ថ្ងៃ ពុធ ទី ២៥ ខែ ឧសភា ឆ្នាំ ២០២២

ក្រុមហ៊ុន​អាកាសចរណ៍​ម៉ា​ឡេ​ស៊ី​សម្រេចចិត្ត​កាត់​បន្ថយ​បុគ្គលិក​ចំនួន​៦​ពាន់​នាក់​ក្រោយជួបមហន្តរាយយន្តហោះ២លើកផ្ទួនៗគ្នា

​តាម​ការ​ប្រកាស​កាលពី​ថ្ងៃ​ទី​២៩​ ខែសីហា​ ឆ្នាំ​២០១៤​ម្សិលមិញ​ របស់​ក្រុមហ៊ុន​អាកាសចរណ៍​ម៉ា​ឡេ​ស៊ី​(Malaysia​ Airlines)​ បាន​ឲ្យ​ដឹង​ថា​ ក្រុមហ៊ុន​នឹង​កាត់​បន្ថយ​បុគ្គលិក​របស់​ខ្លួន​ចំនួន​៦.០០០​នាក់​ ក្នុង​ចំណោម​បុគ្គលិក​សរុប​ចំនួន​២០.០០០​នាក់​ ដើម្បី​ជា​ផ្នែក​មួយ​នៃ​ផែនការ​ស្រោចស្រង់​ឲ្យ​មាន​ភាពល្អ​ប្រសើរ​ឡើង​វិញ​ បន្ទាប់​ពី​ក្រុមហ៊ុន​ជួប​មហន្តរាយ​យន្តហោះ​ចំនួន​២​លើក​ផ្ទួនៗ​គ្នា​ក្នុង​ឆ្នាំ​២០១៤​នេះ​ ។​

​ក្រុមហ៊ុន​ Khazanah​ Nasional​ ដែល​ជា​ក្រុមហ៊ុន​វិនិយោគ​រដ្ឋ​របស់​ម៉ា​ឡេ​ស៊ី​ មាន​ភាគហ៊ុន​ចំនួន​៦៩​ភាគរយ​នៃ​ក្រុមហ៊ុន​អាកាសចរណ៍​ម៉ា​ឡេ​ស៊ី​ បាន​ឲ្យ​ដឹង​ថា​ ផែនការ​កាត់​បន្ថយ​បុគ្គលិក​នេះ​ ត្រូវ​រួម​បញ្ចូល​ទាំង​ការ​បង្កើត​ក្រុមហ៊ុន​ថ្មី​មួយ​ដែល​នឹង​គ្រប់គ្រង​លើ​ដំណើរការ​នៃ​ក្ង​ហ៊ុន​អាកាសចរណ៍​ម៉ា​ឡេ​ស៊ី​មាន​ស្រាប់​ ដោយ​ការ​កែទម្រង់​ និង​ការ​វិនិយោគ​ថ្មី​នៃ​ក្រុមហ៊ុន​អាកាសចរណ៍​ម៉ា​ឡេ​ស៊ី​ ក្រោម​ក្រុមហ៊ុន​វិនិយោគ​រដ្ឋ​នោះ​ នឹង​ត្រូវ​ចំណាយ​ប្រាក់​អស់​ចំនួន​១,៩​ពាន់​លាន​ដុល្លារ​អា​មេ​រិ​ក​​ ។

​គួរ​រំលឹក​ថា​ ក្រុមហ៊ុន​អាកាសចរណ៍​ម៉ា​ឡេ​ស៊ីក្នុង​ឆ្នាំ​២០១៤​នេះ​ បាន​ជួប​ប្រទះ​នឹង​មហន្តរាយ​យន្តហោះ​ចំនួន​២​លើក​ផ្ទួនៗ​គ្នា​ គឺ​លើក​ទី​១​ យន្តហោះ​ដឹក​អ្នកដំណើរ​ប្រភេទ​ Boeing777-200​ មាន​ជើងហោះហើរ​ MH370​ បាន​បាត់​ខ្លួន​ជាមួយនឹង​មនុស្ស​ក្នុង​យន្តហោះ​ចំនួន​២៣៩​នាក់​ កាលពី​ថ្ងៃ​ទី​០៨​ ខែមីនា​ ឆ្នាំ​២០១៤​ រហូត​មក​ទល់​បច្ចុប្បន្ន​រក​មិន​ទាន់​ឃើញ​នៅឡើយ​ ខណៈ​ដែល​គេ​សន្និដ្ឋាន​ថា​ មនុស្ស​ក្នុង​យន្តហោះ​បាន​ស្លាប់​បាត់បង់​ជីវិត​អស់​ទៅ​ហើយ​ និង​លើក​ទី​២​ យន្តហោះ​ដឹក​អ្នកដំណើរ​ប្រភេទ​ Boeing777-200​ មាន​ជើងហោះហើរ​ MH17​ បាន​ធ្លាក់​នៅ​ភាគ​ខាងកើត​ប្រទេស​អ៊ុយ​ក្រែ​ន​ សម្លាប់​មនុស្ស​ក្នុង​យន្តហោះ​ចំនួន​២៩៨​នាក់​ កាលពី​ថ្ងៃ​ទី​១៧​ ខែកក្កដា​ ឆ្នាំ​២០១៤​ ដែល​គេ​សង្ស័យ​ថា​ យន្តហោះ​បាន​ត្រូវ​គ្រាប់​មី​ស៊ី​ល​ធុន​ BUK​ របស់​ក្រុម​ឧទ្ទាម​បំបែក​រដ្ឋ​អ៊ុយ​ក្រែ​ន​ គាំទ្រ​ដោយ​រុ​ស្ស៊ី​ ៕​

 

Filed in: Feature, អន្តរជាតិ

Recent Posts

Bookmark and Promote!

  • © ២០១៣ រក្សាសិទ្ធិដោយ​សារព័ត៌មាន​ដើមត្នោត.Tel ៖ 011 728 471 / 015 868 753.E-mail ៖ deumtnotnews@gmail.com
    ដើមត្នោត​​ ចាត់ទុក​ជា​រុក្ខជាតិ​និមិត្តរូបជាតិ​នៃ​ព្រះរាជាណាចក្រ​កម្ពុជា ដោយ​ព្រះរាជក្រឹត្យ​លេខ នស/រកត/០៣០៥/១៤៩ ចុះថ្ងៃទី២១​ ខែមីនា ឆ្នាំ២០០៥
    ចូលរួម​ការពារ​ និង​ លើក​តម្លៃ​ដើមត្នោត​ ដើម្បី​រក្សា​នូវ​កេរ​ដំណែល​នៃ​មរតក​ធម្មជាតិ​ជានិមិត្តរូប​ជាតិ និង​ ដើម្បី​ការអភិវឌ្ឍសេដ្ឋកិច្ច​ជាតិ
    Proudly designed by Theme Junkie.