​ចុះ​បង្ក្រាប​បទល្មើស​ជលផល​ក្នុង​បណ្តា​ខេត្ត​ចំនួន​៥​ ជុំវិញ​បឹង​ទន្លេសាប​ គឺ​ខេត្តបាត់់ដំបង​,​ ខេត្តកំពង់ឆ្នាំង​,​ ខេត្តពោធិ៍សាត់​,​ ខេត្តកំពង់ធំ​ និង​ខេត្តសៀមរាប​ ។​

​តាម​ការ​អះអាង​ពី​សមត្ថកិច្ច​បាន​ឲ្យ​ដឹង​ថា​ មន្ត្រី​នគរបាល​សេដ្ឋកិច្ច​ក្រសួងមហាផ្ទៃ​ទាំង​៤​នាក់​នេះ​ ត្រូវ​បាន​ប្រជា​នេសាទ​ ដាក់​ពាក្យបណ្តឹង​ទៅ​អយ្យការ​អម​សាលាដំបូង​ខេត្តសៀមរាប​ ដោយ​ប្តឹង​ចោទប្រកាន់​ពី​បទ​កំហែង​យក​ និង​បង្ខាំង​មនុស្ស​ជំរិត​ទារប្រាក់​តាម​រយៈ​ការ​បង្ខំ​ប្រជា​នេសាទ​ឲ្យ​បង់ប្រាក់​ពី​៨​លាន​រៀល​ទៅ​១៣​លាន​រៀល​ក្នុង​ម្នាក់ៗ​ តែ​ត្រូវ​ប្រជា​នេសាទ​ សុំ​បញ្ចុះ​ថ្លៃ​ត្រឹម​ចំនួន​ពី​៤​លាន​រៀល​ទៅ​៥​លាន​រៀល​ ជា​ថ្នូរ​នឹង​ការ​ដោះ​លែង​មក​វិញ​ ។​

​ក្នុង​ពេល​ចាប់​ឃាត់ខ្លួន​មន្ត្រី​នគរបាល​សេដ្ឋកិច្ច​ទាំង​៤​នាក់​ ព្រមទាំង​អ្នក​បើកកាណូត​ចំនួន​២​នាក់​ផ្សេង​ទៀត​ផង​នោះ​ សមត្ថកិច្ច​ធ្វើការ​ដកហូត​បាន​លុយ​ចំនួន​៤.៣៥០.០០០​រៀល​ សៀវភៅ​កត់ត្រា​ឈ្មោះ​ អ្នក​បង់ប្រាក់​ចំនួន​១​ក្បាល​(៩៧​សន្លឹក​)​ អាវុធ​ម៉ាក​ AK47​ ចំនួន​២​ដើម​ បង់​ចំនួន​២​ មាន​គ្រាប់​ចំនួន​៥៤​គ្រាប់​ អាវុធ​ខ្លី​ម៉ាក​ K59​ ចំនួន​១​ដើម​ បង់​ចំនួន​១​ មាន​គ្រាប់​ចំនួន​៥​គ្រាប់​ កាណូត​ម៉ាស៊ីន​ D16​ ចំនួន​១​គ្រឿង​ និង​កាណូត​ស្មាច់​មាន​ម៉ាស៊ីន​ចំនួន​១​គ្រឿង​ ៕​

Siiem3 Sieam

Filed in: Feature, ព័ត៌មានជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.