ថ្ងៃ ពុធ ទី ២២ ខែ កញ្ញា ឆ្នាំ ២០២១

ចិន​នឹង​ជែង​ឈ្នះ​អា​មេ​រិ​ក​ក្លាយជា​ប្រទេស​មហាអំណាច​សេដ្ឋកិច្ច​ធំ​បំផុត​ក្នុង​ពិភពលោក​នៅ​ឆ្នាំ​២០២៤​ខាង​មុខ​

​ចិន​នឹង​ជែង​ឈ្នះ​សហរដ្ឋអាមេរិក​ ដើម្បី​ក្លាយជា​ប្រទេស​មហាអំណាច​សេដ្ឋកិច្ច​ធំ​បំផុត​ក្នុង​ពិភពលោក​នៅ​រយៈពេល​១០​ឆ្នាំ​ទៀត​ គឺ​នៅ​ឆ្នាំ​២០២៤​ខាង​មុខ​ ។​ នេះ​បើ​យោង​តាម​ការ​ចុះ​ផ្សាយ​របស់​គេហទំព័រ​អង់គ្លេស​ឈ្មោះ​ Daily​ Mail​ កាលពី​ថ្ងៃ​ទី​០៧​ ខែកញ្ញា​ ឆ្នាំ​២០១៤​កន្លង​ទៅ​ថ្មីៗ​ ។​

​សហរដ្ឋអាមេរិក​បាន​ដឹកនាំ​សេដ្ឋកិច្ច​របស់​ពិភពលោក​ជាង​១០០​ឆ្នាំ​មក​ហើយ​ ខណៈ​ឥឡូវនេះ​ការ​កើនឡើង​យ៉ាង​ខ្លាំង​ក្នុង​ការ​ចំណាយ​របស់​អតិថិជន​នៅ​ក្នុង​ប្រទេស​ចិន​ ត្រូវ​គេ​រំពឹង​ទុក​ថា​ នឹង​ធ្វើ​ឲ្យ​ចិន​ក្លាយជា​ប្រទេស​មហាអំណាច​សេដ្ឋកិច្ច​ធំ​បំផុត​លើ​ពិភពលោក​នៅ​ឆ្នាំ​២០២៤​ ។​

​របាយការណ៍​របស់​ក្រុមហ៊ុន​ផ្សព្វផ្សាយ​ព័ត៌មាន​អាជីវកម្ម​ IHS​ បាន​បង្ហាញ​ឲ្យ​ឃើញ​ថា​ ការ​ចំណាយ​របស់​អតិថិជន​ចិន​ ត្រូវ​បាន​ព្យាករណ៍​ទុក​ថា​ នឹង​កើនឡើង​ចំនួន​៣​ដង​ពី​៣,៥​លាន​លាន​ដុល្លារ​អា​មេ​រិ​ក​ ទៅ​១០,៥​លាន​លាន​ដុល្លារ​អា​មេ​រិ​ក​ នៅ​ក្នុង​រយៈពេល​១០​ឆ្នាំ​ខាង​មុខ​ ដែល​នឹង​បង្កើន​ GDP​ របស់​ចិន​រហូត​ដល់​២៨,៣​លាន​លាន​ដុល្លារ​អា​មេ​រិ​ក​ លើស​ GDP​ របស់​អាម​រិ​ក​ ដែល​មាន​ចំនួន​២៧,៤​លាន​លាន​ដុល្លារ​អា​មេ​រិ​ក​ បើ​ផ្អែក​តាម​តម្លៃ​បច្ចុប្បន្ន​ ។​

GDP​ របស់​សហរដ្ឋអាមេរិក​បច្ចុប្បន្ន​នៅ​តែ​ខ្ពស់​ជាង​ GDP​ របស់​ចិន​នៅឡើយ​ទេ​ ពោល​គឺ​ចំនួន​១៧,៤​លាន​លាន​ដុល្លារ​អា​មេ​រិ​ក​ ធៀប​នឹង​ចំនួន​១០​លាន​លាន​ដុល្លារ​អា​មេ​រិ​ក​ ខណៈ​ក្រុម​អ្នកជំនាញ​សេដ្ឋកិច្ច​ព្យាករណ៍​ថា​ ការ​ចម​ណាយ​របស់​អតិថិជន​ចិន​នឹង​កើនឡើង​នូវ​កម្រិត​មធ្យម​៧,៧​ភាគរយ​ក្នុង​១​ឆ្នាំ​ ដែល​អាច​ធ្វើ​ឲ្យ​អ្វីៗ​នឹង​មានការ​ផ្លាស់​ប្តូរ​ទៅ​ថ្ងៃ​អនាគត​ ។​

​លោក​ Rajiv​ Biswas​ នាយក​សេដ្ឋវិទូ​អាស៊ី​របស់​ IHS​ បាន​និយាយ​ថា​ "​សេដ្ឋកិច្ច​ចិន​ត្រូវ​គេ​រំពឹង​ថា​ នឹង​ធ្វើ​ឲ្យ​មាន​តុល្យភាព​ឡើង​វិញ​ចំពោះ​កំណើន​កាន់តែ​ឆាប់រហ័ស​ នៅ​ក្នុង​ការ​ចំណាយ​ ហើយនឹង​ជួយ​ដល់​ហេដ្ឋារចនាសម្ព័ន្ធ​សេដ្ឋកិច្ច​ក្នុងស្រុក​ ក៏​ដូច​ជា​កំណើន​សម្រាប់​អាស៊ី​ប៉ា​ស៊ី​ហ្វិ​ក​ ក្នុង​នាម​ជា​តំបន់​មួយ​ ។​ សេដ្ឋកិច្ច​ចិន​នឹង​ដើរតួ​នាទី​កាន់តែ​ធំ​ឡើង​ក្នុង​នាម​ជា​អ្នក​ជំរុញ​សេដ្ឋកិច្ច​ និង​លំហូរ​វិនិយោគ​សកលលោក​ដ៏​សំខាន់​"​ ។​

​ប្រសិនបើ​ការ​ព្យាករណ៍​របស់​IHS​ ត្រឹមត្រូវ​នោះ​ ចិន​នឹង​កាន់កាប់​ GDP​ របស់​ពិភពលោក​ចំនួន​១​ភាគ​៥​នៅ​ត្រឹម​ឆ្នាំ​២០២៥​ ដោយ​កើនឡើង​ពី​១២​ភាគរយ​នា​ពេល​បច្ចុប្បន្ន​ ។​

​សូម​បញ្ជាក់​ជូន​ថា​ បច្ចុប្បន្ន​ប្រជាជន​ចិន​មាន​ចំនួន​ប្រមាណ​១.៤០០​លាន​នាក់​ ខណៈ​សហរដ្ឋអាមេរិក​មាន​ចំនួន​ប្រមាណ​៣២០​លាន​នាក់​ប៉ុណ្ណោះ​ ៕​ 

Filed in: Feature, សេដ្ឋកិច្ច, អន្តរជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.